Vezos presenta’l documental sobre “Os Reises del Valledor”

El Conceyu de Cultura Tradicional Vezos Astures, fadrá esti vienres 9 d’Abril a les 20 hores, nel Auditoriu Príncipe Felipe d’Uviéu, la presentación del documental “Os Reises del Valledor, Úa mazcarada d’inverno nel occidente Asturiano”.

A lo llargo’l mes de mayu van facese presentaciones tamién nos conceyos d’Avilés y Xixón, magar que la fecha ta por axustar. Xuntu coles presentaciones quierse tamén facer una esposición onde s’amuesen los traxes talamente yeren de les mazcaraes d’iviernu n’Asturies.

Os Reises son una mazcarada d’iviernu que se fai a entamos d’añu, unos díes enantes de reis, y na que los mozos salen mazcaraos con pelleyes y llueques unos y con ropa bueno otros pa cantar nes puertes de los pueblos y pidir el guilandu.

Esti documental ellaboróse col material recoyíu na recuperación fecha pol grupu en xineru del añu 2009 nos pueblos de Vilalaín, Fonteta y San Salvador del Valledor, dempués de más de 50 años ensin facese. Dellos vecinos collaboraron con nós dando’l so testimoniu y les sos vivencies pa iguar esti documental.

Esti dvd ye amás d’un testimoniu de la propia recuperación, el material audiovisual más importante y únicu sobre les mazcaraes d’iviernu n’Asturies que anguaño existe, que cuntó cola collaboración de xente cabezalera de la cultura asturiana como Xosé Ambás, Diego Pangua o Naciu i’Riguilón y ye de sorrayar l’iterés d’etnógrafos propios y ayenos qu’ellí taben pa rexistralo sobro manera’l portugués Helder Ferreira, responsable del Proyéutu Europeu pa la recuperación, promoción y mantenimientu de les mazcaraes que recoyó abondu material y yá ta asoleyáu nel volume II de la espublización hispano-portuguesa “La máscara ibérica” onde se fai un estudiu de les mazcaraes peninsulares y onde Asturies apaez representada con toles mazcaraes qu’anguaño se siguen faciendo.

El llabor de Vezos Astures lleva años empobináu al espardimientu de la cultura tradicional y muesa d’ello ye esti documental sobre los Reises del Valledor pero siguimos trabayando nesti sen con delles esposiciones sobre les mazcaraes d’iviernu n’asturies que naguamos por llevar a tolos conceyos d’Asturies.