Mundu

La xira del musical Mamma Mia! llega a La Llabora de Xixón del 16 al 19 de xunu y col envís de promocionar l’espectáculu ente los asturianos, el coreógrafu de la mesma, Carlos Carrasco, va ufrir una “masterclass” de baldre, el vienres 17 de xunu, a les 16:30 hores, en La Llaboral, Ciudá de la Cultura.

Los interesaos en participar baillando los temes del musical d’Abba, pueden apuntase de baldre nel corréu lletrónicu eventosrecrea@recrea.asturias.es, poniendo nome, edá y corréu lletrónicu o teléfonu de contactu. L’actividá ta encamentada pa persones de más de 16 años.

Tolos participantes van recibir un 15% de descuentu sobre’l preciu de la entrada al musical, na so sesión del domingu 19 de xunu, a les 17:30 hores.

El Patiu de la Casa Cultura de Grau acueye esta actividá d’entrada llibre que s’enmarca dientro del ciclu “Ronda per Asturies” de Caxastur. El conciertu entamará a les ocho la tarde con obres d’autores como Ennio Mrricone, Julio Dominguez, Gregorio García Segura o l’asturianu Antolín de la fonte, ente otros.

La Coral Polifónica de Llanera formada por voces mistes, ñació por iniciativa del Conceyu de Llanera en 1988. Dende entós ufierta conciertos y celebraciones llitúrxiques en numberoses fiestes llocales percorriendo la práctica totalidá de la xeografía asturiana.

A partir de 1.992 empieza a realizar les sos actuaciones fuera del país: Monesteriu de San Rosendo (Celanova), Igualada, El Prat y nel Monesteriu de Montserrat, Foz de Llugo, Ponferrada, Laredo, Calahorra, Ribadeo, Medina del Campu, Miranda del Ebro, Cuéllar, Ribadeo, Monforte de Lemos, Suances, Cuenca, Córdoba, Zamora, Plasencia, La Bañeza, Vitoria, Madrid, Toledo, As Pontes, Villalba, Alicante, Torrelavega y Aguilar de Campoo, ente otros llugar. En 2002 la Coral tuvo na llocalidá portuguesa de Guimaraes.

Ganó númberosos premios a les ordénes de cinco directores: Emilio García, Luis G. Santana, Begoña Calleja, Gorka García Fdez. de Castillo, Carlos Ruiz de Arcaute Rivero y el so actual director dende febreru del 2007, Carlos Esteban.

El Serviciu de Política Llingüística d’Asturies y la editorial Suburbia presenten esta tarde’l llibru “La mio voz”, de Marta Mori, obra ganadora del Premiu Xuan María Acebal de poesía n’asturianu 2010.

L’actu va celebrase güei, 8 de xunu, nel Vieyu Institutu de Xixón, a les 7,30 la tarde, cola participación de Xuan Xosé Sánchez Vicente como presentandor y Consuelo Vega, Directora Xeneral de Política Llingüística, en representación del Gobiernu d’Asturies.

La Llaboral Centru D’Arte y Creación Industrial convoca a aquellos artistes o colectivos artísticos qu’utilicen nueves tecnoloxíes pa la producción de tres proyectos, que se van materializar n’esposiciones na Sala de Columnes, dientro del Centru d’Arte y Creación Industrial. Los proyectos 1 y 2 tán dirixíos a ceadores asturianos o residentes n’Asturies y ta dotáu con 1.500 euros d’honorarios más 6.000 euros de producción. El proyectu 3 ta dirixíu a ceadores de cualquier nacionalidá interesaos en realizar una residencia de dos meses en La Llaboral, dotáu con 2.000 euros d’honorarios y otros gastos derivaos de la residencia en La Llaboral, amás de 6.000 euros pa producción y agospiamientu demientres dos meses.

Bases completes

Esti sábadu, 4 de xunu, va celebrase’l I Alcuentru del Estremeñu y la so cultura en Botih.a, pueblu de Cáceres. A partir de les 10 la mañana va celebrase la inauguración d’un mercáu y van facese delles rutes culturales y hestóriques. De 11 a 13 hores van celebrase delles charres alredor de la variedá llingüística estremeña. Ismael Carmona García va presentar el colectivu OSCEC cola conferencia “Llingües inoraes n’Estremadura”, siguiendo darréu Juan Francisco Reina Raposo con “L’estremeñu nel contestu asturlleonés”.

A les doce la mañana José Benito Mateos Pascual va falar d’”El Rebollal: Al otru llau de la Sierra de Gata”, mientres que Bienvenido Gutierro Rodríguez aldericará alredor de “L’asociacionismu y l’estremeñu”, presentándose darréu la novela “El revesinu”, escrita por José María Alcón Olivera na variedá estremeña del asturianu.

Otros actos y charres van completar un día dedicáu dafechu a la cultura y la llingua d’Estremadura, que vive nestos momentos un procesu de recuperación y dignificación per parte de dellos colectivos del llugar.

Na realización d’esta xornada participa’l Conceyu de Botih.a y l’Organu de Siguimientu y Coordinación del Estremeñu y la so cultura.

El Conceyu de Llaviana convoca la décima edición d’esti concursu dotáu con 400, 200 y 100 euros pa los tres primeros. Los trabayos, tanto en prosa como en versu, han tar redactaos en llingua asturiana, respetando les normes ortográfiques y gramaticales n’usu de l’Academia de la Llingua Asturiana, con un llargor máximu de 10 fueyes.

