Lliteratura

La Tertulia Malory, de L’Entregu, escoyó como meyor llibru n’asturianu de tolos editaos nel 2012 la novela gráfica La Chelita, del dibuxante Ruma Barbero. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 1 de Payares de 2013. El xuráu destacó nel acta del fallu “el dominiu de tolos recursos del llinguaxe del cómic. Un ritmu narrativu áxil y rellumante a les órdenes d’un guión perfechu col que conquista l’alma del llector”.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu nuna fecha tovía ensin determinar. Amás, el colectivu lliterariu con sé en L’Entregu va mercar 20 exemplares de la obra pa ofrecer como regalu protocolariu nos actos organizaos o onde participe la Tertulia Malory.

Esta ye la segunda vez que’l grupu concede esti premiu, l’añu anterior resultó ganadora La ñeve del Cuquiellu, poemariu obra de Xabiero Cayarga. Con esti gallardón los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. Los entamadores consideren que yera «pernecesariu» un premiu d’estes característiques nel ámbitu de la lliterartura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

La Chelita, ye una novela gráfica de 160 páxines, onde se narren les vivencies de Charo Borreguero, una psicóloga salmantina qu’en 1992 aporta a El Salvador pa formar mayestros y ayudar na recuperación d’un país qu’aniciaba’l camín de la paz depués d’una sangrina guerra civil. Y onde ensin embargu va acabar trabayando pa la organización pro-drechos humanos Madeleine Lagadec, colaborando na elaboración del Informe pa la Comisión de la verdá pa El Salvador de les Naciones Uníes. Un viaxe personal y ablucante pela historia más recién d’América Llatina.

Ruma Barbero (Somio, Xixón, 1971) Llicenciáu en Belles Artes pola Universidá de Salamanca. Pertenez a los grupos de folk Felpeyu y Los Citriquinos. Nel mundu del cómic diose a conocer na revista escolar El Maguillo y en El Llapiceru. Participó na editorial Cactus Comics onde asoleyó Los Aguarones, xunto con Xosé Antón García Sampedro “Son”. Nel añu 2003 algama’l primer premiu del Concursu de comics de la Comarca de la Sidra pol trabayu Marcianaes, títulu qu’usa pa la tira cómica que asoleya nel selmanariu Les Noticies nel periodu del 2004 al 2010. Nel añu 2009 gana’l premiu Alfonso Iglesias de Cómic en Llingua Asturiana por Manzajú, afitándose como ún de los grandes del mundu de la viñeta asturiana. Anguaño pueden vese los sos trabayos nel blog «Fundición Príncipe de Astucias» y nel fanzine dixital «Aguantando Cachones».

Les XII Xornaes de Lliteratura Infantil y Xuvenil de Samartín del Rei Aurelio dirixíes a escolinos de toles edaes entamen el próximu llunes 4 de payares cola principal novedá d’esti añu de los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu.

La Conceyalía de Cultura, Educación, Igualdá y Deportes de Samartín del Rei Aurelio va celebrar esti mes de payares la décimosegunda edición de les sos Xornaes de Lliteratura Infantil y Xuvenil. La programación inclúi espectáculos teatrales, talleres infantiles y esposiciones dirixíes a los escolinos del conceyu colos que se pretende fomentar los vezos llectores y foi presentada esta selmana nel Ayuntamientu de SMRA.

“Estes xornaes abarquen les artes escéniques y les lletres cola finalidá d’animar a la llectura a la infancia y la mocedá. Naguamos por educar dende l’entretenimientu con una programación de calidá, acercando a la población escolar les últimes producciones teatrales y lliteraries. Tamién queremos sorrayar les creaciones de los autores del conceyu” señaló la conceyala de Cultura, Educación, Igualdá y Deportes, Gema Suárez nesta presentación na que tuvieron tamién presentes representantes de les asociaciones collaboradores.

La principal novedá d’esti añu son los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu. Nellos van llevase a cabu xuegos y actividaes rellacionaes colos llibros “Marta y el peludín de Carrandi” de Chechu García y “Tapín de Picupáu” de Pablo Rodríguez Medina. La inscripción nestos talleres ye de baldre y van desendolcase tolos vienres del mes de payares a les 6 de la tarde na Casa de la Xuventú de Sotrondio y na Casona del Bravial de Blimea respeutivamente.

