Política

Nuna entrevista concedida al periódicu Les Noticies, el diputáu d’IX-Bloque por Asturies-LV na Xunta Xeneral, miembru del Conseyu Políticu d’IX y ex Conseyeru de Xusticia y Rellaciones Esteriores comentó posibilidá de la refundación d’Izquierda Xunida d’Asturies “como partíu asturianu” y criticó’l pactu de gobiernu firmáu por esta formación col PSOE n’Asturies, por nun ser “l’adecuáu p’Asturies y pa la esquierda nesti momentu”.

Pal diputáu asturianu ye un pautu “insuficiente por cómo se xestó y pol resultáu final”. Amás Valledor añadió que dende Izquierda Xunida-Bloque por Asturies-Los Verdes “cometióse un error de base: pensar que nun había más alternativa que l’alcuerdu cola FSA”. A xuiciu del ex Conseyeru “cometióse un error de partida porque se foi a una negociación onde se diba pautar sí o sí”.

Sicasí, Francisco Javier García Valledor reconoz na mesma entrevista a Les Noticies qu’“esti alcuerdu tien aspectos en positivo que superen el del 2003 y dalgún aspectu meyor que’l que nun se llogró nel 2007. Pero, con too y con eso, nun creo que sía un alcuerdu suficiente nestos momentos”. “Tenía que se negociar con más fuerza, con más convicción, faciendo valir más lo que somos”, declaró.

Pa Valledor “Izquierda Unida, como proyectu políticu federal, ta en procesu de descomposición dificilmente reversible”. Camienta que “la esquierda alternativa, federalista, republicana, altermundista tien que refundase en tol Estáu”. Una refundación que pal políticu asturianu “nun se puede facer dende Izquierda Unida por munches razones: debilidá estrema, falta de credibilidá de munchos dirixentes…”.

Pa Valledor “dende Asturies nun podemos resolver la situación del Estáu, pero sí podemos empezar a poner les blimes pa construir el cestu. Yo creo que n’Asturies la coalición Izquierda Xunida-Bloque por Asturies-Los Verdes tien que refundase nun partíu políticu asturianu”. Un proyectu col que’l diputáu d’IX cree que pue sumase non solo a les tres organizaciones d’anguaño, “sinón a muncha xente que nun ta en nenguna d’estes tres organizaciones y podría ver compartible esti proyectu”. Concreta Valledor que “nun se trata de precindir d’un referente estatal, sinón qu’habría qu’empeñase en reconstruir tanto un referente estatal como européu. Esi ye’l camín qu’habría que recorrer y cuido que yá tamos tardando en facelo. Yo voi siguir trabayando n’IX pa qu’esta idea espoxigue”, declaró.

El plenu del Conceyu de Xixón aprobó ayeri de forma definitiva la Ordenanza Municipal del Usu del Asturianu. Una normativa municipal que declara que l’asturianu y el castellán “son llingües propies” del Conceyu. La norma aprobóse colos votos a favor del PSOE ya Izquierda Xunida-BpA-LV y l’abstención del Partíu Popular.

L’abstención del PP, esclarió Manuel Pecharromán, voceru conservador nel conceyu, débese a lo qu’él califica d’“irregularidaes alministratives”, dexando claro en tou casu que la intención del so grupu ye “defender l’usu del asturianu” y qu’ello “queda demostrao con namás mirar el Plan de Normalización pal Conceyu alternativu que presentaron, con 118 puntos frente a los 51 puntos que plantiaba l’equipu de gobiernu”.

Nesti sen, Manuel Pecharromán afirmó que’l PP abstúvose nesta ocasión porque “na Gaceta del Conceyu publicada en xunetu afirmárase que yá s’aprobara la Ordenanza, lo que nun sucediera de forma definitiva, y qu’a pesar de que l’equipu de gobiernu falara de subsanar l’error nun lo fixera”.

Otramanera, el Conceyal de Llingua Asturiana Jesús Montes Estrada “Churruca” (IX) defendió esta Ordenanza como “dalgo positivo, necesario y bono pa la ciudá como un derechu más de la ciudadanía de Xixón”.

La intervención crítica que ficiere nel Conseyu Políticu d’IX hai poco’l diputáu Francisco Javier Valledor filtrábase esta mañana na rede internet amosando les sos opiniones contraries a dellos aspeutos de la negociación d’IX cola FSA, que no que cinquen a la llingua asturiana son fondamente estremaes de la postura oficial que recibió’l sofitu mayoritariu d’esi Conseyu Políticu.

