Música

El periodista musical y cantante del grupu Dixebra, Xune Elipe, va tar güei na Casa Posafuelles d’Uviéu, el chigre de la Xunta pola Defensa de la Llingua Asturiana, a partir de les once la nueche, col envís de presentar el so llibru “Rockmería” d’un mou especial. El músicu asturianu va dir amosando los estremaos estilos qu’apaecen nel llibru, espublizáu apocayá pola editorial Ámbitu, y que se basa nel so programa de radio na RPA.

El cantautor Toli Morilla va tocar esti vienres 19 de marzu, de magar les 21:30 hores na Sala La Muralla, asitiada nel númberu 4 de la cai Azcárraga d’Uviéu.

Toli Morilla asoleyó hasta agora seis discos, dellos en castellán, con temes n’asturianu, y otros defechu n’asturianu: “Diez cantares de Bob Dylan n’asturianu” (2009), “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

Güei, xueves 18 de marzu, a partir de les 21:30 hores, el restorán Tierra Astur de Cualloto acueye una actuación de La Bandina la Curuxa d’Uviéu. El grupu folk va tocar temes del so discu “…toi de camín”, espublizáu en 2008.

Esti próximu vienres 19 de marzu, de magar les 20h na Antigua Estación (Uviéu) cellebrarase el “San Patrick’s pun-folk fest” onde se van dar cita los grupos asturianos Taranus y Sambre, cuntando amás cola presencia n’esclusiva de los checos Pipes and Pints que vienen presentar el so nuevu trabayu “Until we die”.

Pipes and Pints lleven unos años trabayando duru para convertise na nueva referencia europea del punk-folk, con unos soníos directos que s’asemeyen a la llínea yá trazada por grupos consagraos como The Pogues, Floggin Molly o los Dropkick Murphys. Tan acabantes de lanzar un nuevo LP, “Until we die”, a través de los sellos Wolverine Records n’ Europa y Impenitente Records en Norteamérica y Sudamérica.

Tres l’ésitu de la so primer publicación oficial, EP 2008, y la so xira posterior en Países d’Europa Central, vuelven presentanos un trabayu nel que se combina Punk Rock y Rock ‘n’ Roll colos toques característicos del folk de les Highlands. Pipes and pints caracterícense por un espectáculu en directu rotundamente arrollador, frescu y que nun dexa a naide indiferente.

Sambre tán llamaos a convertise na nueva referencia del rock-folk fechu n’Asturies. La banda xixonesa presenta per primer vegada na capital asturiana’l so primer discu, tituláu “Na solombra” (una de les primeres ediciones discográfiques musicales de Algamar Producciones). Sambre, palabra asturiana que significa ‘pena’, ‘tristura’, ye tamién el nome d’un grupu de Xixón creáu a principios del 2007 col enfotu de reflexar les influyencia musicales de los sos miembros, con una base rock y escoyendo la llingua asturiana como forma d’espresión.

Hasta la grabación d’esti discu participaron nel discu de versiones de Dixebra “Perversiones” col tema «Asturcón» y nel recopilatorio “Calzada News vol. 2” con «Atravesáu pelos chigres». “Na solombra” ye un discu fundamentalmente de rock’n’roll con infuencia del folk, onde les guitarres eléctriques y la distorsión comparten espaciu con preseos acústicos como’l violín, la gaita o la mandolina. Temáticamente les lletres van del amor y la folixa a -yos vivencias personales o la vida na cai. La producción tuvo al cargu de Xel Pereda, componente de Llan de Cubel y Lucas 15.

Taranus surde nel añu 1994 formando por un grupu d’estudiantes con más ganes que recursos intentando dar un xiru a la música asturiana. La idea inicial yera entemecer ritmos heavy y rock con folck tradicional. Tres unos años de rodaxe, en 2008, Taranus resurde con fuerza con un cambéu de componentes y nuevos cantares.

El cantante Cholo Juvacho presenta nuevu trabayu discográficu esti sábadu nel Casinu d’Asturies, en Xixón, a les 20:30 hores. L’autor lleva cuasi cincuenta años nos escenarios cola so música, enllena d’humor asturianu.

Xixón enllénase de música esta fin de selmana. El vienres a les diez de la nueche la Sala Acapulco recibe al grupu Revolver, llideráu por Carlos Goñi dende va másde 20 años. El sábadu Miguel Poveda llega alTeatru Xovellanos a les 20:30 hores. Coples con música de Joan Albert Amargós y les collaboraciones de Juan Gómez “Chicuelo”.

El domingu, nel mesmu coliséu xixonés, y a partir de les ocho y media, llega la música de Bustamante, el cántabru llega a Asturies colos sos ésitos habituales y los del so discu nuevu.