En cuanto al teatru van representase nel Teatru Municipal obres destinaes a tolos ciclos de primaria, como “Un gallinero en la azotea”, “Cuatro hojas y la máquina fantabulosa”, “Por las nubes” o “El pelegrín valiente”, adautación esta última del cuentu d’Antón García fecha pola compañía Nun Tris Teatru. Tamién va haber teatru nes escueles infantiles cola obra de Carlos Alba “Sol, luna, arriba y abajo”.

Les xornaes complétense coles esposiciones sobre’l llibru “Mieu” nel colexu d’El Bosquín de L’Entregu y la muestra “Hai una ringlera trazada”, sobre los escritores del conceyu, que se va poder visitar na Casa de la Xuventú de Sotrondio y na Casona del Bravial.

Esti xueves, día 24 d’ochobre, a les 20H.00’, nel local social del Atenéu Obreru de Xixón (Cai Cuadonga, 7 – 1o Izda.), va tener llugar la presentación del llibru Fundido a negro carbón, publicáu pola Editorial “El pescador d’agua duce” y del que ye autor el fotógrafu asturianu Monty (Sergio Montero).

La obre compila’l trabayu documental del fotógrafu en redol al últimu conflictu obreru que solmenó Asturies y España en 2012, el conflictu de la minería. Cola publicación d’esti llibru remanez pal públicu una colección fotográfica que ta destinada a caltener la memoria del que quiciabes sía l’últimu cartuchu d’una llarga llucha qu’empezó xusto al par que la estracción de les primeres piedres de carbón. Les movilizaciones de la minería en 2012 volvieron allugar al sector como la piedra angular del movimientu obreru español.<7p>

Con prólogu del escritor asturianu Pablo Rodríguez Medina, el trabayu amuesa 70 instantánees que dibuxen el final d’un conflictu y de una hestoria, qu’empezó a mediaos del sieglu XIX cola implantación de la industria hullero nel corazón del Principáu. Parte de los beneficios que se llogren pola vienta del llibru van ser destinaos a financiar los procesos xudiciales de el trabayadores deteníos mientres el conflictu col fin d’ocupar el so llugar como última de les acciones del mesmu.

Monty (Sergio Montero) ye director de Fotografía de Cine y Televisión, formáu n’Arxentina y en talleres fotográficos con Alberto García-Alix, Miguel Oriola y Ricky Dávila ente munchos otros. Trabayó nos documentales La Farmacia (Bonos Aires) y Carmiña. Tamién dirixió y produció 34, el sabor de la derrota y fotografió moda, artes escéniques y acontecimientos deportivos.

L’escritor y críticu lliterariu Antón García presenta’l so últimu llibru “Na cuerda floxa (Primer cuadernu de llectures)”. “Na cuerda floxa” fai un repasu críticu de les publicaciones más destacaes de los postreros tres o cuatro años. Narrativa y ensayu, poesía y teatru, música y revistes, atendiendo a tolos xéneros y emprestando atención, principalmente a lo editao n’asturianu, anque de xemes en cuando s’ocupe de llibros n’otres llingües.

Al atropar nesta edición les reseñes breves y d’urxencia publicaes na prensa diaria o en revistes, rescatamos un apasionáu averamientu a la cultura asturiana d’estos últimos años por quien ye, a la vez, xuez y parte del procesu de recuperación cultural d’Asturies.

L’actu tendrá llugar nel Foro Abierto de la llibrería Cervantes a les 19:00 h del martes 8 d’ochobre. Presenten: José Ángel Gayol, escritor y Samuel Castro, d’Ediciones Trabe.

El próximu xueves, día 3 d’ochobre, a les 20 hores, nel local social del Atenéu Obreru de Xixón (Cl Cuadonga, 7 – 1o Izda.), va tener llugar la presentación del llibru El Pozu de los Cayíos Murnios, del que ye autor Xuan Carlos Crespos Llanches. La presentación del llibru va correr a cargu del escritor Xurde Álvarez y va cuntar cola presencia del autor.

