Lliteratura

Menos que la media. Sólo un 52 por cientu de los asturianos se declara llector o comprador habitual de llibros, un porcentaxe que ta tres puntos perbaxo de la media española y qu’asitia al Principáu ente les comunidaes autónomes con niveles más probes de llectura.

Lon datos proceden d’un estudiu asoleyáu ayeri pola Federación de Gremios d’Editores d’España y ellaboráu a partir d’una encuesta a 16.000 ciudadanos mayores de catorce años d’edá y acúten-y dexen a Asturies la cuarta pola cola nel llistáu d’autonomíes con más llectores activos.

Según la estimación de los editores axuntaos nos estremaos gremios del Estáu, el Principáu ta mui perbaxo’l 64 por cientu de ciudadanos que dicen lleer davezu en Madrid, o del 61 por cientu rexistráu en La Rioja. En niveles asemeyaos a los calculaos p’Asturies allúguense Galicia (tamién col 52 por cientu); la Comunidá Valenciana y Andalucía (dambes con 51 por cientu) y Estremadura, que pieslla la llista con un 50 por cientu de llectores declaraos.

Magar d’esos datos, Asturies ye una de les doce comunidaes autónomes onde l’índiz de llectura medró a lo llargo de 2004, frente a los descensos rexistraos, siempre acordies colos datos de la Federación de Gremios d’Editores, na Comunidá Valenciana y Navarra.

Un total de catorce cases editoriales integren el grmiu asturianu d’editores: Azucel, Madú, Nobel, Trabe, Trea, Alborá, Losada, Gea 2000, Grupu Norte, Hércules Astur, KRK, Llibros del Pexe, VTP y ‘El Oriente de Asturias’.

Archivu. Les editoriales asturianes salen a la cai a la gueta de llectores pa más de 1.200 llibros

Xixón estrena’l calendariu de conmemoraciones del ‘Quijote’. Una esposición sobro la dómina de Miguel de Cervantes con grabaos orixinales, proyecciones multimedia y exemplares de les primeres ediciones de la obra abre mañana les puertes de los grandes eventos previstos n’Asturies pa cellebrar el cuartu centenariu del asoleyamientu’l llibru de referencia na narrativa en llingua castellana.

L’escenariu, el Centru de Cultura Antiguu Institutu; el plazu, hasta’l prósimu 27 de marzu. Nesi espaciu y esi tiempu, el públicu podrá acceder a una amuesa na que figuren dalgunos de los primeros ‘Quijotes’ que se distribuyeron nel mundu -ediciones qu’atesora la Universidá d’Uviéu-, un ampliu apartáu iconográficu de monedes y sellos referíos a la obra cervantina, y una versión pa invidentes del llibru, en llinguaxe braille.

Los visitantes de la esposición tendrán amás la oportunidá de penetrar nel entornu políticu, económicu y social nel que Cervantes escribió ‘El Quijote’, al traviés de testos y documentos sobro la dómina na que vivió l’autor, y na propia figura’l creador de Don Quijote de La Mancha.

Grabaos orixinales de Gustave Doré y d’Eberhard Schlotter, grabaciones de video, un espaciu didácticu pa escolinos y una esbilla de páxines web alusives a Cervantes y a la so obra completen l’amuesa xixonesa, qu’axunta recursos de tres entidaes organizadores: La Conseyería de Cultura’l Principáu, la Universidá y la Fundación Ramón Álvarez Viña, que contribúi con dellos materiales d’una colección privada.

Ente otres actividaes paraleles, Asturies secundará’l cuartu centenariu de la publicación del ‘Quijote’ con una edición especial de diez mil exemplares col logotipu’l Principáu, otra esposición itinerante y el repartu de miles de llibros nos colexos asturianos.

Obres en quechua, mapuche o guaraní pa recordar que la lliteratura hispanoamericana nun se constrúi namás n’español y portugués. L’octavu Salón del Llibru Iberoamericanu, que se cellebrará en Xixón ente los prósimos 12 y 17 de mayu, apostará poles llingües minoritaries y ampliará la so nómina d’escritores y editores participantes.

Asina quedó asoleyao güei tres de la comparecencia’l director del certame, l’escritor Luis Sepúlveda, qu’esti mediudía posó en Xixón xunta los 1.557 llibros cedíos por editoriales participantes nel Salón pa la so posterior donación a biblioteques y centros públicos de llectura. Asturies beneficiaráse de la gran mayoría de la entrega, que tamién unviará 77 exemplares a la llocalidá portuguesa de Póvoa de Varzim.

Asina, los 19.000 euros en que ta valorada la donación de llibros traduciránse n’entregues d’exemplares a los conceyos de Llanes, Llangréu, Siero y Grao, y llevarán nuevos llibros a institutos de Llanera y Avilés; biblioteques de Xixón y Mieres; y a la cárcel de Villabona, al traviés del Conseyu de la Mocedá.

