Política

Izquierda Xunida, al traviés del so represenante en Xixón, Marcos Muñiz, denunció que, “a diferencia d’otros territorios peninsulares con idioma maternu, y tres cuasi cuarenta años de gobiernos democráticos, PP y PSOE nun asumen el procesu de normalización llingüística”.

Muliz apuntó a “intereses partidistes o fundamentalismu centralista” como les posibles causes d’esta negación de derechos”, y animó a participar na manifestación pola oficialidá d’esti vienres 3 de mayu n’Uviéu. Recordando que l’asturianu “xenera empléu y texíu empresarial” y que la llingua d’Asturies cuerre peligru de desaniciu.

Izquierda Xunida d’Asturies celebra’l día de les Lletres, allegrándose del importante llabor lleváu a cabu demientres los postreros 34 años de trabayu de munches persones amestaes a esti procesu, pero sobremanera repite les reivindicaciones qu’añu tres d’añu lleva faciendo pola llingua propia. La primera d’elles ye la oficialidá. De la mesma, IX denuncia’l retrasu y la perda de les meyores llograes na normalización polos retayos de calter ideolóxicu qu’amenorgaron y retrasaron los llogros n’educación, nel financiamientu de la cultura n’asturianu y la presencia testimonial nos medios de comunicación.

IX reconoz el gran llabor de la normalización, un procesu necesariu pal desenvolvimientu de la lliteratura y l’usu de la llingua en contestos formales, como la escolarización, los medios de comunicación, instituciones, alministración y otres entidaes, anque pa sostener y reforzar esti llabor, la llingua tien de ser declarada cooficial, como lo son les otres llingües del estáu español.

IX recuerda l’importante númberu de trabayos d’investigación alredor del asturianu, de la lliteratura, los reconocíos estudios filolóxicos lideraos pola Academia de la Llingua Asturiana, que sigue trabayando con rigor dende la so creación en 1980, pero tamién considera que pa sostener esti llabor y poder siguir alantre ensin torgues, ye nececario esixir l’alcuerdu y el compromisu de tolos partíos pa que se declare, ensin más retrasu, la oficialidá del asturianu.

Izquierda Xunida demanda’l desenvolvimientu de la Llei d’Usu, que nun se realizó dende 1998, y el so cumplimientu per parte de l’alministración. Asina mesmu, alvierte que la Llei Wert tien como oxetivu facer recular la escolarización del asturianu que tanto costó poner en marcha.

Nesti Día de les Lletres, la coalición reivindica que l’alministración autonómica, los conceyos, la Universidá y otres instituciones abran les sos puertes al asturianu y que nos medios de comunicación tenga presencia y respetu la llingua asturiana.

A lo cabero, IX espera que’l Día de les Lletres sirva pa que toos los partíos políticos escuchen la voz del pueblu, la voz de la xente nos distintos actos reivindicativos, y nun solo sía utilizáu pa “faer el papelón y salir na semeya”, escaecese’l restu del añu y facese los sordos.

Según pudo saber Asturnews, la Xunta Xeneral va recuperar esti añu la llectura institucional de testos n’asturianu, que celebró dende 2005 a 2011. L’actu tendrá llugar esti añu a les 12 la mañana del próximu martes 30 d’abril y cuntará cola llecutra del presidente de la Xunta, el socialista Pedro Sanjurjo, dos miembros del gobiernu por confirmar, nueve diputaos d’ente los 45 y diez estudiantes. Anque entá nun hai confirmación oficial d’estos datos.

N’otres ocasiones la Xunta recibió tamién a diputaos y senadores de les cámares estatales, amás d’otres figures de la sociedá asturiana, como’l rector de la Universidá d’Uviéu. Amás, asoleyábase un llibru con testos referentes a la Selmana de les Lletres Asturianes de cada añu.

Con fecha 15 d’abril el BOPA asoleya la renuncia al cargu de la Xefa del Serviciu de Normalización Llingüística del Gobiernu d’Asturies, María Antonia Pedregal Montes. Dexa’l cargu dempués de cuasi seis años por “motivos personales” según comentó a Asturnews, agradeciendo amás l’interés pola so decisión.