El Pozu de los Cayíos Murnios “El primer ánxel tocó la trompeta y hubo xarazo y fueu entemecíos con sangre…”. El Dueñu del Pozu” ordena a los probes humanos que se quiten la vida y bástiense al Pozu de los Cayíos Murnios. Cita, nos sos asustaos oyíos, los tenebrosos versículos del Apocalipsis según San Juan. Primero van perder la solombra, depués van ser sangraos y van refundiase, ayudaos polos páxaros bicolores, al abilsu. Esta espiral de muerte va ser aprovechada poles autoridaes de too el mundu pa crear una “Neosociedad” onde se van suspender tolos derechos, va recluyir en “Módulos” y “Granja Pro-vida” a los sospechosos de ser futuros suicides, van crease fármacos como los inhibidores sensoriales, van dexase esperimentos humanos y nuevos programes como los de “Órganos y Texíos” o’l de “Cupu d’Embaranzos” pa que les muyeres collaboren a reemplazar el creciente númberu de muertes. Va tatuar a los castigaos colos sagraos versículos y va obligáse-yos a vistir ropes y brazaletes que los identifiquen. Pero nun van evitar el siguiente xuxuriu, sssshhhh, qu’antemana la llegada del nuevu cayíu murniu a les fueyes seques qu’anubren el fondu del pozu.

Xuan Carlos Crespos Llanches (Xixón, 1970), escritor billingüe en castellán y asturianu, tien ente otros premios los de relatos Érase una vegada (2004), Certame de Llaviana (2004, 2005, 2006, 2007 y 2009), Cangas de Narcea (2005, 2009 y 2011), Fundación Derechos Civiles (2005 y 2006), Casa d´Asturies en Valencia (2009), Oficialidá (2009); y de poesía’l Nené Losada Ricu (2004). Collaboró, tantu na publicación de relatos como de poemes, en revistes como Lliteratura, Lletres asturianes, Lletres Lliteraries, Lunula, Clarín, Ágora, Reciella Malory, El Espinete. Publicó Poemes raros (de sangre seco) (Trabe, 2005; Premiu Nené Losada Ricu, 2004), Enguedeyes aprendiz de contador d´histories (Cuentu infantil ilustráu, 2008), Abilsos, Adicciones y Papeles Azules (Espublizastur, 2009), La Maldición del Cristu Azul y Yacente (Espublizastur, 2011). El Pozu de los Cayíos Murnios (United Publishing editorial, 2013) ye la so primer novela en castellán.

L’Asociación Cultural L’Arribada va poner en marcha esti viernes la Vagamar 2013, una de les estayes de L’Arribada Lliteraria, que se desarrollará los díes 27 y 28 de setiembre, na quincena segunda d’ochobre y na quincena primera de payares. Un homenaxe al poeta Seamus Heaney, Premiu Nobel de Lliteratura recientemente fallecíu, y la entrega de los Premios Timón a los escritores Miguel Rojo y Gonzalo Suárez, y a l’Asociación Cultural Ensame Sidreru protagonicen los actos d’estes primeres xornaes que se desendolquen na cabera fin de selmana de setiembre.

Los Premios Timón que van entregase’l sábadu son convocaos añalmente pola Asociación Cultural L’Arribada col envís de facer reconocimientu d’una trayectoria lliteraria. Son el Premiu Timón p’autores en llingua asturiana y n’eonaviego y el Premio Timón p’autores asturianos en llingua castellana. Dende esti añu tamién se convoca’l Premiu Timón de Cultura Asturiana destináu a asociaciones, sociedaes y fundaciones con sé n’Asturies que tengan como fin la conservación y promoción de la identidá cultural de nueso.

