Música

Chanel impon la so invitación al ‘europerreo’ na primer semifinal del Benidorm Fest. L’artista d’orixe cubanu encabeza con ‘SloMo’ unes votaciones que dieron tamién el pasu a la final a Tanxugueiras, Blancu Palombu y Varry Brava

El Benidorm Fest, un certame que RTVE devolvió a la vida a partir de les cenices del sumíu Festival Internacional del Cantar de Benidorm pa utilizalu como plataforma de selección y llanzamientu del representante español n’Eurovisión 2022, yá tien a los sos cuatro primeros finalistes. Tres un procesu de votación daqué enrevesáu nel qu’hubo que sopesar les preferencies del públicu (partíes ente’l televoto y l’asina llamáu ‘panel demoscópico’) y les d’un xuráu profesional, ‘SloMo’, de Chanel; ‘Terra’, de Tanxugueiras; ‘Secretu d’agua’, de Blancu Palombu, y ‘Raffaella’, de Varry Brava, fueron, por esti orde, los cantares escoyíos pa optar a la plaza eurovisiva na gran final del sábadu. Ellí van midise colos otros cuatro finalistes que salgan de la segunda gala clasificatoria, que va tener llugar na nueche del xueves. Si paez un pocu enguedeyosu ye porque lo ye.

La deserción d’última hora de Lluna Ki dexó en seis los participantes nesta primer semifinal. El tríu de Orihuela Varry Brava abrió’l baille col so sandunguero homenaxe a Raffaella Carrà envueltu nuna puesta n’escena de discoteca cañí, tou petardeo colloráu, peluques rubies y ‘pa-pa-pa-pará’.

Abondo más sobriu foi’l desempeñu de les veteranes Encarna y Toñi Salazar, que defendieron ‘Postureo’ con más oficiu qu’entusiasmu, ente proyecciones visuales d’inspiración arábiga, contención coreográfica y dalguna qu’otra vacilación vocal impropia de la so esperiencia.

Lo de les ‘pandereiteiras’ gallegues Tanxugueiras con ‘Terra’ foi otra cosa. Un númberu hipnótico y distintu con una puesta n’escena d’estética poderosa, entemeciendo con tientu y convencimientu meigas y muñeires.

Cerró esta primer parte del concursu Chanel, que se sobrepunxo a les aparentes llimitaciones del so cantar ‘SloMo’ con una actuación axustadísima, nuna presentación de vocación internacional.

Pa entretener la espera mientres se faíen les votaciones y contabilizábense los sofitos, actuaron el portugués Salvador Sobral, ganador d’Eurovisión 2017 con ‘Amar pelos dois’, y el tríu asturianu Marlon, que la so relación col festival européu del cantar, en casu d’esistir, resulta abondo más enigmática. A la fin, y non ensin suspense, anunciáronse les resultancies, de los que sosprendieron tanto’l trunfu folgosu de Chanel como la eliminación de Azúcar Moreno, el nome más conocíu d’ente tolos candidatos.

Factoría Sound camuda de rexistru na so segunda cita de 2022, y ufierta la posibilidá d’esfrutar d’unu de los referentes internacionales del stoner rock: Green Desert Water. La banda uvieina va presentar en directu, y ex esclusiva para toa Asturies el so nuevu discu, “Black Harvest”, na sala escénica de la Factoría Cultural, esti vienres a les 21 hores.

León Benavente escosó les entraes para’l so conciertu n’Avilés. No que va ser un doble estreno n’esclusiva, el del so nuevu discu, “ERA” y el de la xira col que lu llanzarán dende les tables del Teatru Palacio Valdés, el sábadu 29 de xineru, a les 21.00 hores.

El programa Arte nel Barriu trai güei a les 19 hores a los arxentinos ‘Lloca Bohemia’ al Centru Municipal Integráu El Cotu.

Sharon Corr abre’l telón esti próximu día 21 de xineru d’un Factoría Sound nel que Green Desert Water sumir al cartelu de recitalesLa irlandesa llega colo meyor del folk nel so últimu discu, “The Fool & The Scorpion”, y los asturianos van presentar n’esclusiva so más recién trabayu, “Black Harvest”.

La OSPA ye un referente dientro y fora d’Asturies pol so versatilidad, la so capacidá interpretativa y la so calidá indiscutible y estrena so primer abonu nel Teatru Xovellanos esti xueves 13 de xineru a les 20 hores.

Fernando Alfaro lleva yá enforma tiempu, desque empezara a finales de los ochenta con Surfin’ Bichos, dempués con Chucho y tamién sol so propiu nome, alimentando l’imaxinariu colectivu ibéricu con cantares estremos, como dosis nada calculaes d’emoción, escitación, aselu o nube, qu’aporten esti día al Xovellanos.

El Festival Uviéu Jazz, coproducción del Centru Nacional d’Espardimientu y  la Fundación Municipal de Cultura, vuelve traer el Jazz a la Filarmónica dende’l 14 de xineru, con un programa de cuatro sesiones ente xineru y febreru colo más granao del jazz nacional.