Patrimoniu

Esti pasáu xueves la Casona del Bravial abrió los actos pa conmemorar la celebración del so cuartu aniversariu como centru cultural cola inauguración de la esposición “El Castiellu de Blimea. Historia, lleendes, abandonu.” Nel actu, que contó con numberosu públicu asistente, intervinieron Gema Suárez Torre, conceyal de Cultura de Samartín del Rei Aurelio, y Belén González Collado, la historiadora que llevó a cabu’l llabor d’escoyeta y recoyida de materiales.

Dambes destacaron el valor de la documentación cola que se trabayó pa reconstruyir la historia del castiellu, asina como les importantes aportaciones que ficieron los vecinos de Blimea pa llevar a cabu esta muestra.

La esposición fai un percorríu pela historia del edificiu y les families que lu habitaron basándose en datos bibliográficos, documentos antiguos y semeyes. Asina, cuéntase como ente los sieglos XI y XII la familia Fernández Miranda, procedente del conceyu de Quirós, s’asentaba na Casona del Bravial y, tiempu dempués, nel añu 1496, descendientes d’esa mesma familia treslladaríen la so residencia a la casona de La Cabezá, que munchos sieglos dempués va convertise nel conocíu como Castiellu de Blimea, al que-y dará forma en 1897 el Vizconde de Campogrande nun intentu de revivir les vieyes glories medievales. De dalgún mou esta esposición pretende ser un homenaxe a un edificiu que tovía recuerden con munchu ciñu los vecinos de Blimea, y una manera de dexar constancia del so valor históricu.

La esposición va poder visitase hasta’l 7 de marzu de llunes a vienres n’horariu de 9 a 13 h. Entamen asina les actividaes programaes pa celebrar esti cuartu aniversariu de la Casona del Bravial, que van siguir el próximu día 21 de febreru cola celebración del Día de la Llingua Materna, fecha na que se va llevar a cabu un taller esplicativu d’edición de la Wikipedia n’asturianu.

Nel Día Mundial del Cancer, la Coordinadora Ecoloxista fai una dura acusación al afirmar que sospriende que’l Gobiernu d’Asturies reconoza qu’equí se produza un aumentu de los casos de cancer de pulmón diagnosticaos y nun se -yos relaccione cola contaminación del aire como un factor significativu a pesar de qu’hai una evidencia científica reconocida en tol mundu menos n’Asturies. Esti olvidu del Gobiernu Asturies, oldea cola reconocencia de l’axencia d’investigación del cáncer de la Organización Mundial de la Salú (OMS) clasificó a la contaminación del aire nes ciudaes como un axente que produz cáncer nos seres humanos.

Fízolo ayeri dempués de qu’un panel d’espertos revisara más de 1.000 estudios científicos nel mundu. Y según la Coordinadora Ecoloxista, llegaron a la conclusión de qu’hai evidencies abondes de que la esposición a la contaminación ambiental n’espacios abiertos causa cáncer de pulmón. Antes probárase que tamién provoca enfermedaes cardiaques y respiratories.

Magar depende del nivel d’esposición en cada parte del mundu, el riesgu de desenvolver cáncer de pulmón pola contaminación del aire ye similar al que resulta de la esposición al fumu del pitu”, dixo ayeri Kurt Straif, titular de l’axencia de la OMS que fai’l ranking de los compuestos canceríxenos.

El ranking clasifica a los compuestos o factores físicos en cuatro grupo y básase en pruebes científiques esistentes. La llista va dende’l grupu 1 de los compuestos que son “carcinóxenos pal ser humanu” hasta’l grupu 4, qu’inclúi a los que “probablemente nun son carcinóxenos pal ser humanu”.

Nel casu de la contaminación del aire una vegada más el Gobiernu d’Asturies despinta la realidá de la contaminación atmosférica de la zona central asturiana coles sos declaraciones, cuando embrive los malos datos de la contaminación que carecemos nesta zona, que nos fai posesores del titulo de la única zona d’España que supera l’estragal de protección de la salú en partícules qu’esta afitáu nuna media añal de de 40 µg/m3. pa les partícules de menos de 10 micres (PM10). Este titulo qu’ostentamos nos últimos años ye d’alcuerdu a los datos oficiales, por más que’l Gobiernu Rexonal intente negalo, porque’l Ministeriu fai eses comparancies colos datos que-y facilita’l mesmu Principáu.

Nel casu de la contaminación del aire a cielu abiertu incluyiese nel grupu 1. Esto significa que güei nun hai duldes de que la contaminación del aire causa cáncer de pulmón: hai pruebes abondes que lo acoten. Nel mesmu grupu de sustances que provoquen cáncer yá taben incluyíos los asbestos, el bencenu y la radiación ionizante. Tamién el panel d’espertos reparó una asociación positiva ente la contaminación del aire con un mayor riesgu de cáncer de bixiga.

