Música

Rafa Lorenzo va tar presentando’l so últimu trabayu discográficu, “Primos hermanos”, esti vienres a les 20:30 hores nel Casinu d’Asturies de Xixón xunto cola cantante Nati González, el guitarrista Rafito Lorenzo ya’l teclista Marcos Maoxu. Nel repertoriu que van tocar ltarán les canciones d’esti discu qu’homenaxea al poeta Federico García Lorca al travies de seis poemes musicaos del autor y otros seis d’autoría propia.

Jose María López, un de los meyores luthiers d’ardiones del país, va tar dando un cursu sobre la mecánica acústica del acordión diatónicu dende esti sábadu na Escuela de Música Tradicional Asturiana “Manolo Quirós”, asitiada nos baxos del campu de fútbol Carlos Tartiere d’Uvieu. Nesta primer clase, amás del luthier, va participar del Circu del Sol, Iñaki Dieguez con un pequeñu conciertu pa los alumnos.

Dempues d’esta primer cita el cursu siguirá impartiendose durante tolos sábados d’equí a cuatro meses n’horariu de mañana y tarde. La matrícula cuesta 30 euros y 25 nel casu de que’l solicitante sía escolín de la Escuela de Música Tradicional.

Los amantes de la bossanova saben que detrás d’un nome común como Antonio Pecci escuendese la figura de Tonquinho, un de los meyores y más veteranos compositores y músicos de la escena musical brasileña con más de cuarenta años nes tables. La cita ye a les 20:30 hores nel Teatru Xovellanos de Xixón. El guitarrista brasileñu interpretará canciones d’un reperttoriu que-y sirvió pa acompañar a músicos como Chico Buarque y pa formar una esitosa pareya col compositor Vinicius de Moraes. Dende 1981 Toquinho vien tocando en solitariu polos escenarios de tol mundiu.

Les bandes asturianes Gomeru, FalaNonCaduca ya Insert Koin van tar tocando’l sábadu 19 de xineru nun conciertu que va entamara a les 20:00 hores nel bar La Calleja de la Ciega, asitiáu na cai Martínes Vigil d’Uvieu. Gomeru son un grupu de punk ovetense con dos maquetes na cai y ye quiciabes la propuesta más conocía de les tres, FalaNonCaduca, faen ska n’asturianu y tan a puntu de grabar el so primer single mientres que los xixoneses Insert Koin, más averaos al soníu hardcore, yá tienen un discu nel mercáu.

Esti xueves 17, el grupu Merlín tocó nel escenariu de la sidrería Tierra Astur de Cualloto. La banda de Xixón ta formada por Daniel de la Cuesta al violín y voces, Lluis Gómez de Benito a les xiblates, Ricardo García Mesa a la guitarra, Javier González Lueje al baxu, Dudu García a la percusión, Rubén Ardura a la gaita asturiana y David Varela al curdión. El conciértu enmarcose dientro de les habituales actividaes de promoción del conocíu llocal, que cuasi toles selmanes convida a los sos veceros a actuaciones colo meyor del panorama musical asturianu d’anguaño.

Rafa Lorenzo va tar presentando’l so últimu trabayu discográficu, “Primos hermanos”, esti vienres a les 20:30 hores nel Casinu d’Asturies de Xixón xunto cola cantante Nati González, el guitarrista Rafito Lorenzo ya’l teclista Marcos Maoxu. Nel repertoriu que van tocar ltarán les canciones d’esti discu qu’homenaxea al poeta Federico García Lorca al travies de seis poemes musicaos del autor y otros seis d’autoría propia.

Dempués de la xira mexicana, llugar bien atopadizu pa la escena surf, Los Coronas, una de les bandes punteres del xéneru n’España lleguen a Xixón pa presentar el so últimu trabayu discográficu que lleva por nome Surfin’ Tenochitlan. La cita colos madrileños, el guitarrista David Krahe a la cabeza, ye esti xueves 17 de xineru nel club Nuevo Savoy de la villa xixonesa (Cai Pelayo, 2) a les 21:30 hores. La entrada a la sala cuesta 10 euros.