Dende la puesta en marcha d’esta iniciativa nel añu 2000, el Salón del Llibru Iberoamericanu cedió en total más de 12.500 exemplares, gracies a que les editoriales participantes y los departamentos de publicaciones qu’acuden al eventu cumplieron cola esixencia de donar obres pa surtir de llibros, sobre too contemporáneos, a les biblioteques públiques, centros d’enseñanza y otres instituciones asturianes.

Quince mil euros pal meyor poemariu. La Conseyería de Cultura, Comunicación Social y Turismu pon en marcha la cuarta edición del Premiu de poesía ‘Emilio Alarcos’, instauráu pol Gobiernu asturianu n’alcordanza del llingüista homónimu y qu’en 2004 correspondió-y al actor y escritor madrilanu Enrique García Trinidad.

Los autores que quieran optar al galardón, ún de los meyores dotaos económicamente de cuantos se convoquen n’Asturies, deberán unviar antes del 31 de marzu una obra inédita en llingua castellana, non premiada n’otros concursos y con una estensión mínima de 500 versos.

El trabayu ha presentase baxo seudónimu y con tres copies, amás del orixinal, nel rexistru de la Conseyería de Cultura, allugáu na plaza’l Sol d’Uviéu. Un xuráu cualificáu sedrá’l que decida quién ye’l merecedor del IV Premiu ‘Emilio Alarcos’, que na edición del añu pasáu distinguió al poemariu ‘Sin noticias de Gato de Ursaria’ ente les 115 obres que se presentaron a concursu.

El xuráu valoró la obra presentada por García Trinidad (Madrid, 1950) n’atención a la so capacidá pa divertir ya ironizar dende l’inxeniu y la imaxinación. Nesti sen, el presidente’l xuráu, el poeta Ángel González, eloxó’l poemariu ganador y refirióse a la obra vencedora como una bona amuesa de sentíu l’humor y llinguaxe novedosu, propia d’un autor orixinal.

Anticipar les feches pa evitar que la mayoría de los llibros n’asturianu colapsen el mercáu a fin d’añu. La Conseyería de Cultura convocará y resolverá antes qu’años anteriores les subvenciones pa la edición en llingua asturiana, depués d’una consulta pa meyorar el sistema d’ayudes económiques a la que sólo respondieron dos de les siete editoriales consultaes.

Según confirmó’l responsable de la Oficina de Política Llingüística del Principáu, Ramón D’Andrés, l’anticipación de la convocatoria de les subvenciones al llibru n’asturianu estenderáse a otres ayudes otorgaes por Cultura pa la promoción de la llingua asturiana y buscará normalizar una estaya “especialmente sensible” a los requisitos de les ayudes, como ye la edición.

Les feches en que se convoquen, resuelven y xustifiquen les subvenciones centraron precisamente les suxerencies de les dos editoriales que respondieron a la carta que, n’ochobre pasáu, unvió la Oficina de Política Llingüística a siete cases editores pa pedi-yos propuestes pa meyorar el sistema d’ayudes económiques.

Manden los plazos

En 2004, la maquinaria alministrativa de les subvenciones siguió’l modelu d’años anteriores y determinó un ritmu muncho más altu d’edición nel segundu semestre del añu: Les ayudes convocáronse n’abril, resolviéronse en setiembre y obligaron a emprentar a toa prisa los 74 llibros subvencionaos antes del 20 de payares, fecha establecida pa que les editores xustificaren les ayudes entregando 25 exemplares de cada obra.

L’anticipación nes feches sedrá, poro, la novedá principal na convocatoria de 2005, que mantendrá la pauta d’años anteriores na concesión y nun incorporá, en principiu, grandes cambios nel repartu de les ayudes porque “la ecuanimidá ta cumpliéndose”, sostién D’Andrés.

El Gobiernu autonómicu repartió esti añu un total de 184.000 euros n’ayudes económiques pal asoleyamientu de llibros n’asturianu ente seis cases editoriales: Trabe (68.600 euros pa publicar 28 llibros), KRK (11.400 euros, 5 llibros), Llibros del Pexe (5.900 euros, 3 obres), Madu Ediciones (6.500 euros, 3 títulos), Vtp (40.300 euros p’asoleyar 12 llibros) y Publicaciones Ámbitu (51.300 euros, 23 obres).

Llibros al mundu. La empresa canadiense Abebooks, que xestiona negocios ellectrónicos n’Australia, Nueva Zelanda, Gran Bretaña, Francia y Alemania, merca’l portal asturianu Iberlibro.com, principal buscador de llibros vieyos y descatalogaos del ámbitu hispánicu. El sitiu web, que siguirá manteniéndose dende Llanera, algamó l’añu pasáu una media de 6.000 visites y 400 pidíos al día.