P’afondar na gravedá del problema que venimos años denunciáu, dámos-yos detalles de les superaciones del últimu añu completu lo que demuestra que’l Principáu falsia la realidá del aire, que supon un grave problema de salú pa toos:

Tocantes a la contaminación por partícules PM10, ye significativu que toles estaciones de control del Principáu y son 19 (Avilés, Xixón, Uviéu, Llangréu, Mieres, San Martín, Llugones, Cangas Narcea) y 35 de les privaes (hai 42 en toa Asturies) superen el valor de 20 µg/m3 pa partícules de menos de 10 micres a lo más de promediu añal, encamentáu pola Organización Mundial de la Salú (OMS). Delles d’elles superen el valor llende diariu de protección a la salú establecíu pola norma Española muncho menos esixente, que preve una llende de 35 superaciones al añu del valor de 50 µg/m3 con medies diaries percima de los 55 µg/m3.

La Coordinadora Ecoloxista d’Asturies fizo anuncia esti día de que l’Autoridá Portuaria de Xixón ctien paralizaes “les esplosiones submarines que venía realizando nos últimos meses Astilleros Armón, que taben produciendo la muerte de numberoses aves protexíes y graves daños nes vivienda de la zona”. Según la Coordinadora, la paralización faise hasta que los Astilleros nun presenten un plan de prevención de la fauna.

Pa los ecoloxistes “nun dexa de sosprender, que tres dellos meses d’esplosiones, a menos d’un mes de la finalización d’acabar les obres, agora’l Puertu pída-yos daqué qu’hasta agora l’Astilleru nun tenía, porque nin el Puertu nin el Principáu pidió-yos, pa sorpresa de tol mundu, al ser esti plan preventivu obligatoriu nuna zona con especies selvaxes claramente amenaciaes pola actividá”.

El Colectivu Ecoloxista d’Avilés denunció ante’l Gobiernu d’Asturies y ante l’Autoridá Portuaria d’Avilés un nuevu vertíu de sustancies contaminantes que procedíen del colector d’Asturiana de Cinc-AZSA onde l’edificiu de prácticos portuarios en San Juan de Nieva.

Esti nuevu arramáu decatabase dende les 11,45 hasta les 13,15 hores y apreciabase na vera izquierda del paséu a San Juan que ta cerráu al transitu pola envernada. Los ecoloxistes dicen “desconocer les sustancies arramaes que yeren difíciles de comprobar ante la fuerte marexada qu’había a esi altor de la ría, pero se veia un color negru saliendo del colector qu’oldeaba coles agües de la ria”.

Esti nuevu arramáu, sumase a la llista interminable d’episodios contaminantes de la ría d’Avilés, de la que cada pocu tiempu “anúncien que va sumir esa lacra, pero por mas tiempu que pasa sigui produciendo con demasiada frecuencia para arrebolo de les autoridaes que la dexen”.

Avilés y l’arrodiada ye la zona más contaminada d’España según les últimes mediciones feches poles estaciones de control de la contaminación del Gobiernu d’Asturies nel añu 2013. La zona central asturiana ye la única zona d’España que supera dende va dellos años l’estragal de protección de la salú en partícules toa l’añu qu’esta afitáu nuna media añal de de 40 µg/m3.

Con esos datos podemos comprobar como sigue enquistada la contaminación atmosférica na contorna d’Avilés que sigue siendo la peor d’España en partícules, a pesar del amenorgamientu de la producción industrial y del descensu del tráficu portuariu.

Según denuncia la Coordinadora Ecoloxista “ye significativo que toles estaciones superen el valor de 20 µg/m3 pa partícules de menos de 10 micres, valor encamentáu a lo más de promediu añal pola Organización Mundial de la Salú (OMS). Concretamente, les medies añales son 55 µg/m3 na estación del Mataderu, 37 µg/m3 en Llanu Ponte, 36 µg/m3 en Llaranes y 27 µg/m3 en Plaza Guitarra. Estos datos[1] ponen de manifiestu que la contaminación en partícules PM10 sigue siendo un grave problema.”

Amás, nes estaciones de Mataderu, Llanu Ponte y Llaranes nun se cumple’l valor llende diariu de protección a la salú establecíu pola norma española, que preve una llende de 35 superaciones al añu del valor de 50 µg/m3: produciéronse 178 superaciones nel Mataderu y 55 en Llanu Ponte; como vemos, gran parte del añu fora de norma. Como tamién se superen nel restu d’estaciones privaes allugaes na contorna, de Arnao y Salinas en Castrillón, Depuradora de Alcoa en Gozón, lo mesmo que pasara na de Trasona y el Puertu si dieren los datos.

