Patrimoniu

L’alcalde de L.lena, Hugo Morán, y la conceyal de Cultura, Paz García, presentaron esta mañana la campaña informativa cola que l’Ayuntamientu tenta difundir la bayura patrimonial y l’interés turísticu de la zona al través de siete folletos nos que tamién se promociona la llingua asturiana. Los folletos van empobinaos a los propios vecinos pa que tengan una conocencia meyor del so conceyu y a los visitantes que quieran informase sobre los atractivos culturales y paisaxísticos de la zona.

Na elaboración y difusión de los folletos colaboren l’Area de Turismu y el Serviciu de Normalización Llingüística del conceyu, que tamién difunde los sos servicios al través d’un de los cartafueyos. En total son siete les publicaciones informatives: dos d’ellos sobre la propia llingua del conceyu,el ya referíu que da a conocer el Serviciu de Normalización y les peculiaridaes de la fala local, y un trípticu col nomemclátor toponímicu del conceyu. Otra de les publicaciones n’asturianu ta dedicada específicamente a la promoción turística de L.lena, embaxo’l títulu: “L.lena colos sentíos”. Los otros folletos consisten nun xuegu de papiroplexa colos monumentos del prerrománicu asturianu y un folletu turísticu de diez páxines, editáu en castellano, nel que se recueyen llugares d’interés, hestoria, recursos, gastronomía ya información práctica del conceyu.

La conceyala de Cultura Paz García, desplicó esta mañana na presentación que’l proyectu pal desenvolvimientu de la cultura local y la so aplicación al turismu valió pa la contratación de desempleaos que trabayaron na realización de actividaes vinculaes al desarrollu potencial del conceyu, xeneradores d’actividá y empléu.La responsable de Cultura señaló nesi sen que “los oxetivos del programa son la puesta en valor de los recursos culturales y turísticos y la promoción del patrimoniu históricu, artísticu, cultural y etnográficu al través del turismu”.Nuna prósima fase tentará dinamizase l’actividá económica al través del desarrollu turísticu y cultural, cola implicación, nel futuru, de los empresarios del conceyu nel proyectu.

Per otru llau, ensin ser una publicación específica de la campaña, la conceyal Paz García vinculó tamién al proyectu de promoción del conceyu el llibru sobre la arquitectura de la ruta pelegrina de San Salvador: “El románicu en L.lena y Mieres”, editáu n’abril pol Ayuntamientu. La publicación, en castellano y asturiano, ye’l frutu de la tesis doctoral del hestoriaor Maximino Pando.

El director de Promoción Cultural y Política Llingüística, Carlos Madera, presentó esta mañana na sé de la conseyería, la web que recueye los archivos y el patrimoniu documental d’Asturies. Desenvuelta dende la propia Conseyería de Cultura, la páxina “Archivos de Asturias” tenta poner a disposición d’investigadores y usuarios tolos recursos esistentes alrodiu de los fondos arhivísticos de la nuestra comunidá y una guía censu de los mesmos col fin de facilitar l’accesu a esta parte importante de la nuestra memoria documentada.

La web apaez dividida en varies secciones. Dende la nomada “Censo guía del patrimoniu documental”, puede accedese a información sobre los Archivos y los fondos documentales d’Asturies que tán censaos dende l’añu 2002. Los datos qu’ofrez son una primera aprosimación a la documentación producida y recibida por diverses instituciones. Na sección “Archivos municipales” ufiértense los fondos documentales en dos apartaos, ún de los archivos ya organizaos de los principales ayuntamientos asturianos y otru colos inventariaos nes sucesives campañes de la Conseyería de Cultura. Una tercera sección principal ta dedicada al Archivu Hestóricu d’Asturies y esti apartáu proporciona información sobre caún de los fondos y colecciones documentales procedentes de casi un cientu d’instituciones y entidaees públiques y privaes que s’alcuentren nel principal afayu de documentos de la nuestra comunidá.

La web de la conseyería de Cultura ufierta ferramientes como buscadores y enllaces pa guetar información tanto de los archivos rexistraos na páxina como d’otros relacionaos. Na web ufiértase al empar información xeneral sobre la situación de los distintos elementos del patrimoniu documental asturianu y los fondos inventariaos o por inventariar.

