Sociedá

El númberu 2 de la revista Faceira yá ta disponible na páxina web de Frumientu, asociación zamorana que trabaya pola recuperación de la nuesa llingua. La revista ta empuntiada a la investigación y divulgación del patrimoniu cultural del Reinu de Llión y la creación lliteraria n’asturlleonés.

Nesta edición faise un repás a la Llingua y lliteratura en Llión, por Nicolás Bartolomé Pérez, Tiégui Manuel Pires Albes robla’l reportaxe “Un rincón stur-lliones an Pertual”, mientres que Fernando Álvarez-Balbuena García fala de “Les relaciones ente los movimientos de reivindicación llingüística d’Asturies y Llión”.

Na parta lliteraria, Miguel Ángel del Cueto presenta un rellatu na variedá senabresa, tituláu “L’unicorniu ñegru”, mientres qu’apaecen otres obres d’Ana Ferrero, José Alfredo Hernández y Miguel Ángel González.

Descarga la revista de baldre

El sábadu que vien, 31 de marzu, de magar les siete la tarde, l’Auditoriu Municipal As Quintas (A Caridá) va acoyer la presentación del númberu últimu de la revista “Asturies, memoria encesa d’un país”, qu’inclúi un artículu n’eonaviegu: “Os corrales pra os llobos n’Allande”, de César Alonso.

Amás de les estayes habituales, como “L’Estoxu”, “Cartafueyos de Belenos” o “Memoria Gráfica d’Asturies”, nesta ocasión dedicada al conceyu d’El Franco, la espublización recueye trabayaos dedicaos a una escultura magdaleniense inédita procedente del aviru La Viña, otru sobre’l fueu y agua nel orixe de los santuarios castreños y otru tiuláu “Una posible tésera d’hospitalidá afayada n’Asturies. Les rellaciones d’hospitalidá ente los astures y otros pueblos céltitos”.

Amás, Fernando Inclán firma’l trabayu “Cordoveiru, una aldea celta con historia”, Alberto Álvarez Peña “Osos, llobos y santos proteutores” y Xe M. Sánchez “Quemes rituales de monigotes: la quema’l xigante y la quema la xana”. Daniel Cueli estudia n’otru artículu los llavaderos de la Comarca de la Sidra, Piloña y Siero”.

La polémica cola toponimia de Carreño sigue en marcha. La Xunta de Toponimia va revisar los topónimos Quimarán y El Pieloro, que dalgunos vecinos piden que torne a la forma non tradicional “Guimarán” y “Piedeloro”. El director xeneral de Política Llingüística comprometióse estos díes a que se revisen enantes de la formación d’un gobiernu nuevu.

Los topónimos de Carreño aprobólos el plenu del conceyu en 2005. Énte la campaña entamada en dellos medios de comunicación contra estos topónimos, asoleyóse un vídeu nel que s’amuesa como los vecinos de la parroquia nomen a estos llugares pol so nome tradicional.

El Seminariu de Filoloxía Asturiana celebra güei, vienres 23, la xornada cabera del Simposiu Internacional sobre Variación Sintáctica Dialectal.

Na xornada de güei cuntaráse cola presencia de Ane Odria & Ane Berro (EHU/UPV), que darán llectura a la comunicación «Intransitivization of reflexive and reciprocal predicates in basque. The case of bivalent ditransitive predicates», pa falar darréu Beatriz Fernández (EHU/UPV) y Milan Rezac, de la Universidá de París, que tratarán el «Marcado diferencial de objeto en las variedades del euskera». Pieslla’l congresu Ricardo Etxepare, (iKer umr 5478-cnrS Baiona), con «Partículas evidenciales en vasco: de la variación a la teoría».

El simposiu, dirixíu pol profesor Viejo, tien a Ramón d’Andrés Díaz, Taresa Fernández Lorences, María Cueto Fernández y Roberto Hinojal Díaz como miembros del comité organizador.

