Andecha Astur pide la protección del conxuntu hestóricu d’Avilés en vez de la so declaración como Patrimoniu de la Humanidá

L’agrupación local d’Andecha Astur d’Avilés fexo públicu un comunicáu nel qu’amuesa la so posición énte’l discutiniu entamáu sobre la posibilidá d’encamenta-y a la UNESCO la declaración como Patrimoniu de la Humanidá del conxuntu hestóricu de la villa. Los nacionalistes consideren que’l cascu vieyu de la ciudá nun reún los requisitos establecíos pola UNESCO y que de querer facese dalgo pa conservar el conxuntu patrimonial inda esistente habíen buscase alternatives y una intervención integral pal caltenimientu del entornu urbanu y rural con valor etnográficu, arqueolóxicu o arquitectónicu.

Andecha entra asina nel alderique suscitáu por unes declaraciones del urbanista Carlos Ferrán nes que proponía entamar la solicitú de declarar el conxuntu hestóricu avilesín como Patrimoniu de la Humanidá. Los nacionalistes censuren la respuesta de los tres grupos con representación municipal, tanto la del PSOE y IX-BA, que refuguen por “utópica” esa posible iniciativa, como’l PP, que la sofita.

A.A. considera qu’enantes de posicionase énte un asuntu como esi había que remembrar los requisitos establecíos pola UNESCO pa que determináu conxuntu patrimonial pueda optar al so reconocimientu: aportar un testimoniu únicu, o escepcional d’una civilización o d’una tradición cultural desaparecía; exercer una influencia considerable, nun períodu nuna estaya cultural determinada sobre’l desarrollu de la arquitectura, les artes monumentales, el planeamientu urbano o la creación de paisaxes; constituir un exemplu sobresaliente de establecimientu humanu o d’ocupación del territoriu representativu de cultures tradicionales, sobre too cuando son vulnerables a mutaciones irreversibles; ofrecer un exemplu eminente d’un tipu de construcción o de conxuntu arquitectónicu o de paisaxe qu’ilustre un períodu significativu de la historia humana; constituir una obra maestra del xeniu creador del ser humanu; aparecer directa o materialmente asociáu a acontecimientos o tradiciones vives, idees, creencies o obras artístiques y lliteraries que tengan una significación escepcional. Pa l’agrupación avilesina d’Andecha el casu del cascu vieyu de la villa nun s’axusta a nengún d’estos principios nin a les condiciones previes: responder na so concepción, materiales y execución al valor d’autenticidá o gozar de protección xurídica y mecanismos de xestión adecuaos p’asegurar la so conservación.

La organización nacionalista propón empara siguir caminos alternativos como los entamaos en Canaries nel sen de la creación d’una rede de centros hestóricos, qu’en xunto si podíen optar a ser declaraos bienes de protección universal y tamién a intervenir de manera directa na conservación y caltenimientu de tolos edificios con valor patrimonial, dende les construcciones más vieyes de la ciudá a les que pertenecen al periodu del desenvolvimientu industrial d’Avilés. Nesi sen, A.A. remembra lo sucedío nes últimes décades con edificaciones y sitios con valor hestóricu, destruíos o abandonaos a la so suerte polos distintos gobiernos locales y piden la remanecencia d’Avilés como “llugar na élite de ciudaes culturales, como lo fue nel so día, recuperando el so esplendorosu pasáu, y aprovechar esa sinerxa como dinamizadora d’inversiones y entamu d’un procesu de recuperación del conxuntu del Conceyu”.