Patrimoniu

Foru Abiertu Llugar, asitiáu nel salón d’actos de la Caxa Rural d’Uviéu, va acoyer la presentación del llibru non venal “La costumbre de vivir. Estampas del pasado rural asturiano” güei, xueves 22 d’abril, a la una la tarde. L’actu va cuntar cola presencia del autor, José Antonio Mases.

“Esta obra, de fonderada etnográfica, constitúi una güeyada retrospectiva, al traviés de diverses estampes testuales y fotográfiques, sobre lo que foi la vida cotidiana de les nueses aldees. L’ámbitu rural que güei vemos tresfiguráu y que en tiempos tuvo fuercia, dinamismu ya, inclusive, grandeza idílica (a pesar de la rudeza qu’en tantes ocasiones hubieren d’arrostrar les sos pobladores), queda reflexáu nes páxines del llibru, y los testimonios d’aquel paisaxe humanu, güei prácticamente esmorecíu, tán representaos nun percorríu a lo llargo de tol Principáu”.

El Bloque por Asturies vieno acabante pidir, al traviés d’una nota prensa, el pieslle temporal de partes de la Senda l’Osu y la intervención darréu sobre les mesmes pol so “estáu peligrosu”. La organización política atalanta que ye pernecesaria “una intervención rápida nel arreglu del valláu y mobiliariu, asina como la llimpieza de tolos puntos de vertíos illegales que puen vese a lo llargo de tola senda”.

Mesmamente, tamién se pide dende’l Blque “que la solución que se dea nel mantenimientu y conservación de la senda seya de manera definitiva y nun se repita lo mesmo nos años venideros”.

Na nota deprensa quier afitase tamién que “hai puntos na senda, como’l tramu que va dende Caranga Riba (Proaza) hasta cuasi l’empiezu del conceyu Quirós, nos que’l peligru pal pasiante o cicloturista ye tal que lo más racional sedría que les autoridaes competentes procedieren al pieslle de la senda, polo menos nesti tramu, hasta que nun s’iguare dafechu”.

Esta selmana presentose oficialmente en Llión el I Cursu de Recoyida de la Tradición Oral, organizáu pola asociación El Teixu y pola Conceyalía de Cultura del Ayuntamientu de Llión, y que va facese en Llión los díes 10, 11, 17 y 18 d’abril y 22 y 23 de mayu.

L’equipu docente va tar dirixíu pol profesor de filoloxía de la Universidá d’Uviéu Fernando Álvarez-Balbuena y va tar formáu por un total de seis profesores con probada experiencia nel trabayu de campu y nel estudiu de la lleigua y la cultura populares de Llión y Asturies.

Pa informase y matriculase pue dise a la Conceyalía de Cultura de Llión (Plaza San Marcelo, s/n, planta baxa), chamar al númaru 987 87 83 49 n’horas d’oficina, ou escribir a las señas electrónicas info.elteixu@gmail.com. El prazu de matriculación ta abiertu del 5 al 9 d’abril. El preciu de la matrícula ye de 10 € y’l cursu almite un númberu máximu de 25 alumnos.

Les materias teóriques del cursu van ser las siguientes: – Pautas de deturpación de la toponimia tradicional [2 horas] – Lliteratura de tradición oral en Llión [4 horas] – Pervivencia de la cultura tradicional na actualidá [2 horas] – Nociones básicas de dialectoloxía asturllionesa [4 horas] – El diseñu de la investigación de campu: obxectivos, preparación del cuestionariu y tratamientu de los datos [2 horas] – Metodoloxía de la encuesta llingüística de campu [2 horas] – Metodoloxía de la encuesta de campu n’etnomusicoloxía y lliteratura oral [2 horas] – Panorama históricu de los trabayos llingüísticos de campu en Llión y Asturias [2 horas] Las materias prácticas del cursu van ser estas (cada alumnu tendrá qu’escoyer dúas d’entre estas cuatro): – Recoyida de lliteratura oral nel suroccidente de Llión: Cabreira y La Valduerna [10 horas] – Una encuesta etnomusicolóxica na montaña central de Llión: de La Tercia a Babia [10 horas] – Trazar una isoglosa: los límites llingüísticos l.luna / lluna y pacha / paya na comarca d’Oumaña [10 horas] – Llevantamientu de la toponimia mayor del cuadrante noroccidental de la provincia de Llión [10 horas].

