Política

Javier Fernández ,col sofitu de los 14 diputaos socialistes y los 5 d’Izquierda Xunida, ye otra vuelta presidente del Principáu d’Asturies, per segunda y última vegada como ya anunciare enantes de presentase a les eleiciones. Nun s’esperaba otru resultáu depués de qu’IX sofitara ente la so militancia’l sofitu a la FSA-PSOE, pero les posibilidaes taben abiertes, dempués de que Podemos anunciara que podría ‘emprestar’ dalgunos de los sos diputaos al PP pa forzar un nuevu empate y asina obligar a Javier Fernández a axustar “en serio”. Frente a los 19 sofitos del bloque PSOE-IU taben los 14 que sumaben PP y Foru, ensin saber si la formación de los círculos ufiertaba cinco más a Mercedes Fernández.

Por mor d’ello, el focu d’atención dirixíase na votación non a los candidatos a la Presidencia asturiana, sinón a los nueve diputaos de Podemos, que teníen na so mano allongar un procesu de investidura que yá s’amplió nel tiempu, hasta faer d’Asturies la única comunidá ensin Gobiernu de tol país tres les elecciones de mayu.

Javier Fernández salió reelexíu presidente del Principáu nuna sesión de investidura na que 12 diputaos abstuviéronse, los trés de Ciudadanos y los 9 de Podemos. La tensión yera bultable nel momentu de les votaciones, sobremanera, cuando-y tocó falar a Daniel Ripa. El secretariu xeneral de la formación yera, precisamente, el quintu diputáu de Podemos en votar y cola so astención quedba todo perafitao. La decisión de Podemos de nun faer un usu parcial de los votos” foi tomada ayeri nel Conseyu Ciudadanu autonómicu nel que, según reconoció dempués el so voceru, Emilio Llión, nun hubo votación y sí alderique.

L’ablucante rempuesta dexa en evidencia la política del Principáu d’Asturies nesta materia

La rempuesta de la Xunión Europea a entrugues rializaes por Andecha Ástur al traviés de Josu Juaristi, el nuesu eurodiputáu de Los Pueblos Deciden, cola fin de determinar por qué la sidra nun cunta na XE coles mesmes midíes de promoción, sofitu y sovención coles que cunta’l vinu resultó especialmente sorpresiva: “ A la escontra del vinu, nun esiste dengún preséu de mercáu específicu pa la sidre na organización común de mercáu”. Según Andecha “esta rempuesta pon n’evidencia al “Principado”, dende cuya Conseyería d’Agroganadería vienen anunciándose dende va años distintes actuaciones na XE en defensa de la sidra asturiano, llegando inclusive a afirmase que se taba trabayando n’aniciar un lobby de la sidre a nivel européu”.

Tamién dexa n’evidencia al conxuntu de los eurodiputaos “asturianos” cuyu interés pola nuesa bébora nacional queda n’entredichu dafechu.

Sigún datos facilitaos na mesma rempuesta de la XE, “Asturies ye’l segundu productor européu, namás per baxo del Reinu Xuníu, lo que supón que daes les nueses dimensiones xeográfiques, demográfiques y económiques, la sidre como seutor produtivu tien una repercusión proporcionalmente munchísimo más alta qu’el de cualisquier otru país d’Europa, lo que debiera de vese reflexao na debida atención istitucional, en llugar de la desidia amosada pol Principado”.

Llamentablemente la falta de sofitu a la sidre na XE non solo torga aportar a les aídes de les que gocia’l vinu, s”inón qu’al nun haber una normativa común sobro lo que ye la sidre, n’Asturies vémosmos obligaos a cumplir cola llexislación española, absolutamente restrictiva y desconoceora de lo que ye sidre, mentes que n’otros países europeos gocien de llexislaciones muncho más permisives y que compiten por nuesos mesmos mercaos. Por poner un exemplu recoyíu na mesma rempuesta de la XE, respeutu al conteníu de zusmiu de mazana hai Estaos qu’almiten como sidre bébores con un conteníu dende un 15% de zusmiu de mazana, comu ye’l casu de Reinu Xuníu, el principal productor, y que llóxicamente nun tien dengún interés en que s’harmonice la llexislación comunitaria, dao que esta indefinición beneficialos dafechu”.

