Música

La gala d’entrega del Premiu al Meyor Cantar 2009 entamó esti sábadu puntual, a les siete la tarde, nel auditoriu de la Casa Cultura Teodoro Cuesta de Mieres. El periodista Naciu Varillas y la escritora Vanessa Gutiérrez abríen l’actu, que retresmitía nesi momentu la TPA, recordando les característiques d’esti premiu afaláu pola Conseyería de Cultura y anunciaben al públicu mierense, qu’enllenaba l’auditoriu, que’l cantar escoyíu d’ente los cinco nominaos diba convertise na canción que representare a Asturies nel festival Liet, conocíu como l’Eurovisión de les llingües minorizaes.

Varillas y Gutiérrez anunciaben darréu la primer de les actuaciones, la de La Bandina, que dempués d’un vidiu de presentación salió al escenariu pa defender “Valse coxu”, un tema compuestu por David Varela y Merce Santos, con lletra d’Alicia Álvarez, componente del grupu Pauline na playa que pon voz a esti tema del grupu. Foi nesta actuación onde pudieron sentise los escasos fallos de soníu qu’hebo na hora y media de gala.

Nel segundu llugar nel orde de la tarde-nueche, foi la formación folk Felpeyu la que con un ampliu elencu de músicos intrepretó Refalfiu, ún de los cantares más aplaudíos de la gala.

Darréu y cola salida de los miembros del coleutivu Músicos pola oficialidá, la gala garraba un tonu más reinvidicativu. Camisetes con lemes como “35” o “Toos con Fer”, el propiu cantar “Garra la pallabra” y el llevantamientu de puñu de los miembros del grupu al final de l’actuación, convirtieron la tercer actuación de la entrega del premiu nun manifiestu de principios onde pudo sentise’l rap y el regee, xunto a les tresformaciones lletróniques, con una lletra de Vitor Álvarez, Aique González y Xune Elipe que pidía la fin del “apartheid” llingüísticu n’Asturies.

Un signu mui distintu garró la penúltima actuación dientro de concursu, la del cantautor Alfredo González, que con un tema románticu, basáu nun poema d’Antón García, cantó dende un llugar del escenariu nel que yera dificil velu dende’l públicu. Una mala colocación que nun diba impedir l’ésitu final de “La nada y tu”.

L’últimu de los cantares vieno de la mano de Bacotexo, un grupu rock qu’usa’l gallego-asturianu pa les sos composiciones y que presentó’l tema “Queimar el cielo”.

En terminando les actuaciones, los presentadores de la gala convidaron al alcalde de Mieres, Luis María García, al escenariu, onde tuvo pallabres d’agradecimientu, nun asturianu amestáu, pa tolos presentes y pa Cultura, “por escoyer otru añu más Mieres pa la entrega d’esti premiu”. Darréu, Consuelo Vega, Directora Xeneral de Política Llingüística, salió al escenariu col sobre onde taba’l resultáu del certame. Vega comentó nun curtiu discursu la intención de la Conseyería de Cultura, “de normalizar l’asturianu en toles estayes: non solo lliteratura o música, sinón tamién la ciencia, por exemplu”. Amás, dio anuncia de los miembros del xuráu qu’escoyere’l cantar ganador, ente los que taben María Xosé Rodríguez de la Oficina de la Llingua de Xixón, la filóloga María Cueto, ente otros.

Ente un públicu espectante, Vega abrió’l sobre, que daba como cantar ganador a “La nada y tu”, d’Alfredo García, la que yera en munchos de los círculos previos al certame, clara favorita.

Emocionáu, Alfredo González agradeció’l premiu, una escultura titualada “La payarina” y una xira promocional, y dedicó’l gallardón a so madre, que según esplicaba “taba recuperándose d’una enfermedá”, polo que nun pudiere asistir a la gala.

La entrega pesllóse cola actuación d’Alfredo González, yá como ganador y con un conciertín del grupu de pandereteres Herbamora (entós col nome “Dulcamara”), ganador del Premiu na edición de 2008, que recuperaben el tonu reinvindicativu que garrare la gala p’hacia la meta, sacando cartelos de la campaña “Yo doi la cara pola oficialidá”, lo mesmo n’asturianu, qu’en gallego-asturianu, fala materna d’una de les componentes del grupu.

