Música

Lletres cargaes de conteníu cotidianu y ‘buen rollito’ énte un públicu xeneralista y amenorgáu pol ‘efectu Melendi’. El conciertu simultáneu del rumberu uvieín na plaza toros d’El Bibio quitó-y asistentes al recital que la cantautora Bebe ufrió anueche na Selmana Negra de Xixón, y qu’enllenó de fusión musical el recintu’l certame policiacu.

Con esi denominador común s’escribe la música d’anguaño, cola mecigaya de soníos aflamencaos, ska, reggae y rap que la cantante d’orixe valencianu espardió dende enriba l’escenariu p’asoleyar ente los espectadores esa reivindicación tan d’ella por un espaciu femeninu propiu, guerreru y peleón.

‘Malo’ y ‘Ella’ foron los temes más cellebraos pol públicu, formáu por un amiestu nel que se vieron dalgunos incondicionales pero tamién abondes families que paseaben pola Selmana. Resultáu: Un ambiente menos ‘caldiu’ que’l que s’esperaba.

Turbonada de la escuela’l ‘buen rollito’ y acompañada n’escena por Carlos Jean y varios miembros d’El Combo Linga, Bebe nun dexó d’alitar al baille y tampoco nun dexó de ser esplícita nos llamaos a l’actividá de los espectadores: “a follar, a follar, que choquen los planetes”.

La banda sonora del Camín de Santiago nos sos tramos asturianos resurde con ocasión del Añu Santu Compostelanu. La conseyería de Cultura, Comunicación Social y Turismu y la discográfica Fonoastur presentaron esti mediudía n’Uviéu la reedición del cd ‘Asturies: camín de Compostela’, grabáu pola desapaecida formación Boides y cuya primer edición “nun entendió” el públicu hai agora once años.

Asina lo aseguró güei Xuan Nel Expósito, ún de los integrantes de Boides, pa quien el llanzamientu del trabayu qu’agora se reedita supuso en 1993 “romper los moldes” de la música qu’entós se facía n’Asturies y constituyó el primer discu asturianu concebíu como una banda sonora. Por esa razón, sostién el curdionista participante na grabación, y pol resurdimientu turísticu qu’esperimenta anguaño’l Camín a Compostela, el cd de Boides va valorase agora más qu’hai una década.

Un argumentu asemeyáu esgrimió’l director xeneral de Promoción Cultural y Política Llingüística, Carlos Madera, qu’ensalzó l’itinerariu xacobéu como un “mediu idóneu d’ida y vuelta pa la comunicación de los pueblos” y felicitóse de qu’Asturies cuente dende güei con una banda sonora “d’altor” del Camín a Santiago.

Con diseñu didácticu ellaboráu pol creador gráficu Ástur Paredes, enfotáu en recordar que tamién n’Asturies hai ‘cruceiros’ que-yos marquen a los pelegrinos un camín promovíu pol rei asturianu Alfonso II, el cd qu’agora se reedita incorpora 16 pieces que nacieron como una reivindicación del protagonismu’l Principáu nel Camín a Compostela, según precisó’l productor del trabayu, Lisardo Lombardía.

A lo llargo de 16 temes -la mayoría d’ellos composiciones sobro pieces tradicionales-, el discu plantega un itinerariu musical pol Camín del interior, dende Arbas del Puertu a Tinéu y Allande, y otru paralelu al itinerariu xacobéu de la costa, dende Llanes a Avilés, Cuideiru y la ría l’Eo.

Na remasterización de la grabación orixinal participaron los que foren integrantes de Boides, banda desfecha seis meses depués d’asoleyar el trabayu: Xuan Nel Expósito, José Ángel Hevia, Daniel Lombas y Javier Rojo, amás de Joaquín Menéndez.

Alcuerdu a la puerta’l xulgáu. La Sociedá Xeneral d’Autores y Editores d’España aceptó esta mañana retirar la demanda contra’l Festival Intercélticu d’Avilés, cuya VIII edición empieza mañana, y negociará a la baxa cola asociación Esbardu, organizadora’l certame, un cobru por drechos d’autor que sedrá menor del 10 por cientu reclamáu nun principiu. Dambes partes aplacen a setiembre les conversaciones sobro ediciones anteriores del festival.