Güei, 11 de marzu, a les 12:30 hores, xunto a la biblioteca del aulariu Norte del Campus de Xixón, va celebrase un conciertu de Pablo Valdés.

Les sos influyencies, tanto a nivel musical como lliterariu (Bruce Sprinsteen , Bob Dylan, Quique González, Revolver etc.), marquen la temática de los sos cantares: la carretera, la nueche, l’agua, el deséu de llibertá, etc. Nel añu 2007 ganó’l Concursu de Maquetas de 40 Principales Asturies que-y dexó grabar el so primer discu Onde nos lleve la carretera, y agora yá publicó un segundu discu y Nueches de Ciudá.

La cantante andaluza Diana Navarro entregaba esti xueves el Premiu al Meyor Cantar n’asturianu dientro de los Premios de la Música. Énte la reivindicación de la oficialidá del asturianu, fecha na nuesa llingua por Xune Elipe, l’artista rió y dixo “qué complicao, todo, ¿no? Como hable yo en andaluz me parece que no nos enteramos ninguno: ¡ozú chiquillo, ozú!”, a lo que, y dempués de dase cuenta del enguedeyu nel que se metiere col so comentariu añadió: “con todos los respetos eh por favor, es una broma eh, que yo no quiero ofender a naide, eh por favó, si es que yo hablo y… me callo”.

Los comentarios causaron rocea ente la comunidá asturfalante y Diana Navarro colgó un testu n’asturianu y en castellán na so web, pidiendo disculpes “a les persones que se sintieren ofendíes” pol comenariu fechu nos Premios de la Música, que l’artista califica como “un toque d’humor a un momentu que yo entendí de tensión, cuando coles reivindicaciones, empezó a politizase un actu que ye puramente cultural”.

Navarro añade que’l so comentariu vieno poque “La mayoría de los ellí presentes, nun teníamos la suerte de saber la llingua asturiana, nin la catalana, nin el gallegu, nin el euskera y nun tábamos entendiendo nada de lo qu’ellí se falaba”. Amás, reconoz que la so referencia al “andaluz” nun yera más que “una chancia, yá que l’andaluz nun esiste como llingua”.

L’artista diz sofitar “dende la seriedá, la llucha por que nun se pierdan estes llingües pero entiendo que nun yera’l sitiu, nin el momentu” y pon como exemplu de bon facer al grupu Luar na Lubre “bien atinaos al traducinos primero en castellanu y dempués falar en gallegu”.

L’artista recuerda como gracies ellos tuvo “la oportunidá de cantar en gallegu, y va encantame cantar nel restu de les llingües españoles, si me brinden la oportunidá, porque nun tengo prexuicios”, como diz demostrar nel so discu “Camino Verde”, onde l’artista inclúi un tema del folclore gallegu “La Farruca del tran”, mientres que pal próximu ta investigando “un cante que se llama “La praviana” y que vien d’Asturies”.

Páxina web onde pue atopase’l comunicáu completu

La XIV edición de los Premios de la Música celebróse ayeri xueves en nel Teatru Häagen-Dazs Calderón de Madrid y n’ella recibieron el premiu al Meyor Cantar en Llingua Asturiana, los componentes del grupu asturianu Dixebra. Al salir a recoyelu esixeron “a los responsables políticos asturianos y españoles, qu’iguen la situación de marxinación y d’apartheid que vive la llingua asturiana”.

Amás, Xune Elipe y Jorge Cambareli, que recoyeron el premiu en nome del grupu quixeron dedica-y el premiu “a tolos falantes d’asturianu, porque tán faciendo que l’idioma siga vivu güei y a los militantes de la reivindicación llingüística”, porque según afirmarón “gracies al so puxu y a la so xera dalgún día van vese reconocíos los derechos llingüísticos”.

La 2 de TVE emitió’l vienres la gala, conducida por Olvido Gara, más conocida como Alaska. La cita cuntó coles actuaciones musicales de Miguel Poveda, Zahara y otros, entregndo los premios Fernando Trueba, Vetusta Morla, Bimba Bosé, Dani Macaco, El Canto del Loco, Diana Navarro, Fernando Argenta, Luis Mendo, Carlos Narea, Eduardo Bautista y la propia Alaska.

Güei, vienres 5 de marzu, va celebrase Gala d’entrega de los Premios AMAS 2010, que va tener llugar nel Teatru Filarmónica d’Uviéu a partir de les 21 hores y entamada pola Asociación Cultural Canal Asturias. Los nomianos pueden consultase na so páxina web.

Nominaos