Patrimoniu

Los grupos ecoloxistes, Coordinadora Ecoloxista d’Asturies, Ecoloxistes n’ Aicion d’Asturies y Grupo de Recuperación y Estudio de Espacios Naturales, pidieron per escrito la paralización ‘sine die’ de les obres de Petróleos Asturianos nel puertu d’El Musel de Xixón hasta que termine’l trámite d’evaluación ambiental obligatoriu. Na rodiada del tanque de combustible que se ta llevantando, viven decenes de miles de personones y ta situáu un hospital.

La obra civil d’instalación de los depósitos d’almacenamientu de combustible que lleva a cabu la empresa Petróleos Asturianos empezaron col consentimientu del Puerte d’El Musel ensin el trámite alministrativu obligatoriu de Suxerencies Previes y ensin la Evaluaicón d’Impactu Ambiental. Razón pola que los grupos ecoloxistes Coordinadora Ecoloxista d’Asturies, Ecoloxistes n’ Aicion d’Asturies y Grupo de Recuperación y Estudio de Espacios Naturales, tienen remitío un escritu nel que se pide la paralización sine die d’estes obres por una vulneración de la llei 6/2001, de 8 de mayu, de modificación del Real Decretu llexislativu 1302/1986, de 28 de xunu, d’Evaluación d’Impactu Ambiental.

Según los denunciantes, esta ye una infracción mui grave, polo que piden una sanción pa la empresa executante de la obra asina como la toma de les midides preventives necesaries. Más aún, teniendo en cuenta qu’esta empresa yá foi primero denunciada pol usu de materiales non uniformes nel rellenu, lo que puede poner en peligru a llargu plazu la estabilidá de los depósitos de combustible.

El portavoz d’Izquierda Asturiana, Ignaciu Llope pidió-y al gobiernu asturianu ‘qu’abra los güeyos ente les estremaes posibilidaes de xestión del agua, enantes de facer barbaridaes ensin sentíu como l’embalse de Caliao’. Llope fixo estes declaraciones depues de que nes xornaes d’Esplotación y Propsección de la Escuela d’Inxenieros de Mines de la Universidá d’Uvieu de les qu’Asturnews se facía ecu ayeri, se propunxere l’aprovechamientu del agua de los pozos mineros mesmo pa consumu industrial y aprovechamientu enerxegitu que pal consumu humanu.

Estremaos grupos ecoloxistes lleven meses manifestando la so oposición a la construcción de más embalses n’Asturies, como ye’l casu del que se quier facer en Caliao, mentes que nun s’aprovechen otros recursos naturales disponibles que son igual d’efectivos y menos agresivos col mediu ambiente. Ente les propuestes d’estos grupos encuentrase l’estudiu presentáu estos díes nes xornaes d’Esplotación y Propsección de la Escuela d’Inxenieros de Mines nel que s’aseguraba que col agua de los pozos mineros que yá tán trancaos podría dase de beber a la mitá de la población asturiana.

Al rabu d’estos informes, el portavoz d’Izquierda Asturiana, Ignaciu Llope afirmó que ‘ye mui triste ver qu’al gobiernu d’Areces sólo se-y ocurre facer un embalse pa la supuesta carencia d’agua na zona central d’Asturies, amosando asina la so falta d’imaxinación y la so afición pol hormigón como solución a casi tolos problemes’.

Los datos aportaos nestes xornaes aseguren que los pozos de la cuenca central carbonera, que formen les comarques del Nalón y Caudal, podrían disponer de 76 hectómetros cúbicos de reserves d’agua una y buena que l’actividá estractiva termina. Estes cifres pasen con muncho les reserves d’agua de los principales embalses de les Cuenques, como’l de Tanes y Rusecu, que sumen 40 hectómetros cúbicos.

En función d’estos datos, IAS propón una xestión del agua n’Asturies responsable y que pongo penriba de too l’oxetivu d’un desarrollu sostenible p’Asturies.

Les cifres ufiertaes polos espertos concentraos esta selmana na Escuela de Mines d’Uvieu pa la Reunión Científico-Tecnica sobre Xestión y Aprovechamientu del Agua nel Cierre d’Esplotaicones Mineres aseguren qu’Hunosa bombea de los sos pozos unos 30 millones de metros cúbicos cada añu. Según el Ministeriu de Mediu Ambiente Asturies consume unos 58 millones lo que quier dicir que l’agua d’estos acuíferos de los pozos podríen cubrir más del 51% de la demanda.

