Política

El diputáu del Bloque por Asturies y Portavoz del Grupu Parllamentariu Mestu, Roberto Colunga Fernández, presentó nel día de güei deles siguientes preguntes a la Conseyera de Cultura y Turismu, Mercedes Álvarez, na que pon el déu na mancadura que vien amuesando’l Gobiernu asturianu con un discursu favoratible al cumplimientu de la llei d’usu, pero dafechamente separtáu d’ella na realidá.

Les entrugues que tiene de contestar per escritu la Conseyera de Cultura en relación a la llingua asturiana son les que vienen darréu:

¿Por qué la Conseyería da la mesma subvención a Conceyos que tienen abiertu un Serviciu de Nornalización Llingüística (SNL) durante tol añu qu’a otros que lu piesllen tolos años, cuando un SNL necesita continuidá y, amás, en munchos casos coincide cola solicitú y xustificación de subvenciones?

¿Qué se fai pa evitar l’agraviu comparativu d’un Conceyu como Mieres que tolos años pieslla’l SNL durante meses?

¿Por qué se da una subvención nominativa pa funcionamientu de los SNL y non un conveniu ente’l Principáu y los Conceyos, figura que permitiría esixir el cumplimientu d’unos mínimos en cuantes a normalización llingüística?

¿Por qué s’aparó l’aprobación d’un modelu de conveniu ente’l Principáu y los Conceyos pa regular los SNL y que yá taba redactáu y a la espera de la so tramitación nel últimu Conseyu de Gobiernu nel 2007 y que diba ser una manera eficiente pa evitar que dellos SNL piesllen varios meses cada añu a la espera de que s’aprueben les subvenciones?

¿Cuántes reuniones de coordinación hebo nesta llexislatura ente los SNL de los Conceyos, la Dirección Xeneral de Política Llingüística o la Oficina de Política Llingüística, cola directora xeneral o cola xefa de la oficina?

¿Por qué la Rede de Normalización Llingüística nos Conceyos, creada pola Conseyería de Cultura nel 2004, nun tien entidá xurídica y namás esiste d’ella un logotipu? ¿Por qué nun s’usa esa ferramienta que diba afitar los SNL, dar más continuidá a la normalización, más puxu a les campañes, una imaxe común, más implicación de responsables políticos, etc.?

¿Por qué nun hai redactáu un Plan de Normalización Llingüística na presente llexislatura?

¿Por qué, nun siendo la de les rebaxes, nun se xeneralizaron a otros conceyos d’Asturies campañes desarrollaes con ésitu en conceyos con SNL y que se consideraron d’interés yá que la Conseyería les subvencionó?

¿Qué exemplos d’usu tresversal de la llingua asturiana nes distintes conseyeríes del Principáu pue poner nesta llexislatura? ¿Hai alcuerdos y compromisos firmaos qu’especifiquen qué usu se-y va dar al asturianu nes distintes conseyeríes?

¿Por qué la directora xeneral de Política Llingüística fala en castellán n’actos públicos n’Asturies ente público asturiano?

¿Por qué nun s’esixe compromisu con una verdadera normalización llingüística a los medios de comunicación que reciben pa ello subvenciones suculentes?

Dempués de dellos meses de continues duldes sobre la situación de Francisco Javier García Valledor, esta selmana anuncióse qu’abandonó definitivamente la so militancia n’Izquierda Xunida d’Asturies. Quien fuera conseyeru de Xusticia del gobiernu de coalición col PSOE, abandonare yá’l so acta de diputáu nel mes d’avientu de 2009 y dende entós munchos son los comentarios sobre’l so posible futuru políticu nuna cada vegada más probable coalición ente UNA y Bloque por Asturies.

Valledor tuvo nel Día d’Asturies celebráu por estes dos formaciones en Xixón, el pasáu 8 de setiembre y yá en mayu, la revista Atlántica XXII afirmaba nun artículu qu’Unidá Nacionalista Asturiana (UNA) diba llevar como cabeza de llista al ex Conseyeru. Una afirmación que ñegó a Asturnews nel so momentu Faustino Zapico, Voceru d’UNA, afirmando naquel momentu que nun yera posible y que yera “sorprendente cuanto menos, porque Valledor sigue siendo militante d’Izquierda Xunida”.