Según confirmó el presidente d’Esbardu, Juan Casas, l’asociación cultural que dirixe pagará “lo que realmente correspuenda”, pero en nengún casu el 10 por cientu sobro los beneficios totales que reclamaba la Sociedá d’Autores en conceptu de drechos d’autor por espectáculos musicales. La cantidá final pactaráse darréu fine la VIII edición del festival, qu’arranca mañana y de la que técnicos de la SXAE van facer un siguimientu precisu.

L’alcuerdu algamáu esta mañana evita asina la suspensión de los principales conciertos del certame, que güei debía decidir el xuez en rempuesta a la petición de “midíes cautelares” cursada pola Sociedá d’Autores y Editores. Minutos antes del aniciu de la vista, una conversación ente’l delegáu de la SXAE n’Asturies, Javier Vidal; el conceyal de Cultura del Ayuntamientu d’Avilés, Juan José Fernández; el propiu Juan Casas y los abogaos de dambes partes propició la retirada de l’acusación xudicial, al aceptar Autores la negociación a la baxa.

“Nosotros nunca nun mos negamos a negociar eso”, precisó Casas, qu’espresó la so satisfacción pol alcuerdu algamáu -“agradable y ventaxosu”- y recordó’l saltu cualitativu que da esti añu l’Intercélticu, polo que “güei yera un día pa tirar volaores y non pa dir al xulgáu”, dixo n’alusión al considerable crecimientu que’l festival ufre nesta edición.

Nuna segunda fase, a partir de setiembre, “y ensin presiones”, Esbardu y la Sociedá d’Autores falarán de los cobros que la SXAE reclama poles siete ediciones anteriores del certame avilesín, depués qu’Autores decidiera dar un güelpe de mano el pasáu vienres al denunciar énte’l xuez a los organizadores del Intercélticu por nun comunica-y a la entidá el programa d’actuaciones nin abonar les tases correspondientes que la Sociedá tien estipulaes.

Premiu a la constancia. El guitarrista gaditanu Francisco Sánchez Gómez, conocíu como Paco de Lucía y consideráu mayestru absolutu del toque flamencu depués d’una carrera musical entamada a los seis años d’edá, algamó esti mediudía el ‘Príncipe de Asturias’ de les Artes 2004, en reconocencia a la so decisiva aportación a la música de raigón y a la relevancia mundial del so llabor.

Na so acta, el xuráu destaca a de Lucía por “trascender fronteres y estilos y ser anguaño un músicu de dimensión universal”, y eloxa al artista andaluz porque “too cuanto pue espresase coles seis cuerdes de la guitarra tá nes sos manes, que s’animen cola emocionante fondura de la sensibilidá y la llimpieza de la máxima honradez interpretativa”.

Nacíu na llocalidá d’Alxeciras en 1947 y aniciáu nel toque pol so pá, que lu alitaba a estudiar guitarra hasta diez hores diaries, Paco de Lucía subió a los escenarios a los 12 años d’edá como integrante’l dúu ‘Los Chiquitos de Algeciras’ y consagróse en 1970 con ocasión de la so intervención nun festival n’homenaxe a Beethoven en Barcelona.

Mui prósimu a ‘Camarón de la Isla’, consideráu el meyor ‘cantaor’ de tolos tiempos, y defensor del trabayu diariu frente a los que s’enfoten na “xenialidá espontánea”, De Lucía exerció una influyencia decisiva sobro’l toque flamencu que cambió la so concepción hasta en tres ocasiones. La so obra ta recoyida en 24 discos nos que s’atopen aprosimaciones al jazz, a la música clásica y a los ritmos brasileños.

Ente los candidatos que tamién optaben al ‘Príncipe’ de les Artes 2004 figuraben amás los músicos Bob Dylan, Bruce Springsteen y Chavela Vargas; el baillarín francés Maurice Béjart y el cineasta manchegu Pedro Almodóvar, toos ellos dientro d’una llista de 50 aspirantes qu’el xuráu analizó a lo llargo de tola xornada d’ayeri.

