Música

Coproducía pola Fundación Municipal de Cultura y el Centru Nacional d’Espardimientu Musical (CNDM), la IX Primavera Barroca vuelve axuntar n’Uviéu a los meyores artistes d’esti xéneru, entamando’l 15 de marzu y  desenvolviéndose hasta’l 16 de mayu nel Auditoriu Príncipe Felipe.

La OSPA ye un referente dientro y fora d’Asturies pol so versatilidad, la so capacidá interpretativa y la so calidá indiscutible y va interpretar a Schoenberg nel Teatru Xovellanos esti xueves 3 de febreru a les 20 hores.

El Teatru Xovellanos de Xixón va acoyer esti miércoles 2 de febreru a les 20 hores una nueva actuación del Ciclu de Nuevos Intérpretes de la Fundacion Alvargonzález na que van participar Leonardo González Tortosa al vigulín y Anna Mirakyan al pianu, entamáu pola Sociedá Filarmónica de Xixón.

Wallace y Joris tuvieron el so primer alcuentru mientres una xira n’Europa n’avientu de 2021, ente que Peter y Joris conocieronse en Nueva York los primeros 90. Agora aporten esti martes al Centru de Cultura Antiguu Institutu de Xixón nuna xira europea denomada “Together Again”, na que xúnese-yos el contrabaxista Ignasi González.

El Teatru Xovellanos acueye esti martes 1 de febreru a les 20 hores l’actuación de l’artista angloespañola Calandria Bentley que vien a presentar el so caberu trabayu discográficu a Xixón.

Chanel impon la so invitación al ‘europerreo’ na primer semifinal del Benidorm Fest. L’artista d’orixe cubanu encabeza con ‘SloMo’ unes votaciones que dieron tamién el pasu a la final a Tanxugueiras, Blancu Palombu y Varry Brava

El Benidorm Fest, un certame que RTVE devolvió a la vida a partir de les cenices del sumíu Festival Internacional del Cantar de Benidorm pa utilizalu como plataforma de selección y llanzamientu del representante español n’Eurovisión 2022, yá tien a los sos cuatro primeros finalistes. Tres un procesu de votación daqué enrevesáu nel qu’hubo que sopesar les preferencies del públicu (partíes ente’l televoto y l’asina llamáu ‘panel demoscópico’) y les d’un xuráu profesional, ‘SloMo’, de Chanel; ‘Terra’, de Tanxugueiras; ‘Secretu d’agua’, de Blancu Palombu, y ‘Raffaella’, de Varry Brava, fueron, por esti orde, los cantares escoyíos pa optar a la plaza eurovisiva na gran final del sábadu. Ellí van midise colos otros cuatro finalistes que salgan de la segunda gala clasificatoria, que va tener llugar na nueche del xueves. Si paez un pocu enguedeyosu ye porque lo ye.

La deserción d’última hora de Lluna Ki dexó en seis los participantes nesta primer semifinal. El tríu de Orihuela Varry Brava abrió’l baille col so sandunguero homenaxe a Raffaella Carrà envueltu nuna puesta n’escena de discoteca cañí, tou petardeo colloráu, peluques rubies y ‘pa-pa-pa-pará’.

Abondo más sobriu foi’l desempeñu de les veteranes Encarna y Toñi Salazar, que defendieron ‘Postureo’ con más oficiu qu’entusiasmu, ente proyecciones visuales d’inspiración arábiga, contención coreográfica y dalguna qu’otra vacilación vocal impropia de la so esperiencia.

Lo de les ‘pandereiteiras’ gallegues Tanxugueiras con ‘Terra’ foi otra cosa. Un númberu hipnótico y distintu con una puesta n’escena d’estética poderosa, entemeciendo con tientu y convencimientu meigas y muñeires.

Cerró esta primer parte del concursu Chanel, que se sobrepunxo a les aparentes llimitaciones del so cantar ‘SloMo’ con una actuación axustadísima, nuna presentación de vocación internacional.

Pa entretener la espera mientres se faíen les votaciones y contabilizábense los sofitos, actuaron el portugués Salvador Sobral, ganador d’Eurovisión 2017 con ‘Amar pelos dois’, y el tríu asturianu Marlon, que la so relación col festival européu del cantar, en casu d’esistir, resulta abondo más enigmática. A la fin, y non ensin suspense, anunciáronse les resultancies, de los que sosprendieron tanto’l trunfu folgosu de Chanel como la eliminación de Azúcar Moreno, el nome más conocíu d’ente tolos candidatos.

Factoría Sound camuda de rexistru na so segunda cita de 2022, y ufierta la posibilidá d’esfrutar d’unu de los referentes internacionales del stoner rock: Green Desert Water. La banda uvieina va presentar en directu, y ex esclusiva para toa Asturies el so nuevu discu, “Black Harvest”, na sala escénica de la Factoría Cultural, esti vienres a les 21 hores.

León Benavente escosó les entraes para’l so conciertu n’Avilés. No que va ser un doble estreno n’esclusiva, el del so nuevu discu, “ERA” y el de la xira col que lu llanzarán dende les tables del Teatru Palacio Valdés, el sábadu 29 de xineru, a les 21.00 hores.