Música

Ángel Ruíz, un de los banxistes más versátiles del panorama musical hispánicu, acaba d’algamar una importante reconocencia internacional cola concesión del premiu al meyor tema de banjoblues de la Songwriting Competition correspondiente al añu 2004. Ruíz,nació n’Ourense y reside n’Asturies dende hai abondos años onde tien colaborao con músicos tan diversos como Dixebra, Nacho Vegas,Isaac Turienzo, Australian Blonde, Ramón Prada o Michael Lee Wolfe.

Estos galardones gocen d’un gran prestixu ente músicos profesionales y amateurs de tol mundu, ente los miembros del xuráu que concede los premios figuren nomes como los de Bo Diddley, Aaron Lewis, David Hidalgo (“Los Lobos”), Macy Gray o representantes de la industria dicográfica mundial como Monte Lipman, presidente d’Universal Records o Michael Gudinski, responsable de la compañía Mushroom. El primer premiu de la Songwriting Competition ta dotáu con 10.000 dólares n’efectivu y 30.000 en mercancía. Esa va ser la compensa que va recibir Ruíz pola meyor composición na categoría de banjoblues.

El músicu gallegu tien desenvuelto la mayoría de la so carrera artística n’Asturies onde los ritmos vertixinosos del so banxu tienen colaborao con músicos de tolos xéneros: dende’l folk al pop independiente, pasando pol jazz o la música sinfónica. En 1995 fundó n’Uviéu el so primer grupu Denyure Quartet, dedicada a esplorar los sones del bluegrass. Nel añu 1999 incorpórase al grupu Skitarna col que graba un discu un añu más tarde. Dende entós tien colaborao con una llarga llista de músicos asturianos: Lliberdón, Dixebra, Nacho Vegas, Ramón Prada, Australian Blonde, Xéliba, Isaac Turienzo, Pussy Lovers o cola Orquesta Sinfónica d’Uviéu (OSCO). Anguaño collabora nel proyectu musical del americanu, tamién afincáu n’Asturies, Michael Lee Wolfe, col que tien grabao el discu “Corners of the world” y bien lluego apaecerá nel nuevu trabayu discográficu d’entrambos: “Asturies Bluegrass Sessions”.

La artista neoyorquina Lydia Lunch presenta esti miércoles 30 nuna única actuación n’Asturies el so espectáculu ‘Spoken Word’, una perfomance sobre varios testos estraíos de la so polémica autobiografía ‘Paradoxia'(1999) na que la célebre fundadora del grupu pre-punk Teenage Jesus and The Jerks interprétase y reinterprétase a ella mesma. ‘Spoken Word’ ye arriendes el títulu del últimu trabayu discográficu d’esta artista orixinal y tresgresora que tien colaborao con músicos como Nick Cave o Sonic Youth.

Nacía como Lydia Kock en 1959, en Rochester, Nueva York, cuenta la llienda qu’a los diez años escomenzó a cantar y recitar peles cais de la Gran Mazana. En 1976 conoz al músicu James Chance col que funda el grupu Teenage Jesus and The Jerks, precursor de les bandes del punk americanu. Dende entós Lydia Lunch dirá embarcándose en sucesivos proyectos como Beirut Slump, Queen of Siam ó el grupu 8 Eye Spy. Considerada una referencia fundamental del panorama underground, en 1999 publica ‘Paradoxia’, una autobiografía sexualmente esplícita que prevocó una gran polémica nel momentu de la so aparición. Partiendo de seis pasaxes de les sos memories privades tien construío l’artista neoyorquina el so discu ‘Spoken Word’ y l’ espectáculu nel que lu presenta.

Lydia Lunch actúa nel salón de actos de la Obra Social y Cultural de Caxastur n’Uviéu a las 20,00 hores presentando ‘Spoken word’ nun conciertu con entrada llibre.

Corquiéu ta a piques de sacar el so segundu trabayu discográficu ‘Salia’, producíu pol músicu asturianu Ígor Medio y pol escocés Grant Milne. Darréu d’unos años intensos n’actuaciones en directu per Asturies y los principales escenarios folk del continente européu, el conxuntu de Ribesella quier amosar nesti álbum les lleciones del llabor constante y enfotáu en dar lo meyor d’ellos mesmos en vivo como n’estudiu. ‘Salia’ ye la esperada segunda entrega d’un de los grupos más atractivos del nuevu folk asturianu.