Los Coronas nacen en 1989 pola iniciativa de Fernando Pardo por facer daqué mas averao a los somíos tradicionales del rock que lo que taba tocando n’aquellos tiempos Sex Museum. Dos años mas tarde llega al grupu’l guitarrista David Krahe pa acabar de formar la columna vertebral y definitiva del grupu. Dendé entá espublizaron un EP y tres discos amás de prestixoses apaiciones en direutu como les que ficieron na xira d’Eddie Angel por España.

Siente a Los Coronas

Mañana, xueves 17, a les doce la mañana y nel llocal de la SGAE n’Uviéu, el Conceyu de Cultura Tradicional Vezos Astures y l’Archivu de la Música Tradicional del Pueblu d’Asturies van presentar el DVD “El baille na tradición asturiana”. Esti trabayu inclúi ventiún bailles del país grabaos y esplicaos, embaxo la direción de Ramón Lluís Bande, que nesti casu vuelve al xéneru del documental.

La producción cuerre a cargu de Publicaciones Ámbitu y el DVD inclúi un montaxe de cada baille dixebráu en trés partes: una introducción fecha con grabaciones d’archivu, una parte didáctica onde s’espliquen visualmente los pasos y la grabación de cada baille polos componentes de Vezos Astures nun escenariu preparáu a costafecha pa ello. Yá ye posible deprender en casa baillaes como la Muñeira, la Danza d’El Val.le o’l Pericote de La Guía

Esti miercoles va continuar el ciclu “Jazz en el centro”, que lleva delles propuestes de jazz al Centru de Cultura Antiguu Institutu de Xixón. cola actuación del tríu de Larry Willis, un de los pianistes y compositores más solicitaos de la escena jazzística internacional. La cita cola formación niuyorquina, que completen el contrabaxista Miguel Ángel Chastang ya’l baterista Juanma Barroso ye a les 20:00 hores con entrada llibre.

Larry Willis ye un de los artistes más prolíficos dientro del so xeneru. Formáu na escuela de música Manhattan, tien más de 300 collaboraciones en trabayos de xente tan importante como Dizzy Gillespie, Jackie McLean, col que tocó davezu duran munchos años, o Lee Morgan. Tamien foi teclista na banda de rock y blues Blood, Sweet & Tears durante siete años.

Según dio anuncia la Xunta pola Defensa de la Llingua Asturiana, la ceremonia d’entrega de los XXIII Premios Andrés Solar va cuntar cola participación de Toli Morilla. El cantautor, “siempres solidariu y dispuestu a sofitar les actividaes de la Xunta”-diz el comunicáu, va ufiertar una selección de los sos cantares más nomaos.

La ceremonia va entamar el próximu sábadu 19 de xineru, a les siete y media de la tarde, nel salón d’actos del Antiguu Institutu Xovellanos de Xixón. Ellí va facese entrega del Pegollu, Premiu Andrés Solar 2007, a l’equipu de fútbol L’Entregu CF en reconocimientu a la so aportación a la visualización y normalización de la llingua asturiana nel ámbitu del deporte. El xuráu de los premios valoró mui positivamente la voluntá firme del equipu na defensa del nome verdaderu del so llugar, L’Entregu, y la so difusión en tou tipu de medios deportivos y xeneralistes.

D’otra banda, faráse entrega de la Madreña Purpurina al secretariu xeneral de la FSA-PSOE Javier Fernández Fernández pola so trayectoria d’ataques y esibiciones de prexuicios contra la llingua asturiana y contra los derechos llingüísticos de los asturianos y asturianes.

L’actu incluirá tamién la tradicional llectura del discursu añal de la Xunta pola Defensa de la Llingua Asturiana nel que se fará repasu de lo que’l 2007 dio se sí no tocante a la realidá de la llingua asturiana. Tamién va haber momentu pa la folixa na espicha que, como vien siendo vezu, va facese en acabando la ceremonia. El preciu pa la espicha ye de 25 euros por persona, los y les que quieran apuntase puen facelo nel teléfonu de la Xunta: 985 229 553.