Política

Un plan industrial pa la creación de 11 millones n’Europa. Esa ye la propuesta qu’Izquierda Xunida y el Grupu de la Izquierda Europea pretenden articular dende Bruxeles, según anunció güei el númberu 2 d’IX a la Eurocámara, Paloma López. El programa d’impulsu de la economía preve acciones en sectores tradicionales clave,como siderurxa o’l naval, amás d’otros nuevos.

Andecha Astur presentó nel Congresu de los Diputaos varies entrugues dirixíes al Gobiernu español.

Rafael Larreina, diputáu d’Amaiur nel Grupu Mistu y compañeru de la coallición Los Pueblos Deciden pa les próximes elleiciones europees, de la qu’Andecha Astur forma parte, presentó en nome de Andecha Astur delles entrugues al Gobiernu español sobro les consecuencies del informe apocayá emitíu pola OLAF de resultes de la denuncia presentada por esta organización asturiana sobro’l fraude d’El Musel.

L’alcaldesa de Castrilllón y candidata per Asturies d’IX al Parlamentu Européu sollertó güei en Granada de la perda de l’autonomía local que supon la reforma de l’Alministración local impulsada pol PP y que, aseguró, va en contra de la Carta Europea de l’Autonomía Local. La reforma, añedió ye una vía más p’afondar nel cambéu de modelu d’Estáu. Cola escusa de los retayos propuestos pola Unión Europea, el Gobiernu de Mariano Rajoy punxo en marcha, dixo, “una reforma fondamente ideolóxica” que resta autonomía municipal y que va provocar en munchos casos la desprotección de la ciudadanía”.

El vaciáu de competencies municipales supon un nuevu ataque al sistema de participación de la xente qu’arrinca xusto pola alministración más cercana, na opinión de l’alcaldesa Castrillón: “Ye una estratexa pa dir laminando, adulces, la poca democracia que teníen y precisamente nel momentu en que los ciudadanos y ciudadanes esixen más cercanía y una acción más directa y participativa na política”.

Xunto a la candidata por Granada na llista europea, María Piedad Castillo, l’actual rexidora de Castrillón defendió’l municipalismu como una de les estancies que meyor da respuesta a los problemes de los vecinos pos, dixo, ye quien meyor lo conoz, dada la so cercanía. Sicasí, la reforma supon un importante retrocesu pa l’afayadiza prestación de servicios.

Los gobiernos d’Estremadura, Castiella y Léon, Castiella La Mancha, Aragón, Galicia y Asturies esponen esti miércoles, día 2, les sos esmoliciones sobre los efectos” que la despoblación “ta aniciando” na rexón, demientres una xornada con actos nos que se va esplicar ante eurodiputaos y responsables políticos de distintes rexones los “problemes” a los que s’enfrenten estes comunidaes por cuenta de los cambeos demográficos.

Ente los actos destaca la participación, dientro del Comité de les Rexones, nel Alcuentru Rexonal pol Cambéu Demográficu, onde les comunidaes autónomes participantes (Galicia, Asturies, Castiella y Llión, Castiella’l Llurdiu, Aragón y Estremadura) van protagonizar meses redondes onde se quier “concenciar” a Europa sobre les “necesidaes comunes” d’estes rexones españoles y van ponese de mancomún esperiencies aplicaes n’otres rexones europees pa lluchar contra la despoblación.

El voceru nacional de Compromisu por Asturies, Daniel Fernández, anunció que la organización va sofitar a Podemos nes elecciones europees, aunque reconoz qu’hai lluces y solombres nel procesu.

Pa Compromisu por Asturies lo más importante “nes elecciones europees ye apostar por movimientos de confluencia n’Asturies que trabayen por superar el réxime de 1978 nel Estáu español y el gobiernu de la Troika n’Europa, y algamando el mayor pesu posible pa les candidatures asturianes”.

Pero dende Compromisu por Asturies consideren qu’ente les solombres del procesu ta “la elliminación del criteriu de territorialidá como elementu correutor dientru de les primaries de Podemos, cuestión que na presentación d’Uviéu díxose que diba incorporase a tal procesu, lo que amuesa que’l grupu promotor asítiase un paso per detrás de los círculos d’Asturies en superar el réxime de 1978, onde la territorialidá ye una cuestión fundamental pa superar el réxime heredáu del franquismu, que debería habese afrontáu ensin mieu dende un procesu que se manda de la etiqueta de rupturista con lo esistente”.

Daniel Fernández destacó que “tan importante como la propia elliminación del criteriu, ye la falta d’esplicación y de participación de los círculos en tal decisión” un erru que “queremos correxir con una mayor participación de los círculos y ameyorando la horizontalidá del procesu”.

Sicasí dende Compromisu por Asturies afirmen que “la dinámica de los círculos en Asturies establez unes bases pa facer un trabayu de confluencia n’Asturies que ha buscar captar la mayoría social descontenta col furrulamientu del actual réxime, cola política de retayos y eliminación de derechos sociales, civiles y políticos, mesmu a nivel estatal como européu”.

