Patrimoniu

Les escavaciones nel Picu L.lagüezos, en La Carisa, ufrieron estes selmanes nuevos restos d’orixe romanu no que podría ser el primer asentamientu de les lexones de Roma en territoriu d’Asturies. L’equipu de trabayu de campu ta encabezáu por Esperanza Martín y coordináu pol espertu Jorge Camino.

Los espertos quieren saber si’l yacimientu tien de ver coles guerres ástur-cántabres y col campamentu de Curriel.los, qu’afayose nel añu 2001 a cinco quilómetro del llugar. Los trabayos van allargase delles selmanes, antes que l’iviernu togue trabayar en La Carisa pola so altitú.

El Parque Históricu de la Cuenca del Navia quier apostar polos castros como principal reclamu turísticu sigún dixo esti martes la vicepresidenta y alcaldesa d’El Franco, Cecilia Pérez, qu’atalanta que los yacimientos repartíos polos nueve conceyos que formen parte de la marca turística ye precisamente’l nexu d’unión ente ellos.

Según Pérez, esti proyectu ye importante pa la cuenca porque nel futuru los castros pueden tirar del turismu nesta zona occidental. Al traviés de la web del Parque Históricu del Navia (formáu per Navia, Boal, Coaña, Pezós, Eilao, Grandas, Tapia, El Franco y Villayón) promociónase la visita a ocho yacimiento: Chao Samartín (Grandas de Salime); Mohías y Coaña (Coaña); el Castelón (Ilano); El Esteiro (Tapia); Pendia (Boal); San Isidro (Pezós) y Cabo Blanco (El Franco). Na actualidá, son conocíes les intenciones del gobiernu rexonal d’actuar nun futuru non bien alloñáu en Coaña y yá se trabaya en Pendia y Chao Samartín.

La Conseyería de Cultura, Educación y Deportes va impulsar una nueva campaña d’investigaciones nos yacimientos romanos de La Carisa. Los trabayos van centrase nel Picu L.lagüezos, un monte que dixebra L.lena del conceyu lleonés de Villamanín y que pudo allugar el primer asentamientu romanu nel territoriu qu’ocupa anguaño Asturies.

El proyectu pa retomar la investigación, paralizada por falta de fondos dende 2011, va emplegar a un equipu de cuatro arqueólogos que va dirixir la esperta Esperanza Martín y que va intentar rellacionar los yacimientos romanos cola Vía Carisa.

Fuentes de la Conseyería de Cultura confirmaron esta selmana a los medios de comunicación que’l proyectu arqueolóxicu aprobóse na Comisión Permanente de Patrimoniu. Esti órganu da’l vistu bonu a les actuaciones d’interés y, tres esti primer trámite, podrá apurrise el financiamientu necesariu pa encetar l’estudiu de los xacimientos romanos.

Desque arrincaron les primeres investigaciones en La Carisa, nel añu 2001, ye la primer vegada que’l Principáu d’Asturies se compromete con una investigación nel enclave.

L’Asociación de Vecinos de Viescas solicitó a la Conseyería de Fomentu, Ordenación del Territoriu y Mediu Ambiente qu’esclarie qué tipu de llicencia concedió a la empresa Caliares Alper, S.L. al respective de los usos d’una carretera provisional que, n’orixe, fuera solicitáu pa sacar madera del perímetru de la futura cantera El Xardón. El voceru d’IX en Salas, José Manuel Murias, denunció la medrana de los vecinos a que la empresa tea utilizando pa usos indebíos la citada vía provisional una y bones, dixo, constatóse la salida de camiones con grebos, daqué que, añedió, entepasa’l tipu de llicencia concedíu.

Al paecer, el Principáu solo autorizara esta vía como accesu, ente que se realizaben les obres de montaxe de la planta, pa los llabores d’evacuación de la madera de desmontar y pal atroxu de los materiales necesarios pa la so instalación. Frente a ello, dende va selmanes, los vecinos pudieron comprobar el tráficu de vehículos cargaos con grebos dende la cantera, unes vegaes en dirección a Sotu de Los infantes y, otres, pela carretera dende Piedrafita escontra l’Escayu. La rocea respecto al usu ye entá mayor cuidando que estitráficu produzse n’hores intempestives.

La Coordinadora Ecoloxista d’Asturies va presentar una nuevos allegamientos complementarios ante’l Principáu contra los 4 proyectos d’investigación que la empresa HUNOSA tien previstu na cuenques del Caudal, pa valorar l’apertura de mines a cielu abiertu pa la estracción de carbón, que volvió sacar a información publica sosprendentemente’l Principáu al traviés de la Conseyería d’Industria y Empléu esti pasáu llunes día 19, tal como se publica nel Bopa.

