Sociedá

Iniciativa pol Asturianu anunció que se punxo en contactu cola dirección de la La Vuelta a Asturies 2012 “pa reclama-yos qu’usen la toponimia oficial nos materiales, páxina web, etc.” de la hestórica prueba ciclista asturiana. Dende Iniciativa pol Asturianu dicen nun poder tar tan contentos “del usu que se ta faciendo na vuelta de la cuestión llingüística”. La organización reivindicativa púnxose tamién en contactu cola Dirección Xeneral de Política Llingüístca del Gobiernu d’Asturies, patrocinador del eventu, “pa que faiga cumplir la normativa no que cinca al usu toponímicu”, según esplicaron.

Iniciativa pol Asturianu nun ye a entender “cómo La Vuelta a Asturies fai un usu incorrectu de la toponimia nos llugares pelos que pasa (Gijón/Xixón, La Pola Siero, Piedrasblancas, Llastres, El Fitu, Llugones, Mucó, etc.), cuando son les úniques formes oficiales”, y recuerden “amás, cuando La Vuelta a España, organizada dende fuera d’Asturies, yá anunció, diba usar de forma normal la toponimia”.

Amás, pa Iniciativa pol Asturianu, La Vuelta a Asturies, “como eventu organizáu n’Asturies habría usar tamién l’asturianu na so cartelería, publicidá, etc.”, lo que camienten”sedría un xestu mui bien recibíu polos asturianos qu’ayudaría a promocionar l’usu del asturianu nel ámbitu deportivu, nun campu, como’l ciclista onde l’asturianu siempres tuvo mui presente”.

Por ello Iniciativa pol Asturianu solicitó a la organización de La Vuelta Asturies “que proceda a facer los cambios pa respetar la toponimia oficial asturiana pelos llugares pelos que pasa y entame a usar l’asturianu nos sos materiales, web, etc. dende esta mesma edición, incluyendo’l nome del propiu eventu”. Dende Iniciativa pol Asturianu recuerden como otros eventos de calter internacional celebraos n’Asturies, como’l Mundial de Duatlón celebráu en Xixón, “yá usaron l’asturianu con total normalidá nel pasáu”.

Dende Iniciativa pol Asturianu ufrieron asina mesmo la so collaboración “pa poner en marcha estes midíes, y quedamos a la disposición de la organización pa ello”.

Tolos miércoles a les 18:00 hores, el centru social La Madreña, d’Uviéu, organiza un cursu d’introducción al asturianu por cuenta de Sandra Fernández Gavela, profesora de llingua asturiana. L’idea ye “ufrir una primera toma de contautu a aquellos interesaos n’averase un pocu mas a la llingua delos nuesos güelos tan cau pero al mesmu tiempu tan atapecía pa munchos debío al ostracismu al que la conderguen los que gobiernen les nueses istituciones”, espliquen. El cursín ye de baldre.

El Conceyu de L.lena presenta la campaña “Los nomes de l.lugar nun tienen preciu, garra’l tuyu” que consiste na edición de chapes y pegatines cola toponimia tradicional y oficial del conceyu. La campaña tien como oxetivu fomentar l’usu de los nomes oficiales de L.lena. Pa ello, editáronse 2.000 chapes con topónimos que se van repartir en fiestes de pueblos, y nos distintos servicios del Conceyu y 300 pegatines de cristal col topónimu L.lena.

La idea ye ponese en contactu coles comisiones de fiestes y ofrece-yos esti material como promoción tamién de los llugares. De mano, editáronse chapes de: Payares, Carabanzo, Campumanes, Casorvía, La Vega’l Ciigu, Tuíza, Xomezana, amás de chapes de L.lena. Dende’l Serviciu de Normalización Llingüística preténdese que les fiestes más importantes del conceyu tengan como regalu pa les vecines y vecinos esti material.

D’otra banda, col oxetivu de reforzar y fomentar el nome del conceyu, esto ye L.lena van repartise ente los comercios y chigres del conciyu la pegatina. La idea ye visualizar los nomes tradicionales que yá son oficiales dende l’añu 2005 cola aprobación del Decretu d’oficialización de la toponimia del conceyu L.lena pol Gobiernu del Principáu d’Asturies.

Hai una segunda fase de la campaña que va consistir na grabación d’un videu con xente relevante de cada conceyu, apoyando la toponimia tradicional y qu’espera poder emitise nos cines y nos centros escolares.

La campaña que se financió con una sovención de la Conseyería de Cultura y Deporte, fízose en collaboración cola rede de Normalización Llingüística nos Conceyos, concretamente participaron na campaña los conceyos de Llaviana, Mieres, Samartín del Rei Aurelio, Siero y Mancomunidá de la Sidra.