Preséu de referencia pa profesores, estudiosos ya investigadores de tol Estáu, Iberlibro prevé incorporar, a lo llargo de 2005, la tecnoloxía de la firma Abebooks a la so páxina web, una meyora de la que los responsables del sitiu asturianu esperen algamar una importante novedá: Los llibros cuya venta xestiona Iberlibro podrán ser despachaos tamién en Canadá y Estaos Xuníos.

Una ampliación de mercáu que los promotores del sitiu web cultural creáu y desendolcáu nel Parque Tecnolóxicu d’Asturies, allugáu en Llanera, saluden con entusiasmu porque, sorrayen, l’interés polos llibros en llingua castellana ye creciente en Norteamérica, onde la comunidá hispana ye cada vegada más abondosa.

El portal asturianu Iberlibro.com tien a la venta más de 1,6 millones de llibros antiguos o de difícil afayu, axunta a 246 llibreríes ‘de vieyu’ y exerce como plataforma pa 65 editoriales. El sitiu manteníu dende Llanera afítase como’l principal buscador de llibros vieyos nel ámbitu hispanu, yá que facilita la llocalización y compra d’obres difíciles d’atopar frañendo les barreres xeográfiques.

Web d’Iberlibro

La hestoria d’una vida, en tres episodios. El periodista Miguel Barrero, nacíu n’Uviéu pero estrenchamente vinculáu a Mieres, algamó’l Premiu ‘Asturias Joven’ de narrativa 2004 con ‘Espejo’, un relatu sobro la evolución vital que desnuda “verdaes a medies” y va cubriendo “llamuergues” col pasu de los años. El galardón ta dotáu con 1.600 euros y la publicación de la obra.

Infancia, maurez, vieyera. A partir d’eses tres etapes nun mesmu personaxe, Barrero traza una narración qu’arranca de la posguerra más inmediata y piésllase anguaño, ambientada nun llugar enforma asemeyáu al Mieres nel que’l periodista vivió dende neñu. Un asuntu común a otres munches narraciones porque, según reconoz Barrero, “en lliteratura los grandes temes siguen siendo los mesmos, ta too inventao dende Homero”.

Magar d’ello, l’autor recibirá’l premiu más prestixosu que’l Principáu concede pa descubrir y promocionar a los narradores más mozos por un relatu que yá taba esbozáu hai años y que foi rematáu pocos díes antes de que se pesllare’l plazu del concursu nel que resultó ganador.

Nacíu en 1980, cultivador de la narrativa de ficción pero asitiada nun contestu realista, Barrero refuga ser encasilláu nuna xeneración determinada d’autores lliterarios y sostién qu’esi tipu de clasificaciones fabríquense siempre ‘a posteriori’.

Miguel Barrero ye llicenciáu en Periodismu pola Universidá Pontificia de Salamanca y trabaya anguaño como redactor del diariu ‘El Comercio’. La publicación de la novela ganadora del ‘Asturias Joven’ sacará a la cai el primer llibru del autor, qu’hasta agora sólo asoleyara un cuentu por entregues nel periódicu ‘La Nueva España’.

Asturies tien d’esplotar la so “gan cantera” de debuxantes. Isaac Del Rivero, promotor de la revista de cómic n’asturianu ‘El Gomeru’, defendió esi argumentu na presentación de la nueva dómina qu’abre la publicación, qu’agora sedrá de baldre, tendrá periodicidá mensual y va distribuyise de forma prioritaria nos colexos p’acercar les hestorietes en llingua asturiana a los llectores más mozos.

A xuiciu de Del Rivero, qu’eloxó el cómic pola so inigualable capacidá pa que’l llector tenga “una película nes manes”, la hestorieta tien de dexar de ser una especialidá poco valorada del arte y recuperar el puxu que tuvo n’otros tiempos, básicamente porque hai autores ya idegues.

Con otres pallabres, l’editor Antón García -responsable de la casa Trabe, qu’asoleya los nuevos númberos de ‘El Gomeru’- dixo lo mesmo: El cómic debe recuperar el sitiu de privilexu que nunca nun debió perder dientro’l conxuntu de les artes. Y nesi camín, García apostó por que la publicación d’hestorietes n’asturianu asoleye a lo menos “otros cien númberos más”, n’alusión a los 105 númberos que ‘El Gomeru’ editó antes de la so recuperación.

La revista, que na so nueva andadura cuenta col auspiciu de la Conseyería de Cultura, Comunicación Social y Turismu, inclúi nos sos númberos de xineru y febreru sendes hestorietes n’asturianu sobro les andances de Don Quijote de La Mancha y Robin Hood, firmaes respectivamente polos debuxantes Víctor y Ramón de la Fuente.