Son los proyectos de los Artos ,con 4 sondeos nuna área allugáu al norte de la localidá de Sotrondio y al este del valle de Carrocera, el conocíu como Esperanza con 4 sondeos nuna área allugada al oeste de Mieres, que se subdivide en tres árees (Nicolasa, Pereda y Montsacro, ente los conceyos de Mieres y Morcin), el nomáu San Juan con 5 sondeos nuna área asitiada al este de la localidá de Mieresy el conocíu como Pontones con 2 sondeos nuna área allugada al sur de la localidá de Moreda, nel conceyu d’Ayer.

Al xuiciu de la Coordinadora “los estudios presentaos a información publica pa estos trabayos d’investigación tienen notables defectos que’l Principáu consiente como quedó demostráu por esti estrañu segundu trámite d’información y poles declaraciones del Conseyeru del ramu”.

Esti sábadu 24 d’agostu va tener llugar una ruta andieriega y reivindicativa a L’Escañoriu y al castru del Picu Castiellu entamada pol Atenéu N’Alfoz. L’actividá va tar abierta a tola xente interasao, con salida a les 10 hores de Les Vegues.

L’actividá tien como enfotu solicitar una partida presupuestaria a l’Alministración pública pa realizar trabayos nel castru, datar la so antigüedá y estudiar la so morfoloxía, como primer pasu pa la so recuperación, según señalen dende’l coleutivu . L’Atenéu N’Alfoz quier facer tamién alcordanza de que nel añu 2002 foi aprobáu un Plan de Proteición Especial de L’Escañoriu, garrando asina la denominación de Monumentu Natural y pasando a forma parte d’un plan d’actuaciones nes que se incluyíen la escavación del castru y la restauración d’una ponte medieval, ente otres cuestiones. “

La ruta del sábadu va ser d’ocho quilómetros de llargor y va salir a les 10 hores de la retonda d’entrada a Les Vegues y Molleda, pa percorrer esta parroquia per delles caleyes .

El diputáu d’IX Gaspar Llamazares esixó güei, nuna reuda de prensa, la revitalización del plan director del prerrománicu asturianu, dando cumplimientu al resolvimientu aprobáu a instancies d’IX, y por unanimidá, pa la protección d’esti patrimoniu.

Llamazares reclamó’l financiamientu de la so afayadiza xestión per parte del Estáu, la Comunidá Autónoma y los Ayuntamientos, pa evitar el so deterioru, daqué que, dixo, ye claro na Foncalada o en Santullano. A pesar d’esti resolvimientu, el presupuestu destináu pa la protección pasó dende los 300.000 euros en 2011 a solu 100.000 en 2012. Pa Llamazares nun ye aceptable que les distintes alministraciones refuguen la so responsabilidá alegando que “nun ye de la so competencia” pos, esclarió, la protección ye una responsabilidá de toes elles y tán obligaes a poner les midíes pa evitar el so deterioru.

La falta de cumplimientu del resolvimientu pa la protección del prerrománicu llevó a IX a presentar una nueva propuesta nel Parlamentu pa que se cumpla col compromisu alcordáu por unanimidá nel Congresu.

Güei publica’l Bopa l’anunciu que va suponer el desaniciu de miles de castañales en montes publicos del Parque Natural de Redes nel conceyu de Casu, “que al pasu que va quedar ensin ellos, en vista de lo qu’esta asocediendo nos ultimos meses”, sigún denuncia la Coordinadora ecoloxita d’Asturies.

Anúnciase que van cortase otros 10.873 pies de castañal, nuna zona onde se vienen valtando miles d’ellos a matarrasa nos ultimos meses, nun supuestu plan de saneamientu (Plan Tecnico de Xestión de los Castañeos), que pel momento solo lleva baltar completa de los montes de castañales, col consiguiente impactu pal paisaxe y la flora y fauna d’estos montes.

La Coordinadora Ecoloxista d’Asturies volvió a solicitar información reclamando al Principáu respuesta a les consultes realizaes va meses, sobre los proyectos de restauración de la masa forestal publica de Casu qu’esta sumiendose dafechu: “Temémonos que nestos tiempu de crisis economica, nin el Principáu nin el Conceyu, que ye quien cobra pola vienta de madera, pongan dineru pa la recuperación forestal d’estos miles de arboles valtaos, que supón un gran impactu ambiental nun espaciu protexíu”.

Sigún la Coordinadora Ecoloxista d’Asturies, “hai que recordar que la zona afectada de Casu alluga la mayor concentración de castañales públiques y que les continues baltes de los ultimos meses tresformaron el paisaxe del conceyu de Casu de forma bultable”.

El Parque de Redes, en conceyu Casu, ye un espaciu singular, teniendo delles protecciones, que nun lu llibraron hasta agora de les peligroses practiques madereres”.