Los premios entréguense habitualmente mientres la cellebración de la Vagamar, que nesta edición completase con delles otres actividaes:

VIENRES 27 Patiu, Centru de Cultura Antiguu Institutu 19:00 Homenaxe a Seamus Heaney Seamus Heaney y Asturies Llectura cívica Conciertu de raviola astúrica por Mento Hevia Actuación de la Coral Asturiana de Gijón SÁBADU 28 Salón d’actos, Centru de Cultura Antiguu Institutu 18:30 Actu institucional d’inauguración de la Vagamar 2013 Patiu, Centru de Cultura Antiguu Institutu 19:00 Premios Timón 2013. Entrega de los gallardones: VII PREMIU TIMÓN a escritores n’asturianu y gallego-asturianu a Miguel Rojo IV PREMIO TIMÓN a escritores asturianos en castellano a Gonzalo Suárez I PREMIU TIMÓN DE CULTURA ASTURIANA a l’Asociación Cultural Ensame Sidreru Actuación de la Coral Polifónica Anselmo Solar. 20:00 Llázaro de Tormes Representación d’esta obra interpretada por Carlos Alba “Cellero”.

L’escritor colombianu Álvaro Mutis, Premio Príncipe d’Asturies de les Lletres en 1997 y Premiu Cervantes en 2001, finó a los 90 años d’edá. esta fin de selmana en Méxicu onde llevaba tiempu residiendo.

En 1997, el xuráu de los premnios asturianos alcordó por mayoría concede-y el Premiu Príncipe d’Asturies de les Lletres 1997 pola orixinalidá y compromisu intelectual de la so obra poética y narrativa na que destaca’l personaxe Maqroll el Gaviero, presente en gran parte de les sos páxines. La so creación lliteraria, reconocida unánimemente como una de les más altes del mundu de fala española, venceya la corriente del realismu máxicu cola atención a los problemes del home actual”, según señaló l’acta del xuráu.

El xuráu tuvo presidíu por Fernando Lázaro Carreter ya integráu por Rafael Alvarado Ballester, Andrés Amorós, Luis María Ansón, Felipe Benítez Reyes, Pedro Casals, Juan Luis Cebrián, Antonio Llombes, Víctor García de la Concha, Alfonso de la Serna y actuando como secretariu José María Martínez Cachero.

L’Asociación L’Arribada, la Vagamar Llliteraria xixonesa, asoleyó esti día dalgunos aspeutos del programa de La Vagamar 2013. Esta edición de L’Arribada, xornaes culturales que ñacieron en 2006 y vienen desenvolviéndose dende entós ininterrumpidamente, entama’l vienres 27 de setiembre con un homenaxe a Seamus Heaney, a les siete de la tarde, nel Centru de Cultura Antiguu Institutu de Xixón. Falaráse de Seamus Heaney y Asturies, habrá llectura cívica y piesllará con un conciertu de raviola astúrica por Mento Hevia y l’actuación de la Coral Asturiana de Xixón.

L’actu instiutucional d’inauguración va ser el sábadu 28, nel mesmu llugar a les 18:30 hores, pa entregase media hora depués los Premios Timón 2013, colos gallardones a los escritores Miguel Rojo y Gonzalo Suárez y a l’Asociación Cultural Ensame Sidreru.

>p>L’actuación de la la Coral Polifónica Anselmo Solar piesllará la entrega. La programación del día 28 piesllase les 20:00 hores cola representación de la obra Llazaro de Tormes por Carlos Alba ‘Cellero’.

Web cola programación de l’Arribada que dirá actualizándose

L’estudiu y el trabayu llingüísticu y lliterariu nun teníen de ver cola política o eso lleven diciendo’l propiu Victor García de la Concha y los políticos de partíos mayoritarios n’Asturies dende va cuantayá. Pero cada vegada qu’hai que xustificar l’ausencia nun foru de la llingua asturiana dizse lo mesmo “Nun ye oficial”. y por mor d’ello, unos alcuentros lliterarios fechos n’Asturies van tener menos representantes asturianos que gallegos o catalanes. L’únicu representante asturianu va ser Xuan Bello.