Pero la rempuesta de la XE tamién apurre bones noticies de les que según pudiemos cosstatar, el seutor sidreru nun yera conocedor, y ye que la sidre ta incluyía nel anexu I del TFUE, y polo tanto va tener cabida na política d’información y promoción de los productos agrícoles que va ser aplicable de magar del 1 d’avientu de 2015, y que tien comu oxeto aidar a los profesionales del seutor a atopar nueos mercaos, consolidar los esistentes y promover la calidá de los productos agrícoles de la XE ente los consumidores n’Europa y en tol mundiu. Anguañu ta trabayándose nes normes de desendolcu d’esta nueva política y espérase teneles peracabaes na seronda d’esti añu.

Por último Andecha Ástur facilitó toa esta información a los llagareros asturianos, amosándo-yos el so interés en caltener les oportunes entrevistes colos mesmos en visu a esclariar más si ye precisu esta rempuesta de la XE y ponelos al tantu de les prósimes iniciatives nes que yá tamos trabayando.

Información detallao sobro’l nuevu actu de base (Reglamentu (UE) nº 1144/2014)

IX facía anuncia esti martes 14 de xunetu d’algamar un principiu d’alcuerdu cola FSA-PSOE pa la investidura de Javier Fernández y ente les midíes de la fueya de ruta, abierta a otros partíos, mnun s’alcontraba nin la oficialidá de la llingua asturiana nin la reforma del Estatutu, necesaria pa cualaquier pasu nesti sen, sigún reconocía’l propiu Gaspar Llamazares. La oficialidá presentárase na camapañ como una prioridá, pero la delegación d’IX reconoció que nun fueron a convencer al PSOE de la importancia de la mesma.

Ente los acluéntros si que atopamos otres prioridaes d’IX como un plan de rescate social, la reforma electoral y otres lleis de rexeneración, tresparencia y participación social, midíes de reactivación económica, refuerzu de los servicios públicos y el compromisu de busca d’alternatives a la incineración.

IX d’Asturies vieno acabante ayeri de cerrar un principiu d’alcuerdu pa la investidura de Javier Fernández, que va consultase a los órganos de dirección y a la militancia d’IX, nuna consulta que se va celebrar la fin de selmana. Trátase, en palabres del Coordinador d’IX, Manuel González Orviz y del voceru parlamentariu, Gaspar Llamazares, “de sentar les bases pa un programa de cambéu, qu’inclúi elementos que pueden compartir otres fuerces polítiques. L’alcuerdu sofitar en cuatro eje principales: el rescate ciudadanu y l’afitamientu de los servicios públicos, la rexeneración democrática y la llucha contra la corrupción, la reactivación económica y otros aspeutos amestaos al mediu ambiente o de defensa d’Asturies frente a otres instituciones”.

Los dirixentes d’IX reconocieron como puntos de desalcuerdu cimeru cola FSA-PSOE la reforma del Estatutu y la oficialidá de la llingua asturiana, anque “hai coses que pueden ameyorar la situación de la llingua”, ya que por aciu d’una comisión na FSA-PSOE abren alternatives a l’actual protección y quieren plantegar midíes de respaldu y refuerzu a la protección y promoción del asturianu.

L’agrupación d’electores Somos Avilés, que tien cinco conceyales nel consistoriu, fixo historia estos díes al rexistrar per primer vez nel conceyu avilesín una moción redactada en llingua asturiana. Dende la organización comenten “qu’esta práctica va ser habitual nel so proceder a lo llargo de tola llexislatura, dao que’l so enfotu ye facer del asturianu una ferramienta de comunicación avezada, tamién nel terrén alministrativu y procedimental, fuxendo d’un emplegu meramente simbólicu y/o coyuntural”.