El diputáu amuesa la so postura crítica alrodiu del pautu negociáu cola FSA y afita, na so opinión, la inutilidá de crear una Direición Xeneral de Política Llingüística si al frente d’ella sigue’l mesmu equipu del gobiernu anterior.

El párrafu que nesa intervención crítica destianra Valledor a la cuestión asturianista ye abondo significativu como pa reproducilu darréu: “Resulta más sangrante aún que, a la vez que se plantea como un avance importante la creación de una Dirección General de Política Lingüística, nos encontremos con que hayamos asumido, parece ser que por consenso entre ambas partes negociadoras, que la persona que dirigirá dicha Dirección General sea la misma que hasta ahora venia haciéndolo en el Gobierno de Areces. Siendo conscientes de que la política lingüística tiene, aún sin la reforma estatutaria, un amplio margen de actuación, resulta incomprensible e inaceptable que aceptemos y acordemos que la dirijan quienes menos (o ninguna) voluntad tienen de desarrollarla y fortalecerla. La credibilidad de esta decisión en los sectores asturianistas es nula y pone en cuestión nuestro compromiso con la normalización social del asturiano y del gallego-asturiano.

Amás, Valledor atalanta que “en política lingüística un aumento de medio millón de euros por si sólo, sin el compromiso de gasto de todas las consejerías al ser un tema transversal al conjunto de la acción de gobierno, puede resultar anecdótico”.

El diputáu, sigún la filtración que s’espardió esta mañana pela rede a los medios de comunicación, fizo la so intervención crítica nel Conseyu pesie a les recomendaciones de munchos pa que nun lo ficiera, convencíos de que podía malinterpretase. Pero Valledor animóse a facelo “sin estridencias y no para generar tensión o conflicto, sino en el marco de una Izquierda Xunida amable, en la que podamos discrepar lealmente y sobre todo expresarnos con la libertad de saber que disentir de la mayoría en la toma de una decisión no significa crear cismas ni crisis, sino aportar distintas visiones que nos permitan enriquecernos en el debate y adoptar acuerdos en las mejores condiciones”.

Na intervención de Valledor, qu’aportó esti día a Asturnews por correu electrónicu, el diputáu d’IX fala tamién de cuestiones como la paralización del Estatutu, Caleao y la Macroincineradora y amuesa la so opinión de que si había qu’escoyer ente Cooperación y Emigración, probablemente fora meyor continuar nel desendolque de la política d’esti caberu ámbitu pola importancia futura que se-y albidra.

Unidá Nacionalista Asturiana presentó esta selmana delantre la Fiscalía del Tribunal Superior de Xusticia d’Asturies un escritu pa qu’investigue l’axudicación de les obres del centru deportivu y d’ociu de Llangréu, esponiendo la posibilidá de circunstancies irregulares al coincidir en qu’un cargu públicu, como’l xefe del serviciu d’arquitectura de l’Axencia de Proyeutos Culturales, trabaye pa la mesma empresa a la que supervisa.

Los populares van torgar la reestructuración del Gobiernu y obligar a que los presupuestos pal 2009 s’aprueben cola cadarma actual de Conseyeríes, loq ue plantega un seriu problema al nuevu gobiernu FSA-IX.

Los populares nun van dar el brazu a torcer pa permitir la tramitación urxente de la llei prevista pol Presidente pa modificar la cadarma del Executivu, absteniendose na votación y torgando la tramitación ensin comparecencies. Y darréu d’ello va xenerase un retrasu que va obligar a presentar na Xunta’l Presupuestu col reparto de conseyeríes d’anguaño, ensin adaptar a los cambios que trai l’enxertamientu nel gobiernu d’IX-BA-LV.

La consecuecnia cimera ye que los Conseyeros d’Izquierda Xunida nun podrán tomar posesión de les nueves Conseyeríes el día 20.

Rafael Palacios, futurible direutor de Cooperación del nuevu gobeirnu asturianu, y Javier Orozco Peñaranda, coordinador del Programa Asturianu de Derechos Humanos, van participar na presentación del informe de la cuarta visita d’una delegación asturiana a Colombia pa pescudar el cumplimientu los derechos humanos, que va desenvolvese esta tarde nel salón d’actos de la Casa la Cultura de La Pola, en Conceyu Siero, convocáu por Algamar.

El Seminariu de Filoloxía Asturiana, que ta compuestu por una docena de profesores, investigadores y doctorandos de la Facultá de Filoloxía de la Universidá d’Uviéu anunció que va dar el so “apoyu ensin reserves” a la propuesta del actual decanu, José Antonio Martínez, de crear un “minor” de llingua asturiana ente los nuevos graos del Espaciu Européu. La propuesta va votase enantes de que termine’l mes y nun gusta a organizaciones como Xunta Moza, qu’entamó una campaña pa reclamar el “maior”.

