Patrimoniu apreba la restauración de Lliño y la remozura de la Casa la Rúa d’Uviéu

El plenu del Conseyu de Patrimoniu Cultural d’Asturies aconceyáu esti llunes 9 de mayu n’Uviéu algamó ente otros alcuerdos el de dar el vistu bonu al proyectu de restauración de la ilesia prerrománica de San Miguel de Lliño del que ye responsable l’arquitectu Fernando Nanclares. Les obres proyectaes pal monumentu y el so entornu tienen un presupuestu de 80.283,26 euros y van contar con un seguimientu arqueolóxicu en toles sos estayes. Patrimoniu tamién aprebó l’ampliación del campus de Barredo en Mieres y la remozura de la casa más vieya d’Uviéu, la de La Rúa.

El Plan Especial d’Ampliación del campus mierense cuenta cola aprebación del Conseyu de Patrimoniu na que se considera que los elementos protexíos del entornu del antigu Pozu Barredo tienen un tratamientu adecuáu pa la so conservación. Tocante a la Casa la Rúa, dase por bonu un estudiu pa la so remozura y destín como edificiu pa eventos de calter cultural y social y, nes sos dos últimes plantes, como archivu y vivienda.

Otros asuntos trataos nel últimu plenu del Conseyu de Patrimoniu foron la declaración como Bien d’Interés Cultural (BIC) de la Casa de Los Guzmán de Vegadeo (San Martín dos Ozcos y la propuesta d’incoación, tamién como BIC del Palaciu de San Román en Panes (Peñamellera Baxa. Pa lo último Patrimoniu revisó’l proyectu de rehabilitación pa usos culturales del ábside y edificiu adxuntu de Santa María de Villamayor (Piloña).