Música

El saxofonista Maceo Parker, un de los músicos más importantes del Funk americanu, abre nel Teatru Campoamor el Festival de Jazz d’Uviéu nuna primer xornada que va cuntar tamién cola presencia del vascu Pedru Iturralde nun conciertu gratuítu nel patiu de la Universidá vieya. La estrella indiscutible del festival, l’americanu Taj Mahal llega a Uviéu esti martes 19 cola so banda pa ufiertar un conciertu nel Campoamor. En total van ser seis díes dedicaos a los más diversos estilos del jazz y los soníos negros con un completu cartelu de conciertos de pagu y de baldre, estos últimos nel patiu de la Universidá vieya y na plaza’l Fontán.

Maceo Parker, qu’inaugura el festival a les 20.30 nel Teatru Campoamor, ye un instrumentista que tien tocao con artistes como James Taylor, Prince o James Brown, al qu’acompañó a lo llargo de más de venti años. Ta consideráu un de los meyores saxofonistes del panorama funk internacional.

L’otru músicu del programa inaugural del Festival d’Uviéu, Pedro Iturralde, ye xunto a Tete

Montoliu, la figura más relevante del jazz español. N’Uviéu vien a presentar el so últimu proyectu musical: “Etnofonías”, un conciertu de fusión ente’l jazz y la música tradicional, que recrea los diversos sones del camín de Santiago, dende’l Cant dels Ocells de Pau Casal a les vaqueiraes asturianes, pasando poles cantigues gallegues y el fadu.

Mañana lléga-y el turnu a Taj Mahal, el músicu neoyorquín nacíu en 1942 que dende principios de la década de los sesenta ye una referencia indispensable del blues y la música afroamericana, y ún de los que más influyó nel desenvolvimientu del rock americanu y el rithm’n’blues de les décades siguientes. La cita con esti iconu viviente de la música moderna americana ye nel Teatru Campoamor a les 20.30 d’esti martes 19.

Cedar Walton & Benny Golson y Barbara Hendriks completen el cartelu de los conciertos de pagu d’un festival que va cuntar cola presencia n’actuaciones gratuítes al aire llibre de The Soul of New Orleans, Big Chieff Bo Dollis & The Wild Magnolias y la Charmaine Neville Band (toles tres bandes na Plaza’l FOntán) y na Sala Tribeca de la Photoles Brass Band de Nueva Orleans, Confluent Jazz, Andrej Olejiczak y el John Falcone Trio.

Festival de Jazz d’Uviéu

Joaquín Sabina yera a la fin l’invitáu sorpresa que la organización de la Selmana Negra anunciaba pa la so segunda velada poética. Después de dar plantón dos años al festival xixonés, el cantante apareció ayer compartiendo velada colos poetes Ángel González y Luis García Montero. Cola voz más cascada que nunca y guiños constantes al públicu playu, Sabina aprovechó la so intervención na Selmana Negra p’anunciar que na seronda vuelve a los escenarios y que quier facelo en Xixón, una ciudá onde siempre cuntó con abondos siguidores y onde tenía por vezu entamar o pesllar les sos xires.

La presencia de Joaquín Sabina na Selmana Negra yera un secretu a voces desque Paco Ignacio Taibo anunciara un invitáu sorpresa pa la llectura nocturna de González y García Montero. N’anterior ocasión na que’l cantante vieno al festival lliterariu en calidá d’autor de versos hebo un barullu que la organización quería evitar esti añu. Valles de seguridá de la principal entidá financiera d’Asturies -les mesmes que se ponen nos conciertos- separaben al públicu de la mesa onde lleíen los poetes y empleaos de seguridá de la organización facíen de vixilantes pa evitar cualquier enguedeyu.

El nome de Sabina namás apaeció

nel cartelu de les actividaes de la carpa central pela tarde y escritu a rotulador, sicasí la noticia de que’l cantante diba participar na llectura de la nueche corrió como la pólvora y a medianueche cientos de persones apetiguñábense na carpa d’alcuentros pa ver al so ídolu. Mentantu llegaba esi momentu, El Yampi, un cantante de la cai habitual na Selmana Negra dende va años entretenía al públicu coles sos imitaciones del propiu Sabina.

