El Castiellu de Campogrande vuelve a Blimea

Esti pasáu xueves la Casona del Bravial abrió los actos pa conmemorar la celebración del so cuartu aniversariu como centru cultural cola inauguración de la esposición “El Castiellu de Blimea. Historia, lleendes, abandonu.” Nel actu, que contó con numberosu públicu asistente, intervinieron Gema Suárez Torre, conceyal de Cultura de Samartín del Rei Aurelio, y Belén González Collado, la historiadora que llevó a cabu’l llabor d’escoyeta y recoyida de materiales.

Dambes destacaron el valor de la documentación cola que se trabayó pa reconstruyir la historia del castiellu, asina como les importantes aportaciones que ficieron los vecinos de Blimea pa llevar a cabu esta muestra.

La esposición fai un percorríu pela historia del edificiu y les families que lu habitaron basándose en datos bibliográficos, documentos antiguos y semeyes. Asina, cuéntase como ente los sieglos XI y XII la familia Fernández Miranda, procedente del conceyu de Quirós, s’asentaba na Casona del Bravial y, tiempu dempués, nel añu 1496, descendientes d’esa mesma familia treslladaríen la so residencia a la casona de La Cabezá, que munchos sieglos dempués va convertise nel conocíu como Castiellu de Blimea, al que-y dará forma en 1897 el Vizconde de Campogrande nun intentu de revivir les vieyes glories medievales. De dalgún mou esta esposición pretende ser un homenaxe a un edificiu que tovía recuerden con munchu ciñu los vecinos de Blimea, y una manera de dexar constancia del so valor históricu.

La esposición va poder visitase hasta’l 7 de marzu de llunes a vienres n’horariu de 9 a 13 h. Entamen asina les actividaes programaes pa celebrar esti cuartu aniversariu de la Casona del Bravial, que van siguir el próximu día 21 de febreru cola celebración del Día de la Llingua Materna, fecha na que se va llevar a cabu un taller esplicativu d’edición de la Wikipedia n’asturianu.