Sociedá

La organización Iniciativa pol Asturianu emitía estos díes una nota de prensa na que recuerden que “l’asturianu ye una ventaya a la hora d’anunciase”. Como exemplos ponen les campañes «Aforra les perres pa les vacaciones, la cesta la compra regálatela Caudalia» o «Teas onde teas siempres ye bon momentu pa tornar a casa», que califiquen como “namás dos exemplos de grandes empreses que se sumen a les permunches iniciatives d’otros negocios asturianos”, en referencia a los restoranes Tierra Astur, qu’entamó una campaña billingüe xugando cola cercanía del idioma a la hora d’afalagar el calter familiar de los sos llocales y los sos clientes y Caudalia, un centru comercial allugáu en Santuyano (Mieres), que fai usu de la llingua d’Asturies pa una campaña de promoción.

Dende esta asociación en defensa del idioma destaquen “la importancia de que n’Asturies el so comerciu emplegue l’asturianu con naturalidá, dalgo que per otra parte tendría que ser habitual como asocede n’otres comunidaes españoles, ya que’l papel de la normalización ye una responsabilidá individual y coleutiva, tanto de les entidaes públiques y privaes”.

Iniciativa pol Asturianu anunció amás que vien “contautando y roblando convenios con delles empreses pa la inclusión del idioma n’ámbitos como la toponimia, la páxina web o l’etiquetaxe”. Ello ye que la organización quier afalar a les empreses a apostar pola llingua en tolos casos, entendiendo con estos exemplos que “l’asturianu nunca nun ye un pilancu o un impedimentu sinón una fonte de riqueza, un incentivu económicu y una ventaya qu’ofrez cercanía y familiaridá”.

El periodista Xurde Morán, conocíu polos sos programes en radio y televisión, presenta la reedición del so llibru dedicáu al Camín de Xixón a Cuadonga, qu’asoleyare va doce años Alborá Llibros y que taba cuantayá escosáu. La obra sal a les llibreríes en castellán y baxo’l sellu de la Editorial Gran Enciclopedia Asturiana.

La presentación va tener llugar na Biblioteca Pública Xovellanos de Xixón, esti xueves 5 de xunetu y de magar les siete la tarde.

Nel añu 2011, la Plataforma d’Asociaciones en Defensa del Llionés y el Gallegu organizó n’Estorga les primeres Xornaes de patrimoniu llingüísticu. Nesti añu 2012, l’asociación El Teixu. Rede pal Estudiu y Defensa de la Llingua Asturllionesa, integrante d’esa plataforma, quier dar continuidá a aquella primer xornada organizando na ciudá de Lleón una nueva edición, centrada na llingua asturlleonesa y na so producción lliteraria hestórica y actual. El vienres 6 na sede del Institutu Lleonés de Cultura, na cai Santa Nonia de Lleón, van entamar les xornaes cola presentación de les mesmes a les 18:45. Darréu va presentase’l llibru “Llogas Carbayesas”, cola presencia del autor Juan Andrés Oria de Rueda Salgueiro y de José Alfredo Hernández Rodríguez.

A les ocho va presentase’l manual “Xurdir. Guía gramatical de leonés”, cola participación de Nicolás Bartolomé Pérez y Teresa García Montes, miembros de l’Asociación Cultural Faceira, del profesor Fernando Álvarez-Balbuena García.

EL sábadu siguen los actos, nesta ocasión nel Salón d’Actos de la Biblioteca Pública Provincial de Lleón, tamién na cai Santa Nonia. A les once y media va presentase l’antoloxía “Onde la palabra pousa. D’Asturias a Miranda: crestomatía del asturl.lionés occidental”. Nel actu van participar Xulio Viejo Fernández y María Cueto Fernández, editores de la obra, presentándolos Andrés Menéndez Blanco, d’El Teixu.

A les 12.30 va poder sentise la conferencia «Asturllionés na Edá Media: llingua y actividá lliteraria» de Xulio Viejo Fernández, profesor titular del Departamentu de Filoloxía Española de la Universidá d’Uviéu, al que lu va presentar Ricardo Chao Prieto, de Faceira.

A les 13:15 van pesllase les xornaes con música de Fran Allegre, qu’apocayá grabó un discu con cantares lleoneses.

L’Academia de la Llingua Asturiana lleva tiempu dixitalizando dalgunes de les sos publicaciones. El so boletín Lletres Asturianes sal dende va unos años y al empar, en versión en papel y dixital; la revista Ciencies sácase namás en versión dixital, y otros conteníos yá escosaos en papel fueron xubiéndose a la so web pasu ente pasu. Agora axunten estos nuna estaya de la so web y xunto a dellos nuevos, como dalgunos númberos de la revista Cultures o de la colección Collecha Asoleyada, xunto a la so páxina de terminoloxíes técniques “Termast”.