Archivos d’Asturies

El plenu del Conseyu de Patrimoniu Cultural d’Asturies aconceyáu esti llunes 9 de mayu n’Uviéu algamó ente otros alcuerdos el de dar el vistu bonu al proyectu de restauración de la ilesia prerrománica de San Miguel de Lliño del que ye responsable l’arquitectu Fernando Nanclares. Les obres proyectaes pal monumentu y el so entornu tienen un presupuestu de 80.283,26 euros y van contar con un seguimientu arqueolóxicu en toles sos estayes. Patrimoniu tamién aprebó l’ampliación del campus de Barredo en Mieres y la remozura de la casa más vieya d’Uviéu, la de La Rúa.

El Plan Especial d’Ampliación del campus mierense cuenta cola aprebación del Conseyu de Patrimoniu na que se considera que los elementos protexíos del entornu del antigu Pozu Barredo tienen un tratamientu adecuáu pa la so conservación. Tocante a la Casa la Rúa, dase por bonu un estudiu pa la so remozura y destín como edificiu pa eventos de calter cultural y social y, nes sos dos últimes plantes, como archivu y vivienda.

Otros asuntos trataos nel últimu plenu del Conseyu de Patrimoniu foron la declaración como Bien d’Interés Cultural (BIC) de la Casa de Los Guzmán de Vegadeo (San Martín dos Ozcos y la propuesta d’incoación, tamién como BIC del Palaciu de San Román en Panes (Peñamellera Baxa. Pa lo último Patrimoniu revisó’l proyectu de rehabilitación pa usos culturales del ábside y edificiu adxuntu de Santa María de Villamayor (Piloña).

El númberu 11 de “Liño” presentóse ayer nel Aula Magna de la Unviersidá cola presencia del rector Juan Vázquez. Nel actu de presentación espunxéronse los conteníos d’esta nueva entrega de la segunda época como revista, unos conteníos que van siguir teniendo como referencia l’estudiu del patrimoniu artísticu. Ente los trabayos publicaos nesti númberu 11 ufiértase-y un protagonismu especial al monumentu prerrománicu que da nome a la publicación, trátase d’un ampliu artículu nel que se reflesiona sobre la estructura orixinal del edificiu al través de los datos arqueolóxicos y del estudio metrolóxico. Xunto a esti trabayu abórdense otres cuestiones relacionaes col patrimoniu hestóricu-artísticu d’Asturies, con trabayos sobre’l Monesteriu de San Pelayo d’Uviéu, el palaciu de Miranda-Valdecarzana de Grao, etc.) y col etnográficu (mobiliariu popular de Gozón ), ensin escaecer otres manifestaciones artístiques d’ámbitu ibéricu como’l trabayu referíu a “La sacristía catedralicia en los reinos hispanos”.

Nel actu de presentación los responsables d’esta segunda etapa de “Liño” afirmaron que la revista “allampia por convertise nun mediu de comunicación ente’l Departamentu que la xenera y la sociedá” poro, na propia revista dedícase un capítulu a informar sobre les actividaes investigadores y culturales organizaes a lo llargo l’añu académicu.

El conceyu d’Andecha Astur de Corvera presentó un pliegu d’alegaciones al estudiu en detalle del plan Sapu VI pa la urbanización de terrenos nel llugar de Truyés y pide la paralización del mesmu poles deficiencies detectaes nél. Les principales pegues del proyectu urbanísticu tán pa la organización nacionalista en que nun se contempla la protección de los elementos con valir etnográficu del entornu y que la tipoloxía de los edificios que se quier construir nun respeta la identidá cultural d’esta zona tradicionalmente rural

El riesgu pa la integridá d’un núcleu bayurosu nel so patrimoniu etnográficu y hestóricu como ye’l del llugar de Truyés vien siendo advertíu d’abenayá pola Plataforma Ciudadana de Corvera y va alpenes un par de selmanes la propia Conseyería de Cultura reconoció que nel entornu afectáu polos planes urbanísticos del Principáu hai elementos protexíos embaxo la Llei de Patrimoniu y otros como afayos arqueolóxicos.

