Patrimoniu

L’agrupación local d’Andecha Astur d’Avilés fexo públicu un comunicáu nel qu’amuesa la so posición énte’l discutiniu entamáu sobre la posibilidá d’encamenta-y a la UNESCO la declaración como Patrimoniu de la Humanidá del conxuntu hestóricu de la villa. Los nacionalistes consideren que’l cascu vieyu de la ciudá nun reún los requisitos establecíos pola UNESCO y que de querer facese dalgo pa conservar el conxuntu patrimonial inda esistente habíen buscase alternatives y una intervención integral pal caltenimientu del entornu urbanu y rural con valor etnográficu, arqueolóxicu o arquitectónicu.

Andecha entra asina nel alderique suscitáu por unes declaraciones del urbanista Carlos Ferrán nes que proponía entamar la solicitú de declarar el conxuntu hestóricu avilesín como Patrimoniu de la Humanidá. Los nacionalistes censuren la respuesta de los tres grupos con representación municipal, tanto la del PSOE y IX-BA, que refuguen por “utópica” esa posible iniciativa, como’l PP, que la sofita.

A.A. considera qu’enantes de posicionase énte un asuntu como esi había que remembrar los requisitos establecíos pola UNESCO pa que determináu conxuntu patrimonial pueda optar al so reconocimientu: aportar un testimoniu únicu, o escepcional d’una civilización o d’una tradición cultural desaparecía; exercer una influencia considerable, nun períodu nuna estaya cultural determinada sobre’l desarrollu de la arquitectura, les artes monumentales, el planeamientu urbano o la creación de paisaxes; constituir un exemplu sobresaliente de establecimientu humanu o d’ocupación del territoriu representativu de cultures tradicionales, sobre too cuando son vulnerables a mutaciones irreversibles; ofrecer un exemplu eminente d’un tipu de construcción o de conxuntu arquitectónicu o de paisaxe qu’ilustre un períodu significativu de la historia humana; constituir una obra maestra del xeniu creador del ser humanu; aparecer directa o materialmente asociáu a acontecimientos o tradiciones vives, idees, creencies o obras artístiques y lliteraries que tengan una significación escepcional. Pa l’agrupación avilesina d’Andecha el casu del cascu vieyu de la villa nun s’axusta a nengún d’estos principios nin a les condiciones previes: responder na so concepción, materiales y execución al valor d’autenticidá o gozar de protección xurídica y mecanismos de xestión adecuaos p’asegurar la so conservación.

La organización nacionalista propón empara siguir caminos alternativos como los entamaos en Canaries nel sen de la creación d’una rede de centros hestóricos, qu’en xunto si podíen optar a ser declaraos bienes de protección universal y tamién a intervenir de manera directa na conservación y caltenimientu de tolos edificios con valor patrimonial, dende les construcciones más vieyes de la ciudá a les que pertenecen al periodu del desenvolvimientu industrial d’Avilés. Nesi sen, A.A. remembra lo sucedío nes últimes décades con edificaciones y sitios con valor hestóricu, destruíos o abandonaos a la so suerte polos distintos gobiernos locales y piden la remanecencia d’Avilés como “llugar na élite de ciudaes culturales, como lo fue nel so día, recuperando el so esplendorosu pasáu, y aprovechar esa sinerxa como dinamizadora d’inversiones y entamu d’un procesu de recuperación del conxuntu del Conceyu”.

Dende esti miércoles 20 va tar abierta nel Parque Arqueolóxicu de la Campa Torres, en Xixón, una esposición con materiales estraíos de les escavaciones del castru de Chao San Martín, en Grandas de Salime. Ente los conxuntos recuperos nel xacimientu castreñu resalten los fragmentos y pieces de cerámica, conocíes como “Terra Sigillata”, abondoses nesti y otros poblaos asturianos.

La cerámica nomada polos arqueólogos “Terra Sigillata” considerábase un tipu de cacía de luxu na sociedá romana altoimperial. El castu de Chao San Martín ye ún de los xacimientos arqueolóxicos onde más pieces d’esti tipu de cerámica s’afayaron, hasta algamar les más de 1.300, de les que s’ufierten alrodiu de 80 na esposición de la Campa Torres.

L’amuesa va cuntar, amás de colos materiales espuestos, con un audiovisual sobre’l xacimientu de Grandas y el mundu castreñu, y completaráse con un percorríu espositivu en diversos paneles esplicativos al través de los que’l visitante va poder reconocer abondos datos hestóricos sobre’l Chao de San Martín. L’amuesa va tar abierta hasta’l prósimu 30 d’ochobre.