Insatisfechos polos resultaos musicales del so primer álbum “La Barquera”(2002), según reconoz el gaiteru Roberto Suárez, Corquiéu enfótense en qu’esti nuevu discu valga “p’amosar el resultáu del trabayu d’estos últimos años y un soníu muncho más cuidáu, curtíu poles actuaciones en directu y arriquecíu poles aportaciones d’Ígor Medio y Grant Milne na producción”. Pa Suárez el directu ye una “bona escuela” pa ofrecer soníos de calidá: “el públicu ye desixente y oblígate a presentar un directu trabayáu y calidable, nós concedémos-y abonda importancia a les actuaciones en vivo y de fechu’l nuestru repertoriu busca tamién presentar temes colos que’l públicu se divierta y participe”.

Roberto Suárez recuerda los últimos tres años “especialmente intensos” en desenvolver el llabor del grupu pelos principales festivales folk d’Europa

y tamién per bona parte de la xeografía asturiana. La necesidá de responder a les espectatives creaes énte ellos n’escenarios con públicos bien desixentes llevó al grupu a esmolecese sobremanera por ufiertar un soníu personal y “muncho más curiáu que’l que podía alvertise nel nuestru primer discu, del que nun quedamos mui contentos nin respondió a la fin a lo que nós esperábemos recoyer nél”, esti nuevu discu: ‘Salia’, quier ser pa Corquiéu “una manera de quitanos aquella espina”. Del nuevu trabayu, el gaiteru del conxuntu ribesellanu, resalta la eficaz collaboración ente “el gustu polos sones retro que representa Grant Milne y l’apueste polos más modernos y abiertos d’Ígor Medio”. El discu ye tamién resultáu de la doble mecigaya d’una grabación fecha nos estudios Eclipse d’Uviéu y remasterizáu en Glasgow pola mano veterana de Milne.

El títulu del trabayu ‘Salia’ fai referencia “al ríu Sella y al empar paeciónos un nome lo bastante internacional, en siendo latín, como pa enfilalu fuera d’Asturies despertando l’interés pol so mesmu soníu”, desplica Suárez, y esa referencia a los oríxenes del grupu na villa riberana del Sella ye tamién una amuesa del so compromisu cola música tradicional del so país. Enriba estes bases tradicionales ufierta Corquiéu los temes d’esti discu: “casi al 95 por cientu composiciones propies, inda toes fieles a los raigaños tradicionales y el restu netamente populares arreglaes por nós”. Roberto Suárez señala les dificultaes que supón enfrentase a la interpretación de temes recoyíos en cancioneros: “non namás porque hai d’axustase a les melodíes talo apaecen trescrites nellos, sinón que nel nuestru casu, que tocamos como’l que diz ‘d’oreya’, ye una complicación añedida, por eso préstanos más apostar por temes compuestos por nós sobre bases tradicionales o pieces del patrimoniu popular arreglaes”.

El segundu discu de Corquiéu ya ta en procesu de fabricación de copies y en poques selmanes va tar disponible nes tiendes. Mientres s’enfoten n’acoyida que pueda tener esta esperada nueva entrega, los ribesellanos tienen la vida puesta nes prósimes xires, la más cercana, en xunetu, pel norte d’Italia onde van coincidir colos tamièn asturianos Llan de Cubel y Llangres nun conciertu.L’actual formación de Corquiéu compónenla: Frankie Delgado (viólín y viola), Roberto Suárez (gaita y wishtle), David Mateos (bodhram y percusiones), Paul Balmori (boukouki y baxu pedal), Xurde Fernández (flauta y wishtle) y Gema García (voz).

La tercera edición del festival de música afroamericano S.O.U.L.’05 aconceya esti fin de selmana en Xixón a dellos de los más célebres djs del panorama nativu y internacional nesti tipu de ritmos. Los británicos Dean Rudland, Gareth Donovan y Rob Messer, el noruegu Christian B., o los asturianos Hermino Alonso y Felix A.Domínguez son dalgunos de los ‘pinchas’ d’esta alternativa folixera a los rigores esmorecíos de la Semana Santa asturiana que va celebrase nuna clásica discoteca de la vera xixonesa del Piles.

Los amigos de los sones enérxicos y calientes de la música negro americano van poder disfrutar de les dos intenses sesiones nocturnes qu’ofrez la tercera edición del S.O.U.L. (Sounds of Unity and Love) cola presencia na cabina de la pista de baile de ‘pinchas’ como los citaos o como Sergio M. Vivas, Alex Subinas, Jose Mardigras, Eduard DOmingo, Juan Vicente del Castillo ya Ismael García.