Búscase con ello “da-y normalidá, prestixu y utilidá al nuestru idioma, más allá d’aspectos sentimentales o políticos, presentándolu como un instrumentu comunicativu amañosu y preparáu pal desenvolvimientu del llabor municipal”.

Nesti sen, la primer moción en llingua asturiana trata de la conocida como «Llei mordaza», redactada y aprobada pol Partido Popular y qu’entró en vigor apocayá. Nella esíxese la derogación darréu de la Llei de Seguridá Ciudadana y de la Reforma del Códigu Penal, la dimisión del Ministru del Interior, Jorge Fernández Díaz, polos sos postulaos contra derechos como’l d’espresión o manifestación, ente otros, qu’enzarra’l testu llexislativu y pídise al gobiernu municipal que, mentanto esto nun asoceda, amenorgue la so aplicación a nivel local, con estes palabres: “Amosar el compromisu d’esti consistoriu nel cumplimientu de les funciones de velar pola seguridá pública, siempre de manera coordinada coles autoridaes competentes, y el nuestru refugu a que’l funcionariáu públicu de los cuerpos policiales seyan remanaos como elementos de represión de la protesta social”. La moción va debatise ente los distintos grupos municipales nel próximu plenu ordinariu, que va entamase pal xueves d’esta selmana.

Otra manera, Somos Avilés tien la intención de presentar pa la so aprobación y puesta en marcha delles midíes de política llingüística a desenvolver nel conceyu na presente llexislatura, como prueba del so compromisu col asturianu y los derechos civiles de la ciudadanía avilesina.

La Xunta Pola Defensa de la Llingua facía ayer un llamamientu a los partíos políticos asturianos que dicen defender la normalización de la llingua asturiana y sofitar la cooficialidá pa que s’amuese esi plantegamientu nes conversaciones pa escoyer al presidente asturianu, convenzíos como tan de que “nengún cambiu políticu va poder existir n’Asturies si nun se visibiliza al traviés d’un cambiu radical nes polítiques de normalización llingüística”.

Nun comunicáu asoleyáu esti miércoles, la Xunta describe que “estos díes tamos viendo cómo los cambios nos Gobiernos de dellos territorios del Estáu tán xenerando cambios en tolo que tien que ver cola normalización de los sos idiomes. Asina, nel País Valencianu la política llingüística ta visibilizándose como ún de los exes vertebradores del cambiu políticu y de la visión nueva sobre’l futuru d’esa tierra, mentes que n’Aragón va existir pela primer vez na historia una Dirección Xeneral de Política Llingüística, xestionada amás pol ala más aragonesista del Gobiernu autonómicu”.

Sigún la XDLA, “el mesmu camín de meyora na visibilidá y usu del idioma propiu parez que van siguir Navarra y conceyos tan importantes del Estáu como A Coruña, Pamplona o Valencia. Sicasí, nel llau contrariu ta Asturies, un territoriu trillingüe onde los idiomes propios parez que nun tán xugando nengún papel nes negociaciones pa formar un Gobiernu nuevu. Y ye que cada día vemos a los nuestros representantes falar de tiempos nuevos, de polítiques nueves, de buscar consensos, de midíes sociales, etc., mentes dexen de llau un patrimoniu cultural y fonte de derechos tan importante como ye la llingua propia de los asturianos”.

Pala organización asturianista, entá más preocupante ye que “partíos que se comprometieron a defender los nuestros derechos llingüísticos -derechos humanos a la fin- en campaña electoral, agora, depués de les elecciones, falen d’apoyar a candidatos como Javier Fernández, que nun fixo nenguna referencia al idioma nel so discursu d’investidura y que presidió cuatro años de parón na política llingüística, o otros que voten a Mercedes Fernández, que na so intervención la una única referencia que fixo al asturianu foi pa falar de recortar, tovía más, la so presencia nel sistema educativu. Nun podemos entender que se dea carta blanca a persones que mostraron la so intolerancia llingüística y que nes últimes décades vienen faciendo tolo posible por facer desaparecer la llingua asturiana como vehículu de comunicación”.