El director xeneral de Promoción Cultural y Política Llingüística Carlos Madera anunció esti martes 19 l’alcuerdu algamáu col Ministeriu de Cultura y l’aprebación per parte del departamentu que dirixe Carmen Calvo d’una partida de 14,3 millones d’euros destinada a tresformar l’edificiu de l’antigua cárcel d’Uviéu na sé del futuru Archivu Hestóricu d’Asturies. El nuevu edificiu podía abrir les sos puertes en 2008, si se cumplen les previsiones de la Conseyería de Cultura.

El nuevu Archivu Hestóricu va ser una realidá después de bien de tiempu navegando ente les duldes y habrá dexar la so actual ubicación nel vieyu monesteriu de les Pelayes pa da-y un destín definitivu al edificiu de l’antigua prixón provincial. Tres l’aprebación del dineru necesariu pa entamar el proyectu per parte del Ministeriu, que va destinar ya nesti añu 100.000 euros pal empiezu de les obres, l’Archivu Hestóricu d’Asturies va poder disponer de la capacidá necesaria p’abellugar unos fondos qu’hasta agora nun cuntaben con ella. Les previsiones de la Conseyería de Cultura ye que na nueva sé puedan espurrise hasta 54 cuatro kilómetros d’estanteríes de documentos nes ales del edificiu de l’antigua cárcel, un edificiu que conservaría la llinterna y la cúpula orixinales, asina como delles celdes de presos pa remembrar el so usu desque se inauguró en 1905.

El nuevu Archivu Hestóricu d’Asturies puede ser una realidá en 2008 y pola so capacidá y el volume de los sos fondos convertiríase nun de los más bayurosos y importantes del estáu.

Per otru llau, Carlos Madera refirióse a la prósima visita que va facer a Asturies la ministra Carmen Calvo col oxetu de firmar un alcuerdu pol que’l so departamentu va empobinar 10 millones d’euros pal proyectu de Tito Bustillo, destinaos al futuru centru d’interpretación de la cueva.

La conseyera de Cultura y Comunicación Social del Principáu, Ana Rosa Migoya, asistió esta mañana en Comillas, xunto al restu los titulares d’esta estaya de les 17 comunidaes autónomes,al conseyu sectorial convocáu pol Ministeriu de Cultura. Na reunión, la ministra Carmen Calvo encamentó a les comunidaes autónomes a cumplir col so 1 por cientu destináu pal patrimoniu, talo fai el gobiernu central.Calvo propunxo tamién una colaboración coles comunidaes pa equipar les biblioteques públiques con nuevos fondos, una idea que la conseyera Migoya emponderó.

La Ministra llanzó esa propuesta, aceptada por toles comunidaes, pa participar na adquisición de fondos bibliográficos destinaos a les biblioteques de titularidá estatal, xestionaes poles comunidaes autónomes. Nel casu d’Asturias, esti apoyu económicu del Ministeriu, beneficiaría a les biblioteques públiques d’Uviéu y Xixón.L’ayuda va empezar recibise esti añu al través d’una subvención del Ministeriu y en 2006, la previsión ye firmar convenios coles autonomírs, “que dean un calter más estable a esta aportación”, señaló la conseyera asturiana Ana Rosa Migoya. La cuantía financiada pol Estáu va tar en relación al esfuerzu económicu de cada comunidá. “Pal Gobiernu d’Asturies esta ye una bona noticia”, afirmó Migoya, “ya que después d’ años de falta d’apoyu por parte del Estáu hacia estos equipamientos, abrimos una nueva etapa de colaboración y apoyu en dalgo tan importante como la renovación y nueves adquisiciones de fondos”, dixo la conseyera.

La ministra de Cultura, Carmen Calvo, y el director xeneral de

Belles Artes, Julián Martínez , informaron esta mañana sobre los programes d’aplicación del 1 por cientu cultural. Una vez aprobaos los criterios d’ aplicación d’estos fondos, tán desarrollándose les reuniones de les comisiones mistes con Vivienda y Fomentu y aína van facese públicos los proyectos que nesti añu 2005 s’entamen con cargu a este programa. Na reunión, la ministra encamentó a les comunidaes autónomes a cumplir col so 1 por cientu destináu pal patrimoniu, talo fai el gobiernu central.Calvo afirmó que “nun diba ser fácil entender polos ciudadanos” el que l’executivu del estáu contribuya col so tantu por cientu y los gobiernos autonómicos nun lo fagan “como lo tienen establecíos nes sos lleis”.

