Entama en Corvera la I Selmana Cultural dedicada a la divulgación del patrimoniu popular del conceyu

La Plataforma Cultural de Corvera organiza dende esti llunes 20 unes xornaes dedicaes a divulgar el bayurosu patrimoniu popular del conceyu como parte de los oxetivos que mueven a esti colectivu ciudadanu. Una esposición fotográfica y de cerámica local, diverses charres sobre aspectos del patrimoniu etnográficu corverán y asuntos relacionaos cola cultura asturiana, como la cocina tradicional o la participación de la Banda de Gaites del conceyu nel últimu desfile de San Patriciu en Nueva York, igüen el programa d’estes xornaes.

La Plataforma Cultural de Corvera, un colectivu ciudadanu que vien lluchando de cuantayà na defensa del patrimoniu hestóricu y popular d’esti conceyu, entama esti llunes 20 la so I Selmana Cultural con una charra del restaurador Lluis Nel Estrada sobre cocina tradicional asturiana a les 19.00 hores nel centru sociocultural de Los Campos. El martes 21 a les 18.30 nel centru cultural de Tresona l’investigador Bertu Peña da una conferencia sobre “Mitoloxía de Corvera” y a les 19.30 nel mesmu sitiu, Bras Rodrigo, director de la Banda de Gaites de Corvera, va falar de la participación de la so banda nel desfile de San Patricio en Nueva York.

El miércoles 22 na Sala d’Arte del centru cultural de Tresona representantes de la Plataforma Corverana van falar sobre’l patrimoniu hestóricu del conceyu. Al día siguiente ye l’hestoriador Jesús Ángel González Calle l’encargáu de pronunciar una conferiencia sobre “Horros y paneres decoraos nel conceyu de Corvera” a les 19.00 nel centru sociocultural de Cancienes.

La tradicional foguera de San Xuan alrodiu l’embalse de Tresona ye l’actividá principal d’esta I Selmana Cultural pal viernes 24. El sábadu, la Plataforma, organiza una sextaferia pa desrrozar el camín vecinal de La Reguera a Truyés que va rematar con una espicha popular a les 20.00 hores nel pueblu de Truyés.