Asina, Daniel Fernández amosó’l apoyu de la organización “a la candidatura asturiana a les primaries de Podemos, pa llograr que dalguna asturiana o asturianu venceyáu a les distintes lluches sociales del país aporte a les istituciones europees” yá que “como asturianistes la nuestra primer prioridá ye ser quien a q’Asturies tea representada en toes les istituciones onde se deciden cuestiones que nos afeuten directamente”.

El so presidente, José María González, presenta estio día la nueva web de la Fundación pola Europa de los Ciudadanos, la primera venceyada a una formación política qu’inclúi’l balance y la memoria de les sos cuentes.

El presidente de la fundación asegura que “dende IX siempres tuvimos pola defensa de la tresparencia de les instituciones públiques, pola tresparencia nel usu de los recursos públicos y, tamién, na tresparencia de la mesma organización”.

El presidente de la Fundación pola Europa de los Ciudadanos, José María González, aseguró güei que “dende Izquierda Xunida siempres tuvimos pola defensa de la tresparencia de les instituciones públiques, pola tresparencia nel usu de los recursos públicos y, tamién, na tresparencia de la mesma organización. Con éses cola nuesa nueva páxina web damos un pasu más escontra la tresparencia”. González, que tamién ye coordinador d’IX en Castiella y Llión, fixo esta valoración demientres la presentación en rueda de prensa de les novedaes de la ferramienta n’Internet de la fundación que dirixe, venceyada a IX.

Nel contactu colos medios de comunicación na see federal d’IX, na que tamién tuvieron presentes el so coordinador federal y el secretariu executivu d’Economía y Emplegu, Cayo Lara y José Antonio García Rubio, respectivamente, el presidente de ‘Pola Europa de los Ciudadanos’ esplicó que la nueva web inclúi la publicación del balance y la memoria de les nueses cuentes, les postreres que fueron visaes a nivel oficial, les de 2012. Yá tán a disposición de la ciudadanía y, si nun me equivoo, ye la única fundación dependiente d’una organización política que dio esti pasu escontra la tresparencia”.

Andecha Astur tomará parte nes elleiciones al Parllamentu Européu xunta con EH Bildu (Euskal Herria), BNG (Galiza), Puyalón de Cuchas (Aragon), UPC y ANC (Canaries).

Andecha Astur participará nes elleiciones al Parllamentu Européu que tendrán llugar el 25 de Mayu, dientru la coallición LOS PUEBLOS DECIDEN, soscribiendo un sopelexu común nel que se recueye la nuesa llectura compartía sobro’l contestu nel que tienen llugar estos comicios. La candidatura a la que-y dan puxu presentaráse públicamente nes prósimes selmanes.

Andecha Astur de Xixón quier cellebrar con militantes y amigos la renaguración del so llar en Xixón, dempués de dellos meses n’obres de remocicamientu pa da-y al llocal l’aspeutu y los conteníos precisos pa meyorar la so presencia y funcionalidá.

L’actu tendrá llugar el prósimu vienres 14 de marzu de magar les 20 hores, y al mesmu tan invitaos militantes, simpatizantes y amigos d’Andecha Astur.

El coordinador xeneral d’Izquierda Xunida, Manuel González Orviz, pidió esti día un nuevu Plan de Producción Ecolóxica y criticó la falta d’atención del Gobiernu d’Asturies escontra’l sector agroalimentario daqué que dixo, “ye bultable, na ausencia d’un estand oficial d’Asturies nel Salón Gourmet” que se celebra estos díes nel IFEMA de Madrid. “Una visita al salón del Gourmet amuesa les faltes y la falta d’interés del Gobiernu d’Asturies na promoción de la so producción agroalimentaria”, afirmó’l líder de la formación al comprobar que nun esistía representación oficial nesta feria internacional de l’alimentación.

“Nun ta la carta de presentación d’un estand institucional del Gobiernu d’Asturies nel que recueya’l conxuntu de les nueses denominaciones d’orixe ya indicaciones xeográfiques protexíes. Ye que si queremos llevar un simple catálogu de la producción agroalimentaria asturiana nun lu tendríamos”, refiertó’l coordinador xeneral d’IX.

Orviz destacó tamién la presencia d’un importante númberu de firmes asturianes anque, na so opinión, “lo lóxico” ye que cuntaren col respaldu de l’Alministración del Principáu. Tamién llamó l’atención sobre la finalización del Plan de Producción Ecolóxica 2013 ensin que, hasta’l momentu, l’Executivu de Javier Fernández, esplicara si ta ente los sos oxetivos la puesta en marcha d’unu nuevu. Nesti sentíu, González Orviz dixo que, esta mesma selmana, y al traviés del diputáu y ex conseyeru de Mediu Rural, Aurelio Martín, va presentase una iniciativa destinada a impulsar la producción ecolóxica.

El Partíu Asturianista vieno de denunciar que la repartida de la cuota de xarda constitúi una inxusticia pa los asturianos, tan castigaos, amás, pola envernada esta temporada.

Por mor d’ello, nel PAS manifiesten “nuesu sofitu y esiximos del Gobiernu central más seriedá y más equidad”.

El proyectu ministerial de repartida de les cuotes de xarda significa pal PAS una nueva falta a Asturies y un ataque a los intereses asturianos per parte del Gobiernu central.