Hai que recordar que la zona central asturiana ye la única zona d’España que supera dende va dellos años l’estragal de protección de la salú en partícules toa l’añu qu’esta afitáu nuna media añal de de 40 µg/m3.

Aurelio Martín, diputáu d’IX na Xunta Xeneral, alvirtió esta mañana en rueda de prensa que la decisión de la Conseyería de Agroganadería y Recursos Autóctonos de llevantar la moratoria de plantíu d’ocalitos decretada por IX en 2009 ye una irresponsabilidᔠpor qu’implica l’arrenunciu a facer cumplir l’oxetivu del Plan Forestal redactáu pol PSOE en 2001, qu’afitaba un máximu de 61.338 hectárees hasta 2060.

L’ex conseyeru de Mediu Rural recordó que “los planes tán pa cumplise” y sería una temeridᔠfaer lo contrario ensin ufiertar les razones de tomar d’esta decisión, teniendo en cuenta de que yá se superen les 60.000 hectárees plantaes.

El diputáu considera que si esistiera una razón pa terminar cola moratoria, la Conseyería tendría d’unviase al Parlamentu, máxime cuando’l mesmu Plan yá preve una evaluación en 2015, y cualquier cambéu tendría de facese col consensu necesariu. Martín amuesa tamién la so “esmolición” pol esmantelamientu” de les polítiques qu’IX impulsó cuando taba nel Gobiernu, nesta y n’otres materies, un camín equivocáu” pal PSOE, por que perxudica al mediu rural y contribúi “a un mayor aislamientu políticu y social del Gobiernu”.

Martín apunto que cuando IX impunxo la moratoria en 2009 los datos de plantíos yá demostraben que la superficie plantada d’ocalitos yá taba bien percima de los indicaos nel Plan Forestal.

L’alternativa, a xuiciu del diputáu d’IX, nun ta en qu’Asturies tenga más superficie plantada d’ocalitos sinón n’aumentar la productividá de la superficie yá esistente que ta, según los sos datos, al 50% de la capacidá por falta de tratamientu. “Entá reconociendo como diz la Conseyería que la productividá sía del 70%, hai marxe pa una meyora de lo yá plantao”, aseguró na see d’IX.

Nuna sorprendente decisión, el Principáu va decretar una moratoria de la prohibición de los plantíos d’ocalitu fecha nel añu 2009 de resultes de la grave espansión que taba esperimentando esti árbol nel país. Envalorábase que l’ocalitu ocupaba la sesta parte del territoriu arboláu de la nuesa rexón y que reemplazara a la práctica totalidá de los montes costeros, tando a puntu de romper la barrera de les 61.338 hectárees de superficie fita como llende pol Plan Forestal d’Asturies pal añu 2060, en concretu atopar na llende fita pal añu 2.053, que son 60.311 hectáreas.

Pero agora, y ensin dulda nenguna de resultes de les fuertes presiones exercíes pola multinacional papelera y los madereros, el Gobiernu d’Asturies ta volviendo autorizar plantíos d’ocalitos, tal que consta nuna respuesta unviada por escritu pol Director Xeneral de Política Forestal a una entruga de la Coordinadora Ecoloxista d’Asturies, que diz textualmente: “Los nuevos plantíos d’ocalitos globulus autorícense, previu informe favorable, nel marcu de lo previsto nel artículu 42.3 de la Llei 3/2004, de 23 de noviembre, de Montes y Ordenación Forestal y coles llendes de la medría de superficie máximos d’ocalitu previstos nel Plan Forestal”.

Pero ye que les llendes previstes nel Plan Forestal yá s’algamaron, porque como denuncia la Coordinadora Ecoloxista d’Asturies “tamos na superficie prevista pal añu 2.053. Poro, non puede tolerase que sía’l lobby del ocalitu quien dicten la política y la planificación forestal d’Asturies atendiendo puramente a los sos intereses comerciales, ensin tener en cuenta criterio sociales, mediu ambientales o de planificación económica xeneral. Non puede tolerase que’l Gobiernu del Señor Javier Fernández se plega a les presiones d’esti lobby por bien poderosu que sía, yá que percima de los intereses particulares hai de imperar l’interés xeneral. Y nun creemos que l’interés xeneral sía’l de convertir la mariña asturiana nun monocultivo d’ocalitos”.

Tenemos de recordar que’l Plan Forestal d’Asturies redactar el mesmu Gobiernu asturianu nel añu 2001, y que obviamente esti Plan Forestal cuntó con unos estudios técnicos y una evaluación ambiental estratéxica, que suponemos seríen los qu’indicaron les superficies fayadices pa cada especie ensin poner en peligru l’ecosistema forestal y buscando l’equilibriu ente aprovechamientu económicu sostenible y sostenibilidá del mediu. Y en función d’esos estudios llegar a la conclusión a la que se llegó nel oxetivu de superficies ¿O non? ¿O ye que los oxetivos de superficie poner a volio? De ser asina sería bien grave.