El Seminariu de Filoloxía Asturiana organiza güei xueves y mañana vienres, nel Salón de Graos del Departamentu de Filoloxía Española, el Simposiu Internacional sobre Variación Sintáctica Dialectal. Esti alcuentru científicu fai parte de la serie de xornaes añales que vien entamando la SFA dende 2006, cola particularidá de coincidir nesti casu col conceyu, tamién añal, de la rede d’investigación Wedisyn. Nel alcuentru van participar filólogos asturianos como Ramón d’Andrés o María Cueto, xunto a otros dedicaos al estudiu d’otres llingües.

El programa del Simposiu

Güei, xueves 22, los actos van entamar a les diez de la mañana con Xulio Sousa, de la Universidade de Santiago de Compostela, que va falar d’«estrategias evidenciales en las variedadesdel gallego: los marcadores gramaticalizados». Más tarde Ernestina Carrilho, de la Universidá de Lisboa daré llectura al trabayu «Expletivos em línguas de sujeito nulo ibéricas: entre contextos matriz e contextos subordinados».

Víctor Lara, de la Universidá Autónoma de Madrid, presentará la comunicación «Concordancias de un cambio lingüístico: el acusativo versus el dativo en el uso de vocês como único alocutivo de plural en el portugués europeo». A la una Ramón d’Andrés, de la Universidá d’Uviéu falará de la «Variación sintáctica y transición lingüística entre asturiano y gallego».

Yá de tarde, Francisco Fernández Rubiera, de la Universitat d’Alacant, tendrá tiempu pa falar de «La conexión germánico-románica: los fenómenos matriz en contextos subordinados». A les 16:45, María Cueto, de la Universidá d’Uviéu ocuparáse del «Leísmu, laísmu y loísmu nel nororiente de Llión», siguiéndola Xulio Viejo Fernández, con «Determinación, especificidad e indefinitud en los determinativos asturianos».

Yá mañana, vienres 23, cuntaráse cola presencia de Ane Odria & Ane Berro (EHU/UPV), que darán llectura a la comunicación «Intransitivization of reflexive and reciprocal predicates in basque. The case of bivalent ditransitive predicates», pa falar darréu Beatriz Fernández (EHU/UPV) y Milan Rezac, de la Universidá de París, que tratarán el «Marcado diferencial de objeto en las variedades del euskera». Pieslla’l congresu Ricardo Etxepare, (iKer umr 5478-cnrS Baiona), con «Partículas evidenciales en vasco: de la variación a la teoría».

El simposiu, dirixíu pol profesor Viejo, tien a Ramón d’Andrés Díaz, Taresa Fernández Lorences, María Cueto Fernández y Roberto Hinojal Díaz como miembros del comité organizador.

Esti xueves 22 de marzu va celebrase na Facultá de Filosofía y Lletres la II Xornada d’Empléu y Entamadores. Un día dedicáu a la orientación llaboral y conocencia de la realidá empresarial como estratexes pa encarar la busca de trabayu, en rematando los estudios.

Anque la finalidá de la Universidá seya la de crear y tresmitir conocencia, la institución tamién quier ameyorar les perspectives d’empléu de los sos titulaos. La percepción xeneral ye que les titulaciones de Filosofía, Filoloxía, Xeografía, Hestoria, Hestoria del Arte y Hestoria y Ciencies de la Música tienen un difícil inxertamientu llaboral. Una imaxe contra la que se propón la formación nes mañes y habilidaes valoraes pol mercáu llaboral.

Na edición d’anguaño y sol títulu “Innovación y Creatividá pal Empléu y Emprendimiento dende les Humanidaes desenvolveránse una conferencia del espertu en emprendimiento, José Mauel Pérez Díaz “Pericles”; una mesa redonda posterior con especialistes y entamadores de diversos ámbitos profesionales; y el taller denomináu “Anovar pa crear empreses nel campu de les Humanidaes”.

Programa completu d’actividaes

La Diputación Provincial de Zamora acaba espublizar una reedición de la obra de Fritz Krüger dedicada a la variedá del asturianu de Senabria. El llibru asoléyase en collaboración col Institutu d’Estudios Zamoranos Florián de Ocampo y Caxa Dueru y Caxa España, recuperando asina un trabayu, asoleyáu nos años venti n’alemán y pol que se dan a conocer munches de les característiques de les fales de la zona a principios de sieglu venti, cuando l’asturianu tovía yera una realidá muncho más viva qu’anguaño na zona.