Andecha Astur de Corvera entiende agora que “esti estudiu de detalle nun tien validez pola so falta de sensibilidá cultural, medioambiental y social, amás de presentar deficiencies administratives”. Nun comunicáu emitíu por esti motivu el conceyu corveranu d’AA cree que’l proyectu “pueda ser desaprobáu pola CUOTA debío a les deficiencies que presenta” y afirmen que “la organización nacionalista resérvase el derechu a proceder a otres instancies si l’Ayuntamientu de Corvera desestima les alegaciones presentaes”.

El Plenu del Conseyu de Patrimoniu Hestóricu decidió na so última reunión proponer delles zones con interés pol so entornu patrimonial pa la so esclusión énte la instalación de futuros parques eólicos. Ente les zones propuestes tán l’entornu del Monte Narancu y el vai de Valdediós, asina como otres zones bayuroses n’edificios hestóricos y afayos arqueolóxicos. Nel conceyu d’esti grupu de trabayu fixáronse les estayes de protección de la mina romana de A Freita y declaróse bien d”interés cultural a Os Teixois de Taramunde. Tamién se dio’l vistu bonu a la nueva iluminación del santuariu de Cuadonga.

La comisión que vela pola preservación del patrimoniu hestóricu asturianu nel so conceyu, presidíu pola conseyera de Cultura, Ana Rosa Migoya, decidió amás de les resoluciones citaes aprebar el proyectu pa la restaruración y acondicionamientu como agospiamientu turísticu del torrexón medieval de Vil.lamourus en Valdés.

Otros alcuerdos adoptaos nel plenu foron la llendación del entornu de protección del Palaciu de Cienfuegos na Puela d’Al.lande y l’autorización pa les escavaciones arqueolóxiques nel entornu de la cantera de Castiel.lu de la Barca en Tinéu.

Los integrantes de la Plataforma Cultural Corverana amuésense parcialmente contentos de que la Conseyería de Cultura del Principaú reconoza’l valir hestóricu del núcleu rural de Truyés y se comprometa a garantizar la conservación de construcciones y elementos tradicionales del llugar dientro’l proyectu urbanísticu SAPU VI. Nun informe de Cultura considérase que’l núcleu central del pueblu ta protexíu pola Llei de Patrimoniu Cultural del Principáu.

La plataforma vecinal de Corvera siéntese satisfecha en parte por esti informe inda s’amuese esmolecida porque nun se faga nél referencia a los elementos de posible valir arqueolóxicu de la zona que se pidíen protexer y catalogar.

La conseyería admite nel so informe que la decisión final sobre la situación d’esti núcleu nel plan SAPU VI ta en manes del Conseyu de Gobiernu del Principáu.

De centru de cultivu del espíritu a complexu d’ociu y agospiu. L’Institutu de Turismu d’España, organismu dependiente de l’Alministración central, y el Principáu roblaron güei n’Uviéu un alcuerdu pol que se destinen 20 millones d’euros pa reconvertir el monasteriu de Corias en parador nacional d’equí a 2008. L’edificiu de Cangas del Narcea caltendrá la so estética herreriana ya incorporará más lluminosidá, piscines termales y campu de golf.

Nesos términos presentó esti mediudía la reforma el presidente’l Principáu, Vicente Álvarez Areces, que llegó a falar de “refundación” del vieyu edificiu monacal mercáu pola Alministración autonómica hai agora cinco años pa da-y un nuevu puxu al calor del plan pa la reactivación de les comarques mineres.

Agora, el monasteriu de Cangas renovará la so cara acordies con un proyectu del arquitectu José María Pérez Peridis ya intentará recuperar l’amplitú d’espacios y la lluminosidá perdíes na habilitación del monasteriu como centru d’enseñanza, qu’obligó a compartimentar l’edificiu.

Un campu de mini golf, una piscina termal y les correspondientes habitaciones convertirán Corias nun centru d’agospiu turísticu que l’Estáu quier emplegar pa reactivar la economía en declive de la comarca de Cangas, una de les razones que llevó a l’Alministración central a implicase nel remocicamientu’l monasteriu, d’estética herreriana y unos 23.000 metros cuadraos.