La Seición Sindical de la Corriente Sindical d’Izquierda (CSI) en Tenneco vien d’algamar que la empresa multinacional “Tenneco Automotiv” (anantes “Monroe”) se viere obligada a espublizar el Conveniu Colleutivu de la empresa n’asturianu. Según espliquen dende la Corriente, “en 2011, por entamu de la Seición Sindical de CSI, los y les trabayadores de Tenneco llevaron alantre delles xornaes de fuelga demientres la negociación del Conveniu Colectivu la empresa . El resultáu d’esta movilización apareyó, anantes de nada, una riestra meyores nes condiciones llaborales de la plantía, que, inclusu, garantizaben un xorrecimientu de la contratación indefinida”.

Por too ello, “ente eses reivindicaciones, la Seición Sindical de CSI-Tenneco algamó incluyir, nel Conveniu Coleutivu, una cláusula de “Fomentu del Asturianu”, que, lliteralmente, obligaba a la empresa al “Conveniu impresu en billingüe: español y asturianu”.

Según treslladen dende dende’l sindicatu de clas asturianu, “Magar ello, la empresa Tenneco, obrando de mala fé, espublizó’l Conveniu esclusivamente n’español. La rempuesta de la Seición Sindical de CSI nun se fizo esperar y una denuncia delantre la Inspeición de Trabayu, con resultáu favoratible, fizo que la multinacional nun tuviera otra qu’espublizar el Conveniu n’asturianu”.

Pa la CSI, fechos comu esti, “asoleyen, bien a les clares, que los avances de la clas obrera son compatibles dafechu colos avances na cultura y na identidá asturianes”.

L’asociación N’ast felicitó a la CSI por esti pasu dau.

Dende l’Asociación Cultural N’Ast manifiesten la so oposición a la realización de la Feria d’Abril en Xixón yá qu’esti eventu enmárcase pa esta organización “nuna estratexa d’aculturación empobinada a l’anulación del calter específicu del Pueblu Asturianu, amosando amás la faceta más rancia y etnocéntrica del nacionalismu españolista: el flamenquismu”.

Critiquen “la promoción de la Feria d’Abril con tou tipu de sofitos y publicidá nuna coxuntura crítica pa la cultura propia del País, que s’atopa nuna situación de precariedá social y descomposición folclorica, a efeutos práuticos implica la sustitución d’unes pautes culturales y d’unes referencies identitarias como comunidá nacional por otres que fomenten l’alienación de la población en rellación al propiu territoriu lexitimando socialmente’l marcu de subordinación política y dependencia estructural d’Asturies respectu al Estáu español”.

El miércoles 11 d’abril a les 20:00 nel Club Prensa Asturiana de La Nueva España va facese la presentación del llibru “Documentos Orixinales de los Sieglos IX-X de los Archivos del Monesteriu de San Pelayo y de la Catedral d’Uviéu” coedición de l’Academia de la Llingua Asturiana y la Universidá d’Uviéu. Nel actu participarán los autores del trabayu, esplicando’l llabor de rescatar testos medievales como esti, onde apaecen les primeres fases de la llingua asturiana.

Na presentación intervendrán Isabel Torrente Fernández (direutora de la coleición Fontes de la Llingua Asturiana), Andrea Miranda Duque (llectora y autora de los índices), Xosé Lluis García Arias (autor del estudiu llingüísticu) y Ana María Cano González (presidenta de l’Academia de la Llingua Asturiana), cola moderación del so direutor Javier Rodríguez Muñoz.

El Club de Prensa Asturiana de La Nueva España ta asitiáu na cai Calvo Sotelo 7, d’Uviéu.

Yá ta disponible la versión dixital del númberu 106 de Lletres Asturianes, el boletín de l’Academia de la Llingua Asturiana. L’ALLA espubliza una versión dixital dende va dellos númberos y la institución tien como oxetivu xubir tolos númberos a la rede. Pel momentu yá pueden consultase tolos asoleyaos dende l’añu 2000. Nesti númberu, como vien siendo vezu, hai espaciu p’artículos venceyaos a la filoloxía asturiana, recoyendo dalgunes de les comunicaciones presentaes nes pasaes Xornaes Internacionales d’Estudiu, celebraes n’Uviéu a finales de 2011.

Fernando Sánchez Miret abre’l númberu col artículu “Los problemas de la diptongación del asturleonés a la luz de la Romanística”, la presidenta de l’Academia, Ana María Cano González Fala de “L’antroponimia asturiana y el procesu de castellanización documental”, mientres que’l caderalgu Xosé Lluis García Arias revisa “La toponimia de Cantabria vista dende l’asturiana”, y Martín Sevilla Rodríguez comenta delles cuestiones sobre “Los topónimos asturianos Tamoca/Caloca”.

La profesora Clara Elena Prieto Entrialgo fala de los nomes comerciales de sidra y vinu en “Onimia empresarial asturiana: el sector del vinu y de la sidra”, Fernando Bello Garnelo céntrase na “Toponimia y antroponimia en la zona de Las Médulas (León)”, mientres que Xabiel Fernández García da un repás a “Los llugares de pasu. Una aproximación antrópica cola toponimia”.

