Cultura quier que’l nuevu Archivu Hestóricu d’Asturies pueda abrise en 2008

El director xeneral de Promoción Cultural y Política Llingüística Carlos Madera anunció esti martes 19 l’alcuerdu algamáu col Ministeriu de Cultura y l’aprebación per parte del departamentu que dirixe Carmen Calvo d’una partida de 14,3 millones d’euros destinada a tresformar l’edificiu de l’antigua cárcel d’Uviéu na sé del futuru Archivu Hestóricu d’Asturies. El nuevu edificiu podía abrir les sos puertes en 2008, si se cumplen les previsiones de la Conseyería de Cultura.

El nuevu Archivu Hestóricu va ser una realidá después de bien de tiempu navegando ente les duldes y habrá dexar la so actual ubicación nel vieyu monesteriu de les Pelayes pa da-y un destín definitivu al edificiu de l’antigua prixón provincial. Tres l’aprebación del dineru necesariu pa entamar el proyectu per parte del Ministeriu, que va destinar ya nesti añu 100.000 euros pal empiezu de les obres, l’Archivu Hestóricu d’Asturies va poder disponer de la capacidá necesaria p’abellugar unos fondos qu’hasta agora nun cuntaben con ella. Les previsiones de la Conseyería de Cultura ye que na nueva sé puedan espurrise hasta 54 cuatro kilómetros d’estanteríes de documentos nes ales del edificiu de l’antigua cárcel, un edificiu que conservaría la llinterna y la cúpula orixinales, asina como delles celdes de presos pa remembrar el so usu desque se inauguró en 1905.

El nuevu Archivu Hestóricu d’Asturies puede ser una realidá en 2008 y pola so capacidá y el volume de los sos fondos convertiríase nun de los más bayurosos y importantes del estáu.

Per otru llau, Carlos Madera refirióse a la prósima visita que va facer a Asturies la ministra Carmen Calvo col oxetu de firmar un alcuerdu pol que’l so departamentu va empobinar 10 millones d’euros pal proyectu de Tito Bustillo, destinaos al futuru centru d’interpretación de la cueva.