El tema sedrá llibre valorándose los trabayos que recueyan tradiciones, costumes, llugares, fechos, paisaxe d’Asturies y, sobremanera, del Conceyu de Llaviana y el Valle’l Nalón. Les obres van presentase na Oficina de Normalización Llingüística de Llaviana, allugada na Plaza Armando Palacio Valdés 1, 33980, en La Pola Llaviana. El plazu d’almisión de trabayos acaba’l vienres 3 de xunu a les 14:00 hores.

Bases completes del concursu

Les cifres algamaes poles trés fuercies nacionalistes que se presentaben a les eleiciones nacionales d’esti domingu nun dexen llugar a duldes, l’asturianismu políticu salió feríu de muerte d’estos comicios. Bloque por Asturies-UNA, que se presentaba col envís de caltener el diputáu col que cuntaben dempués de la so salida del pactu con Izquierda Xunida-LV, quedó en namás 6.160 votos, poco más del 1%. La coalición URAS-PAS, hasta agora cuarta fuercia política asturiana, desplómase y algama namás 2.948, baxando más de 10.000 votos con respectu a 2007 y quedando nun porcentaxe del 0’49%. Conceyu Abiertu, heriede d’Andecha Astur nestes elecciones quedó en 1.529 votos (el 0’26%), frente a los 2.770, (el 0’46% de 2007). Los datos faen pensar que la folar producida nos resultaos por Álvarez-Cascos y Foru Asturies son la causa d’esta fuxida de votos que dexa al asturianismu fuera de la Xunta Xeneral y perbaxo de fuercies como UpyD ya IDEAS, que tampoco algamen diputaos.

Conceyales nacionalistes

Nun-yos va muncho meyor a los partíos nacionalistes nos conceyos. PAS-URAS, hasta agora la fuercia más importante nel ámbitu llocal con 11 conceyales, pierde tolos sos conceyales actuales y algama dos, unu en Valdés y otru en Bimenes. Con estos datos queda claro que la formación asturianista pierde los dos conceyos que gobernaba hasta agora.

Nel casu de Bloque por Asturies, consigue un conceyal en Carreño, otru en L.lena (onde cuntaben con dos dientro de la coalición IX). Amás, les sos marques Asturianistes por Nava, xube un conceyal, quedando con trés y pudiendo decidir el gobiernu llocal ente’l PSOE o FAC.

Conceyu Abiertu consigue un conceyal que llevaba años resistiéndose a la izquierda nacionalista, en Noreña, onde l’asturianista Inaciu Iglesias va ser l’únicu representante de la formación lliderada por Francisco Álvarez-Cascos.

Esti xueves, 19 de mayu a les 19:30 hores va presentase un llibru de la editorial Glayiu en collaboracion cola Sociedá Cultural Xixonesa sobre l’estensu trabayu del fináu conceyal xixonés, José Manuel Palacio, como articulista na prensa llocal, dende l’añu 1979 hasta’l so fallecimientu en 2005. L’actu va tener llugar nel Colexu Públicu Xovellanos de Xixón, allugáu na cai Begoña 25.

Considérense d’especial interés los sos artículos d’opinión sobre temes en política llocal, por mor del so pasáu como miembru de les Cortes Constituyentes, hestóricu militante socialista, primer alcalde de Xixón dientro de l’actual democracia, y como conceyal independiente, (con posterioridá), del partíu Unidá Xixonesa.

Na edición, participen nos prólogos y la semblanza Luis González Fernández, Armando Joaquín Nosti Casu, Vicente Bernaldo de Quirós y Juan Antonio Álvarez, ya inclúi un epílogu de Miguel Ángel Llana.

A partir del vienres, podrá mercase’l llibru na Llibrería Paradiso y el Centru Social Sestaferia a un preciu de 18 euros.

Yá ta abiertu’l plazu del clásicu concursu folk de Navelgas, qu’esti añu algama la so XII edición. Los grupos interesaos en participar nun de los más prestixosos concursos de música tradicional pueden unviar les sos maquetes hasta’l 8 de xunu, a “XII Concursu Folk Internacional Cuartu Los Val.les, Muséu del Oru d’Asturies 33873 Navelgas – Conceyu de Tinéu – Asturies”.

Les maquetes tienen d’incluyir cuatro temes y har dir acompañaes d’un dossier informativu de la trayectoria del grupu, amás, de los sos datos de contauctu. Esti añu, el concursu, vuelve tar dividíu en dos categoríes: grupos de pequeñu formatu (hasta trés componentes) y de gran formatu (con más de trés componentes. Los premios van ser de 1000 euros, troféu y emisión de conciertu en Radio 3, pal grupu de gran formatu ganador (los finalistes tienen un premiu de 600 euros); na categoría de pequeñu formatu, el ganador, va llevar 500 euros, troféu y emisión de conciertu en Radio 3 (los finalistes tienen un premiu de 300 euros).

El 20 de xunu daránse a conocer los tres finalistes de cada categoría y midiránse sobre les tables del escenariu los díes 29,30 y 31 de xunetu en Navelgas.

A carlotina

Nesta nueche d’insomniu
apetezme falar cola lluna,
pa ver si la convenzo
que venga a la cama conmigo.
Que m’allurie una añada y me duerma
pa suañar qu’amanezo contigo.

Nesta nueche d’insomniu
apetezme falar coles ñubes,
y entrega-yos un tienru mensaxe
que lu dexen cayer en to llechu,
llexando selino,y t’espierte callando, ensin ruíos.

Nesta nueche d’insomniu
que se faen tan llargues les hores,
apetezme falar coles sombres,
y pente’l misteriu del espaciu’l cielu,
tan fríu y tan prietu,
que me lleven espiertu al to ñeru.

(Lletres Asturianes, mayu de 1995)