El Premiu ‘Príncipe de Asturias’ de les Artes, que l’añu pasáu recayó nel creador plásticu Miquel Barceló y ta concebíu pa distinguir el llabor de persones o collectivos destacaos na arquitectura, cinematografía, dancia, escultura, música, pintura y demás espreciones artístiques, ye’l sestu de los ocho galardones que concede la Fundación ‘Príncipe’, y marca’l fin de la primer fase de concesión de los galardones, hasta qu’en setiembre prósimu se fallen los ‘Príncipe’ de Deportes y Concordia.

Nel palmarés de premiaos en 2004 yá figuren l’escritor Claudio Magris (Lletres), l’economista Paul Krugman (Ciencies Sociales), el periodista Jean Daniel (Comunicación ya Humanidaes), el Programa ‘Erasmus’ (Cooperación Internacional) y un equipu plurinacional de cinco oncólogos (Investigación Científica).

Web oficial del artista

La música antigua desembarca en Xixón. Los ‘lutiers’ Benoit Gervais y Antonio Franco imparten dende güei los dos cursos de construcción de viola qu’abren el programa de la VII Selmana de Música Antigua y de los que saldrán los instrumentos que van sonar nel conciertu final del certame, el 25 de xunetu.

Hasta entós, y a partir del prósimu vienres, polos escenarios del teatru Xovellanos y de la Colexata de San Xuan Bautista pasarán los grupos y solistes El Cortesano (16 de xunetu), The Ferrera Ensamble (17), Ensamble Plus Ultra (18), Ensamble Tetrakys (19), Paul O’Dette (20), Kaori Uemura & Jerome Hantai (21), Abendmusic (22), Ensamble II Fondamento (23) y Allia Música (24 de xunetu).

Benoit Gervais, inxenieru ellectrónicu, formóse como ‘lutier’ nel Reinu Xuníu y trabyó, ente otres instituciones, nel Muséu de la Música de París. Los sos alumnos xixoneses deprenderán baxo la so supervisión a construyir violes de gamba, mientres que’l cursu impartíu por Antonio Franco -artesanu dende 1986 del Taller d’Instrumentos Musicales de Lugo- centraráse na construcción de violes medievales.

Amás de los conciertos y les actividaes docentes, la VII Selmana de Música Antigua de Xixón caltién abierta hasta’l fin del certame, nel Centru de Cultura Antiguu Institutu, una esposición sobro los instrumentos musicales nes ilesies del Camín de Santiago que pue visitase tolos díes llaborables n’horariu de 11 a 14 y de 18 a 21 hores, y los domingos namás na franxa mañaniega.

Los Berrones graben el so primer discu en directu. La veterana banda de Tolivia, pionera na difusión masiva del pop-rock en llingua asturiana, aprovechará’l conciertu que va ufrir na xixonesa playa de Poniente el prósimu 10 d’agostu pa editar un dvd que saldrá al mercáu al rodiu de la seronda y nel que’l grupu prevé incluyir ente 22 y 26 temes.

Según confirmó Olegario Méndez, baxista del grupu, los integrantes de Los Berrones entá nun decidieron el títulu col que sacarán a la venta la so primer incursión nes grabaciones en directu, que saldrá d’un conciertu programáu pol Ayuntamientu de Xixón nel marcu de la Selmana Grande de les fiestes llocales de Nuesa Señora de Begoña, pero en cualquier casu nun quieren esperar más allá de los meses finales de 2004 pa regresar a les tiendes de discos con un nuevu trabayu.

Finalistes del concursu de maquetes de Radio Asturias en 1988, Los Berrones saltaron darréu a la fama col premiu d’esi certame: La grabación d’un ‘single’ nel que s’incluyeron los temes ‘Tais de yogur’ y ‘Nun yes tú’ -primer gran ésitu del pop-rock n’asturianu- y qu’escosó dos tiraes acabante ser editáu.