Na reunión, Carmen Calvo informó a los representantes de les autonomías sobre los alcuerdos algamaos nel Conseyu Ministros de la Unión Europea (UE), celebráu los díes 23 y 24 de mayu, asina como de la reunión de los ministros iberoamericanos de cultura, celebrada el 13 y 14 de xunu.

Tamién s’aprobó la constitución d’un grupu de trabayu de comunidaees autónomes sobre estadístiques culturales. El so oxetivu ye l’estudiu del panorama museísticu nos distintos ámbitos territoriales y pal análisis de la inversión pública en materia de cultura. Aparte d’esta cuestión, nel alcuentru hubo unanimidá na mayoría de los asuntos trataos ente los titulares de les conseyeríes de Cultura y el Ministeriu.

El prósimu conceyu sectorial va ser pa tratar la designación del titular autonómicu de Cultura qu’acompañe a Carmen Calvo nel prósimu Conseyu de Ministros de la Unión Europea, un asuntu nel qu’amosaron les sos discrepancies delles comunidaes, ente elles el País Vascu y otres embaxo gobiernu del PP.

El director xeneral de Promoción Cultural y Política Llingüística, Carlos Madera, anunció ayer na visita que compartió colos medios a los restos afayaos nel claustru del Muséu Arqueolóxicu, que’l bastión de muralla descubiertu va pasar integrase al itinerariu espositivu del propiu muséu. Tanto Madera, como los espertos que lu acompañaben, resaltaron la importancia del afayu pa conocer los oríxenes d’Uviéu como ciudá.

Les primeres observaciones de los arqueógos tres el descubrimientu casual de los restos valiéron-yos pa comprebar el valor del afayu, al que relacionaron col sistema defensivu entamáu por Alfonso II alrodiu del so palaciu y los principales templos y conventos de la capital del so reinu. La semeyanza d’esti bastión colos otros restos de la muralla que se conserven nes prosimidaes y n’actual cai Xovellanos, confirmaría les hipótesis espuestes por investigadores como Juan Uría Ríu a propósitu del Uviéu d’Alfonso II.

Carlos Madera anunció la intención de la Conseyería d’integrar de la manera na qu’aconseyen los espertos los restos de la muralla dientro’l itinerariu espositivu del Muséu Arqueolóxicu y l’entamu de nuevos sondeos alrodiu del claustru pa tentar completar el descubrimientu con posibles nuevos restos.

La Plataforma Cultural de Corvera considera un fechu importante la iniciativa de la Conseyería de Cultura de reconocer la esistencia d’un afayu aqueolóxicu na zona de Truyés y la solicitú a la promotora qu’entama operaciones inmobiliaries ende de facer el correspondiente estudiu enantes de prosiguir les obres. Esti colectivu vecinal venía de cuantayá denunciando los llabores urbanísticos nuna zona onde había constancia d’un xacimientu prehestóricu y tamién advirtiendo del peligru pa la conservación del entornu patrimonial de Corvera de les obres de les constructores.

Según informaron fontes de la Plataforma corverana, el Serviciu de disciplina Urbanística recibió el 3 de mayu pasáu un informe de la Conseyería de Cultura “ dando cuenta de la esistencia d’una estaya arqueolóxica na zona de Truyés. Facíalo respondiendo a una denuncia entamada por miembros de la Plataforma pola Defensa del Patrimoniu Cultural de Corvera , na que solicitaben a la Conseyería que tuviere en cuenta una zona d’especial interés arqueolóxicu dende l’aparición d’un cantu talláu del Paleolíticu Inferior nes cercaníes del pueblu de Truyés, y recoyíu na Carta Arqueolóxica de Corvera ( 1996 ).Agora sábese que la Conseyería de Cultura ve “ la necesidá de elaborar un Proyectu Arqueolóxico en la zona “ requiriéndo-y a la empresa constructora la realización previa d’esti estudiu enantes del iniciu de les obres na estaya que determine la propia Conseyería.

Pa la Plataforma Cultural esti fechu ye importante porque corrobora la esistencia de posibles xacimientos arqueolóxicos na zona de Truyés como venía defendiendo nos últimos meses. El colectivu vien denunciando de cuantayá les operaciones urbanístiques nuna zona que considera de gran valir etnográficu y hestóricu. Otros grupos del conceyu, como l’agrupación local d’Andecha Astur, tamién se sumaron a estes llamaes a l’atención y recientemente presentaron una denuncia nel Ayuntamientu de Corvera pola destrucción d’una panera y una casa tradicional mariñana nel entornu de les obres d’una empresa constructora. Pa estos colectivos les operaciones urbanístiques desenvueltes na zona dientro’l proyectu SAPU ponen en peligru el patrimoniu d’esta fastera rural de Corvera.