L’Alcuentru d’Escritores y Críticos de les Lletres Españoles algama la so XXIX edición sol epígrafe ’30 años de creación y diálogu’ y el director del Institutu Cervantes, l’asturianu Víctor García de la Concha, propónse recuperar el so espíritu primitivu», que nun ye otru qu’el d’afondar nel entendimientu de les distintes llingües d’España, pero escaeciéndose de la que sintió a lo llargo de la so infancia nel conceyu maliayu que lu vió ñacer. Asina lo punxo de manifiestu ayeri na presentación en Madrid del programa d’anguaño, un actu nel que tamién participaron el secretariu d’Estáu de Cultura, José María Lasalle, y el poeta Luis García Montero.

El Ministeriu d’Educación, Cultura y Deporte y l’Universidá de Salamanca -organizadores del eventu- incorporen a los Alcuentros de Verines a cuatro instituciones representatives de la llingües que se falen en España: l’Institutu Cervantes, el Institut Ramon Llull, el Consello da Cultura Galega y el Etxepare Euskal Institutua, anque nun conviden como institución a nenguna de les representantes de llingües non oficiales, esto ye dexen a la única Academia d’una llingua non oficial n’España, l’asturiana.

«Dende l’entamu plantegóse como un alcuentru de les llingües oficiales, y l’asturianu nun tien esa categoría», recordó De la Concha. L’únicu asturianu invitáu va ser Xuan Bello.

De la Concha dixo qu’a él, como asturianu, gustára-y cuntar con más escritores de la so rexón ente la nómina d’invitaos, y recordó que «dende’l principiu, de toes formes, cuntóse con escritores asturianos», pero ye incomprensible una delcaración tala, ya que nel programa hai sitiu abondu pa más invitaos d’Asturies y les cuestiones presupuestaries nun puen emplegase como xustificación denguna.

Ente los participantes nesti alcuentru, que vio amenorgáu’l númberu de díes y de participantes por motivos económicos y que va tener llugar el 19 y 20 de setiembre, atópense amás de Xuan Bello, José María Merín, Carme Riera, Miren Agur Meabe, Luis García Montero, Miquel de Palol, Soledá Puértolas, Diben Zaldua, Jon Juaristi, Suso de Toru, Luis Antonio de Villena, Luis Mateo Díez o Francesc Serés.

La edición de 2013 de los Alcuentros de Verines, que se celebra los díes 19 y 20 de setiembre marxina otra vuelta la llingua asturiana col aportar a la direición del filólogu maliayu Víctor García de la Concha, que recupera les sos riendes, al asumir l’Institutu Cervantes, qu’él dirixe dende l’añu pasáu, la coordinación académica del programa.

El filólogu y académicu asturianu Víctor García de la Concha (Villaviciosa, 1934) vuelve gobernar sobre los Alcuentros de Verines, la cita lliteraria qu’él mesmu creó en 1985 y que cada setiembre cierra’l branu na casona de Pendueles. Naquellos años, De la Concha quiso torgar la presencia nos Alcuentros de periodistes que criticaben la murnia presencia de los escritores qu’escribíen n’asturianu y de la lliteratura nesa llingua, anque nun lo llogró pola intermediación del Ministeriu de Cultura que patrocinaba l’eventu.

Los alcuentros faense dende 1998 ensin la so participación, porque aquel añu algamaba la presidencia de la Real Academia Española (RAE), na que se caltuvo hasta 2010.

Na convocatoria d’esti añu tan llamaes «les instituciones representatives de les llingües», según una nota espublizada ayeri dende’l Cervantes, ente les que s’alcuentren «el Institut Ramon Llull, el Consello da Cultura Galega y el Etxepare Euskal Institutua», pero non l’Academia Asturiana.

Nin na comunicación escrita, nin na coordinación efectiva apaez l’Academia de la Llingua, nin organismu asturianu dalgunu, yá que nun fueron convidaos a participar d’esa coordinación académica, na que se doblen los esfuerzos «por tar próxima la celebración del trenta aniversariu».

Entamaos pola Dirección Xeneral de Política ya Industries Culturales y del Llibru y l’Universidá de Salamanca, los Alcuentros de Verines, que van ser presentaos oficialmente esti llunes, en Madrid, na see del Institutu Cervantes, van tratar nesta inminente sobre la so propia hestoria. De fechu el lema ye ’30 años de creación y diálogu’.