Los tres poetes apaecieron puntuales metanes d’una ovación a la que nun paez mui avezada la voz íntima de la poesía. Por turnos fueron lleendo los sos poemes y nún d’esos turnos foi cuando Joaquín Sabina, aludiendo al ictus que sufrió apocayá y que lu apartó de los escenarios, anunció qu’en setiembre o n’ochobre volvía a actuar y que Xixón yera la ciudá escoyida pal so primer conciertu.

Los tres poetes quixeron acabar la so actuación con humor y asonsañando a los tres tenores cantaron -un dicir- un himnu que Sabina compunxo pa la propia Selmana Negra. Enantes el cantante ya sacara a escena ún de los sos trucos d’escenariu al lleer unos versos sobre’l papa Benedicto que’l públicu había contestar diciendo: “Habemus papam”. Al final avalancha na firma de llibros de los tres poetes, pero controlada y ensin desgracies personales.

Los poetes Ángel González y Luis García Montero participaran enantes de la velada na presentación del llibru del primeru: “La poesía y sus circunstancias” xunta a Paco Ignacio Taibo I, padre del organizador de la Selmana y amigu de González dende la infancia. El poeta uvieín dixo que la so obra yera más la d’un “llector curiosu y atentu que la d’un críticu o un estudiosu” y que compartía con QUevedo la so preferencia por vivir “arrodiáu de pocos y doctos llibros más que d’una biblioteca de consulta universitaria”.

Little Richard, un de los padres del rock’n’roll y creador de clásicos como “Lucille” y “Tutti-frutti”, anunció va unos meses la so intención de d’abandonar les xires fuera de los Estaos Uníos y que la que va traelu a Xixón p’actuar dientro’l Crossroad Festival ye la última que fai. El rockeru, de setenta años, anunció abondes veces el so retiru definitivu de los escenarios, inda nesta ocasión, polo menos no que cinca a los escenarios europeos, paez ser un deséu definitivu. El Crossroad de Xixón puede ser la última ocasión de ver en directu a Richard.

En más de cincuenta años dedicáu a la música, el creador de “Auambabulubabalambambú” nunca actuó nel estáu español. El so conciertu del sábadu 23 de xunetu nel recintu del Crossroad Festival va ser el primeru que dea n’España y polo que se sabe tamién l’últimu, y ún de los caberos que dea nel continente européu. El pesu de ser un

septuxenariu y los escesos de cinco décades descuartizando’l piano coles frenétiques notes del so rock’n’roll de raigañu paecen tar pasándo-y la factura final a esi iconu de la música del sieglu XX, qu’al pesar de ser l’únicu superviviente de les estrelles americanes que descubrieron el r’n’r nos cincuenta, los que vieron los sos últimos conciertos nos Estaos Uníos afirmen que’l so directu sigue siendo arrollador.

Little Richard vien a Europa, na xira que lu trai a Xixón, con una banda bien numberosa na que la base rítmica fórmenla dos bateríes y el restu de les bases un curiosu elencu de músicos, dispuestos a siguir al so capitán col mesmu frenesí que lleva imprimiendo a los sos temes dende que se fizo mundialmente famosu con “Tutti-frutti” y “Aumababuluba..”. La mesma nueche na qu’actúa Richard, otros pesos pesaos de la música americana van compartir escenariu con él na xornada más intensa del Crossroad: Los Lobos. Ensin dulda, una nueche que van tardar n’escaecer los fanáticos xixoneses, asturianos y visitantes del rock’n’roll más xenuín, el migollu sobre’l que se sofita esti festival.

Enantes de Little Richard ya pasaríen pel escenariu otres estrelles del festival: Willie DeVille, el xueves 21 y El Vez, Blues Explosion y The Presidents of USA, el viernes 22. El Vez, l’Elvis Mexicanu, xunta los arxentinos Superratones van ser los encargaos de rematar el Crossroad 2005 con una tremenda folixa en El Jardín de Somió.