En total, alredor de 90 minutos de la meyor música asturiana nun espectáculu bien realizáu y áxil que consiguió caltener l’atención d’un públicu entregáu a lo llargo de tola gala. Polo menos nel auditoriu Teodoro Cuesta. Los datos d’audiencia televisiva tán por ver.

A la fin del actu, el ganador, Alfredo González, tuvo tiempu pa dedicar unes pallabres sobre la esperiencia pal diariu Asturnews:

Alfredo González fízose col Premiu al Meyor Cantar en Llingua Asturiana esta tarde en Mieres col tema “La nada y tu”, basada nun poema d’Antón García. González conviértese asina nel representante asturianu nel festival Liet de les llingües minorizaes, que va celebrase esti añu en Frisia.

Asturnews va ufrir nes próximes hores crónica completa de la gala y un ampliu reportaxe fotográficu de la mesma.

La televisión pública asturiana va emitir esti sábadu, 21 de febreru la Gala d’Entrega de la III edición del Premiu al Meyor Cantar en Llingua Asturiana, que va celebrase na Casa Cultura de Mieres, a partir de les siete la tarde. L’actu, van presentalu Vanesa Gutiérrez y Naciu Varillas y va cuntar cola participación de los cinco finalistes: Alfredo González, Bacotexo, Musicos pola Oficialidá, La Bandina y Felpeyu, d’ente los que va salir el representante d’Asturies nel festival Liet-Lavlut, que va celebrase esti añu en Frisia, nos Países Baxos.

Nel trescursu de la gala va dase a conocer el cantar escoyíu tres de les deliberaciones d’un xuráu independiente, especializáu y formáu a esti efectu.

El Premiu al Meyor Cantar en Llingua Asturiana quier reconocer el trabayu de los creadores musicales qu’escueyen les llingües tradicionales d’Asturies como ferramienta de comunicación, buscando’l dar puxu a les composiciones orixinales (en lletra y música) feches n’asturianu o en gallego-asturianu. Nesta III edición los artistes y cantares finalistes son Alfredo González, con “La nada y tu” (de La nada y tu, Discos L’Aguañaz); Bacotexo, con “Queimar el cielo” (d’A máquina del tempo, Boomerang Records); La Bandina, con “Valse coxu” (de 13, Discos L’Aguañaz); Felpeyu, con “Refalfiu” (de Canteros, Tierra Discos); y Músicos pola Oficialidá, con “Garra la palabra” (de Garra la palabra, Xunta Pola Defensa de la Llingua Asturiana).

L’artista ganador va recibir una pieza escultórica de l’artista María Xesús Rodríguez.

La Gala d’Entrega de la III edición del Premiu al Meyor Cantar en Llingua Asturiana, va zarrase cola actuación d’Herbamora, conxuntu de pandereteres que ganó na edición del 2008.

El tríu de versiones acústicu Sin Enchufe ofrecerá esti fin de selmana un triple conciertu con tres feches pa los díes 12, 13 y 14 en delles sales de Xixón y Noreña, nes que interpretará un repertoriu diferente en ca una. Sin Enchufe ye una banda uvieína nacida pola xunión de componentes de los grupos Factor X y DEEPS. Naguando por experimentar coses nueves nel ámbitu musical y pasar un bon ratu faciéndolu, la voz de Portu (DEEPS) trabaya horizontalmente coles guitarres de Pablo Jonte y Diego Carrera (ambos de Factor X).

El xueves 12 de febreru los “desenchufaos” entamarán el so “triplete” nel llocal Savoy Drinks & Music, pisando esta banda de nuevu la sala xixonesa. L’actuación acústica entamará a la medianueche y la entrada sedrá de baldre.

Al día siguiente, vienres 13 de febreru, la formación uvieína actuará tamién na ciudá de Xixón, pero esta vegada nel Pub Bohemios, chigre asitiáu na cai Los Almacenes. El conciertu tien les 00:30 como hora d’entamu y tampoco habrá preciu d’entrada.

La triple actuación de Sin Enchufe finará’l sábadu 14 de febreru en Noreña, concretamente nel Café La Portiella. Sedrá un conciertu especial y ye que ye la quinta vegada qu’esta formación de versiones actúa nesi llocal, interpretando siempre temes diferentes. Entamarán a actuar a les 12 y media la nueche y tamién de baldre.