En setiembre de 2007 sustituyía a Ramón d’Andrés al frente d’esti serviciu, dempués de que nomaran a Consuelo Vega, Directora Xeneral de Cultura y Política Llingüística, creando un cargu superior al de la xefe de serviciu. Dende entós conoció trés superiores, la propia Consuelo Vega, que la nomó, Alfredo Ignacio Álvarez Menéndez, nomáu pol gobiernu de Foru Asturies, y l’actual, Ana María Fueyo, nomada pol gobiernu de la FSA-PSOE dempués de recuperar el poder en 2012.

María Antonia Pedregal foi profesora d’hestoria n’institutos y tien feches abondoses investigaciones alredor de la filoloxía asturiana.

Resolución sobre la renuncia nel BOPA

L’asociación N’ast emitió un comunicáu nel que denuncia qu’esti llunes pasáu, 8 d’abril, el Boletín Oficial del Principáu d’Asturies asoleyó’l “Plan Estratéxicu de Subvenciones pa 2013” de la Conseyería d’Educación, Cultura y Deporte y que nel mesmu pudieron confirmar lo que califiquen como “un fechu pergrave”, la desapaición de les ayudes económiques que, dende va años, el Gobiernu venía apurriendo a los Conceyos pa la normalización social del asturianu. Recuerde que “si bien ye cierto que puxar pola normalización social del asturianu nun ye competencia municipal, sinón de la institución cimera que tien la obligación de mirar por esta llingua y de facela oficial”, espliquen que “sí ye verdá que valoramos positivamente too aquello que se faiga pol asturianu dende los Conceyos por ser l’alministración más averada al pueblu”. Daqué que con estes nuevu recorte que denuncien sedrá más difícil.

Camienten que “ensin sovenciones la mayoría de les entidaes llocales van dexar d’entamar actividaes de normalización, porque pa munches d’elles sí ye verdá que faen falta unes perres que yá nun van recibir”. Sicasí, recalcaquen “que la responsabilidá última de normalizar socialmente l’asturianu nun ye de los Conceyos y que nun se los pue cargar con una competencia que nun-yos correspuende”.

Dende N’ast llamenten que’l PSOE, partíu que gobierna Asturies col sofitu d’Izquierda Xunida y UPyD, “vuelve a amosar qu’esta dómina de crisis económica viéno-y perbién pa siguir col procesu de dexar morrer al asturianu baxo la escusa d’un “nun hai perres” que suena abondo mal, más nestes selmanes nes que tamos comprobando que sí les hubo, sí les hai, pa marafundiar llibremente polos xestores de los sos “proyeutos estrella”, casu del Centru Niemeyer”, denuncien.

L’asociación N’ast denuncia que “A la fin, tres dellos meses de falsa incertidume, el tiempu vieno a demostrar lo que colectivos como N’AST afitamos dende cuantayá: que la llaceriosa situación que-y espera a la llingua asturiana nel sistema educativu, y por estensión al profesoráu qu’imparte la materia, nun va depender de la Llei Orgánica pa la Reforma de la Calidá Educativa (LOMCE), sinón de l’ausencia d’oficialidá”. Esta organización recuerda que la responsabilidá d’incluyir al asturianu como materia d’especialidá na denomada Llei Wert “ye esclusivamente del Gobiernu d’Asturies”.

Pa N’ast nesti tema la pelota nun ta nel teyáu del Ministeriu d’Educación, Cultura y Deporte “como quieren facemos pensar”, sinón, espliquen “nel de la Xunta Xeneral d’Asturies, que ye onde siempres tuvo”.

La organización cree que la solución a esti y otros problemes rellacionaos col asturianu “pasa polo qu’esti colectivu vien defendiendo dende’l so aniciu: la oficialidá pa la llingua d’Asturies”. Pero recuerden que’l PSOE, “otra vuelta nel poder dende va xusto un añu, tornó al camín al que mos tenía avezaos, el de la negación dafechu d’un drechu fundamental que-y asiste al pueblu asturianu”.

Pa N’ast “el partíu gobernante n’Asturies vio na LOMCE una oportunidá: aprovechando esta coyuntura na que se quier imponer una política educativa reaccionaria, que favorez a los sectores de la drecha más xabaz en perxuiciu d’un drechu básicu de toos y toes, el Gobiernu’l “Principado” diz que fai muncho cuando en realidá nun fai nada”.