La Jambre, un conxuntu folk de Jaen que busca los sos raigaños nel fondu de la música andalusí, va tar esti sábadu en Xixón presentando’l so últimu trabayu discográficu: “Saltalindes”, una propuesta na que los whistles y el curdión fúndense cola Darbouka y la gaita magrebí. Los andaluces nun ye la primer vez qu’actúen n’Asturies y más d’un aficionáu a lá música tradicional alcordaráse que’algamaron el IV Concursu de grupos folk de El Cuartu los Val.les.

Esta formación de siete músicos, especializaos na música del mundu traten de recuperar y actualizar la música tradicional andaluza, que coesistió col flamenco hasta ser desplazada pola vitalidá d’ésti y d’ otres músiques más modernes.

Bien de los temes que toca esti grupu xerezanu, na so mayoría cantaos, son de lletres pervaries y de orixen perantigu. Hai cantares de calter relixosu, profanu y mesmo anticlerical. La vida cotidiana tamién ta presente nestos temes populares, asina como les xeres campesines. Les melodíes son d’una bayura sorprendente utilizando escales (frixes y xóniques con usu d’intervalos de fonda espresividá) que denoten les sos procedencies de cultures estremaes. La rítmica d’estes composiciones presenta una idiosincrasia propia que les distingue de les del restu del folklor peninsular, con compases ternarios, d’amalgama y llibres, que recuerden sos oríxenes a la vez que nos ofrecen una modernidá plasmante.

La Jambre va presentar el prósimu sábado 16, a les 22:30 hores en conciertu, nel Xardín Botánicu Atlánticu de Xixón el so discu “Saltalindes”, dientro’l ciclu “Música con raíces”.

Mañana, día 14, va inaugurase nel Antiguu Institutu Xovellanos, dientro de la VIII Selmana de la Música Antigua de Xixón, la exposición de la Colección Vázquez de la Orpheon Foundation, compuesta por más de 150 instrumentos históricos que daten dende 1500 a 1780. Nel actu d’apertura, que va ser a la una na Sala 2 del Centru de Cultura del Antiguu Institutu, y nel que va tar presente la concejala de cultura, Mercedes Álvarez, y Jose Vázquez, violinista y violagambista docente na Universidá de Viena y dueñu de la colección, tendrá llugar un breve conciertu con dalgunos d’estos instrumentos.

La colección contien más de 150 instrumentos (viola da gamba, viola d’amore, violín, viola, violonchelo, violone, baryton) y arcos históricos, que daten na gran mayoría del períodu que va ente los años 1560 y 1780, toos ellos restauraos y puestos a disposición de los integrantes de la Orpheon Orchestra, Orpheon Consort y de músicos profesionales de toa Europa pa conciertos, grabaciones y con fines d’investigación. El so dueñu, Jose Vázquez, catedráticu de la University for Music and the Performing Arts Vienna, diz que l’interes d’esta exposición ta na muestra d’una herencia acústica viva, aquella que ta nos soníos qu’estos instrumentos producen anguaño, y non na so contemplación como meros elementos decorativos que nel so día pertenecieron a linaxes aristocráticos. Lo importante ye sentir lo qu’estos instrumentos tienen que dicir y aprender d’ellos sobre la manera d’interpretar la herencia musical del Renacimientu, el Barrocu y los períodos clásicos.

Orpheon Foundation

Les gaites de Xuacu Amieva, José Manuel Tejedor y Ruben Alba subieron na nueche d’esti martes 12 al escenariu de la carpa d’alcuentros pa protagonizar una jam sessiom que van tardar n’escaecer los que tuvieron el privilexu d’asistir a ella. Los tres gaiteros amosaron les sos sobraes dotes de sabiduría y inspiración con pieces tradicionales que se diben sucediendo o empastando unes con otres nuna folixa de gaites que respondía namás al propiu ritmu que los músicos marcaben.