En mayu de 1989, la banda de Tolivia asoleya’l so primer discu de llarga duración, ‘Voi dicítelo’, que popularizó la música en llingua asturiana a niveles hasta entós inéditos al traviés d’un singular amiestu de modernidá sonora y raigañu rural. Nos siguientes cuatro años, Los Berrones editaron tres trabayos más -‘Si rompe, que rompa’, ‘¿Lo tuyo cómo ye?’ y ‘No, home, non’- y somorguiáronse llueu nun silenciu que nun frañeron hasta 1998, cola publicación del so quintu cd, ‘Da-y fuerte’.

En payares del añu pasáu, el grupu sacó a la venta un discu recopilatoriu que, baxo’l títulu ‘Diez años berrando’, repasa los temes más representativos de la banda na so primer década de vida.

Web oficial del grupu

El folk asturianu promociona en Polonia el Camín a Santiago. La banda Gueta na Fonte representará al Principáu el prósimu llunes na inaguración d’una esposición sobro l’itinerariu xacobéu que podrá visitase nel Muséu Etnográficu de Varsovia y que ta entamada en comuña polos Gobiernos autonómicos d’Asturies, Galicia, Castiella y León y La Rioja.

Nel recital, Gueta na Fonte interpretará un repertoriu basáu na música tradicional asturiana, pero con llugar tamién pa les composiciones propies y les pieces populares de países celtes vecinos. Amás de la intervención del grupu folk, formáu hai agora cuatro años, l’actu d’inaguración incluyirá una preba de productos de les comunidaes organizadores de l’amuesa a la qu’Asturies contribúi con quesos del país.

La esposición, que se presenta énte’l públicu baxo’l títulu ‘Sentimientos de Camino’, concéde-y un especial pesu a la imaxe ya incorpora fotografíes del Camín Xacobéu al so pasu per Asturies tomaes por Arnaud Späni.

John Mayall, Rundy Brecker & Bill Evans, Black Heritage Choir, Fisk Jubilee Singers ya Isaac Turienzo pondrán-y música a la recuperación del Festival de Jazz d’Uviéu, que l’Ayuntamientu recupera depués del so desaniciu, hai agora trece años, y qu’anuncia como una cita llamada a tener continuidá n’años posteriores.

Esi ye l’envís qu’amosó esti mediudía el conceyal delegáu de Cultura y primer teniente d’alcalde, Alfonso Román López, que presentó “la primer edición de la segunda época” del festival como un atractivu añadíu pa los turistes que visiten la ciudá aprovechando’l veranu. A xuiciu de Román, la recuperación del certame uvieín de jazz supón “que’l veranu seya tamién una estación cultural”, al asigna-y a esta época del añu un eventu de sonadía, al nivel de la temporada d’ópera n’inviernu o’l festival de danza na primavera.

En total, el revivíu certame de jazz, que va cellebrase ente’l 18 y el 23 de xunetu y quier ‘colase’ nel circuitu de grandes cites espacializaes como los festivales de Vitoria y San Sebastián, espardirá los acordes de 24 bandes, coros y solistes por tres escenarios: El teatru Campoamor, reserváu pa los intérpretes de relieve internacional y con conciertos de pagu -12 euros la entrada, 45 euros l’abonu pa los cinco recitales- a partir de les 22,30 hores; el patiu hestóricu de la Universidá, onde habrá tres conciertos gratuitos a la mesma hora; y la sala Tribeca, que va acoyer seis recitales de madrugada.

Ente los músicos incluyíos nel programa destaquen John Mayall & The Bluesbreakers, qu’estrenarán les actuaciones del festival nel Campoamor a ritmu de blues el llunes 19; el Black Heritage Choir de Mississippi, que protagonizará’l conciertu del miércoles 21; el pianista asturianu Isaac Turienzo, y los lexendarios Fisk Jubilee Singers, primera formación afroamericana que xiró por Europa a finales del sieglu XIX.

Nel edificiu hestóricu de la Universidá actuarán los cuartetos d’Alberto Menéndez, John Falcone y Ricardo Lewis, amás del dúu Albert Sanz-Robert Stillman y el Chastang Tríu, mientres que por Tribeca pasarán la News Orleans Brass Band -que tocará nes cais d’Uviéu mientres dure’l festival pa recorda-yos la so cellebración a los ciudadanos- y varios intérpretes del ámbitu asturianu.

