Música

Más de 15.000 copies vendíes del so últimu discu. El grupu Los Berrones, pioneru nel usu de la llingua asturiana en música pop-rock de difusión masiva, asítiase ente les bandes con más ésitu nes tiendes y aprovecha l’emburrión nes ventes pa reeditar el so últimu trabayu d’estudiu, ‘República independiente de Tolivia’, qu’inclúi n’audio y video el nuevu tema’l grupu, ‘Fai deporte’.

Los integrantes de Los Berrones presenten güei na Fnac de Parque Principáu esi cenciellu, grabáu hai un mes xunta más de dos decenes de deportistes asturianos d’alta competición y cuyos beneficios de venta donaránse, en parte, a una entidá benéfica de Ciañu. El nuevu tema sal a la lluz dientro d’una reedición del discu ‘República independiente de Tolivia’, editáu por primer vegada en 2003.

La banda de Llaviana revive l’ésitu de públicu algamáu na so presentación énte’l públicu, hai agora dieciséis años, cuando’l so singular amiestu de pop-rock, raigañu rural y llingua asturiana propició-y al grupu altos niveles de siguimientu y popularidá, asina como un abondosu númberu de conciertos dientro y fuera’l Principáu.

Nesti ‘resurdimientu’, Los Berrones enfilen esti añu col envís de rentabilizar el so ésitu de ventes y protagonizar una cifra de recitales asemeyada a la del añu pasáu, con cites inmediates na Salka Azkena de Bilbao (22 de xineru), nel llocal madrilanu El Sol (día 27) y na sala Glam de Lleón (29 de xineru).

El responsable de la reedición de la popularidá de Los Berrones ye’l discu que la banda grabó en directu n’agostu pasáu na playa xixonesa de Poniente, al qu’acudieron miles de persones. Con anterioridá, el grupu grabó otros siete trabayos dende’l so estrenu nos estudios, en 1989.

Archivu. Los Berrones axunten a deportistes d’alta competición na grabación d’un tema alusivu

Segunda fase. L’Academia de la Música abre la votación pa escoyer los tres finalistes del premiu a la meyor canción en llingua asturiana de 2004, a partir d’un llistáu nel que s’inclúin los intérpretes Toli Morilla y Rafa Lorenzo y con un plazu de votaciones que se pesllará’l 13 de febreru. El nome de los finalistes conoceráse a finales d’esi mesmu mes.

Asina, l’Academia apura l’unvíu a los sos socios de papeletes pa que materialicen el so votu por corréu ordinariu, o bien una clave pa qu’emitan el so sufraxu vía web, en dambos casos antes del domingu 13 de febreru. De la votación saldrán los tres finalistes que viaxarán a Madrid pa participar na gala d’entrega de los IX Premios de la Música, n’abril.

Ente los grupos y solistes qu’opten a recibir el galardón al meyor cantar n’asturianu editáu ente avientu de 2003 y payares de 2004 figuren, como incorporaciones d’última hora, los intérpretes Toli Morilla, que l’añu pasáu asoleyó’l discu acústicu ‘Nueche d’insomniu’ a partir de testos de poetes asturianos, y Rafael Lorenzo, quien grabó los temes ‘Ye navidá’ y ‘Lluceru de Navidá’ nel discu collectivu ‘Navidad en Asturias’.

Xunta él, Chus Pedro Suárez concurre con ‘Agora sal a bailar’, un tema d’orixe tradicional con igües del propiu Chus Pedro y de Gabino Antuña. El folk ta presente con ‘Lin’, cantar escritu por Lilian Fernández ya interpretáu por Deua Dubra, y ‘Nun nos dexen’, interpretáu por Tarañu y obra de José Luis Díaz; y Skanda y La Tarrancha compiten, respectivamente, colos temes ‘Sangre d’ochobre’ y ‘Presente indicativu del verbu nun trabayar’.