El director d’estes xornaes y profesor del Departamentu d’Explotación y Prospección de Mines d’Uvieu, Jorge Loredo, aseguró ayeri que l’agua de la cuenca del centru sería bona pal consumu humanu y eso supondría una inversión mínima. ‘L’agua de los pozos ye poco sulfurosa y amás los pozos asturianos cuenten con sistemes de depuración pasiva como la caliza qu’axuden a llimpiar. Sicasí, una pequeña inversión en primeres valdría pa facer un sistema de depuración natural, al travies de plantes por exemplu, que la dexaría llista pal consumu humanu’, afirmó Loredo.

Tocante a la conexón d’esi agua cola rede de distribución, Loredo cuenta que nun diba ser abondo complicada ‘si tenemos en cuenta que los pozos tán mui cerca de los grandes núcleos de población y de la rede de Cadasa’. Otra manera, l’agua d’Hunosa podría emplegase pa mantener el caudal ecolóxicu de los ríos, pa usu industrial o pa xenerar elletricidá.

L’asociación ecoloxista Green, al travies de les semeyes y les quexes de Jose Carlos Perez Arboleya, denuncia la tresformación de les pequeñes playes de la costa del Cabu Peñes, dientro del Paisaxe Protexíu, n’autenticos basureros y, por mor d’ello, desíxe-y al Principáu d’Asturies, como responsable nesta tutela, la toma de midides oportunes de calter urxente.

L’asociación ecoloxista Green faise ecu de les semeyes y la denuncia de Jose Carlos Perez ARboleya nes que se pueden ver los restos de basories, plásticos, botes y cuerpos podreciendo d’animales na playa de L’Arena, conocida tamien como Viodo, dientro del Paisaxe Protexíu del Cabu Peñes.

Esta playa yá sufriere nel so momentu l’impactu de la marea negra del Prestige y agora, esta cala natura, d’arena fina y agües tranquiles, na convertida nun verdaderu basureru. Por esta razón, la coordinadora ecoloxista desíxe-y al Principáu d’Asturies, responsable de la tutela de los espacios protexíos, que tome midides de calter urxente nesta playa, asina como nel restu de cales de la zona que s’atopen na mesma situación de contaminación y abandonu.

La Conseyería de Cultura del Principáu d’Asturies anunció la prósima espublización del informe de los sos arqueólogos sobre la memoria de les escavaciones feches pola UTE Ánade Recursos Naturales – 1:20. Carlos Madera, director xeneral de Promoción Cultural, aseguró qu”ente la Conseyería y l’Ayuntamientu tendrán qu’estudiar si se fai una reconstrucción del castru o una replica”.

Madera, antes de decidir que tipu d’obres van ser necesaries, prefier discutir col Ayuntamientu “que mecanismu de xestión facer”. Sicasí, el conceyal de Cultura tien asegurao n’abondes ocasiones que cola cesión d’El Castañeu (una finca de 20000 metros cuadraos onde se va treslladar el castru Cellagú) al Principáu, el Consistoriu terminó la so responsabilidá, pasando esta a ser exclusivamente del Gobiernu rexonal.

El director xeneral de Promoción Cultural, sorrayó que la prioridá del so área nesti momentu ye’l Prerrománicu, pero la conseyera de Cultura, Ana Rosa Migoya, anunció’l qu’esperaba encargar el proyectu pal montaxe esti añu, anque l’empiezu de les obres van tener qu’esperar hasta l’añu que vien.

La empresa Readymix Asland, dueña de la cantera nel que taba orixinalmente’l castru, comprometióse a pagar el treslláu, desmonte y montaxe de los restos, asina como l’allanar el tarren p’ayudar na tarea.

El Principáu cunta con un estudiu d’impactu ambiental nel que se plantega la creacción d’una serie d’instalaciones nel parque natural de Redes, en Casu y Sobrescobiu, nes qu’abellugar en llibertá especies propies de la fauna Asturiana. El proyectu inclúi un acuariu, un anfibiariu, un centru pa la cría d’urogallos, una casa d’esperteyos y un observatoriu pa venaos y xabarinos, amás d’un hospital que va cuntar con una unidá de cuidaos intensivos.

Según el Plan d’Ordenación de los Recursos Naturales del Principáu d’Asturies, l’estudiu preliminar d’impactu ambiental de les obres de construcción del Parque de la Fauna nel Parque Natural de Redes salió a información pública pa que los ciudadanos puedan facer les alegaciones que-yos abulten oportunes nos prósimos quince díes.

Dientro de les previsiones del proyectu de Parque de la Fauna de Redes destaquen la creacción d’un Centru de recuperación de la fauna, basáu nun hospital p’animales que ta previsto llevantar na parte conocida como’l Castañeru Montes, ente Rusecu y Llaínes; y el Centru pa la cría d’urogallos, na zona de La Mata, al que nun se va dar accesu pa turistes y se va llimitar el tráficu rodáu pa que los animales tean lo más desapartaos del ruiu posible.

