Los Alcuentros de Verines, que se presenten esti llunes en Madrid, marxinen otra vuelta la llingua asturiana

La edición de 2013 de los Alcuentros de Verines, que se celebra los díes 19 y 20 de setiembre marxina otra vuelta la llingua asturiana col aportar a la direición del filólogu maliayu Víctor García de la Concha, que recupera les sos riendes, al asumir l’Institutu Cervantes, qu’él dirixe dende l’añu pasáu, la coordinación académica del programa.

El filólogu y académicu asturianu Víctor García de la Concha (Villaviciosa, 1934) vuelve gobernar sobre los Alcuentros de Verines, la cita lliteraria qu’él mesmu creó en 1985 y que cada setiembre cierra’l branu na casona de Pendueles. Naquellos años, De la Concha quiso torgar la presencia nos Alcuentros de periodistes que criticaben la murnia presencia de los escritores qu’escribíen n’asturianu y de la lliteratura nesa llingua, anque nun lo llogró pola intermediación del Ministeriu de Cultura que patrocinaba l’eventu.

Los alcuentros faense dende 1998 ensin la so participación, porque aquel añu algamaba la presidencia de la Real Academia Española (RAE), na que se caltuvo hasta 2010.

Na convocatoria d’esti añu tan llamaes «les instituciones representatives de les llingües», según una nota espublizada ayeri dende’l Cervantes, ente les que s’alcuentren «el Institut Ramon Llull, el Consello da Cultura Galega y el Etxepare Euskal Institutua», pero non l’Academia Asturiana.

Nin na comunicación escrita, nin na coordinación efectiva apaez l’Academia de la Llingua, nin organismu asturianu dalgunu, yá que nun fueron convidaos a participar d’esa coordinación académica, na que se doblen los esfuerzos «por tar próxima la celebración del trenta aniversariu».

Entamaos pola Dirección Xeneral de Política ya Industries Culturales y del Llibru y l’Universidá de Salamanca, los Alcuentros de Verines, que van ser presentaos oficialmente esti llunes, en Madrid, na see del Institutu Cervantes, van tratar nesta inminente sobre la so propia hestoria. De fechu el lema ye ’30 años de creación y diálogu’.