Na edición d’esti añu ta tamién presente, como aspirante, el controvertíu ganador de 2004, el compositor Pepín Robles, qu’entra a concursu col tema ‘La Pola de Siero’, interpretáu por Vicente Díaz. Robles fízose col galardón a la meyor canción en llingua asturiana de 2003 por ‘Nunca Máis’, un tema cantáu por Manolo Morán y dafechu cuestionáu como representativu de la música fecha n’asturianu a lo llargo d’esi añu.

Trescientes entraes al día. El grupu norteamericanu REM mantién esi ritmu de venta de llocalidaes pal conciertu qu’ufrirá el prósimu 29 de mayu en Xixón. L’Ayuntamientu espera caltener esa media nes prósimes selmanes -lo qu’ayudaría a pasar páxina del déficit dexáu pol últimu gran conciertu entamáu na ciudá, el de Paul McCartney- y sorraya que despachó yá más de 5.000 entraes pal recital de la banda d’Estaos Xuníos, lo que supón un terciu del aforu previstu.

Según les cifres apurríes pola sociedá Teatru Xovellanos, que xestiona los espectáculos municipales en Xixón, si persistiere l’actual ritmu de venta de llocalidaes, les entraes escosaríen en cuatro selmanes más, yá que pol momentu bastaron quince díes pa despachar una tercera parte de les 15.000 entraes puestes a la venta.

El conciertu de REM n’Asturies suscita amás l’interés de comunidaes autónomes vecines, yá que Galicia y Cantabria son les autonomíes onde más entraes se vendieron hasta agora escluyendo’l Principáu, y axuntará en Xixón a siguidores procedentes de llugares alloñaos como Zaragoza, Marbella, Logroño, Ourense, Salamanca o Guadalajara, según los datos de venta automática de llocalidaes.

Llueu de les actuaciones que REM ufrió esti mesmu mes en Barcelona y Madrid, la banda norteamericana regresará a la península Ibérica pa completar dos conciertos más, el de Xixón y ún cuartu en Torrevieja. Antes, la banda liderada por Michael Stipe viaxará por Francia, Italia, Estonia, Checoslovaquia, Noruega, Alemania, Dinamarca, Xapón y Australia.

L’Ayuntamientu de Xixón enfótase n’algamar un ésitu qu’ayude a superar la mala alcordanza dexada pol últimu gran recital entamáu na ciudá, el del ex ‘beatle’ Paul McCartney, que dexó nes arques municipales un déficit superior a los 500.000 euros y provocó tumultos fuera l’estadiu d’El Molinón al regalar la compañía Movistar más entraes de les que llueu repartió ente’l públicu.

Web oficial del grupu

Discrepancia sobro la cifra final. La Sociedá Xeneral d’Autores y Editores (SXAE) y l’asociación Esbardu, organizadora’l Festival Intercélticu d’Avilés, mantienen un desalcuentru en tornu a la cantidá qu’Autores reclama polos drechos d’autor de los conciertos del certame avilesín, qu’esti añu dedicará la so edición a Galicia y cellebraráse ente los prósimos 22 y 31 de xunetu.

Según confirmó Juan Casas, presidente d’Esbardu, los organizadores del Intercélticu esperen inda una rempuesta de la Sociedá d’Autores a la propuesta de lliquidación que yá-y empobinaron a la entidá, y de la que los responsables d’Esbardu yá tienen constancia de que la SXAE nun comparte.

Magar d’ello, los representantes de l’asociación qu’entama el festival avilesín enfótense n’algamar un alcuerdu nes prósimes selmanes colos servicios xurídicos de la Sociedá d’Autores y piensen yá na novena edición del Intercélticu, qu’aconceyará n’Avilés a cientos d’intérpretes de música y dancia del ámbitu célticu en diez díes nos que Galicia tendrá presencia destacada.