Camienten por ello que la LOMCE “viéno-y bien al PSOE nel so enfotu d’esaniciar dafechu la llingua asturiana”. Por ello, dende N’AST faen un llamáu a la ciudadanía pa que, “énte situaciones como la de la llingua asturiana nel enseñu, apueste nidiamente pola oficialidá, una oficialidá que garantice non l’asturianu nel enseñu, sinón un enseñu n’asturianu”. Y ye que, como recuerden “énte un de los los problemes más graves que carez esta llingua, ta la perda de los falantes más vieyos, ye esencial que seyan los escolinos y escolines los que garren el testigu y la deprendan pa evitar el so desaniciu”.

La Xunta pola Defensa de la Llingua Asturiana (XDLA) denuncia la castellanización de la imaxe de la que fuere Axencia Asturiana de Cooperación al Desarrollu y l’ausencia de versión n’asturianu na web agendaculturalasturias.es, que ta acabante inaugurar la Conseyería de Cultura. La XDLA diz “plasmar énte la castellanización de la imaxe de l’Axencia de Cooperación, dependiente de la Conseyería de Bienestar y Vivienda, que ta entamando a difundir nes sos comunicaciones un llogotipu nuevu en castellán cuando llevaba más d’una década cola so denomación n’asturianu”.

Espliquen que vienen denunciando, “por desgracia, les muestres d’usu públicu del asturianu nes Conseyeríes respuenden a voluntaes polítiques individuales y concretes, y non a planes claros, tresversales y sistemáticos de normalización” y denuncien que “cuando llega un responsable al que nun-y da más la recuperación del asturianu (como ye’l casu), esta llingua, ensin más, desapaez de la Conseyería”.

De la mesma manera, recuerden, “vuelve a sorprender negativamente que la llingua y la toponimia asturiana tean ausentes de la web agendaculturalasturias.es, acabante estrenar y xestionada pola Conseyería d’Educación y Cultura, y supuestamente dedicada a presentar la ufierta d’actividaes culturales”. Pa la Xunta “nun val agora la sida de la falta de presupuestu, disponiendo como dispón esa Conseyería d’un Serviciu de Política Llingüística pa traducir los conteníos, nin ye posible que desconozan les formes oficiales de los topónimos qu’ellos mesmos aprobaron nel Boletín Oficial del Principáu d’Asturies hai años y que na mentada web nun se respeten”.

Dende la XDLA esixen “la rectificación inmediata d’entrambes dos conseyeríes y l’usu públicu del asturianu como muestra del compromisu real cola so recuperación y normalización”. Recuerden que “nun ye abondo con dicilo: hai que facelo”.

Represenantes d’Iniciativa pol Asturianu aconceyaron el vienres pasáu col xefe de Gabinete de la Delegación de Gobiernu n’Asturies, Alberto Mortera quien atendió per dos hores a los representantes de la organización. Los dos cabezaleros de la Xunta Direutiva acudieron en representación del coleutivu a una xunta que se xestó con rapidez, yá que se solicitare’l martes. La imposibilidá d’aconceyar con Gabino de Lorenzo por motivos d’axenda llevó a l’asociación a tratar con Mortera dalgunos de los problemes qu’atopa anguaño l’asturianu y que precisen d’una solución d’urxencia. Asina, Mortera comprometióse con esti coleutivu n’asuntos de toponimia, educación y presupuestos estatales.

Sicasí, dende Iniciativa pol Asturianu anuncien que van facer “un siguimientu a tolos asuntos que tratamos pa ver si se cumple lo dicho, yá que, nestos casos, munchos van quedando escaecíos al nun los considerar urxentes”. Asina, en materia de toponimia, mostróse favoratible a dir incorporando la toponimia oficial nos cartelos de les carreteres, inclusive aquella que tovía nun se oficializó, casu de la d’Uviéu, y faló de facilitar un conceyu d’Iniciativa pol Asturianu col Xefe de Demarcación de Carreteres. D’igual forma, conseñó que va falar col grupu municipal del PP n’Uviéu pa rematar el procesu d’oficialización de la toponimia del conceyu, con cinco años de retrasu.