La cita d’esti alcuentru colos ritmos negros ye na discoteca Oasis,

un clásicu de la nueche xixonesa dende que s’abrió la primer vez al públicu en 1968. Sones funk, soul, jazzdance, latinos, peñeraos polos filtros electrónicos de les últimes tendencies na música discos van ser los que fagan vibrar la pista d’esti santuariu de los ritmos de baile, contemporáneu del Studio54 neoyorquín y inda abiertu al cultu. Un marcu ensin dulda incomparable pa una atopada de señaldosos y fanáticos de los sones afroamericanos.

Los organizadores del S.O.U.L.’05 tenten con esti festival ofrecer una amuesa de les bayuroses amestances que la música negro tien entamao dende mediaos del sieglu XX hasta l’actualidá, un momentu nel que tien cobrao un inusitáu puxu en tol mundu al mecese con nuevos soníos procedentes de la música electrónico o el hip hop. Talo afirmen los organizadores trátase d’ufiertar una visión global d’estos “soníos orgánicos dirixíos a la pista de baile pero non concebíos con esa única intención”. Esi ye l’espíritu d’esti S.O.U.L.’05.

Les sesiones empiecen la nueche del viernes 25 cola presencia de Dean Ruadland (UK), Gareth Donovan (UK), Sergio M. Vivas (Madrid), Alex Subinas (Bilbo), José Mardrigas (Valencia) y los asturianos Herminio Alonso y Felix A. Dominguez. El sábadu tarán pinchando Cristian B. (Noruega), Rob Messer (UK), Eduard DOmingo (Barcelona), Juan Vicente del Castillo (Valencia), Ismael García (Madrid) y de nuevu Herminio Alonso y Felix A. Domínguez.

Más información

Los sones señaldosos y desengaños de la cantautora canadiense Julie Doiron van poder escuchase en vivo esti sábadu 19 nel conciertu qu’ofrez nel Forum de Fnac. A la ex componente d’Eric’s Tripa acompáñenla como teloneros nesta única actuación n’Asturies los franceses Berg Sans Nipple, un duu formáu polos músicos Shane Aspegren y Jerome Lorichon. Doiron acude a presentar los temes del so últimu álbum “Goodnight Nobody”.

Intimista y caseru, asina define la critica especializada l’últimu trabayu discográficu de la cantautora canadiense, grabáu xunto a los sos amigos Herman Dune. El discu ye un emocionáu mosaicu de viñetes pop-folk tan escures como lluminoses, cantares nos que la evocación pol pasáu y l’entornu afectivu desenvuélvese nun llinguaxe musical intensamente emotivu.

A la ex baxista del grupu de noise-pop de los 90 Eri’s Trip acompáñenla nesta xira promocional pela península ibérica el duu parisín Berg Sans Nipple, compuestu por Shane Aspegren y Jerome Lorichon, dos músicos iconoclastes y de difícil clasificación que tienen collaborao con artistes como Dominique A. Los parisinos teloneen a Julie Doiron con discu propiu, el EP “Play the inmutable truth”, espresivu y ecléctivu ú los hubiere.

La cita ye a les 19.30 en Parque Principado nuna actuación con entrada llibre.

El grupu irlandés Solas, un de los meyores conxuntos folk del mundu según el Washington Post, van ser los encargaos d’inaugurar el prósimu 15 d’abril la X Folixa de Primavera de Mieres d’esti añu. A lo llargo de tres díes la villa del caudal va acoyer una edición más d’esti festival que se celebra dende va diez años y ye una referencia fundamental nel calendariu musical asturianu. En prósimos díes, el departamentu de festeyos del Ayuntamientu mierense, dará a conocer el restu de la programación de la Folixa.

La conceyala de fiestes populares Queti Rodríguez adelantró que’l grupu estrella del festival va ser esta banda, orixinaria d’Irlanda y afincada dende va tiempu nos Estaos Uníos, onde goza d’un enorme prestixu, hasta’l puntu de ser considerada pol diariu Washington Post: “un de los meyores conxuntos folk del mundu”. Ganadores

en tres ocasiones del premiu Naird-AFIM al meyor discu de música celta de les isles britántiques, Solas son autores de la banda sonora de la película “Los hermanos MacGullen” y tienen visitao los principales festivales folk del mundu.