El Conceyu de Cultura Tradicional Vezos Astures, fadrá esti vienres 9 d’Abril a les 20 hores, nel Auditoriu Príncipe Felipe d’Uviéu, la presentación del documental “Os Reises del Valledor, Úa mazcarada d’inverno nel occidente Asturiano”.

A lo llargo’l mes de mayu van facese presentaciones tamién nos conceyos d’Avilés y Xixón, magar que la fecha ta por axustar. Xuntu coles presentaciones quierse tamén facer una esposición onde s’amuesen los traxes talamente yeren de les mazcaraes d’iviernu n’Asturies.

Os Reises son una mazcarada d’iviernu que se fai a entamos d’añu, unos díes enantes de reis, y na que los mozos salen mazcaraos con pelleyes y llueques unos y con ropa bueno otros pa cantar nes puertes de los pueblos y pidir el guilandu.

Esti documental ellaboróse col material recoyíu na recuperación fecha pol grupu en xineru del añu 2009 nos pueblos de Vilalaín, Fonteta y San Salvador del Valledor, dempués de más de 50 años ensin facese. Dellos vecinos collaboraron con nós dando’l so testimoniu y les sos vivencies pa iguar esti documental.

Esti dvd ye amás d’un testimoniu de la propia recuperación, el material audiovisual más importante y únicu sobre les mazcaraes d’iviernu n’Asturies que anguaño existe, que cuntó cola collaboración de xente cabezalera de la cultura asturiana como Xosé Ambás, Diego Pangua o Naciu i’Riguilón y ye de sorrayar l’iterés d’etnógrafos propios y ayenos qu’ellí taben pa rexistralo sobro manera’l portugués Helder Ferreira, responsable del Proyéutu Europeu pa la recuperación, promoción y mantenimientu de les mazcaraes que recoyó abondu material y yá ta asoleyáu nel volume II de la espublización hispano-portuguesa “La máscara ibérica” onde se fai un estudiu de les mazcaraes peninsulares y onde Asturies apaez representada con toles mazcaraes qu’anguaño se siguen faciendo.

El llabor de Vezos Astures lleva años empobináu al espardimientu de la cultura tradicional y muesa d’ello ye esti documental sobre los Reises del Valledor pero siguimos trabayando nesti sen con delles esposiciones sobre les mazcaraes d’iviernu n’asturies que naguamos por llevar a tolos conceyos d’Asturies.

Delles asociaciones ecoloxistes, ente les que s’alcuentren l’Asociación pa la Defensa Xurídica del Mediu Ambiente “Ulex”, la Coordinadora Ecoloxista d’Asturies, l’Institutu pa la Calidá y la Educación Ambiental o la Plataforma pa la Defensa de la Cordillera Cantábrica; criticaron esti día la “pasividá, la dexadez y la inoperancia” del Principáu d’Asturies frente a l’amenaza del mediu natural que suponen los 2.095 incendios forestales rexistraos n’Asturies tan solo nel pasáu añu 2.009.

Les agrupaciones recordaron esti miércoles nuna nota de presa que la cifra d’incendios superó en más de 350 los rexistraos l’añu anterior, y que ye futurible que suba sensiblemente nel desendolcu de 2010.

La Coordinadora Ecoloxista d’Asturies vieno acabane asoleyar una nota de prensa esti llunes na que fai una alierta sobro’l Parque eólicu Picu Liebres en Tinéu que vien xuníse a los de Pico Gallu y Sierra de Tinéu que ya funciones y a los diez más que tan previstos. Sigún la Coordinadora, el conxuntu tendría de tener una Evaluación d’Impactu Estructural pol efectu acumulativu que suponen 88 parques eólicos previstos pal occidente asturianu.

Según la Coordinadora Ecoloxista esti parque eólicu cinca a numberosos núcleos de población por proximidá, colo que resulta evidente que tou esti conxuntu de parques tendría de sometese a una evaluación completa.

El Bloque por Asturies fai un llamamientu a vixilar los numberosos ‘basureros pirates’ atopables na zona alta del Valle de Turón y desixe una actuación rápida y eficiente del Ayuntamientu de Mieres.

Según una nota prensa asoleyada esti llunes ún d’esos basureros alcuéntrase na carretera AS-337, a unos 100 metros de la fin del pueblu d’Urbiés, na dirección que lleva a Samartín del Rei Aurelio, y ellí puen atopas muebles y, especialmente, escombrios d’obra asgaya.

