Política

Xuristes pol Asturianu fizo pública la carta que-yos fizo llegar el Conseyeru de Cultura y Deporte, Marcos Vallaure, en respuesta a la so petición de que tolos impresos alministrativos de los organismos públicos del país tuvieren redactaos en versión billingüe asturianu-castellán. Nella, Vallaure valora “positivamente” la propuesta y fala d’estudiala como “posible midida de normalización llingüística”.

Pa Xurde Blanco, cabezaleru de Xuristes pol Asturianu, esta contestación fecha pol Conseyeru (y n’asturianu) supón un cambiu importante dempués d’años de “política llingüicida y clientelista de los gobiernos d’Areces”, qu’esplica “obligaron al Aconceyamientu de Xuristes pol Asturianu a tener qu’amosar de contino y per años, la so cara más combativa y fosca: la única posible cuando se llucha pola sobrevivencia”.

Pa Xuristes, “avezaos -afirmen- al tratu arispiu, cuando non direutamente a l’aición represiva, del vieyu gobiernu” les pallabres del nuevu Conseyeru son calificaes como “respetuoses” y como dalgo que-yos da pie a la esperanza. AXA aguarda agora poder caltener una postura “negociante y comprensiva” anque, recuerden, “dando pasos, midíos pero decidíos, p’hacia una sociedá asturiana dafechamente tolerante pa colos drechos llingüísticos de tolos sos ciudadanos”.

L’Aconceyamientu de Xuristes pol Asturianu encamienta al Gobiernu d’Asturies la redacción billingüe de tolos impresos de l’alministración del Principáu, n’asturianu y en castellán. Nel so escritu, empobináu al Presidente y al Conseyeru de Cultura, los xuristes afiten que ye’l momentu afayadizau pa facelo porque munchos dellos tienen d’aperiase coles nueves competencies y denomamientos de Conseyeríes, Viceconseyeríes y Direiciones Xenerales; que la midida ye de poco costu “porque anguaño tolos impresos salen direutamente del ordenador, que non de la imprenta, y el so camudamientu ye un trabayu que lu fai –ensin matase- un funcionariu nuna selmana (dos puestos a esaxerar, afirmen) per Conseyería”.

Recuerden que Cultura cunta con una direición Xeneral de Política Llingüística sirvida por once funcionarios; y qu’un xestu tan cenciellu y baratu sedría pa la normalización social del asturianu “muncho más granible que los dolce años de política arecista na que’l popularmente conocíu como ventanucu de política llingüística dedicóse a repartir perres, aparentemente al debalu, pero que casi siempres viníen a cayer nes mesmes manes”.

Política clientelista y llingüicida de los gobiernos d’Areces que con una mano esbardiaron los recursos públicos demientres cola otra torgaben a la ciudadanía l’exerciciu de los derechos proclamaos nes lleis, pente elles la 1/1998, d’usu y promoción del bable/asturianu, onde se “declara, afita y empara’l derechu de tolos ciudadanos al llibre usu de la llingua llariega ensin discriminación dala” énte l’Alministración asturiana. Derechu que ficieron imposible porque nel intre d’empobinase a ella pa xestionar cualquier asuntu esíxíen –y esíxen- l’emplegu d’un impresu redautáu dafechu en castellán.

Faen alcordanza los xuristes de que la igua darréu d’esti asuntu ta dientro del programa del nuevu gobiernu, “apallabráu col pueblu asturianu nes elleiciones y, robláu énte la Xunta Xeneral del Principáu nel procesu de l’aproclamación del Presidente”, no que cinca al desendolcu bonal de la mentada Llei 1/1998.

La Xunta de Gobiernu del Ayuntamientu de Xixón designó a Xosé Nel Riesgo como nuevu director de la Fundación Municipal de Cultura, Eduación y Universidá Popular. Riesgo, de 48 años, ye llicenciáu en Xeografía pola Universidá d’Uviéu y tien un master superior en desenrrollu llocal. Ye miembru de la Fundación Belenos.

Riesgo ye escritor n’asturianu, siendo autor de les noveles El cai nunca duerme (ALLA,1989), Parque Temáticu (Trabe,2005) y Escrito na ceniza (ALLA, 2007); y de diversos rellatos, dalgunos recoyíos en llibru Cuentos de la nevera (1997), y poemes apaecíos en revistes lliteraries asturianes.

Como xeógrafu fue responsable d’un de los fascículos de la Xeografía d’Asturies, editada por La Nueva España, amás d’una publicación sobre El Conceyu de Muros del Nalón (2003).