Un conciertu únicu y dignu de repetise el que se vivió esta nueche na Selmana Negra de Xixón. Xunto al tríu d’Ases, músicos

como Igor Medio al bouzouki, al llau del contrabaxo del grupu Tejedor. Una sesión que va tardar n’escaecese y que valió p’amosar una vez más el grau de desenvolvimientu y perfeccionamientu qu’algamó un instrumentu como la gaita na so interpretación. Nes primeres fileres de la carpa d’alcuentros, l’organizador de la Selmana y de la jam-session, l’ubicu Paco Ignacio Taibo, miraba esteláu a los músicos y nin gorgutaba, lo mesmo que les decenes d’espectadores qu’abarrotaben la lona y qu’alcuando arropiellaben a los gaiteros con acompañamientu de palmes. Una ocurrencia feliz nun festival nel que nunca ta too visto del too.

El Festival de Música Antigua de Xixón quier sumase al centenariu del Quixote dedicando los sos conteníos de la octava edición a la música del tiempu de Cervantes. Les partitures del Barrocu y los instrumentos colos que s’interpretaben van ser los protagonistes del festival qu’escomienza esti martes 12 en Xixón y va durar hasta’l prósimu domingu 24 de xunu.

Una esposición con pieces orixinales d’instrumentos barrocos de la Fundación Orpheon de Viena va ser el complementu a estes xornaes dedicaes a la divulgación y la formación de música antigua. L’Enssamble Orpheon de la fundación vienesa tamién va interpretar pieces de la dómina de Cervantes xunto a otros grupos de cámara como el Enssamble Mayaicin, Forma Antigua o la Orquesta de Cámara de Siero. Músicos como Paul Odette o Andrés Cea van actuar nel marcu del festival, onde tamién va haber un conciertu dé música andalusí.

La presencia de la Fundación Orpheon de Viena va facer posible que se cotemple la esposición “La colección Vázquez de la Orpheon Foundation” :Instrumentos históricos de 1500 a 1780: violines, violas, violas da gamba, violas d’amore, arcos”, que presenta más de cien instrumentos de cuerda de los sieglos XVII y XVIII. La sala d’ esposiciones de la Fundación Municipal de Cultura de Xixón abll3ugará esta amuesa dende’l 15 de xunetu al 21 de agostu. Al llau d’esta esposición va ufiertase otra amuesa del 17 al 24 de xunetu : “Caligrafías árabes de Yacine Kacimi el Hassani”.

donde los visitantes podrán disfrutar -además de la colección de instrumentos propiamente dicha- de actividades didácticas y animaciones musicales en directo. Es de destacar que, tanto el fundador y alma mater de la Fundación Orpheon -José Vázquez- como su asistente -Lúcia Krommer- impartirán cursos de violín, viola, violonchelo y viola de gamba en los cursos del Festival, poniendo a disposición de los alumnos instrumentos antiguos para las clases.

Anabel Santiago debuta esti llunes 11 en Xixón cola nueva formación que l’acompaña nel so proyectu musical paralelu a la so carrera en solitariu como intérprete de tonada. Michael Lee Wolfe y l’Asturiana Mining Company arropiellen a la cantadora casina nel conciertu que protagoniza la nueche de la Selmana Negra esta nueche. Nél, Anabel y los sos músicos van presentar los nuevos temes musicales que van formar parte del so prósimu discu xunta otros del so anterior álbum “Al son de la lluna”.

Anabel Santiago, orixinaria de Casu y residente en Xixón dende cuantayá, va debutar na so ciudá cola nueva formación que l’acompaña nel so proyectu musical alternativu a la tonada y nel que busca la esperimentación con nuevos sones de les más variaes procedencies. Temes tradicionales xunta canciones de propia composición y lletra de poetes asturianos como Xuan Bello, Lourdes Álvarez o Taresa Lorences formen el repertoriu que va echar la cantante nel escenariu de la Selmana Negra.

Santiago, escoyida como una de les diez voces principales de l’asturianada apocayá en Mieres por un xuráu d’espertos, va ufiertar al públicu xixonés esta otra faceta de la so carrera como artista na que busca caminos diferentes y modernos pa la canción n’asturianu. La cita ye a les 23.00 hores nel escenariu central de la Selmana Negra.