El Conceyu de Cultura Tradicional Vezos Astures, fai la presentación del documental “Os Reises del Valledor, Úa mazcarada d’inverno nel occidente Asturiano” el próximu día 3 d’Abril a les 19 hores na biblioteca de La Puela d’Ayande. Esti documental ellaboróse col material recoyíu na recuperación fecha pol grupu en xineru del añu 2009 nos pueblos de Vilalaín, Fonteta y San Salvador del Valledor, dempués de más de 50 años ensin facese. Dellos vecinos collaboraron con nós dando’l so testimoniu y les sos vivencies pa iguar esti documental.

Esti dvd ye amás d’un testimoniu de la propia recuperación, el material audiovisual más importante y únicu sobre les mazcaraes d’iviernu n’Asturies que anguaño existe, que cuntó cola collaboración de xente cabezalera de la cultura asturiana como Xosé Ambás, Diego Pangua o Naciu i’Riguilón y ye de sorrayar l’iterés d’etnógrafos propios y ayenos qu’ellí taben pa rexistralo sobro manera’l portugués Helder Ferreira, responsable del Proyéutu Europeu pa la recuperación, promoción y mantenimientu de les mazcaraes que recoyó abondu material y yá ta asoleyáu nel volume II de la espublización hispano-portuguesa “La máscara ibérica” onde se fai un estudiu de les mazcaraes peninsulares y onde Asturies apaez representada con toles mazcaraes qu’anguaño se siguen faciendo.

El llabor de Vezos Astures lleva años empobináu al espardimientu de la cultura tradicional y muesa d’ello ye esti documental sobre los Reises del Valledor pero siguimos trabayando nesti sen con delles esposiciones sobre les mazcaraes d’iviernu n’asturies que naguamos por llevar a tolos conceyos d’Asturies.

La Conseyería de Cultura y Turismu, pente medies de la Direición Xeneral de Política Llingüística, sumóse al proyeutu intramural “Ellaboración y edición de los materiales del Atles Llingüísticu de la Península Ibérica (ALPI)”, coordináu pol Conseyu Superior d’Investigaciones Científiques. Pa ello, va convocar en 2010 la beca d’investigación “Lorenzo Rodríguez Castellano” pal tratamientu y estudiu de los materiales asturianos.

L’ALPI ye’l gran atles de les llingües romances peninsulares, una obra d’estraordinaria importancia precisamente porque faltaba pa la Península Ibérica l’atles xeneral que munchos dominios llingüísticos europeos tienen y que permitiría l’estudiu comparáu de toles fales iberorromániques. Esta obra, concebida pol equipu de Menéndez Pidal y dirixida por Tomás Navarro Tomás, ye tamién un documentu de gran valor científicu pa conocer l’estáu de les fales peninsulares ente 1930 y 1936, años nos que se fixeron la mayor parte de les encuestes que la componen.

El filólogu asturianu Lorenzo Rodríguez-Castellano, impulsor de la llectura pública n’Asturies al que la Conseyería dedicó’l Día del Llibru nel añu 2009, foi tamién el responsable de la parte asturiana del ALPI; poro, y col preste de la so familia, Lorenzo Rodríguez-Castellano va dar nome a les beques d’investigación que dende 2010 va convocar el Gobiernu asturianu como aportación a la edición d’esta gran obra. La primer beca predoctoral, con una dotación de 15.000 euros, ta empobinada a llicenciaos en Filoloxía y con destín na sede madrilana del CSIC. Alcuéntrase yá en tramitación.

L’equipu científicu del proyeutu, coordináu pola Profesora del Conseyu Superior d’Investigaciones Científiques (CSIC), Pilar García Moutón, integra a investigadores de los distintos dominios peninsulares. El Caderalgu de Filoloxía de la Universidá d’Uviéu José Antonio Martínez ye la referencia asturiana d’esti proyeutu.

El Grupu Trabanco y la revista ‘La Sidra’ asoleyaron esti xueves nuna nota de prensa’l fallu del xuráu del I Premiu d’Ensayu ‘Emilio Trabanco Trabanco’ que foi a parar a Fernán Gonzali Llechosa pola so obra, ‘El Diccionariu de la Sidra’, que s’enfota en recuperar el vocabulariu tradicional de la cultura sidrera.

El premiu ta dotáu con 1.250 euros, un llote de llibros valoráu en 250 euros y la publicación de la obra ganadora.