Plataforma pola Defensa del Patrimoniu de Corvera

El Muséu Etnográficu del Pueblu d’Asturies acaba d’adquirir cinco cartelos litográficos pa la so colección referíos a la guerra civil, la emigración y l’esiliu a América. Les pieces que van presentase esti miércoles 22 nel recintu museísticu van poder apreciase nuna esposición que va tar abierta al públicu nos prósimos meses. Ente los cartelos resalten dos obres del conocíu dibuxante republicanu xixonés, German Horacio, fíu del escritor Pachín de Melás, una d’elles un cartelu del Frente Popular d’Asturies y otru relacionáu col esiliu en México.

Les litografíes adquiries pol Muséu Etnográficu pa la so colección son un cartelu publicitariu de la “Compañía Hamburg Sud-Amerikanische”, qu’operaba en 1910 ente Hamburgu y América del Sur, recoyendo pasaxeros n’otros puertos europeos como’l d’El Musel y ta donáu por Consuelo Miyar Gancedo, de Priesca (Villaviciosa).Otru cartelu litográficu, relacionáu cola emigración asturiana a América ye’l qu’ufierta’l de la “Agencia de información y despacho de pasajes para emigrantes de Valentín Santa Eulalia Blanco, de Boal” anunciando “Líneas de vapores de correos rápidos para Habana, Panamá, Perú, Chile, Río Janeiro, Santos, Montevideo y Buenos Aires” de la Compañía Norddeutscher Lloyd, Bremen. Lit. Wilhm. Jöntzen, Bremen. Hacia 1928. 100 x 70 cm., que foi donáu por Angel Bueres Santa Eulalia, de Boal.

Relacionáu cola Revolución d’Ochobre de 1934 ye’l siguiente cartelu, dibuxáu por Tomás en 1937, que se convirtió a partir d’esi añu nun de los más famosos símbolos de la “revolución” y que hasta la fecha nun esistía en nenguna colección publica asturiana. La otra pieza del artista Tomás ye un cartelu litográficu cola lleenda “Asturias / octubre 1934-1937 / Hoy como ayer / el Socorro Rojo de España / cuidará de vuestras familias”. 1937. Gráficas Valencia. 98 x 69 cm.

Les pieces restantes son los cartelos realizados pol dibuxante Germán Horacio (Xixón, 1902 – México D. F., 1975), fíu del escritor Emilio Robles, “Pachín de Melas”, y ensin dulda l’artista más destacáu d’aquella dómina n’Asturias. N’acabando la guerra tuvo d’ esiliase a México onde siguió trabayando como gráficu hasta la so muerte. Ún de los cartelos adquiríos pol muséu ta dibuxáu en Xixón en 1936, al poco d’estallar el conflictu, y el segundu ta fechu en México en 1953. Trátase d’un cartelu litográficu cola lleenda “Frente Popular de Asturias / Aprieta fuerte compañero”. 1936. Litografía Luba, Gijón. 84 x 65 cm. y d’otru cola lleenda “México le espera”, de la Dirección General de Turismo, México, D. F. 1953. Talleres Lito-tipográficos S. Turanzas del Valle. 94 x 70 cm.

La presentación de les pieces va tar a cargu de Francisco Crabiffosse Cuesta, especialista na hestoria de la litografía asturiana y autor del llibru “El color de la industria. La litografía en Asturias (1834-1937)”, y de Pilar González Lafita, xefa de la División de Cultura de la FMCE y UP, y autora de “Las artes gráficas en Gijón, 1890-1920”.

La Plataforma Cultural de Corvera organiza dende esti llunes 20 unes xornaes dedicaes a divulgar el bayurosu patrimoniu popular del conceyu como parte de los oxetivos que mueven a esti colectivu ciudadanu. Una esposición fotográfica y de cerámica local, diverses charres sobre aspectos del patrimoniu etnográficu corverán y asuntos relacionaos cola cultura asturiana, como la cocina tradicional o la participación de la Banda de Gaites del conceyu nel últimu desfile de San Patriciu en Nueva York, igüen el programa d’estes xornaes.

La Plataforma Cultural de Corvera, un colectivu ciudadanu que vien lluchando de cuantayà na defensa del patrimoniu hestóricu y popular d’esti conceyu, entama esti llunes 20 la so I Selmana Cultural con una charra del restaurador Lluis Nel Estrada sobre cocina tradicional asturiana a les 19.00 hores nel centru sociocultural de Los Campos. El martes 21 a les 18.30 nel centru cultural de Tresona l’investigador Bertu Peña da una conferencia sobre “Mitoloxía de Corvera” y a les 19.30 nel mesmu sitiu, Bras Rodrigo, director de la Banda de Gaites de Corvera, va falar de la participación de la so banda nel desfile de San Patricio en Nueva York.