Ente los exemplartes disponibles la edición de La Fonte del Cai, de Pin de Pría, asoleyada por Miguel Ramos Corrada en 1984, Notas de Folklor Somedán, d’Ana Cano o’l Vocabulariu de Mántaras (Tapia), de Xosé Miguel Suárez.

Páxina de llibros en rede de l’ALLA

El periodista Xurde Morán, conocíu polos sos programes en radio y televisión, presenta la reedición del so llibru dedicáu al Camín de Xixón a Cuadonga, qu’asoleyare va doce años Alborá Llibros y que taba cuantayá escosáu. La obra sal a les llibreríes en castellán y baxo’l sellu de la Editorial Gran Enciclopedia Asturiana.

La presentación va tener llugar na Biblioteca Pública Xovellanos de Xixón, el xueves 5 de xunetu y de magar les siete la tarde.

Amelia González, médica, intervendrá el martes tres de xunetu de 2012 a les 20:00 hores na charra-coloquiu que baxo’l títulu «Adiós al sistema de salú» va tener llugar nel Conceyu Abiertu d’Uviéu, asitiáu na Cai La Gascona 12.

Del 15 de xunu al 30 de setiembre de 2012, la Casa los Valdés, asitiada nes instalaciones del Muséu del Pueblu d’Asturies, en Xixón, acueye la esposición Máscara ibérica, entamada por Progestur, asociación fundada en 2003 pa la promoción y espardimientu del patrimoniu cultural portugués, la promoción de les artes populares y la dinamización del turismu cultural tantu en territorioportugués como foranu. Na organización d’esta esposición collabora la Rede Ibérica de la Mázcara, dedicada al estudiu y espardimientu de les fiestes tradicionales de la península qu’inclúin rituales nos que participen mazcaraos.

La esposición Mázcara ibérica consiste nuna selección fotográfica que presenta una amuesa de diverses fiestes de tola península nes que participen mazcaraos. Estes fiestes reciben nomes variopintos: A bugiada (Valongo, Portugal); Vos caretos da Lagoa (Mira, Portugal); antroxu, zamarrones, guirrios, sidros y guilandeiros (Asturies); jarramplas (Cáceres)… Estes fiestes caltienen vives nes rexones portugueses de Lazarim, Vinhais, Sobráu y Mogadouro. Amás, son especialmente significatives n’Ourense, Zamora, Cáceres y Asturies, anque les mazcaraes d’iviernu conocíes como Antroxos tán esperimentando una gran puxanza en tolos territorios.

Les fotografíes qu’integren la esposición Mázcara ibérica tomáronse en directu, mientres la celebración d’estes fiestes, lo que confier a la esposición frescura y dinamismu, dexando al visitante ser testigu de la vitalidá del fenómenu de la mázcara nuna sociedá urbana na que tovía perviven los elementos culturales más enraigonaos de la sociedá tradicional. La esposición compleméntase con una proyección en vídeu y con delles vitrines nes que s’amuesen los exemplares de mázcares más significativos.

Esta esposición complementaráse con un desfile de mázcares ibériques dende Begoña hasta L’Atalaya y una animación de cai nel paséu de Begoña.

L’asociación zamorana Furmientu acaba d’asoleyar una edición más del so boletín, “El Llumbreiru”. Na sección de lliteratura d’esti númberu apaecen La fuente de la Fermosina, primera parte del rellatu de Miguel Ángel del Cueto, y Vendrá a muerte y tendrá os tous uellos, traducción a la variedá senabresa d’un poema de Cesare Pavese, por Ana Ferrero.

Amás na estaya d’actualidá cultural fálase de la salida del númberu dos de la revista Faceira, de les xornaes de cultura tradicional de Zamora y anúnciase la resolución del Concursu de vocabularios tradicionales d’esta organización.

Descarga’l boletín de baldre

Les sidrografíes de Xurde Margaride y un especial sobre la sidra en Madrid protagonicen la portada del númberu 102 de la revista La Sidra, qu’asoleya l’Ensame Sidreru cada mes. La revista puede atopase en chigres, quioscos, y na so versión dixital, de baldre, na rede.

Descarga la revista de baldre

Dende l’asociación N’Ast anuncien que van sacar a la lluz el conflictu llingüísticu “xeneráu pola represión de la llingua asturiana exercida pol Estáu español y la so sucursal del “Principado””. Pa N’ast “La represión llingüística tien una rempuesta bien nidia por un Pueblu Asturianu que nun se rinde énte’l colonialismu español, y de magar agora N’Ast fadrá un esfuerciu por espeyar una rialidá tapecía poles istituciones implicaes y los medios de comunicación”. Asina, na so canal en Facebook tán asoleyando semeyes de pintaes feches p’asturianizar cartelos puestos namás en castellán.

Dende la organización agradecen enforma toles collaboracions que se-yos puedan aportar a nast.oficialida@gmail.com

Páxina de N’ast en Facebook