La obra recueye material inédito de los trabayos de campu fechos nel periodu d’enteguerres por Krüger, que se tresllada ente payares 1921 y febreru 1922 a Senabria pa estudiar la llingua y cultura material del llugar. Tres años dempués publica La cultura popular en Senabria, na so versión orixinal, n’alemán. Amás, tamién fizo dellos estudios llingüísticos nel suroccidente asturianu.

L’investigador alemán percorrió 70 pueblos anque nel estudiu tán identificaes 9 llocalidaes y otres 10 estraxéronse oldeando con material d’otres obres. L’estudiu tuvo una notable repercusión y enfocó los sos siguientes trabayos escontra estudios asemeyaos n’otres rexones de la Romania.

Dempués de la Segunda Guerra Mundial, Krüger foi procesáu por pertenecer al partíu nazi y tien d’esiliase a L’Arxentina. En 1960 el Gobiernu alemán rehabilita’l so nome, retomando los sos estudios llingüísticos.

El Conseyu d’Estudiantes de la Universidá d’Uviéu celebra esta selmana la I Selmana d’Activismu Cultural “Mocedá con futuru” nel Salón d’Actos de la Facultá de Filosofía y Lletres d’Uviéu. Ente los temes tratos, la ecoloxía de la mano de Mario Quevedo de Anta y Greenpeace Uviéu.

Esti miércoles les xornaes rematen con una güeyada a les “Contribuciones de las mujeres del mundo al desarrollo sostenible” por Teresa Nuño Angos, de magar les diez de la mañana. A les 11, Pablo Vidal Vanaclocha, de la Universidá del Pais Vascu, falará de “La mujer europea en el discurso publicitario: Prototipos y extereotipos sexitas en la publicidad actual”, cuntando pal pieslle de les xornaes con Rosario Hernández Catalán, Queli Fueyo, y l’Asociación Juvenil Llanera Joven, amás de les Asamblees d’Estudiantes de la Universidá d’Uviéu.

L’1 de marzu pasáu morrió Enriqueta Robles Sánchez, la fía escritor xixonés Pachín de Melás, a los 101 años. La so familia quixo despidila en priváu pero agora celebra un funeral. Sedrá’l xueves a les cinco y media la tarde na Ilesia San Xosé de Xixón.

Pachín de Melás, escritor, periodista y entamador de les primeres esperiencies editoriales de la lliteratura n’asturianu, amás de ser ún de los primeros autores del teatru costumista asturianu.

La iniciativa “Vitaminas para o Galego” acaba aportar a les 25 cabeceres asociaes y prepara un festival de música y poesía pal 27 de abril, que va celebrase na Gentalha do Pichel, en Santiago de Compostela (cola presencia confirmada de Terbutalina), así como varios eventos pal 17 de mayu.

La iniciativa, impulsada dende un aniciu por Galicia Confidencial, Tempos Novos, Radiofusión, Praza Pública, Novas da Galiza, Val Miñor.info e Quepasanacosta, cunta con 25 medios asociaos, al xunise darréu Certo xornal dixital de Barbanza e Noia, Osil.info de Valdeorras, Crónica3 da Mariña Lucense, Radio Nordés (Cadena Ser Costa da Morte), Terra Chá.Xa, Crónicas da Comarca (Arzúa – Melide), a revista de surf SurfGZ, Cadernos de Comunicación e Análise; O periódico de Lalín e Comarca; Hermes e Atenea, xornal en galego de deporte e cultura; Disquecool, el mediu de tendencies made in Galicia; o xornal De Luns a Venres; Cabozo, la rede social galega; la rede de blogues Vencello; Cartafol, la revista multimedia para Ipad; A Nova Peneira, el programa radiofónicu Plástico Elástico y los mensuales Gaceta de Fene e Cerne, xornal da terra de Melide.

Web de la Campaña