Francisco García Hidalgo, responsable xurídicu de la SXAE n’Asturies, postula un alcuerdu “razonable y equitativu” pa cobrar los drechos d’autor del festival avilesín, pero a la torga de pactar una cantidá final añádese un segundu puntu de desalcuentru: Mientres que García Hidalgo sostién que “la negociación tien que ser global” y reclama un pactu retroactivu sobre los drechos d’autor d’ediciones anteriores del festival, Juan Casas remembra que l’alcuerdu algamáu ‘in extremis’ na puerta’l xulgáu na viéspora l’aniciu del festival prevía namás la negociación al rodiu de los drechos d’autor xeneraos pola edición de 2004.

La octava edición del Intercélticu d’Avilés y Comarca aconceyó ente’l 16 y el 27 de xunetu a unos 20.000 asistentes, según el balance de los organizadores, nun añu que supuso un importante saltu cualitativu pal eventu, qu’axuntó a 850 participantes y aumentó la so duración respecto a 2003.

Tarañu xuega en casa. La banda ayerana de folk presenta mañana’l so primer discu, ‘Al xeitu de nenyuri’ nun conciertu que tendrá como escenariu’l teatru Carmen de Morea y nel que ta previsto qu’andechen los músicos Xuan Nel Expósito, Merce Santos, Alberto Ablanedo y Xosé ‘Ambás’, toos ellos ayenos al grupu.

Esti últimu exercerá amás de conductor del recital, qu’empezará a les 20,15 hores con entrada llibre y de baldre. Nél, los seis integrantes de Tarañu interpretarán los temes del so debú discográficu, editáu pol sellu L’Aguañaz y que la propia casa discográfica define como una recreación de lo tradicional dende una óptica contemporánea.

‘Jotas’, saltones y muñeires axúntense nel cedé de la banda ayerana, qu’entró na llista preliminar de los Premios de la Música como candidata a algamar el premiu al meyor cantar en llingua asturiana pol tema ‘Nun nos dexen’ y que ta formada por intérpretes mozos enfotaos en definir una propuesta singular del folk asturianu.

‘Al xeitu de nenyuri’ ta formáu por trece temes, de los que toos sacante tres son instrumentales y nos que la banda ayerana fai un repás de los sones tradicionales d’Asturies en clave de respetu a los esquemes y melodíes habituales nel folk. La composición propia marca bona parte de los temes, n’amiestu con pieces populares.

Archivu. El grupu ayerán Tarañu saca a la cai el so primer discu

Berren más y más lloñe. La banda d’agro rock en llingua asturiana Los Berrones aprovecha l’emburrión que-y da’l so discu en directu, con más de 10.000 copies yá vendíes, y abre 2005 con un calendariu de conciertos qu’inclúi actuaciones inmediates en Madrid, Lleón y Bilbao. La banda de Tolivia reedita l’altu siguimientu de públicu que tuvo nos sos empiezos, na década de los ochenta.

Col ‘Nun yes tú’ presente na programación de la cadena televisiva ‘Sol Música’, ún de los canales musicales con más audiencia nel Estáu, los integrantes de Los Berrones acudirán el prósimu 22 de xineru a presentar les sos credenciales na sala Azkena, de Bilbao. El xueves 27 actuarán nel llocal madrilanu El Sol y dos díes depués viaxarán a la sala Glam, de Lleón.

Esi ye l’itinerariu que los músicos de Tolivia tienen trazáu esti mes pa fuera d’Asturies, según informa la productora’l grupu, Santo Grial, pero los sos compromisos pasen tamién por presentar na Fnac de Parque Principáu, el prósimu xueves 20, el cenciellu ‘Fai deporte’, grabáu n’avientu xunta decenes de deportistes asturianos.

Finalistes del concursu de maquetes de Radio Asturias en 1988, Los Berrones saltaron darréu a la fama col premiu d’esi certame: La grabación d’un ‘single’ nel que s’incluyeron los temes ‘Tais de yogur’ y ‘Nun yes tú’ -primer gran ésitu del pop-rock n’asturianu- y qu’escosó dos tiraes acabante ser editáu.