José Luis González Escribano adiéntrase nel campu de “La estructura de la ‘frase nominal’ en asturiano”, mientres Cristina García-Sampedro Clérigo fai un “Estudio codicológico sobre el Libro del Prior”. Nel campu de la lliteratura encuádrase l’aportación de Xuan Santori Vázquez-Azpiri, col artículu “La lliteratura de les escritores asturianes. Perspectives d’un trabayu d’investigación sociollingüística”, basáu en parte del trabayu de la so tesis, presentada apocayá.

El lleonés y académicu Nicolás Bartolomé Pérez fala de la llexislación de la comunidá vecina con “L’artículu 5.2. del Estatutu d’Autonomía de Castiella y Lleón” y el periodista Cristobal Ruitiña repasa “La llingua asturiana na televisión autonómica. Presencia, audiencia y estándar”, pesllando’l númberu un espaciu pa noticies y novedaes bibliográfiques n’asturianu o n’otres llingües, siempres que cinquen al estudiu del idioma d’Asturies.

Accesu al númberu 106 de Lletres Asturianes

El Muséu del Pueblu d’Asturies, en Xixón, acoyerá del 5 al 8 d’abril l’eventu “III Primer Sidre l’Añu” col que los organizadores quieren “recuperar y dar puxu a la tradición de les espiches de Selmana Santa”. Nesta tercer edición va ufrise, n’esclusiva, la oportunidá de prebar la primer sidre de la collecha 2012 proviniente de los toneles de los más de los llagares asturianos “industriales” n’activu.

Dende la organización nun creen que “seya posible ufrir munchos más llagares asturianos que l’añu pasáu”, porque, espliquen, “na Primer Sidre l’Añu de la edición 2011 namás hebo un llagar que, teniendo produición nesi intre, nun quinxere participar nel certame”. Esti fechu, afirmen los organizadores “consolidónos como’l Certame Sidreru con mayor participación de llagares, con mucha diferencia”.

La revista La Sidra y la Fundación Asturies XXI entamen la Primer Sidre l’Añu nel que la cultura de la sidra ye protagonista.

Más información sobre l’eventu

Representantes d’Iniciativa pol Asturianu viaxaron a territoriu lleonés y tuvieron un primer contautu coles organizaciones qu’integren el movimientu de reivindicación llingüística lleónés el sábadu pasáu, 31 de marzu, na sede de La Caleya, n’Estorga (Lleón). Esta xunta, “encuádrase dientro de la rolda d’alcuentros colos coleutivos en defensa del idioma”, espliquen dende la organización. Nesta ocasión Iniciativa pol Asturianu quixo conocer de primera mano’l llabor y l’actividá qu’éstos vienen desendolcando en Lleón y Zamora, asina como abrir canales de comunicación y cooperación futures.

Delegaos de les asociaciones Furmientu, Faceira y La Caleya intercambiaron impresiones y propuestes cola organización a lo llargo d’un conceyu de cerca de trés hores nel que se faló de “facer una defensa unánime de la llingua qu’une a bona parte de Zamora y Lleón con Asturies”.

“El nuesu oxetivu ye plantegar aquellos proyeutos que seyan d’interés pal idioma en dambos territorios y llevar alantre aquellos que puedan ser válidos a tol dominiu llingüísticu de manera conxunta”, espliquen dende la vocalía de Dominiu Llingüísticu d’Iniciativa pol Asturianu. Cola creación d’esta estaya Iniciativa pol Asturianu quier treslladar “la voluntá firme de la organización por afitar una conexón sólida con tolos territorios onde l’asturianu ye llingua propia”.

D’otra miente, nel conceyu, púnxose atención ente otres cuestiones na situación esmolecedora que vive l’idioma al sur del cordal; na perda progresiva de falantes, na ausencia total de lleis que garanticen los sos drechos, na falta de prestixu social y na falta d’actuaciones de puesta en valir del patrimoniu llingüísticu y inmaterial como recursu que ye y como fonte de desenrollu social y económicu.

Esti xueves 29 de marzu sedrá recordáu por ser la primer fuelga xeneral a la que s’enfrenta’l gobiernu de Mariano Rajoy dende la so victoria a finales de 2011. Los principales sindicatos asturianos faen un llamáu a los trabayadores pa nun acudir a los sos puestos de trabayu pa tratar de valtar la reforma llaboral aprobada pol nuevu executivu. Dos manifestaciones van percorrer les cais asturianes, una convocada por Comisiones Obreres, SOMA-FIA-UXT y USO d’Asturies, n’Uviéu, saliendo de la Plaza d’América a les seis y media la tarde, y otra en Xixón, convocada polos sindicatos CSI, CXT y SUATEA, con salida a les doce la mañana na Plaza L’Humedal de Xixón.

La convocatoria de los sindicatos mayoritarios discurrirá baxo’l lema “Quieren acabar con too”, mientres que los sindicatos convocantes de la manifestación de Xixón van facelo col lema “Contra la reforma llaboral, los recortes sociales y los ataques del capital”.

La cabera fuelga xeneral celebrada n’Asturies tuvo llugar el pasáu 29 de setiembre de 2011.