La televisión pública asturiana va emitir el sábadu 21 de febreru, coincidiendo col Día Internacional de la Llingua Materna, la Gala d’Entrega de la III edición del Premiu al Meyor Cantar en Llingua Asturiana, que va celebrase na Casa Cultura de Mieres, a partir de les siete la tarde. L’actu, van presentalu Vanesa Gutiérrez y Naciu Varillas y va cuntar cola participación de los cinco finalistes: Alfredo González, Bacotexo, Musicos pola Oficialidá, La Bandina y Felpeyu.

Nel trescursu de la gala va dase a conocer el cantar escoyíu tres de les deliberaciones d’un xuráu independiente, especializáu y formáu a esti efectu. Como novedá, per primer vegada, el ganador va representar a Asturies nel festival Liet-Lavlut, que va celebrase esti añu en Frisia, nos Países Baxos.

El Premiu al Meyor Cantar en Llingua Asturiana quier reconocer el trabayu de los creadores musicales qu’escueyen les llingües tradicionales d’Asturies como ferramienta de comunicación, buscando’l dar puxu a les composiciones orixinales (en lletra y música) feches n’asturianu o en gallego-asturianu. Nesta III edición los artistes y cantares finalistes son Alfredo González, con “La nada y tu” (de La nada y tu, Discos L’Aguañaz); Bacotexo, con “Queimar el cielo” (d’A máquina del tempo, Boomerang Records); La Bandina, con “Valse coxu” (de 13, Discos L’Aguañaz); Felpeyu, con “Refalfiu” (de Canteros, Tierra Discos); y Músicos pola Oficialidá, con “Garra la palabra” (de Garra la palabra, Xunta Pola Defensa de la Llingua Asturiana).

L’artista ganador va recibir una pieza escultórica de l’artista María Xesús Rodríguez.

La Gala d’Entrega de la III edición del Premiu al Meyor Cantar en Llingua Asturiana, va zarrase cola actuación d’Herbamora, conxuntu de pandereteres que ganó na edición del 2008.

L’Academia de la Música acaba faer publico esta selmana la rellación d’artistes y grupos nominaos a los premios d’esti añu, siendo los nominaos n’esta edición al meyor cantar n’asturianu La Bandina, Esther Fonseca, el Colectivu de músicos pola Oficialidá y K-Nalón. Y dende K-Nalón quieren faecr publico “qu’anque tamos agradecíos pola nominación nun queremos formar parte de tales premios. Consideramos positivo qu’alguien haiga puesto el güeyu en nosotros, pero nun sería xusto pa nos, nin pal restu d’artistes que tamién podrien tar ente los finaistes”.

La canción cola que tan nominaos ye Dixebra, un cantar que forma parte del tributu-homenaxe que ventidos bandes asturianes fiximos al grupu Dixebra. Esti discu ta rexistrau na SGAE, pero K-Nalón nun lo ta, y esa ye la cuestión.

El grupu fai un apueste dende’l principiu pola llibre difusión de la música y la cultura, y n’esi sen toles sos creaciones tienen llicencia Creative Commons del tipu Reconocimientu-Non comercial-Sin obres derivaes (3.0 España License) Y ye hai onde la so filosofía choca colos planteamientos de la SGAE.

K- Nalón afirma nel comunicáu nel que dan anuncia al so refugar de la nominación que respeten a tolos grupos que formen parte de la SGAE, pero nun comparten la politica d’esta entidá y tan totalmente escontra’l famosu CANON que graba’l preciu de munchos productos electronicos, polo qu’entienden que sería un actu hipocrita pola soa parte aceptar cualquier nominación fecha pola SGAE.

Ante ello, K-Nalón acaba mandar un comunicau a esta entidá pa que nun cuenten con K-Nalón y reconsideren a los otros grupos que nun entraron como finalistes. Polo que tienen de conocimientu ye la primer vez que se plantea esta cuestión nos premios anuales de la Academia de la Música.