En mayu de 1989, la banda de Tolivia asoleyó’l so primer discu de llarga duración, ‘Voi dicítelo’, que popularizó la música en llingua asturiana a niveles hasta entós inéditos al traviés d’un singular amiestu de modernidá sonora y raigañu rural. Nos siguientes cuatro años, Los Berrones editaron tres trabayos más -‘Si rompe, que rompa’, ‘¿Lo tuyo cómo ye?’ y ‘No, home, non’- y somorguiáronse llueu nun silenciu que nun frañeron hasta 1998, cola publicación del so quintu cd, ‘Da-y fuerte’.

Los discos ‘Diez años berrando’ (1999) y ‘República Independiente de Tolivia’ (2003) precedieron al llanzamientu, hai dos meses, del primer discu en directu de la banda, grabáu n’agostu pasáu nun multitudinariu conciertu na playa de Poniente, en Xixón.

Archivu. Los Berrones regaláronse una fiesta multitudinaria pa inmortalizar en Xixón el so soníu en directu

Los Chichos, Javier Krahe, Loquillo y Trogloditas. Los teatros y sales de conciertos reanuden la so programación depués de les fiestes navidiegues con un cartel pal mes de xineru qu’inclúi, ente otres actuaciones, les de Riveldel Lords y Saratoga n’Avilés, Clara Montes en Xixón y una xornada monográfica de rock en Pravia cola participación de Carlos Segarra, ex cabezaleru de Los Rebeldes.

L’axenda musical pa lo que queda de mes defínese pola variedá y tien una cita destacada el vienres 14 de xineru, día nel que’l veteranu grupu flamencu Los Chichos ufrirá un conciertu na sala xixonesa Parque’l Piles, coles llocalidaes a un preciu de 15 euros en venta anticipada y 18 en taquilla el día del espectáculu.

Al otru día, sábadu 15, Pravia quier convertise na capital del rockabilly nuna xornada dedicada de forma monográfica a esti estilu musical: La proyección de les películes ‘Grease’ y ‘American Graffiti’ precederán a l’actuación del rockeru Carlos Segarra na sala Olimpia, a un preciu d’entrada de 2 euros y cola participación de la banda asturiana Bourbon, en cuyu primer cedé prevé collaborar l’ex líder de Los Rebeldes.

Cultivadores d’un estilu asemeyáu, Loquillo y Trogloditas saldrán a escena, el 21 de xineru, na sala avilesina Quattro, pola que tamién pasarán, una selmana depués y nun conciertu en comuña, les bandes Saratoga y Rivendel Lords.

Xixón pondrá’l ritmu más sele a finales de mes. Dientro’l denomináu Festival de la Pallabra, cita añal que convoca a estremaos cantautores, el singular compositor ya intérprete Javier Krahe actuará nel teatru Xovellanos el 27 de xineru, con un preciu únicu d’entrada de 10 euros. El sábadu 29, les voces sureñes de Clara Montes -conocida por musicar poemes d’Antonio Gala- y de Valderrama -nome artísticu’l fíu’l ‘cantaor’ Juanito Valderrama- sonarán tamién nel Xovellanos, con entraes a la venta ente 12 y 15 euros.

Feches de recitales na web asturconciertos

Mayoría d’edá. El grupu avilesín Dixebra cumple mañana 18 años de vida como únicu referente durable nel panorama’l rock en llingua asturiana y cellebra’l cumpleaños colos primeros trabayos de grabación del so sétimu discu, que saldrá al mercáu na prósima primavera. Nes sos casi dos décades d’esistencia, la banda avanzó d’un primixeniu ska ensin complicaciones hasta facturar un soníu propiu y consagró l’asturianu como idioma posible pa la música más actual.