El Partíu Asturianista (PAS) esixe que les matrícules de los coches puedan llevar na matrícula un signu que los identifique como vehículu de la comunidá. La formación nacionalista recuerda al PP qu’en Cataluña defenden la colocación del “Cat” na matrícula mientres equí nieguen esa posibilidá.

El PAS esixe a PP y Foru que “se mueyen” y preguntánse “por qué si pa Cataluña ye bono, nun lo ye p’Asturies”. Amás pregúntase “¿ónde guarda Foru esi rexonalismu que diz querer?”, esperando que “lu practiquen d’una vez”.

El Partíu Asturianista defendó esta idea “en solitariu a lo llargo de más de 25 años, llegando a recoyer decenes de miles de firmes nel so momentu.

El Conceyu de Lleón yá nun va ufrir los sos documentos en billingüe, dempués de venir faciéndolo va años, por mor del pactu ente PSOE y UPL na vieya capital del Reinu. L’entós Conceyal de Cultura Lleonesa, Abel Pardo, dio-y puxu a estes polítiques de normalización que’l nuevu conceyal, Juan Pablo García, asegura son “inviables”. Pal edil, del Partíu Popular, que dende mayu gobierna Lleón, “agora mesmu ha aplicase’l sentíu común, y a día de güei nun s’usa’l lleonés de forma cotidiana”.

Sicasí, el conceyal afirmó en declaraciones a Diario de León qu’esta midida regresiva pa la llingua asturiana “nun supón que nun se vaiga potenciar l’usu del lleonés nel ambitu educativu, pa quien lo requiera”.

L’asociación cultural llama a simpatizantes y militantes a un aconceyamientu abiertu que va tener llugar na Llibrería Paraxuga, asitiada na Cai Paraísu d’Uviéu, el miércoles 24 d’agostu dende les 20 hores.

L’aconceyamientu cuntará con un orde del día formáu polos siguientes puntos: Organización; Campañes n’activo -Voluntariáu llingüísticu, Material pedagóxico, Esposición de Cartelos, Vivir n’Ast, Nome n’asturianu…; Propuesta de nueves campañes; Distribuición de material -chaples, pegadielles, llibretines, postales…- y, pa finar, Ruegos y entrugues.

L’Academia de la Llingua Asturiana fizo pública la so posición sobre la decisión del alcalde de Noreña, el socialista César Movilla, de refugar y retirar del orde del día del Plenu de güei una moción del grupu políticu “Conceyu Abiertu”, sobro la ponte ferroviaria de Rebalde (patrimoniu industrial asturianu de mediaos del sieglu XIX) por “tar redactada n’asturianu”. L’Academia treslladó al traviés d’un comunicáu “la so más fonda esmolición énte la falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu derechu de los ciudadanos del conceyu a usar la llingua d’Asturies”.

Pa l’ALLA refugar la mentada moción cola xida de problemes “reglamentarios” da cuenta perfeutamente del allugamientu, oxetivamente anti-asturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu.

L’Academia de la Llingua Asturiana ye sabedora que l’afitamientu de la oficialidá requier del consensu mayoritariu na Xunta Xeneral del Principáu y, darréu d’ello, de la reforma del Estatutu d’Autonomía d’Asturies. Poro, píde-y al Gobiernu del Principáu que llidere esi procesu de reconocimientu xurídicu del asturianu y qu’actúe (mentantu esa figura llegal nun seya plenamente efeutiva) afalando calces de dignificación y de planificación llingüística que, acordies col marcu alministrativu vixente, enconten l’usu del asturianu en toles instituciones del País.

Xurde Blanco Puente, na so condición de Secretariu del Aconceyamientu de Xuristes pol Asturianu vieno acabante unviar una instancia a los conceyales del Ayuntamientu de Noreña onde-yos pidi que faigan dimitir al Alcalde pola so pergrave decisión de refugar la moción d’un conceyal por dir escrita n’asturianu.

Na instanci firmada por Xurde Blanco dizse que “pente medies del presente escritu la Xunta Direutiva del Aconceyamientu de Xuristes pol Asturianu quier tresmitir a tolos conceyales del Ayuntamientu de Noreña la so indignación énte’l despreciu que l’entá alcalde amosó pa cola llingua asturiana nel fechu de refugar la moción d’un conceyal por dir escrita n’asturianu. Da vergoña ayena refiertar a un cargu públicu, a estes altures del sieglu XXI, que la Constitución entama afitando que “La Nación española, naguando por asitiar la xusticia, la llibertá y la seguridá y promover el bien de los que nella s’inxerten, n’usu de la so soberanía, proclama la so voluntá de: … Protexer a tolos españoles y pueblos d’España nel exerciciu de los derechos humanos, les sos cultures y tradiciones, llingües ya instituciones”; que l’artículu 9.2 de la mesma Constitución obliga a los poderes públicos “a facer los posibles pa que la llibertá y la igualdá del individuu y de los grupos nos que s’inxer seyan reales y efeutives”; que cola ratificación de la Carta Europea de les Llingües Rexonales o Minoritaries (BOPA de 15 de setiembre de 2001), l’Estáu español obligóse a la “facilitación y/o el fomentu del emplegu oral y escritu de les llingües rexonales o minoritaries na vida pública”; o que los artículos 3 y 4 de la Llei 1/1998, d’usu y promoción del bable/asturianu declaren, afiten y emparen el derechu de tolos ciudadanos al llibre usu de la llingua del país”.