El documentu, que se puede consultar nes dependencies de la Conseyería de Mediu Ambiente, parte d’un presupuestu de 3’7 millones d’euros y calcula l’empiezu de les obres pa finales d’esti añu.

La conseyera de Cultura, Comunicación Social y Turismu, Ana Rosa Migoya, compareció ayeri ente una comisión de la Xunta Xeneral, por pitición de cinco diputaos del Partíu Popular, pa informar sobre’l futuru Centru d’Interpretación de la Cueva del Sidrón, l’únicu de los equipamientos del Plan de la Prehistoria del Oriente que tovía nun ta concretáu. Según la conseyera, la falta d’avances nesti plan correspuende a la “inacción ya incapacidá” del alcalde popular de Piloña, Juan Roberto Perez, que nun se tien implicao nesti proyectu.

“El Gobiernu destinó 559.000 euros pa financiar les investigaciones nel yacimientu piloñes”, según Ana Rosa Migoya, que-y propunxo al alcalde d’esti conceyu del Oriente asturianu que se fixere cargu del equipamientu cultural. La conseyera aseguró que Perez se comprometió en mardar a la conseyería de la qu’ella ye responsable una propuesta de tarrenos nos que llevantar l’inmueble, pero finalmente “llimitóse a mandar un planu con dos círculos ensin mayores concreciones tecniques sobre les característiques”.

Énte les afirmaciones de la conseyera qu’acusa al alcalde de Piloña d’amosar “un gran desinteres por esti proyectu”, los diputaos populares acusáronla d’ “echar balones fuera” y d’inhibise del proyectu.

Tres de la denuncia remitida por 16 colectivos énte’l titular de la fiscalia del TSJA , D.Gerardo Herrero Montes , ún de los colectivos denunciantes, AVALL (Asociación de Vecinos y Amigos de Llanes) recibió’l pasáu día 16 de Mayo confirmación pola Fiscalía d’abrir dilixencies d’investigación.

Na denuncia los colectivos, asociaciones y agrupaciones polítiques denunciantes ponen a les clares les contínues neglixencies qu’atalante se cometieren pola parte del responsable de Patrimoniu cultural del Principáu, l’Ayuntamientu de Corvera y la empresa promotora de les obres de Los balagares escontra’l patrimoniu cultural de Truyés, en concreto sobro dos horros xunidos por un mesmo corredor (horros de Casa Colás) y panera de Cá Viña.

Agora tien de ser la fiscalía la que decida al respective, y los colectivos denunciantes esperen que’l TSJA aplique la llei a toos por igual y depurar responsabilidaes escontra los responsables d’esti “atentáu” escontra’l patrimoniu cultural asturianu.

La Conseyera de Cultura, Ana Rosa Migoya, y l’alcalde de Caravia, Pablo García Pando, anunciaron ayeri la so intención de construir un centru d’interpretación de la cultura castreña nel oriente d’Asturies, nes dependencies d’una casona del sieglu XVII conocida como El Franco, un horru y una capiella. Les obres de restauración de los inmuebles van xubir a los 600.000 euros y van allargase ente diez y doce meses.

Los conteníos del futuru centru interpretativu de la cultura castreña van entrar dientro del plan de la prehistoria, intregaos al tiempu dientro d’un plan de calidá turística pa los conceyos de Parres y Piloña. El castru de Caravia ta localizáu na zona del Sueve, no que se conoz popularmente como’l Picu’l Castru.

De les escavaciones que se ficieron en so día del Picu’l Castru sacáronse pieces arqueolóxiques de gran valor qu’anguaño tán nel Museu Arqueolóxicu d’Asturies. Ente elles ta la famosa fíbula que representa un asturcón.

Les denuncies d’Andecha Astur y los vecinos de la Plataforma pola Defensa del Patrimoniu Cultural de Corvera ente la Comisaría d’Agües de la CHN poles actuaciones de la promotora Dolabay-Erma SA-Grupo nel regatu de Truyes, llograron que se suspendieren temporalmente les obres por faltar los permisos necesarios, a la espera d’una sanción exemplar.

Con fecha 20 d’abril la Confederación Hidrográfica del Norte (CHN) acordó “a fin de evitar males mayores a los sos responsables” la midida cautelar d’ “aparar les obres consistentes nel entubamientu del regatu de Truyes; movimientos de tierres na zona de policía y servidume del regatu; tala d’árboles y depósitu de tierres sobre fontes” ( Apart.2 , art.119 Ley de Aguas ). Esta paralización temporal ta a la espera de que la Comisaría d’Agües de la CHN estime una sanción exemplar a esti respectu.

P’Andecha Astur, esta ye una midida cuanto menos esperada , yá qu’esta empresa ta incumpliendo de contino la llegalidá vixente, según la formación política, “col beneplácitu del equipu de gobiernu del Ayuntamientu de Covera”.