”La mayor parte de los profesores de Filoloxía Asturiana apoyamos la propuesta del minor”, aseguró’l profesor Ramón d’Andrés. “Y facémoslo ensin nenguna reserva porque entendemos que ye la única posibilidá de dar un pasu hestóricu na nuesa facultá, como ue colocar al asturianu dientro del ámbitu de los estudios reglaos”, siguió.

D’esta forma, sigue D’Andrés, “rómpese la provisionalidá qu’esistía dende 1994. El títulu propiu d’Asturianu sí que ye insuficiente”.

Pa Ramón d’Andrés “ye clarísimo, nun queda otra. Una cosa ye caer y otra ye tirase. Na última Xunta de Facultá caímos pel Cabu Peñes p’abaxo. Nun podemos permitinos el luxu de facer agora lo mesmo. Tamos énte una ocasión d’oru”.

La Xunta pola Defensa de la Llingua Asturiana calificaba esti vienres l’alcuerdu de gobiernu ente PSOE ya IX-Bloque por Asturies-Los Verdes como “decepcionante y continuador de la política de marxinación llingüística llevada alantre hasta’l momentu pol gobiernu del PSOE, política que vien siendo criticada sistematicamente pola Xunta como un plan pa esterminar l’asturianu a mediu plazu”. Amás d’eso, la Xunta dicía nun comunicáu fechu públicu pela mañana que nun se pue escaecer “que la FSA ta acabante de proponer una redacción entá más restrictiva d’artículu 4u del Estatutu d’Autonomía nel que la llingua asturiana desapaez como tal pa convertise nun «patrimoniu». Nesti contestu danse les negociaciones qu’orixinen el presente alcuerdu de gobiernu”.

El comunicáu afonda nel fechu de que “nel testu del alcuerdu abonden les declaraciones d’intenciones xenerales y escasien o nun esisten les concreciones sobre les midíes, actuaciones, aplicaciones y plazos que tendríen que guiar la política llingüística del nuevu gobiernu”. La Xunta atalanta que se tien qu’entender que “la non esplicitación de midíes concretes implica la non esistencia d’eses midíes nel pautu de gobiernu”.

El comunicáu de la Xunta pola Defensa de la Llingua sigue diciendo que “si énte l’alcuerdu ente estes mesmes fuercies polítiques en 2003 la Xunta amosó una postura enforma crítica, esti nuevu pautu confirma les impresiones que tuviéramos daquella: ye imposible afitar un procesu de normalización ensin una voluntá y compromisos concretos, que nun existen tampoco anguaño”.

Por tolo mentao, l’asociación cívica de defensa de los asturianofalantes valora “de forma especialmente negativa la falta de referencies a la necesidá de normalización de la llingua, un términu omnipresente nel pautu de 2003”. Igualmente “desapaecen les referencies al desarrollu de la Llei d’Usu” y, nesi sen, “el testu del alcuerdu ye en tou casu una llectura parcial y restrictiva de lo contenío na Llei d’Usu y Promoción del Asturianu vixente dende l’añu 1998 y polo tanto d’obligáu cumplimientu”.

Pala Xunta, “l’asturianu ye la única llingua del Estáu español que nun ye oficial, lo que ye causa fundamental de la situación actual de grave retrocesu, de perda de falantes y ámbitos d’usu. La falta d’un marcu llegal que garantice los derechos llingüísticos básicos y una presencia digna nel sistema educativu, nes alministraciones y medios de comunicación públicos, toponimia, etc., lleva irremediablemente a la desapaición del idioma a curtiu o mediu plazu”.

Esti procesu “nun pue tornase con polítiques cosmétiques, sinón con aquelles qu’avancen hacia la dignificación de la llingua y la so equiparación llegal col restu de llingües del Estáu. Si la intención del nuevu gobiernu fuera la d’afitar el futuru del idioma tendría qu’esplicitase la voluntá de construir consensos pa la inclusión de la oficialidá na prósima reforma del Estatutu d’Autonomía. Obviar el problema de la non oficialidá, dicir qu’agora nun toca pa llegar a alcuerdos de gobiernu, non solo nun val de solución sinon que val pa consolidar más tovía l’escenariu actual de marxinación y falta de derechos”.