La Coordinadora Ecoloxista d’Asturies propón que se caltenga l’actual regulación y consiguiente moratoria nos plantíos d’ocalitos decretada nel añu 2009 y respétense les llendes de les superficies establecíes pol Plan Forestal, qu’afita un máximu de 61.338 hectárees pal añu 2060, porque nestos momentos yá algamemos la cifra prevista pal añu 2.053. Per otra parte débese impulsar l’aumentu de la productividá de les actuales mases d’ocalitos (agora mesmu tán a un 50% de la so capacidá productividá per falta de cuidos y tratamientos) en cuenta de pol aumentu de la superficie.

L’ocalitu aceda’l suelu sobre’l que se sofita. Y el suelu asturianu yá tien de por sí un pH baxu de resultes del altu réxime d’agües, lo cual agrávase entá más nel occidente de la rexón onde los suelos son silicios. Lo que xuníu a la gran cantidá de nutrientes que precisa estrayer polos sos rápidos crecedera, al tratamientu forestal que s’aplica a los plantíos (yerbicíes, baltes a matarrasa cada 12 años, etc.) y que causen procesos graves d’erosión poles fuertes rimada de los montes asturianos.

L’Asociación Cultural N’AST quier denunciar públicamente que’l Gobiernu’l “Principáu” ta acabante de sacar a esposición pública y periodu d’altriques el Reglamentu de Patrimoniu Cultural con doce años de retrasu –la Llei de Patrimoniu foi aprobada en 2001– y qu’amás fízolo en plenes feches navidiegues col enfotu de torgar lo más posible la participación de la xente dificultando asina’l drechu a alegar.

Pa N’AST, la tramitación del Reglamentu de Patrimoniu Cultural ye un exemplu más del pocu respetu y nulu interés del Gobiernu’l “Principáu” en que los asturianos puedan participar na tramitación de les lleis y documentos que-yos afecten, nesti casu un reglamentu básicu pa la defensa de los elementos culturales d’Asturies, anque tamién ye verdá que tampoco da munchu más, viendo la “dilixencia” cola que se vien aplicando la Llei de Patrimoniu dende 2001 y el procuru que los socesivos gobiernos del PSOE tuvieron pa cola cultura asturiana, en xeneral, y el patrimoniu, en particular.

Por último, N’AST quier remembrar que nin siquiera se va poder conocer pronunciamientu dalgún d’Ana González, Conseyera d’Educación, Cultura y Deporte, sobre’l mentáu reglamentu nin sobre’l retrasu de doce años en sacalu a esposición pública enantes de qu’acabe’l periodu d’altriques gracies al alcuerdu algamáu ente PSOE, PP, IU ya UPyD pa que nun heba plenos cada selmana nesti mes de xineru.

La Coordinadora Ecoloxista vieno acabante d’esixir a la Conseyería de Agroganaderia del Principáu’l que se tomen midíes yá, contra les numberoses quemes forestales que se vienen produciendo en peracabar selmana coincidiendo con unes elevaes temperatures y el vientu sur. Solamente ayeri hubo mas de 60 quemes, sobremanera nel oriente asturianu.

A pesar de les escepcionales condiciones meteorolóxiques d’estos díes, el Principáu nun punxo en marcha los mecanismos de prevención habituales cuando l’Índiz de Riesgu Forestal tendría de ser 4 o 5 (bien altu), mientres estos díes púnxose l’Índiz de Riesgu Forestal 1 (el mas baxu) pa sorpresa de los excoloxistes, y nun s’activo’l plan d’emerxencies, a pesar de que llevamos dellos díes con munches quemes.

Ante’l silenciu informativu, la Coordinadora Ecoloxista denuncia que fueron numberoses les quemes, con cantidaes importantes p’haber tomáu midíes escepcionales, nun siguir con un Índiz de Quemes 1, “lo qu’amuesa la falta de rigor del Gobiernu Asturianu nos niveles de quemes forestales, que nun sabemos si debe a la falta de capacidá, o de presupuestu pa movilizar al personal en materies de prevención y vixilancia que traería un Índiz cimeru a 3 con estes condiciones climátiques actuales”.

Andecha Astur vieno acabante de xuntase, al pié d’otres munches asociaciones polítiques y ciudadanes a la plataforma “oro non” escontra l’apertura d’una xabaz mina d’oru por ASTURGOLD nos conceyos de Castropol, Tapia y El Franco.

Andecha Astur anima a presentar altriques escontra la resolución del “Principado” pa que la empresa Exploraciones Mineras del Cantábrico S.L. se beneficie d’un nueu Permisu d’Investigación de 100 cuadrícules mineres pa mineria d’oru, nos conceyos de Castropol, Tapia de Casariego y El Franco.