Dixebra presentó oficialmente’l so discu “Ensin novedá”(L’aguañaz, 2005)esti viernes 8 al meudía na sé uvieína de la SGAE, pela tarde la banda avilesina entamó otra presentación abierta al públicu y con presencia de los sos componentes nel Foru de Fnac. Acabante salir al mercáu, el nuevu álbum de la banda más veterana del rock n’asturianu nun ha defraudar a los sos incondicionales nin dexar indiferentes a los que tuvieran nel improbable casu d’escuchalos per primer vez.

Los trece temes que componen “Ensin novedá” falen de la realidá sobre la que Dixebra y los sos colaboradores habituales (nesti discu los cásique lletristes oficiales del grupu: Quique Faes y Xandru Fernández) llancen la so mirada crítica y certera, a menudu irónica y munches veces indignada: les negatives espectatives de futuru la mocedá asturiana, el duldosu papel de los axentes sociales por solventala, les inxusticies del mundu y hasta un tema dedicáu a los manteros, que nun paceía face-y muncha gracia a un Javier Vidal sentáu ente los medios informativos.

No musical, Dixebra siguen apostando polos sos calces espresivos avezaos: rock guitarreru, sones de reaggue y ská, fraseaos de rap, cola incorporación progresiva, talo veníen faciendo nes sos últimes mezcles, de programaciones y samplers, integraos nel discursu del discu col mesmu calter que les propies canciones.

“Ensin novedá” fai l’álbum númberu ochu de los grabaos por Dixebra y yera abondo esperáu dende la publicación en 2003 del so últimu trabayu: “Cróniques d’un pueblu” un discu recopilatoriu que se ufiertaba na mesma caxa que la biografía del grupu, col mesmu títulu, escrita pol periodista xixonés Francisco Álvarez.

El 35 festival de Lorient 2005 va tener a Llan de Cubel como cabezaleru de la representación asturiana que van completar la Banda de Gaites de Villaviciosa, el grupu Xuno, la Bandina’l Tombu y Skanda. El Festival ta dedicáu esti añu a Irlanda y va desendolcase na ciudá bretona ente 5 y el 14 d’agostu, cuntando cola presencia de The Silencers, Soldat Louis, Yann Tiersen y Carlos Nuñez como artistes más destacaos.

La delegación asturiana nel festival intercélticu de Lorient ye esti añu una delegación enforma completa y recueye a dalgunes de les formaciones a les que más ciñu-y profesa’l públicu bretón, como ye’l casu de los veteranos Llan de Cubel y la Banda Gaites de Villaviciosa. Amás, esti añu ta previsto que la presencia d’Asturies vaya acompangada de dalgunes novedaes con respeutu a otros años, xunta les actividades que se lleven davezu a Lorient como les esposiciones artístiques y culturales.

Esti añu, el festival de Lorient va camudar d’escenarios por mor de les munches obres que se tan faciendo na ciudá, lo que ta obligando a que delles carpes qu’ocupaben les actuaciones cimeres camuden de llugar y que dalgún espaciu como’l pueblu celta nun se mos ufierte como yera tradición. Pa esta 35 edición, la organización tien previsto allugar nel muelle onde s’asitia’l Club K delles carpes de 15×15 que van ufiertase namái que a delles nacionalidaes. Concretamente, eses carpes ocuparánles, sigún desplicó a Asturnews el delegáu asturianu del festivalk, Lisardo Lombardía, el país invitáu d’esti añu, Irlanda, el del añu pasáu, l’Acadíe canadiense, Gales, Bretaña y Asturies.

La actividá cimera del Festival de Lorient será en tou casu como cada añu el Concursu Maccrimmon, en realidá’l Macallan de tola vida, que l’añu pasáu ganara un gaiteru asturianu, Angel Domingo, que por mor d’una perbona interpretación de la música bretona algamó la meyor puntuación del xuráu bretón, tanto nes pieces bretones como nes asturianes y nes gallegues.

Asturnews ufrirá n’agostu un seguimientu completu del festival cola participación día a día de la delegación asturiana.

Programa completu del 35 Festival de Lorient