Dende la Xunta pola Defensa de la Llingua Asturiana va siguise “trabayando pa sumar a tolos axentes políticos y sociales d’Asturies na defensa d’un patrimoniu común que pertenez a tolos asturianos y asturianes”. Pero tamién se va siguir denunciando, “cola mesma claridá qu’hasta agora, les práctiques polítiques que xeneren prohibiciones, coacciones y ataques contra l’usu de la llingua asturiana, como les qu’anuncia con esti alcuerdu esti gobiernu que ye nuevu nos sos componentes pero que nun apurre nenguna novedá na nefasta política llingüística actual”.

El conceyal de Cultura del Ayuntamientu d’Uviéu, José Suárez Arias-Cachero, qu’afalagó’l compromisu del Rector faciendo alcordanza alrodiu de la so intervención n’asturianu nel Primer Conceyu Internacional de la Llingua Asturiana de qu’estes coses nun salen gratis n’Asturies, ufrió una intervención enforma política, debuxando una fonda semeya del país onde “lo que importa nun pasa y lo que pasa nun importa”.

José Suarez Arias-Cachero, pernomáu como Felechosa ente l’asturianismu, entamó la so intervención nesti Conceyu Internacional, amosando’l so contenu por inauguralu por ser l’asturianu “nun sólo una de les mios pertenencies más queríes, sinon que la so reivindicación ye clave nel mio trayeutu vital”.

Felechosa dió la bienvenía la xente “que vien d’otres partes d’España, especialmente de les tierres ástures, Lleón, Zamora, Salamanca, Miranda” y a la xente “que vien de fuera, sobremanera a Michael Metzeltin, Paul O’Neill, Antionio Barrolo y Max Pfister”, pero tamien a la “xente de casa” a la qu’agradeció’l trabayu que faen pela llingua.

Pero lo más aplaudío de la so intervención foi cuando contó daqué que lu ablucara: “hai unos meses llei que según un sondéu reciente, ún de cada cuatro ingleses, pensaba que Churchill y Ghandi yeren personaxes lliterarios y qu’ensin embargu Sherlock Holmes y Robin Hood fueren homes de carne y güesu. Dexome asustáu que tantu inglés confundiera d’esa manera a figures cimeres de la so historia coles de la lliteratura. Pues bien, conozo un país que nun sólo confunde a los sos personaxes, sinon que desconoz, nel sentíu de que nun ye a reconocela, la so llingua”. Y fizo alcordanza del so amigu Chus Pedro, pa dexar afitao que “somos una sociedá que vive, fala, canta, escribe y suaña nuna llingua que nun esiste. Y nun esiste porque buena parte de la xente que la fala nun la reconoz como propia”.

El conceyal de Cultura del PP n’Uviéu dexó nidia la so calidá de lliberal y la so creencia na llibertá llingüística al tiempu que-yos dicía a los presentes que nun tuvieren esmolición si esti Conceyu nun apaecía nos medios de comunicación: “N’Asturies nunca pasa nada, porque lo que importa nun pasa y lo que pasa nun importa”.

Arias-Cachero finó la so intervención afitando la seguranza de só en que los prósimos mil años de la llingua “van facese con tres T: la del Talentu, la de la Tecnoloxía y la de la Tolerancia”.

El Conseyu políticu d’Izquierda Xunida (IX) perafitó’l pautu de Gobiernu col PSOE por una bultable mayoría con 126 votos a favor (90,65%), 9 a la escontra (6,47%) y 4 abstenciones (2,48), según informó la coalición nuna nota de prensa. Según las intervenciones realizadas por el coordinador xeneral d’IX, Jesús Iglesias, y los secretarios d’organización y comunicación, Angel González y Pablo Prieto, el “pautu permite afrontar la crisis económica dende la izquierda; garantiza más izquierda nel Gobiernu y supón un cambiu políticu n’Asturies”.

La coalición atalanta que la so entrada nel Gobiernu “garantiza que l’aición de gobiernu tendrá dos obxetivos: dar rempuesta a los problemes de la xente y afrontar los retos de futuru n’Asturies”.

Izquierda Xunida atalanta que la so entrada nel executivu de Vicente Álvarez Areces fadrá “un gobiernu más d’izquierdes qu’asitie l’emplegu, la vivienda y la cohesión social ente las prioridaes y qu’asitie a los servicios públicos como elementos centrales de la su aición política qu’invertirá más n’educación, en sanidá y en servicios sociales”.

La FSA tamién sofita’l pautu

La Comisión Executiva Autonómica de la FSA-PSOE sofitó esti martes de forma unánime’l pautu políticu entre los socialistas e IU-BA-Verdes. La medida tomóse de forma esplícita y como actu de “responsabilidá”, según informó en rueda de prensa’l secretariu xeneral de la Federación Socialista Asturiana, Javier Fernández.