L’altu grau de caltenimientu de los montes de Redes conviértese nun apartáu d’especial valor pa la fauna, por tar presentes nellos la mayor parte de les especies que pueblen el monte cantábricu. “Por eso ye inaceptable que s’acepte valtar a matarrasa la totalidá de les castañales publicos, ensin garantíes de restauración d’esta masa forestal nos proximos años, pa recuperar la redolada paisaxística y natural de la zona”, sigún asoleya la Coordinadora nun comunicáu.

L’Atenéu N’Alfoz esplica qu’acaben de saber nestos díes “que se decidió retirar la panera de Cá Flora, que data del sieglu XVIII, del cascu hestóricu de la localidá castrillonense de Raíces Vieyo, tando incluyía ésta dende’l añu 2006 na Área de Rehabilitación Integral qu’atacaba la reurbanización de tola zona”. L’Atenéu califica esti fechu de “nueva llaceria cultural por parte l’alministración y un nuevu marafundiu de perres de toles contribuyentes”.

“Otra vegada más, la entidá cívica Atenéu N’Alfoz tien de llamentar la dexadez de funciones de les alministraciones asturianes no tocante al nuesu padremuñu”, espliquen. Esta vegada, foi’l equipu de gobiernu del Conceyu Castrillón quien amosó la so neglixencia ya incapacidá pa xestionar el padremuñu cultural d’Asturies.

Sábese que l’Área de Rehabilitación Integral cuntaba con un presupuestu de 399.000 euros, amás de qu’en pallabres del conceyal de Facienda y Padremuñu nel añu 2010, Ramón Martínez Campo, la obra de rehabilitación de la panera, agora declarada en ruina, diba ser adxudicada por 60.000 euros. La mentada panera ye propiedá de la Casa Conceyu dende va yá diez años.

L’Atenéu denuncia que “dempués d’invertir miles d’euros de fondos públicos en espropiaciones y convenios con particulares, amás d’asignar partíes presupuestes pa la rehabilitación, nós entrugámonos ónde foi a parar too esi dineru”. Arriendes d’esta denuncia, piden “reponsabilidá y que se faigan les actuaciones pertinentes pa caltener les otres dos construiciones etnográfiques en peligru, l’horru de Cá Lolo Llodares y la panera de Cá Tista”.

Más d’un centenar d’obres d’arte y dalgunes de les principales xoyes bibliográfiques, munches d’elles pieces úniques, formen parte de GAUDEO, un innovador proyectu de divulgación del patrimoniu qu’acaba de rematar la Universidá d’Uviéu. Dempués de la presentación de la primer fase, va un añu, la Galería de la Universidá d’Uviéu completóse y ameyoró tantu en conteníos como en diseñu, cola incorporación como novedá d’una cuidada biblioteca dixital que pon a disposición de la sociedá exemplares únicos y inaccesibles pal públicu.

GAUDEO ufierta la posibilidá de realizar una visita virtual pel Edificiu Hestóricu de la Universidá d’Uviéu, producida con fotografía esférica; aportar a una galería en llinia con imáxnes n’alta definición de cada obra d’arte y otros oxetos significativos, acompañaos d’una completa ficha; y consultar una biblioteca dixital con xoyes bibliográfiques y llibros especiales de la Biblioteca Hestórica de la Universidá d’Uviéu.

Dende la Universidá espliquen que la tecnoloxía utilizada “sigue’l modelu del Muséu del Prado na so galería en llinia o de la Biblioteca Nacional de Francia -Gallica- na so biblioteca dixital, ente que la visita virtual ta oldeada a la National Gallery de Lonndres”.

Al traviés d’esta galería, los espertos pueden conocer tolos detalles de pieces úniques, como trés talles y parte del retablu fundacional de la institución académica, de 1607, salvaes del fueu que destruyó la Universidá na Revolución d’Ochobre de 1934, o’l llibru El Baladro del Sabiu Merlín coles sos profecíes, un incunable d’estraordinaria rareza y gran guapura formal, únicu exemplar conocíu de la edición burgalesa de 1498.

La biblioteca dixital esibe tamién obres que nun pueden atopase n’otru llugar y inaccesibles pal públicu como Arte de herrar cavallos, en dialogo, el primera Plan d’estudios de la Real Universidá d’Uviéu, Statutos de la Universidad de Oviedo (los primeros estatutos de la institución académica) y Llibre de menescalia (en castellán:) Llibru de albeyteria.

Tamién s’inclúin obres de Feixoo o Xovellanos y van dir incorporándose nuevos volúmenes como una primer edición de La Rexenta, ediciones d’El Quixote, amás d’otros incunables y manuscritos.

Visita GAUDEO