La banda gaélico-americana ta compuesta por Seamus Eagan, líder del grupu,(flauta, baxu, mandolina, whistle, guitarra bodhram), Mick MacAuley (curdión y concertina); Eamosn Mc Elholm (guitarra y teclao) y Deirde Scalan (voz). En palabres del so productor Joe Wilson nes actuaciones en directo de Solas: “nun hai dos conciertos iguales, la nuestra música interactúa col públicu y busca la so reacción inmdiata con melodíes mui potentes, que solmenen como una fola”.

El restu del programa de la X Folixa de Primavera va dase a conocer nos prósimos díes. N’anteriores ediciones pasaron pelos escenarios de Mieres artistes del nivel de Carlos Núñez, Capercaille, Hevia, Wolfstone, Tanahill Weavers, los portugueses Gaiteiros de Lisboa o les finlandeses Värtina.

La Sala Albéniz de Xixón acueye esta nueche l’actuación d’un artista de luxu, el guitarrista John Lee Hooker Jr., fíu del míticu bluesman de Detroit. Heriede d’una dinastía de músicos populares que se remonta a principios del sieglu XIX, l’últimu esllabón de la saga afirma que ‘depués de munchos años de tar enllenando los zapatos de mio pá quiero agora amosar que tamién yo puedo calzar unos propios’. Va ser ensin dulda una ocasión única p’asistir en vivo a una sesión del más puru Rithm & Blues, los soníos que marcaron la música popular del sieglu pasáu.

La formación cola que se presenta en Xixón John Lee Hooker Jr. ye una banda clásica de blues eléctricu: Will Roc Griffin, al órganu y pianu; Jeff Horan, a la guitarra; John Aughney, al baxu y John Handy Jr., a la batería. El discu que trai la banda embaxo’l brazu: ‘Blues with a Vengeance’, grabáu íntegramente en vivu, ye una amuesa del tipu de directu qu’ufierta el fíu del míticu John Lee Hooker.

Nacíu en Detroit en 1952, vióse influenciáu dende bien nenu polos ritmos del blues y del soul, la banda sonora del so entornu familiar y local (non de baldre la so ciudá yera la sé de la mítima factoría Motown Records)y amosó dende rapaz un talentu particular pa la música. La so primer actuación en directu tuvo llugar a la precoz edá d’ocho años na WJBK Radio de Detroit. A los dieciséis años actuó por primer vez nuna sala de conciertos, onde foi aclamáu por músicos como Jimmy Red. Dos años más tarde edita’l so primer discu: ‘Live at Soledad Prison’, grabáu en directu nuna cárcel federal en compañía de so padre. Dende entós bien acompañando al vieyu John Lee Hooker o en solitariu el músicu de Detroit tien dío llabrando una sólida carrera personal como bluesman abiertu a la influencia de los soníos del so tiempu ensin renunciar a los sos raigaños tradicionales, que nel so casu remóntense a una dinastía familiar de cantantes populares orixinaria de principios del sieglu XIX.

La cita col directu de John Lee Hooker Jr. ye esta nueche a les 20,00 hores na Sala Albéniz de Xixón. Un conciertu que de xuro nun ha defraudar a los que vayan col enfotu de ver en vivo la enerxía d’una de les espresiones musicales más auténtiques del pasáu sieglu XX. Les entraes cuesten 15 euros en venta anticipada y 20 en taquilla.

Diez años después de la publicación del esitosu ‘Pizza pop’ Australian Blonde presenta con nueva formación y nun momentu de gran actividá creativa el so esperáu séptimu trabayu: ‘Canciones de amor y gratitud’, un album surcáu de referencies a los soníos del soul blancu o al country alternativu, nel que los rasgos más coherentes cola trayectoria musical del grupu algamen niveles propios de sabiduría y novedá. La salida d’esti nuevu trabayu coincide nel tiempu cola reedición del ya clásicu ‘Pizza pop’.

La grabación de ‘Canciones de amor y gratitud’ foi un procesu ‘lentu y llaboriosu que se demoró a lo llargo de meses por diverses circunstancies’, afirma Fran Fernández, pa quien esti nuevu trabayu supón ‘un reflexu del llabor creativu desenvueltu pola actual formación de la banda, na que les aportaciones creatives tan más repartíes y tamién el llabor singular de cada ún de nós’. Una amuesa d’esa diversificación creativa son los temes compuestos nunes ocasiones por Paco Loco, Pablo Errea o el propiu Fran Fernández. Amás de

la coherente apuesta por un tipu de soníu habitual na identidá musical d’Australian Blonde y nel que les guitarres lleven el pesu conductor, Fernández señala “rellumes más cercanos al soul blancu y al country alternativu”, una nueva manera d’encarar los sones que ficieron nel so día de la banda asturiana una de les referencies fundamentales de la escena independiente del estáu.