Col abandonu d’IX per parte de Valledor la situación cambia, anque entá nun se fizo pública la postura d’UNA y Bloque sobre’l papel que pue tener agora l’ex conseyeru nos pactos ente les fuercies nacionalistes d’izquierdes.

Valledor milita nel PCE dende 1976, siendo parllamentariu d’IX de 1995 a 2009, y ente 2003 y 2007, conseyeru de Xusticia.

La formación política asturiana xustifica la presentación d’esti recursu na Xunta Xeneral en qu’en «l’Asturies de güei nun tienen cabida los espectáculos taurinos polo que se fai necesaria’l cambéu de la Llei d’Espectáculos Públicos y Actividaes Recreatives p’acabar con ellos nel Principáu».

La propuesta recibió yá l’apoyu d’Unidá Nacionalista Asturiana al traviés de Tino Fernánde<, voceru de medioambiente d'UNA, que treslladó l’apoyu de la organización a la iniciativa del BA y recordó qu’UNA "lleva años trabayando pola abolición y si esta Llei sal alantre, consideraríemosla una victoria y un broche d’oru pa toos y toes los que lluchamos nesi sen. Una llucha na qu’UNA apurrió delles iniciatives que se desendolcaron nos últimos años, tanto a traviés de la presentación de mociones nos conceyos, como d’aiciones reivindicatives".

Propuesta presentada por BpA

UNA-Uviéu pide al Conceyu d’Uviéu qu’incluya’l tresporte públicu dientro del billete únicu como n’otres ciudaes facilitando l’usu del tresporte públicu y abaratando el costu a los usuarios.

UNA-Uviéu, denuncia, como yá fixo cola xuba del bonu bus va unos meses, la situación de los usuarios del tresporte públicu d’Uviéu que tienen que pagar el preciu mas caru d’España, según denuncia la Unión de Consumidores d’Asturies. Esta situación perxudica a tolos usuarios del tresporte públicu y sobre manera a los que queden escluyíos de los colectivos d’estudiantes, pensionistes o discapacitaos, ye dicir, cualquier persona qu’use’l tresporte públicu pa dir trabayar llega a pagar más del doble qu’en Xixón. Esto produzse en parte pola non esistencia del bonu mensual n’Uviéu que si esiste n’otres ciudaes, pero tamién inflúi la mala cobertoria na zona rural del tresporte públicu onde son abondo frecuentes los tresbordos pagando dos billetes.

Unidá Nacionalista Asturiana pide al Conceyu d’Uviéu qu’incluya cuanto antes a Uviéu dientro del billete únicu del Consorciu de Tresportes d’Asturies p’acabar cola situación que sufren los usuarios del tresporte públicu n’Uviéu y que se lleve a cabu una auditoría pública de les cuentes del tresporte públicu y en particular el destín de les subvenciones apurríes pol Conceyu.

El Grupu Socialista del Conceyu d’Uviéu solicitó esti día al equipu de Gobiernu del PP que conxele toles tases, impuestos y precios públicos pal exerciciu 2011, de forma que los sos valores nominales coincidan colos aplicaos esti 2010.

Los socialistes piden tamién nueves bonificaciones nos conceptos directamente rellacionaos con actuaciones de cálter social, como l’ayuda en casa, los comedores infantiles y les actividaes socioculturales.

El diputáu del Bloque por Asturies, Roberto Colunga, intervino per primer vegada nun Alderique sobr l’estáu d’Asturies, l’últimu del Gobiernu d’Areces, y refiérose nel so discursu a delles cuestiones alredor de la cultura y la llingua asturianes. Colunga recordó-y a Areces que nel so discursu caberu nun tuvo “Nin una sola pallabra pa la política llingüística”. Una actitú que nun sorprendió al diputáu nacionalista “yá lo esperábemos, el so sectarismu y despreciu a la llingua y la cultura d’Asturies nun ye nuevu. La fama ye verdá que lu precede”.