El miércoles 22 na Sala d’Arte del centru cultural de Tresona representantes de la Plataforma Corverana van falar sobre’l patrimoniu hestóricu del conceyu. Al día siguiente ye l’hestoriador Jesús Ángel González Calle l’encargáu de pronunciar una conferiencia sobre “Horros y paneres decoraos nel conceyu de Corvera” a les 19.00 nel centru sociocultural de Cancienes.

La tradicional foguera de San Xuan alrodiu l’embalse de Tresona ye l’actividá principal d’esta I Selmana Cultural pal viernes 24. El sábadu, la Plataforma, organiza una sextaferia pa desrrozar el camín vecinal de La Reguera a Truyés que va rematar con una espicha popular a les 20.00 hores nel pueblu de Truyés.

El Muséu Etnográficu del Pueblu d’Asturies de Xixón entama tolos domingos dende’l pasáu 5 de xuno hasta setiembre visites guiaes n’asturianu al recintu y conciertos de música tradicional nun ciclu tituláu “Música nel Muséu”. El ciclu ta formáu por una retafila de quince actuaciones nes que diverses bandines de músicos ufierten una amuesa de sones populares con instrumentos de la tradición del país. Esti domingu hai un doble conciertu, nel que van intervenir David Varela (curdión), Florentino González (violín) y Mercedes Santos (zanfoña), na primera parte, y n a segunda: Nel Muñiz (gaita) y Sara Fernández (percusiones). La cita ye a les 12.30 la mañana nel Muséu xixonés.

L’espaciu museísticu del Pueblu d’Asturies organiza estes actividaes dientro de la so programación habitual dedicada a difundir la cultura popular asturiana y en colaboración coles escueles de música tradicional anguaño esistentes na nuestra comunidá. El ciclu entamó el pasáu 5 de xunu y va continuar toles mañanes de los domingos hasta’l prósimu 11 de setiembre. Xunta l’amuesa en vivo de música tradicional ufiértase la posibilidá de faer un visita guiada en llingua asturiana al recintu.

Per otru llau, el Muséu de la Gaita, integráu dientro’l conxuntu museísticu del Pueblu d’Asturies de Xixón,sigue amosando nos sos horarios avezaos la esposición “Instrumentos tradicionales del mundo”, una colección de pieces de diverses partes del planeta dedicaes a la música de percusión.

L’agrupación local d’Andecha Astur de Corvera presentó esta selmana énte los xulgaos de guardia d’Avilés una denuncia pol incendiu, presuntamente provocáu, d’una panera nel llugar de Los Campos. Los nacionalistes afirmen que tomen esta iniciativa “al non alcontrar nengún movimientu alministrativu pola parte del Ayuntamientu Corvera pa que s’investigara lo asoleyau”, una actitú que califiquen de “parsimonia como prautica habitual nel equipu de gobiernu cuando se fala d’asuntos culturales”. L’agrupación corverana d’A.A. relaciona esti incendiu, supuestamente provocáu, colos planes urbanísticos pa la zona.

Los autores de la denuncia caltienen nun comunicáu que “esisten pruebes pa que detrás d’esti atentau cultural haya un escuru trámau urbanísticu” y recuerden lo sucedío a finales de 2003, cuando se produxo na mesma panera, agora quemada, l’espoliu d’una de les sos puertes con decoraciones d’altu valir etnográficu y la demolición al llau d’una casona mariñana`, too ello nel entornu de les obres d’una constructora. Entós los fechos denunciáronse nel Ayuntamientu pa que’l conceyu espurriere la correspondiente sanción administrativa a la constructora, ensin ésitu. Empobinada la denuncia a la Conseyería de Cultura, esti organismu sí pidió al Ayuntamientu la suspensión cautelar de les obres, una resolución, qu’a xuiciu d’Andecha, sigue vixente.

Dende va tiempu colectivos ciudadanos como la Plataforma Cultural de Corvera vienen alertando del peligru que suponen los planes úrbanisticos desenvueltos al través de la zona SAPU I de SOGEPSA pa la conservación del patrimoniu etnográficu y hestóricu de la zona rural del conceyu. Esa plataforma considera de magar especialmente preocupante la situación del núcleu rural de Truyés, onde amás de construcciones y elementos de fondu valir etnográficu, atópase un afayamientu arqueolóxicu.