Como desplica Fran Fernández el discu grabóse a lo llargo de varios meses l’añu pasáu nel estudiu de Paco Loco nel Puertu de Santa María y dende entós, arriendes los retrasos motivaos pol mesmu procesu de grabación, inda se fexo esperar hasta que la compañía Astro decidió sacalu col so sellu.

La publicación de ‘Canciones d’amor y gratitú’ coincide nel tiempu cola reedición del ya álbum clásicu ‘Pizza pop’, diez años después del so llanzamientu nel sellu Subterfuge.

‘Intersecciones 2004′ ye’l títulu del segundu trabayu publicáu pol sellu asturianu Lloria Discos qu’empobina’l músicu Xel Pereda. El compactu ufierta grabaciones en directu del ciclu de conciertos entamáu pola Obra Social y Cultural de Cajastur en 2004. Trece temes d’otres tantes bandes ufiertaes nuna curiada grabación d’esta amuesa de la música más inquieta de la escena independiente que desfiló pelos escenarios de los centros culturales de Cajastur.

El discu recueye directos de los grupos Sexy Sadie, Mus, Howe Gelb, El Columpio Asesino, Aroah, Alpha, Landsbury, La Habitación Roja, Refree, Doctor Explosion, FMM, Electra y The Unifinished Sympathy y ye’l segundu que publica el sellu Lloria Discos, tres la edición de ‘Koniec’, protagonizáu pol grupu del mesmu nome. Pa Xel Pereda, responsable del sellu, la so empresa discográfica tenta buscar la complicidá de grupos y artistes non arrepresaos poles compañíes comerciales, siguiendo por únicu criteriu “la calidá musical y que nos guste lo que faen esos grupos”, desplica esti músicu, componente de Llan de Cubel y collaborador habitual d’artistes como Nacho Vegas.

Una amuesa del eclecticismu del gustu col que se rixe’l sellu de Pereda son los prósimos discos que van apaecer embaxo’l marchamu de Lloria: el primer trabayu de la banda llanisca de folk Niundes y el tamién debú del grupu de pop electrónicu FMM.

Más información

El ciclu Intersecciones qu’entama la Obra Social y Cultural de Caxastur acoyó ayer nel Pabellón de la Feria d’Amueses de Xixón un de los conciertos más esperaos del programa d’esta edición: Einstürzende Neubaten, la inclasificable banda de pop industrial liderada pol versátil Blixa Bargerld, acudíen por primera vez a Asturies p’amosar que siguen siendo un grupu tan vivu y inquietu como cuando emerxeron del post-punk xermanu de los ochenta. El ciclu de Caxastur continúa esti xueves 14 cola presencia del canadiense Matthew Adam Hart y la so banda The Russian Futurist.

Les Cases Nueves qu’Esbarrumen llegaron a Xixón contrataos pa una actuación de cincuenta minutos y a la fin fueran dos hores llargues y intenses d’un directu que paecía remanecer del puxu improvisador de la banda según el clima emocional y que sicasí sonaba como un engranaxe perfectamente engrasáu. La banda de Blixa alcontró nos primeros momentos a un públicu dalgo fríu, inda nun tardaron n’envolvelu colos sos ximielgones rítmicos, tan mudables y naturales como los d’un cielu estopando nuna truena y volviendo a escamplar. Señaldá y contundencia, poesía del ruiu sacada de cualquier oxetu capaz de

facer música: unos canalones de fierro o una manguera d’inflar neumáticos, too ello cola poderosa capacidá de Blixa pa convertir la so voz nun desgarru atronicador o nun susurriu confidencial.

En resume un conciertu que van tardar n’escaecer los siguidores más fieles de la banda xermana presentes nel conciertu de la Feria d’Amueses de Xixón y nel que los Neubaten paecieron tamién sentise bien afayaos, ufiertando lo meyor de la so sabeduría tresgresora inda después de tantos años teniendo poles cases nueves qu’argayen y esbarrumbándoles otra vez pa volver a entamar.

Intersecciones sigue esti xueves 14 con un conciertu de The Russian Futurist, el proyectu musical del cantautor canadiense Matthew Adam Hart nel salón d’actos de la obra social y cultural de Caxastur n’Uviéu.