Magar que sólo ún de los componentes de la formación orixinal pervive nel grupu -el vocalista, Xune Elipe-, Dixebra cellebró’l so primer ensayu nel día de Reis de 1987 na llocalidá corverana de Castañeda. Cinco meses depués, el grupu ufrió en Xixón el so primer conciertu y entamó un granible pasu polos estudios de grabación que se traduxo na edición de los discos ‘Grie-ska’ (1990), ‘Asturies o trabayes’ (1993), ‘Apúntate a la llista’ (1995), ‘Dieron en duru’ (1997), ‘Glaya un país’ (2000) y ‘Sube la marea’ (2002), amás del llibru-discu ‘Cróniques d’un pueblu’, asoleyáu hai agora un añu con temes recopilaos.

La serie continuarála nos prósimos meses el sétimu trabayu discográficu que la banda saca a la lluz con temes inéditos, un cedé del que yá tán rexistrándose les bases rítmiques de los primeros cortes nos Estudios Tutu de Corvera y que’l grupu espera asoleyar como mui tarde nel mes de mayu.

A lo llargo de los sos 18 años de trayectoria musical, los integrantes de Dixebra ufrieron decenes de conciertos n’estremaos escenarios del Estáu y d’Europa, universalizaron les sos lletres depués de canta-yos a realidaes puramente asturianes -el sector naval, les movilizaciones de Duro Felguera, la propia llingua asturiana- y afitaron un soníu singular basáu nel amiestu de guitarres con distorsión, gaita midi, instrumentos de vientu y bases firmes.

Web oficial de la banda

Gaita de rabil pa saludar el regresu a la programación musical ordinaria. La zanfonista Celia González -conocida poles sos intervenciones en discos d’Hevia, Nuberu, Muyeres o Ramón Prada- presentará güei na Fnac de Parque Principáu el so primer discu en solitariu, ‘Coloradina la guinda’, nel qu’ufre 18 temes interpretaos con gaita de rabil, la mayoría d’ellos cantaos en llingua asturiana.

L’actuación de Celia González ta prevista pa les 20 hores y forma parte del apueste de la multinacional del ociu y la cultura Fnac por programar música de raigón asturiana nel establecimientu que rexenta nel centru comercial Parque Principáu.

Frutu d’esi interés, pol escenariu de la Fnac n’Asturies pasará tamién esti mes el músicu y compositor Héctor Braga, que visitará les instalaciones de Parque Principáu el sábadu 15 de xineru p’amosa-y al públicu les pieces del so trabayu ‘Encoplando’, un discu con alma básicamente tradicional a partir del propiu soníu de la bandurria, instrumentu qu’anguaño ta en plenu procesu de recuperación.

La programación musical de la Fnac de Parque Principáu inclúi amás una nueva presencia de Los Berrones, que’l xueves 20 de xineru presentarán el cenciellu ‘Fai deporte’, grabáu a mediaos d’avientu xunta decenes de deportistes asturianos; el guitarrista de rock progresivu Juanjo Respuela (día 14); The Punishers (día 8) y El Sueño de Morfeo, grupu qu’ufrirá un recital acústicu el 29 de xineru.

Un sitiu web que sofita la llibre distribución de la música ta acabante de facer una ufierta a la que nun se pue ún negar. El portal Música Libre, en comuña con con 22 grupos y a la escontra del consumismu que davezu s’atopa nestes fiestes, tienen creáu un CD cola fin d’ufiertar una alternativa pa los regalos de reis d’esti añu. Música Libre ufierta un regalu que nun se pue mercar sinón que tien ca ún que preparalu, baxando’l ficheru, copiándolu nun CD ya emprentando la carátula.

La propuesta, enforma interesante, tien prevista tamién la personalización del regalu, pa lo que se dexa un espaciu nel que se pue escribir una dedicatoria.

El CD xunta 22 grupos de la escena indie española como Explicit Language, Marujita Manson, Motorsex, Sonados, Manikiatrico, Punkmuki o Adore.

Amás de ser una campaña escontra’l consumismu nestes feches, ye una iniciativa de promoción de la Música Llibre y tamién pue valir pa que lu lleve la xente a los bares que suel frecuentar. La xente’l portal creó un testu nel que desplica por qué nun hai que pagar drechos d’autor por poner esta musica nun bar.