Xunta esos nomes, Isaac Del Rivero fexo un llamáu a los autores noveles pa qu’unvíen los sos trabayos a la publicación porque ye un “fin primordial” de la nueva etapa de la revista, aseguró, da-y un llugar a la xenta mozo que quier debuxar y nun tien un espaciu p’amosar los sos trabayos.

Cien al añu. La edición d’obres en llingua asturiana instálase nesa llende y corrobora que les subvenciones siguen determinando’l 75 por cientu de la publicación de nuevos llibros. Según la catalogación definitiva del Ministeriu de Cultura pa 2003, que ta acabante pesllase, nesi añu asoleyáronse un total de 103 títulos n’asturianu, una cifra asemeyada a la d’obres que salieron al mercáu a lo llargo de 2004.

Son cifres de l’Axencia española del ISBN, l’organismu ensertáu nel Ministeriu de Cultura que controla y sistematiza tola producción editorial estatal, asignándo-y un númberu a cada obra dientro d’un códigu d’aplicación mundial (l’International Standard Book Number, que da llugar al acrónimu ISBN). Toles editoriales tán suxetes a esi procesu, polo que la catalogación definitiva ye un espeyu fiel de los títulos que s’asoleyen.

Hai venti años, a lo llargo de 1984, el Ministeriu de Cultura catalogó sólo diez llibros escritos n’asturianu. Nuna década, la producción quintuplicóse hasta arruñar los cincuenta en 1994 y l’añu 2000 traxo con él un saltu cualitativu hasta los 97 títulos. D’ehí p’alantre, les cifres caltuviéronse en términos asemeyaos pero’l gremiu editorial alpenes asomó la tiesta penriba d’esa llende (61 llibros en 2001, 94 en 2002 y 103 títulos en 2003).

Con esa tarxeta de presentación nel mercáu estatal, el sector editorial n’asturianu allúgase a una distancia abismal, en volume de títulos, de les lliteratures contemporánees de Galicia, Euskadi y Cataluña, que dende 1972 tienen espublizaos respectivamente 18.000, 19.000 y 95.000 llibros nes sos llingües propies. Asturies supera por pocu’l millar: 1070.

Dependiente de les subvenciones

L’asturiana afítase, amás, como una lliteratura dependiente de les subvenciones públiques a la edición nun 75 por cientu: Les tres cuartes partes de los llibros n’asturianu asoleyaos en 2003, según les cifres definitives de l’Axencia del ISBN, vieron la lluz con subvención del Principáu, nuna proporción que previsiblemente sedrá igual darréu se contabilicen formalmente les cifres de la edición en 2004.

El Gobiernu autonómicu repartió esti añu un total de 184.000 euros n’ayudes económiques pal asoleyamientu de llibros n’asturianu ente seis cases editoriales: Trabe (68.600 euros pa publicar 28 llibros), KRK (11.400 euros, 5 llibros), Llibros del Pexe (5.900 euros, 3 obres), Madu Ediciones (6.500 euros, 3 títulos), Vtp (40.300 euros p’asoleyar 12 llibros) y Publicaciones Ámbitu (51.300 euros, 23 obres). La cifra d’obres subvencionaes en 2004 coincide esactamente col númberu de llibros n’asturianu qu’algamaron una ayuda económica del Principáu pa la so edición en 2003: 74 títulos.

Apágase una voz crítica. La escritora norteamericana Susan Sontag, que recoyó hai agora un añu n’Uviéu el Premiu ‘Príncipe de Asturias’ de les Lletres pola so atención lliteraria a asuntos esenciales d’anguaño, falleció ayeri en Nueva York depués de completar una trayectoria vital na qu’hebio llugar pal reporterismu de guerra, l’ensayu, la narrativa y la reciente oposición pública a la vocación imperialista de los Estaos Xuníos.

Nesti puntu, Sontag destacóse nos últimos años por espresar en tribunes públiques una enérxica conderga a la guerra d’Iraq. La escritora yá sabía de conflictos armaos: Fue reportera na guerra’l Vietnam y viaxó a l’antigua Yugoslavia en plena engarradiella de los Balcanes pa montar en Sarajevo la obra ‘Esperando a Godot’.

Susan Sontag, que tenía 71 años d’edá y padecía una llarga enfermedá, recibió n’ochobre de 2003 el ‘Príncipe’ de les Lletres nel teatru Campoamor pol so múltiple llabor lliterariu nel análisis de cuestiones d’actualidá y na busca de caminos más transitables pa la Humanidá, y compartió’l galardón cola escritora magrebí Fatima Mernisi.

Sontag, antecesora nel palmarés de los premios ‘Príncipe de Asturias’ del autor italianu Claudio Magris -galardonáu esti añu-, publicó la so primer novela en 1963 y a partir d’ehí mantuvo una constante presencia na práctica de la lliteratura, amás de protagonizar incursiones na dirección cinematográfica.