Esta esmolición xorrez entá más al ver que “nos otros territorios billingües del Estáu, la situación del idioma propiu nel sistema educativu o nos medios de comunicación públicos -estayes fundamentales p’asegurar la vitalidá d’una llingua- convirtiéronse nún de los temes protagonistes de les negociaciones d’investidura o de Gobiernu”.

Na Xunta Pola camiente que “tampoco nun podemos dexar de llau que se ta abriendo un procesu de reformes estatutaries nos territorios nos qu’estos cambios llexislativos quedaren paraos. Un exemplu son les Isles Canaries, que nel mes de marzu pasáu aprobaron una reforma qu’agora tien que llegar al Congresu. Per otru llau, nel País Valencianu yá iniciaron los trámites pa siguir esi camín y desbloquiar la so reforma. Por eso, los partíos comprometíos colos derechos de les persones falantes d’asturianu van poder demostrar que trabayen pola igualdá en derechos fundamentales que trai oficialidá. Y ye que nengún cambiu políticu va poder existir n’Asturies si nun se visibiliza al traviés d’un cambiu radical nes polítiques de normalización llingüística”.

Col entamar d’esta llexislatura nueva, la Xunta pola Defensa de la Llingua Asturiana (XDLA) acaba d’unviar a tolos grupos políticos con representación parllamentaria un documentu p’avanzar na normalización social del nuestru idioma (documentu abaxo). El testu recueye 25 propuestes concretes dividíes en seis estayes (ámbitu xurídico-alministrativu, socioeconómicu, medios de comunicación, industria cultural, educación y toponimia) que sigúnla organización “van permitir dar pasos alantre depués d’una de les llexislatures más demoledores pa col asturianu, onde la política llingüística consistió en paralizar o desfacer les poques iniciatives institucionales entamaes nestos años”.

La XDLA vuelve recordar qu’estos díes, “coles negociaciones pa configurar el Gobiernu nuevu d’Asturies, los partíos con representación na Xunta Xeneral y comprometíos colos derechos de les persones falantes d’asturianu y cola cooficialidá van tener una oportunidá perfecta pa demostrar esi compromisu faciendo valir nos sos pactos, aliances y esixencies, de manera inescusable y irrenunciable, el respetu a la igualdá de la ciudadanía que la oficialidá supón. Tola xente, sobre manera, lo que nagua pola resolución d’esta llarga deficiencia democrática, va tar pendiente y tomar nota de lo que se dixo y se diz, de lo que se llucha y se defende”.

Pala XDLA, “la Xunta Xeneral tien que llexislar un Estatutu nuevu que reconoza’l calter oficial de la llingua asturiana y del gallego-asturianu como llingües propies d’Asturies, al mesmu tiempu que se normaliza na alministración autonómica. Amás, pídese una Llei de Normalización Llingúística que tien de desenvolver les midíes pa garantizar la igualdá xurídica efectiva de les llingües propies d’Asturies y de los sos falantes. al tiempu que garantizar la estabilidá de los servicios de normalización municipales.

Ente otres piticiones, destaquen tamién les que cinquen a los medios de comunicación onde se pide que l’asturianu seya la llingua vehicular de, polo menos, una canal de televisión, una emisora y un portal informativu públicos. Tamién se pide que l’adxudicación de subvenciones y publicidá institucional namái se faiga pa coles publicaciones o medios que cumplan los decretos d’oficialización toponímica.