Colunga recordó-y la importancia de cuestiones como “la especialidá de llingua asturiana, de la llingua na RTPA, del apoyu a la Rede de Normalización Llingüística nos Conceyos y de la estabilidá de los sos trabayadores, del Plan de Renovación Progresiva de la Señalización vial, del Conveniu cola Alministración del Estáu pa l’adaptación de la señalización, del nuevu manual d’identidá gráfica colos logotipos billingües,…” y echó-y en cara la falta d’acción del Presidente nos doce años nel cargu.

Amás criticó la participación de la empresa de José Luis Moreno como programador en La Llaboral y dixo tar esperando a saber “cuánto nos costó la gala desastrosa que organizó pa la TPA por cuenta del ‘Día d’Asturias'”, amás de conocer “Cómo foi’l procesu de adxudicación y contratu”, pues, afirmó, siguen ensin sabese “qué contratos firmó’l Grupu de José Luis Moreno col Principáu d’Asturies o col Ente Públicu de Comunicación”.

Colunga faló tamién del refugu del Gobiernu d’Asturies a facer a Asturies protagonista del Festival de Lorient, “ponen en marcha “la autopista del mar” y nun son capaces d´aprovechala pa potenciar la imaxen d´Asturies nel mundu aceptando dedicar el Festival de Lorient a Asturies l´añu prósimu”. El diputáu del Bloque afirmó con ironía “Pero claro, ye meyor escuchar a la Pantoja na Llaboral, que potenciar la cultura y la música asturiana nel mundu. Lo suyo ye increíble”, remató.

Audiu de la intervención completa de Colunga

El hasta ayeri Conceyal de Cultura del Ayuntamientu d’Uviéu, José Suárez Arias-Cachero, desplicaba esti vienres na sala de prensa del ayuntamientu les razones verdaderes del so cese dafechu de toles funciones como Conceyal de Cultura decretáu pol Alcalde d’Uviéu, Gabino de Lorenzo y averábales nidiamente al so posicionamientu favoratible a la candidatura de Cascos a la presidencia del Principáu.

L’anuncia fízose ayeri nel mesmu día nel qu’Uviéu queda apeada como candidata a la Capitalidá Cultural Europea 2016, proyeutu del que foi apartáu José Suarez y que llideró Gabino de Lorenzo cola so xente de confianza.

La disculpa pa cesar al Conceyal ye una presunta irregularidá al nun abstenese na contratación d’una empresa mensaxería que foi d’accionaríáu familiar (un hermanu del conceyal yera sociu) y na que trabaya como alministrador un cuñáu de José Suárez. La facturación de la compañía en mensaxería urxente foi de 8.000 euros en 2 años.

Arias-Cachero refugó les acusaciones d’irregularidaes na contratación y dixo que la verdadera razón ye la carta abierta a Rajoy, qu’espublzcó nel periódicu El Mundo esti llunes, y na que mostraba’l so apoyu a Cascos. Darréu d’ello, el conceyal dixo qu’entamaron a dir escontra la so persona y la so familia col únicu oxetivu de “estroza-y la vida”.

Arias-Cachero estimó les numberoses llamaes d’apoyu recibíes nes últimes hores y l’aliendu d’afiliaos del PP peles cais d’Uviñeu y dixo que’l problema allúgase en que la so opinión ye mayoritaria ente los votantes del PP na capital.

Cachero dixo “entender” la situación del restu collacios de corporación y agradecer dalgún apoyu nidiu que se-y fizo en públicu el mesmu xueves, pero llamentó l’actitú d’Isabel Pérez-Espinosa a la que se dirixó pidiéndo-y qu’actuara con independencia, recibiendo la callada por rempuesta. Cachero dixo qu’apreciaba y seguía apreciando a Pérez-Espinosa, pero qu’ella mesma se descalificara pa lliderar un proyeutu nel PP cuando nun actuaba con independencia.

Fontes del Ayuntamientu d’Uviéu anunciaron que güei a les seis de la tarde va celebrase un conceyu ente los miembros del gobiernu d’Uviéu pa votar la espulsión de José Arias-Cachero “Felechosa” como Conceyal de Cultura. La decisión ta provocada pol sofitu públicu a la llegada de Francisco Álvarez-Cascos como candidatu del PP a Presidente d’Asturies, que’l conceyal pasáu nacionalista espublizó n’El Mundo na so versión en castellán y n’ASTURNEWS, n’asturianu.