El festival de jazz d’Uviéu, que resurde con un presupuestu de 180.000 euros, foi desaniciáu pol PP -qu’agora lu recupera- a la so llegada a l’Alcaldía.

La lluvia nun impidió anueche qu’El Canto del Loco llevara la plaza de toros d’El Bibio, en Xixón, al borde’l llenu, nun conciertu onde’l pop enérxicu de la banda madrilana ‘caló’ a más de 8.000 asistentes y que supuso la primer visita a la ciudá de los integrantes del grupu, Dani Martín, David Otero, Chema Ruíz y Jandro Velázquez.

Los primeros acordes de ‘La Insoportable’ y l’ésitu ‘A contracorriente’ abrieron una hora y media de música na que los temes del últimu discu del grupu, ‘Estados de ánimo’, amestáronse con coreaos cancios d’álbumes anteriores.

Nos momentos previos al recital, el grupu madrilanu declaró’l so interés por aportar a tolos públicos, pero aseguró que nun-y da más que se-yos aplique la etiqueta de ‘grupu de quinceañeres’, nun mercáu estigmatizáu polos designios de la industria discográfica: A xuiciu de los miembros d’El Canto del Loco, l’actitú de promotores y cases editores, que “busquen dalgo rápido, que dea perres”, contribúi a “restrinxir” la música, “ensin preocupase namás que por un look que venda”.

El so estilu pop-rock llevó a la banda a lo más alto nel panorama estatal, en parte, según los propios músicos madrilanos, porque anguaño nun se tá faciendo música d’esti estilu. Siguidores declaraos de grupos como Fito y los Fitipaldis, Marea, Macaco, Bebe y José el Brujo, los integrantes d’El Canto del Loco reconocen que la fusión ye’l puntu fuerte de les corrientes musicales d’anguaño.

La banda de Madrid dará conciertos hasta ochobre, casi diariamente, y depués d’unes vacaciones sacarán al mercáu un nuevu discu en setiembre de 2005 qu’anuncien el más divertíu de toos, colos sonidos más frescos d’EL Canto.

Sones ‘timberos’, pieces sinfóniques, puru rock and roll y temes con acentu asturianu. La XVII edición de la Selmana Negra, que se cellebra en Xixón ente’l prósimu vienres y el 18 de xunetu, subirá al so escenariu central a un garrapiellu heteroxéneu de solistes y bandes nel que figuren Bebe, Lunáticos, Dixebra, Xuacu Amieva, Long Riders y la Orquesta Nacional de Barbès

A tres xornaes del empiezu’l festival, que repite allugamientu na oriella izquierda’l ríu Piles y destaca nesta edición la so vertiente lliteraria, los organizadores de la Selmana Negra ultimen el montaxe d’un recintu que’l mesmu vienres animarán los cubanos NG La Banda, a partir de la hora que sedrá habitual nos conciertos que se cellebren nel escenariu central: les 23 hores.

Long Riders garrarán el relevu al otru día, sábadu 10, y el gaiteru Xuacu Amieva sedrá l’encargáu d’abrir el domingu 11 de xunetu cuatro xornaes d’actuaciones d’artistes asturianos: El veteranu rock de Dixebra sonará nel escenariu de la Selmana na nueche’l llunes 12, los xixoneses Manta Ray tocarán el martes 13 y la Orquesta de Cámara del Nalón interpretará el miércoles 14 un repertoriu qu’inclúi pasaxes de la banda sonora del llargumetraxe ‘Psicosis’.

Nel tramu caberu del festival, la solista Bebe presentará’l so primer trabayu discográficu, ‘Pafuera telarañas’, el xueves 15, y Los Lunáticos -dúu formáu pol ex guitarrista de M-Clan Santi Campillo y por Miguel Bañón- actuarán na nueche’l vienres 16 de xunetu.

La espuela musical de la XVII Selmana Negra correspuende-y esti añu, el sábadu 17, a la Orquesta Nacional de Barbès, un conxuntu entamáu nesi barriu parisín por músicos africanos d’estremada procedencia enfotaos n’amestar los sones tradicionales de les sos respectives tierres con innovaciones n’estructures y melodíes.

Programa íntegru de la XVII Selmana Negra