Izquierda Xunida d’Asturies sigue apostando por un gobiernu fuerte con una base programática sólida de mínimos, “por un modelu d’entendimientu similar al d’Uviéu, tresversal y de cambéu d’izquierdes, de protección a les persones, como reflexa la propuesta de rescate ciudadanu que presentaron na mesma rueda de prensa”. Asina lo amosaron esti martes tantu’l coordinador d’IX d’Asturies, Manuel González Orviz, como’l voceru na Xunta Xeneral, Gaspar Llamazares.

Orviz refugó un gobiernu que siga’l modelu Xixón, un gobiernu débil, ensin alcuerdos qu’acabe poniendo en bandexa un executivu de la derecha. Al so xuiciu “PSOE y Podemos tienen qu’escoyer p’Asturies el modelu d’Uviéu o’l modelu de Xixón”.El coordinador d’IX alvirtió qu’IX nun va reforzar estes táctiques qu’al so xuiciu “miren más a les xenerales”. Tampoco tienen de cuntar con IX pa “xuegos de tronos nin pa cambeos seles”, porque Asturies precisa de forma urxente un gobiernu con amplia mayoría parlamentaria.

Gaspar Llamazares, pela so parte, reconoció que tantu en contactos públicos como privaos detecta “la resignación” del PSOE y “la esclusión” en Podemos, qu’apuesta por una investidura testimonial y conflictiva. Ente dambos, nin siquier vieno produciéndose un aproximamientu, dixo’l voceru d’IX, qu’especificó que’l PSOE quier un gobiernu en minoría y Podemos considera un problema al PSOE.

Orviz tamién remembró que va ser la militancia d’IX la qu’escueya ente trés opciones: l’astención, el votu a otru candidatu, o la presentación de la candidatura del propiu Gaspar Llamazares a la presidencia, nuna entruga abierta a la militancia que va votar ente 24 y 48 hores antes de la fecha de investidura na Xunta, que podría ser el martes día 30.

Andecha Astur quier agradecer públicamente nuna nota de prensa asoleyada esti día “les munches amueses de solidaridá recibíes pol pucherazu elleutoral sufríu” y anuncia la imposibilidá de continuar coles aiciones llegales por xides económiques y conseyu de los sos asesores llegales. De magar el que nomen como “pucherazu elleutoral del 24 M cola retirada de les nueses papeletes d’a lo menos un centenar de meses elleutorales”, Andecha Astur vien recibiendo amueses de solidaridá a nivel individual y colleutivo “por parte d’estreames presones y organizaciones sociales y políitques”.

Esi ye’l casu d’Equo Asturies, “indignaos tantu polos fechos en sigo mesmos, comu pola forma de xestionar esti pucherazu les xuntes elleutorales de Xixón, de Asturies y la Central, dando un carpetazu antidemocráticu a toles reclamaciones y contradiciéndose ente elles”.

Llamentablemente, “anque les evidencies llegales son munches y les contradiciones esistentes escandaloses,Andecha Astur vese obligada a renunciar a exercer el so drechu a continuar coles aiciones llegales por mor del altísimu costu económicu de les mesmes y el conseyu de los nuesos asesores llegales, que consideren qu’anque se ganara, el tiempu pasáu fasta que saliere la sentencia impidiría la execución de la mesma, colo que namás dibemos algamar un trunfu moral”.

El recursu d’Andecha foi denegáu pola Xunta Elleutoral Central, al ñegar ésta fechos ciertos que la Xunta Elleutoral Provincial reconocía y llevó al Ministeriu Fiscal -onde tovía tan xestionándose-. Ello asina, Andecha Astur “perafítase nel so comencimientu del baxu nivel democráticu esistente nel Estáu español, y continúa la so xera, qu’agora mesmo pasa per una redefinición del asturianismu políticu que permita articulalu y rentabilizar elleutoralmente la so capacidá d’incidencia social, lo que pasa pola convocatoria d’un Conceyu Nacional qu’afaye la llinia política a la rialidá d’anguañu y a los oxetivos plantegaos”.