Les escavaciones nel Picu L.lagüezos ufren nuevos restos d’orixe romanu

Les escavaciones nel Picu L.lagüezos, en La Carisa, ufrieron estes selmanes nuevos restos d’orixe romanu no que podría ser el primer asentamientu de les lexones de Roma en territoriu d’Asturies. L’equipu de trabayu de campu ta encabezáu por Esperanza Martín y coordináu pol espertu Jorge Camino.

Los espertos quieren saber si’l yacimientu tien de ver coles guerres ástur-cántabres y col campamentu de Curriel.los, qu’afayose nel añu 2001 a cinco quilómetro del llugar. Los trabayos van allargase delles selmanes, antes que l’iviernu togue trabayar en La Carisa pola so altitú.