Documentar vezos y costumes ancestrales pa poder caltenelos na vida moderna. La Conseyería de Xusticia, Seguridá Pública y Relaciones Esteriores ultima una campaña pa ‘sacar del caxón’ el drechu consuetidunariu asturianu y promover la so sobrevivencia. Pa ello plantega la recuperación de la documentación agora espardida nes parroquies rurales y la so posible centralización nel Archivu hestóricu d’Asturies.

Según quedó asoleyao nuna entrevista que güei mantuvieron el conseyeru de Xusticia, Francisco Javier García Valledor; la directora xeneral del ramu, Pilar Jiménez; y el presidente de la Federación Asturiana de Parroquies Rurales, José Fernández, el 90 por cientu de la documentación ta inda por esplorar, y en dellos casos contién información sobro les primeres esperiencies municipales nel sieglu XVIII.

Son llibros d’actes, memories de contabilidá y testos que falen d’engarradielles vecinales qu’afitaron les normes básiques de convivencia ente los asturianos qu’habitaben el mediu rural -la inmensa mayoría hasta’l sieglu XX- a partir de la costume de cada llugar, acatada polos vecinos con rangu de llei.

Pero pesie a la riqueza d’esos fondos documentales, José Fernández alertó güei de que munchos de los vieyos ‘papeles’ acumulaos nes parroquies rurales tán deteriorándose ensin igua por mor dela inacción política, y otros paecen yá irrecuperables al tar yá nes colecciones de propietarios individuales.

Pa enveredar la situación, la conseyería que dirixe Valledor empezará por entamar unes xornaes de divulgación que dexen clara la relevancia de los documentos nos que s’asoleya el drechu consuetudinariu asturianu, y pondráse a trabayar darréu nuna posible centralización de los fondos documentales de les parroquies rurales, que mantendríen la titularidá de los ‘papeles’.

Un gran pasu alantre. L’equipu qu’investiga los restos humanos afayaos na cueva d’El Sidrón, allugada en Piloña, protagoniza un importante avance científicu al obtener ya interpretar, por primer vegada, información xenética de los neandertales que poblaron la península Ibérica. Asina lo comunicaron esti mediudía los responsables de la investigación, qu’alcuentra semeyances ente los primitivos habitantes d’Asturies y los del restu d’Europa.

Pa entender la relevancia’l pasu dau polos científicos qu’estudien los restos d’El Sidrón -güesos y dentames de 43.000 años d’antigüedá-, son útiles les comparances: Sólo seis yacimientos de tol mundu proporcionaren hasta agora restos de los que llueu pudo estrayese y analizase l’ADN de neandertales, y El Sidrón ye l’únicu d’ellos qu’inda sigue escavándose. Amás, ye la primer vegada qu’un laboratoriu que nun seya inglés o alemán cuaya un procesu paleobiolóxicu tan técnicamente complicáu.

Asina lo espresa’l responsable de la estaya antropolóxica de les escavaciones d’El Sidrón, l’investigador del Conseyu Superior d’Investigaciones Científiques Antonio Rosas, coautor del logru científicu xunta’l profesor de la Universidá de Barcelona Carles Lalueza. En mayu pasáu, el propiu Rosas anunciare n’Uviéu la inminencia d’un descubrimientu de relieve mundial a partir del estudiu de los restos d’El Sidrón.

Como principal conclusión del afayu científicu, l’estudiu de les refugayes humanes atopaes na cueva de Borines permite avanzar que les estremaes poblaciones de neandertales qu’habitaron Europa yeren xenéticamente asemeyaes, dende l’actual España hasta’l Cáucasu. Como consecuencia, los espertos qu’estudien El Sidrón afiten que los neandertales tuvieron un orixe común hai unos 250.000 años, amás de descartar una mecigaya xenética ente neandertales y ‘homo sapiens’, especies que convivieron nel tiempu.

Los restos humanos afayaos n’El Sidrón -850 pieces que permitieron identificar a cinco individuos- tán siendo estudiaos nel Muséu de Ciencies Naturales de Madrid, rexentáu pol CSIC. La escavación ya investigación del yacimientu de la cueva de Piloña, cordinada pol caderalgu Javier Fortea con participación de les Universidaes d’Uviéu y Barcelona, ta sufragada pol Principáu con 300.000 euros hasta 2006.

Archivu. L’equipu del Sidrón enfótase n’atopar nuevos restos humanos nun segundu yacimientu