Na carta, que dirixía a Rajoy pidiéndo-y la escoyeta de Cascos como candidatu, Cachero dicía saber que “La nuesa ye una sociedá encoyida na que sé que nun me va a salir de baldre espresar esta opinión”.

Ye la primer vegada que Gabino de Lorenzo usa la fórmula de la votación pa espulsar a un conceyal, asumiendo él la decisión n’otres ocasiones. La decisión pue responder a la necesidá de demostrar el sofitu al alcalde n’esta decisión nun momentu nel que munchos cuestionen la forma na que De Lorenzo ta dirixendo’l partíu col casu Cascos.

Carta abierta a Rajoy (ver. n’asturianu)

El Conceyal de Cultura del Ayuntamientu d’Uviéu, José Suárez Arias-Cachero, foi separtáu esta mesma tarde de les sos funciones por decretu del Alcalde d’Uviéu, Gabino de Lorenzo, como rempuesta al sofitu asoleyáu pol conceyal a la candidatura de Cascos.

L’anuncia, adelantada esta mesma tarde pol diariu El Comerciu na so versión dixital, produzse nel mesmu día nel qu’Uviéu queda apeada como candidata a la Capitalidá Cultural Europea 2016, proyeutu del que foi apartáu José Suarez y que llideró Gabino de Lorenzo cola so xente de confianza.

L’anuncia yera adelantada por munchos dende que Arias-cachero firmara una carta empobinada a Rajoy nel diariu El Mundo sofitando la Candidatura de Álvarez Cascos como cabeza de llista autonómicu del PP.

La disculpa pa cesar al Conceyal ye una presunta irregularidá al nun abstenese na contratación d’una empresa mensaxería que foi d’accionaríáu familiar (un hermanu del conceyal yera sociu) y na que trabaya como alministrador un cuñáu de José Suárez. La facturación de la compañía en mensaxería urxente foi de 8.000 euros en 2 años.

IX d’Asturies considera un ésitu” la Fuelga Xeneral na nuesa comunidá autónoma. Asina la califica Jesús Iglesias, Coordinador Xeneral d’IX d’Asturies nesta primer valoración, na qu’afirmó que’l siguimientu ye del 87%, convirtiendo a Asturies “na comunidá con un mayor siguimientu y refugu a les midíes del Gobiernu de José Luis Rodríguez Zapatero”.

El siguimientu d’esta Fuelga Xeneral na nuesa comunidá, asegura Iglesias, implica que’l Gobiernu de Zapatero va tener que rectificar la reforma llaboral y tou el conxuntu de midíes qu’apuesten por una salida neolliberal de la crisis y abandonar la idea d’una reforma de les pensiones qu’allongaría la vida llaboral y rebaxaría l’importe de les pensiones.

Jesús Iglesias, Coordinador d’IX d’Asturies, sorraya que la derecha tamién foi ganada. El Coordinador d’IX d’Asturies convida tamién al Partíu Popular y los partíos nacionalistes a recoyer el mensaxe de güei. Iglesias recuerda que la estratexa d’estos partíos foi doble: una vegada consiguíu l’oxetivu de foliar al Gobiernu cola convocatoria de la fuelga, darréu apostaron por debilitar a les organizaciones sindicales ante la hipótesis d’un posible gobiernu posterior de la derecha. “Que recueyan el mensaxe de que el trabayadores y les organizaciones caltienen la so capacidá de convocatoria y de resistencia ante cualquier gobiernu sía Socialista o del Partíu Popular”, afirma Jesús Iglesias.

“Derrotada tamién foi la patronal, esa patronal insaciable qu’hai, por desgracia, nel nuesu nel nuesu país”, sigue Iglesias. El Coordinador d’IX d’Asturies sostien que la patronal pretende caltener la so tasa de beneficios namás a base d’amenorgar costos llaborales, fundamentalmente’l xornal y l’importe de les indemnizaciones por despidu. Iglesias denuncia que la patronal emplegóse a xeitu amenaciando a los trabayadores que pretendíen secundar la fuelga xeneral y éstos supieron aguantar a eses presiones y amenaces.