Sigún l’Aconceyamientu esta “Indignación y vergoña que mos torguen dafechu l’empobinamos al desagradecíu ciudadán –y llamentablemente alcalde de un conceyu asturianu- que paga la hospitalidá qu’esti país-y dio con un xestu perdespreciatible escontra la primera seña d’identidá del pueblu asturianu: la so llingua”.

Darréu de too ello, l’Aconceyamientu encamienta a los conceyales de Noreña ” qu’adopten les resoluciones afayadices pa desaposiar darréu del cargu d’alcalde a un suxetu que, a lo que tresciende a la opinión pública, namás s’esmuela pel sueldu y dietes que nagua por cobrar y que, a poco que-y rasquen, amuesa con xeitu autoritariu’l so enclín ideolóxicu preconstitucional”

.

El filólogu y profesor de la Universidá d’Uviéu Alfredo Alvarez Menéndez foi nomáu ayeri pel Conseyu de Gobiernu nuevu Direutor Xeneral de Política Llíngüistica. Profesor del Departamentu de Filoloxía Española, foi hasta hai bien poco direutor de los cursos d’español pa estranxeros de la Universidá y la so especialidá y la so fastera investigadora ta alloñada del estudiu del asturianu polo que xeneró sorpresa nel ámbitu asturianista.

“Las construcciones consecutivas” ye la so especialidá d’aniciu y el títulu de 1995 de la so primer publicación y más conocida nel ámbitu de la Filoloxía Española, nel que s’especializara darréu na enseñanza del español como segunda llingua, asignatura que tuvo impartiendo na década pasada os estudios de Filoloxía de la Universidá d’Uviéu.

Amás, ye l’autor de dellos llibros nesti mesmu ámbitu asoleyaos pola Universidá d’Uvieu como “Escribir En EspaÑol. La Creacion Del Texto Escrito.composicion Y Uso De Modelos” o “Hablar en Español” y “Leer en Español”, obra esta cabera escrita xunta Rafael Nuñez y Enrique del Teso.

Sobre l’asturiano tien dalguna publicación científica como “Y Por Yos”, Un Caso De NeutralizaciÓn MorfolÓgica En Asturiano”, “separata facticia de la Revista Archivum”. 7 hh. Tomos XXXI-XXXII. Oviedo, 1981-1982.”

El nuevu Director Xeneral de Política Llingüística, Alfredo Ignacio Álvarez Menéndez nun ye una de les cares más visibles del asturianismu cultural, pero la so participación foi bien activa en dalgunos de los momentos claves pa la Filoloxía Asturiana. Álvarez Menéndez ye ún de los ponentes y co-redactor de la Gramática de la Llingua Asturiana, asoleyada pola ALLA en 1998, siendo membru de la Comisión de Lexicografía y Normativización d’esta institución tolos años que duró’l llabor de la Gramática.

Amás foi dellos años profesor d’asturianu nel Títulu d’Especialista en Filoloxía Asturiana. Alfredo tuvo nes primeres plantilles d’esi Títulu d’Especialista, figurando nes pallabres clave del so currículum, que determinen les arees de trabayu académicu: gramática español, español como segunda llingua, dialectoloxía, asturianu.

Tuvo involucráu en Cursos de Doctoráu d’Asturianu, como ún sobre’l Neutru de Materia que se dio va pocos años. Amás, ye coautor del llibru Diccionariu de Frecuencies Léxiques del Asturianu (1997), asoleyáu pola Academia de la Llingua Asturiana.

Ye coautor y editor del llibru “El asturiano en el teatro de Perfecto F. Usatorre”, onde publicó un trabayu sobre les característiques del asturianu d’esi autor astur-cubanu. Nel añu 1994 foi ún de los supervisores llingüísticos, en representación de la Universidá, de les Propostas de Normas Ortográficas del Gallego-Asturiano. Ye autor d’un puñáu de conferencies, artículos, etc., sobre l’asturianu.