L’Atenéu N’Alfoz responsabiliza al Conceyu de Castrillón de la ruina la panera de Raices Vieyo

L’Atenéu N’Alfoz esplica qu’acaben de saber nestos díes “que se decidió retirar la panera de Cá Flora, que data del sieglu XVIII, del cascu hestóricu de la localidá castrillonense de Raíces Vieyo, tando incluyía ésta dende’l añu 2006 na Área de Rehabilitación Integral qu’atacaba la reurbanización de tola zona”. L’Atenéu califica esti fechu de “nueva llaceria cultural por parte l’alministración y un nuevu marafundiu de perres de toles contribuyentes”.

“Otra vegada más, la entidá cívica Atenéu N’Alfoz tien de llamentar la dexadez de funciones de les alministraciones asturianes no tocante al nuesu padremuñu”, espliquen. Esta vegada, foi’l equipu de gobiernu del Conceyu Castrillón quien amosó la so neglixencia ya incapacidá pa xestionar el padremuñu cultural d’Asturies.

Sábese que l’Área de Rehabilitación Integral cuntaba con un presupuestu de 399.000 euros, amás de qu’en pallabres del conceyal de Facienda y Padremuñu nel añu 2010, Ramón Martínez Campo, la obra de rehabilitación de la panera, agora declarada en ruina, diba ser adxudicada por 60.000 euros. La mentada panera ye propiedá de la Casa Conceyu dende va yá diez años.

L’Atenéu denuncia que “dempués d’invertir miles d’euros de fondos públicos en espropiaciones y convenios con particulares, amás d’asignar partíes presupuestes pa la rehabilitación, nós entrugámonos ónde foi a parar too esi dineru”. Arriendes d’esta denuncia, piden “reponsabilidá y que se faigan les actuaciones pertinentes pa caltener les otres dos construiciones etnográfiques en peligru, l’horru de Cá Lolo Llodares y la panera de Cá Tista”.