Y ye qu’esta ciudá estremeña va acoyer la gala d’entrega de la 13ª edición de los Premios de la Música, qu’otorga cada añu l’Academia de les Artes y les Ciencies de la Música. Ente les 28 categoríes ta la de meyor cantar en llingua asturiana, que nesta edición cumple cinco años nel certame. Los nominaos son K-Nalón, pol tema “Dixebra”, Esther Fonseca por “Negra”, La Bandina con “Valse coxu” y los Músicos pola oficialidá, nominaos por “Garra la pallabra”.

Los ganadores van dase a conocer el 26 de febreru y la gala d’entrega va facese’l 12 de marzu nel Palaciu de Congresos Manuel Rojas de Badaxoz.

La octava edición de los premios, celebrada en 2004, foi la primera na que se cuntó cola categoría de música n’asturianu y el ganador foi entós Manolo Morán, col tema “Nunca mais”, en 2005 Chus Pedro ganó con “Agora sal a bailar”, Los Berrones ganaron con “Fai deporte” en 2006, Rosaleda Jazz Quartet con “Na fonte”, en 2007 y “Seique non”, de Tejedor, foi la ganadora del añu pasáu.

En cuantes a les categoríes referíes a llingües minorizaes, nel casu del catalán/valencianu, esti añu tán nominaos Sergio Dalma, Port bo ya Inma Serrrano. En vascu, Gose, Fermín Muguruza y Benito Lertxundi, son los nominaos, mientres que nel casu de la catergoría en gallegu, Víctor Aneiros, Uxía y Ophiusa son los finalistes.

Güei, xueves 29 de xineru, a les 21:30 hores, l’escenariu de Tierra Astur de Cualloto va acoyer l’actuación del grupu “Pandereteres de Fitoria”, agrupación etnomusical formada por Guadalupe Villanueva y Lorena Älvarez de La Pola Siero, Yolanda Menéndez de Granda (Siero), Verónica González d’Uviéu, Silvia Rodríguez y Laura Ruiz, de Fitoria y Florentina Cuadriello (asesora vocal y musical) de Corvera.

Con motivu del so primer aniversario, el Conceyu Cultural El Carbayu, de Llugones, celebra esti sábadu 31 de xineru un actu, qu’entama a les 8 la tarde na Casa de la Cultura de Llugones con un festival conmemorativu, con entrada de baldre, presentáu pol nomáu monologuista Milio del Nido.

NelFestival van presentase oficialmente’l documental “BRUJAS” producíu y rodáu n’Asturies y nel que participaren dellos colectivos culturales asturianos. Tamién actuará la Banda de Gaites Conceyu de Siero y el Conceyu Cultural el Carbayu de Llugones, que representará una esbilla de distintos bailes tradicionales asturianos, acompangaos por les pandereteras de Nervia.

El Nuevu Teatru La Felguera va acoyer mañana vienres 23, a les 20.15 hores, la presentación oficial del que ye’l nuevu discu del músicu llangreanu Héctor Braga: TRAD.YE

Dempués de ganar el premiu de la crítica RTPA como meyor discu de canción asturiana del añu 2008, el vienres 23 de xineru Héctor Braga ufiertará un conciertu-presentación nel Nuevu Teatru La Felguera. L’actu va presentalu l’escritor Pablo Rodríguez Medina y nel intervendrán dellos artistas convidaos amás de proyectase un trabayu audiovisual fechu por Ramón Lluís Bande al rodiu’l llabor artísticu d’Héctor Braga.

Héctor Braga, músicu y cantante profesional, ye llicenciáu pol Conservatoriu Superior d’Uviéu ya intérprete de Violonchelu, Gaita, Vigulín, Harpa, Gaita Rabil, Bandurria, Mandolina… Héctor Braga concibió «Trad.ye» pa recoyer los sos conciertos individuales, dando anuncia per primer vez del so ampliu rexistru vocal y tolos instrumentos qu’esti artista gasta nes sos actuaciones. Con un sabor acústicu y basándose nos archivos recoyíos nes sos incursiones etnomusicales, reinterpreta les asturianaes clásiques de principios del sieglu XX, actualiza romances d’orixe medieval, revive l’arte de cantar, toca la gaita, ellabora cantares herederos del más pícaru Mester de Xuglaría, recrea la xenuina lliteratura popular de cordel… Pero lloñe de quedase na música «de muséu», Héctor Braga ufre bien d’aportaciones artístiques a la tradición musical qu’interpreta y investiga