No que respeuta a la educación, Inaciu Galán y Vítor Suárez repasaron col xefe de Gabinete tolo acontecío cola asignatura de Llingua Asturiana y Gallego-asturianu colos borradores de la Llei Orgánica pa la Meyora de la Calidá Educativa (LOMCE) y treslladáron-y el so esmolecimientu pol fechu de que nun s’acabe de tramitar la especialidá d’asturianu. Alberto Mortera calificó esta situación de “inesplicable” y afitó’l so compromisu de facilitanos un contautu col subdelegáu n’Asturies del Ministeriu d’Educación. Señalando tamién la so intención de comunicase col grupu parllamentariu popular pa tratar el tema.

A lo último, Alberto Mortera, mostróse favoratible a que los presupuestos del Estáu incluyan una partida pa l’Academia de la Llingua Asturiana y tamién al usu del idioma na Delegación de Gobiernu, tanto na rotulación interna como en campañes del calter estatal que nes comunidaes con llingua propia suelen dir nel idioma llariegu. El xefe de gabinete rescampló que nel Delegáu de Gobiernu “los defensores del idioma tenemos una persona receptiva dafechu a estes demandes”.

Iniciativa pol Asturianu denunció güei que la Dirección Xeneral de Carreteres del Gobiernu d’Asturies ta acabante instalar nueves señales viales colos nomes de Lieres, Nava, L’Infiestu y Les Arriondes nel enllaz de l’autovía A-8. Según espliquen dende la organización “estes señales usen los topónimos yá derogaos “Infiesto” y “Arriondas”, en cuenta de los únicos oficiales y d’obligáu usu pola alministración: L’Infiestu y Les Arriondes”, lo que califiquen como “un nuevu ataque a la recuperación y normalización de la toponimia tradicional asturiana”.

Dende Iniciativa pol Asturianu afirmen tar sorprendíos, pues esti usu incorrectu de la toponimia “llega dempués de que la Conseyera de Cultura reclamara al Ministeriu de Fomentu l’usu d’esta toponimia qu’agora vemos que nun cumple siempres el so propiu Gobiernu”, anque reconocen que “nes carreteres nueves el Gobiernu d’Asturies vien cumpliendo col usu de la toponimia oficial”, esti ye un exemplu de lo qu’Iniciativa pol Asturianu califica como “inalmisible pasu atrás”.

Por ello solicitaron al traviés de carta a la Dirección Xeneral de Carreteres el cambiu inmediatu d’estes señales, “esperando que se trate namás d’un erru temporal”, al mesmu tiempu que se-y solicitó, tamién vía postal, a los alcades de Piloña y Parres, Carmen Barrera y Marcos Gutiérrez Escandón “que reclamen dende les sos instituciones l’usu de los nomes de llugar que ficieron oficiales los propios plenos de dambos conceyos”.

Dende la formación política ecoloxista EQUO creen que “tener una llingua propia ye bonu pal nuesu país y amás sirve a la xente mozo a abrise a otres llingües y cultures”. EQUO Asturies entiende que la finalidá de la educación “nun ye crear trabayadores sumisos, sinón facer ciudadanos comprometíos”, por eso creen que la calidá de la educación “nun ye namás l’informe PISA, tamién lo ye conocer d’ónde venimos y cómo fueron, vivieron y falaron los nuesos güelos”. “Namás asina vamos poder entender meyor el mundu nel que vivimos” afirmen. Y ye por ello polo que sofiten les reclamaciones de los y les profesores d’asturianu y gallego-asturianu y que se garantice’l derechu al so estudiu en toles estayes del sistema educativu.

“Esta reforma ta marcada pol componente ideolóxicu, non por cuestiones técniques y nun busca’l consensu. El ministru Wert ta más ocupáu n’atender a los sos intereses políticos qu’a sirvir a la ciudadanía”, afirma Adrián Blanco coportavoz d’EQUO Asturies.

EQUO Asturies ta convencida de que la sociedá asturiana ye abondo madura y que sofita la oficialidá del asturianu, y del gallego-asturianu nel so ámbitu llingüísticu, polo qu’encamienta a les fuerces presentes nel Parllamentu Asturianu a entamar los trámites necesarios p’aprobala.

EQUO Asturies remite a tales fuerces a cumplir los alcuerdos y protocolos suscritos polos distintos gobiernos españoles ante organismos como la UNESCO o’l Conseyu d’Europa y cumplir cola Carta Europea de les Llingües Minorizaes o Rexonales, recordando que la diversidá llingüística forma parte de la Biodiversidá.