Lliteratura

L’escritor occidental Naciu i Riguilón acaba de publicar “Queixas ya conxuros”, un conxuntu de poemes, munchos d’ellos ya asoleyaos nos años ochenta y que recuperen la voz personal d’un autor fiel a la so tierra y al so propiu patrimoniu sentimental. L’autor xunta a la edición del poemariu dos trabayos de recuperación de la memoria oral.

El cedé-llibru “Rosabra” ye’l primer volume d’una colección sobre cuentos de la tradición popular fechu con grabaciones de campu del escritor cangués. L’otru volume etnográficu ye “Los aguinaldos nel suroccidente d’Asturies”, entrambes obres publicaes pola editorial CH.

Naciu i Riguilón fue un de los fundadores del grupu d’escritores en dialectu occidental nomáu Pesicia y miembru del Conceyu d’Asturies de Madrid. El so nuevu llibru de poemes “Queixas ya conxurus” (Trabe, 2006) remanez a esti autor pa l’actualidá después de que’l músicu y cantante Pedro Pereira compunxera dellos cantares sobre poemes de Naciu i Riguilón.

L’escritor Miguel Rojo acaba de publicar un nuevu llibru de poesía embaxo’l títulu de ‘Llaberintos’. El conxuntu de poemes conteníu nel últimu títulu del autor de “Hestories d’un seductor” presenta una voz fonda y confidenciada que busca al través del regueru de les palabres la complicidad de los llectores.

Los versos de “Llaberintos”(Trabe, 2006) comparten cola so poesía anterior el tonu meditativu y la reflexón autobiográfica, y mantienen un estilu coloquial que caracteriza al autor ente los poetes asturianos, alloñáu de la retórica, pero capaz de sorprender con un llinguaxe vigorosu, ricu n¹imáxenes, col que¹l poeta se reinventa a elli mesmu mientres axusta cuentes, n¹intelixente diálogu, col mundu que lu arrodia.

Miguel Rojo (Zardaín, Tinéu, 1957), bien conocíu como narrador, mostró dende siempre¹l so inclín poéticu, a pesar de que nun publicó en llibru hasta l¹aparición de “Buscador d¹estrel.las” en 1996. Sicasí, yá paez antologáu en “Poesía última asturiana” (El Ciervo, 1986) o na Muestra corregida y aumentada de la poesía en Asturias, de 1989. Nel 2001 publicaba un segundu y formosu llibru, “Bilbao estación terminal”. El volume editáu agora: “Llaberintos”, ye’l so tercer poemariu.

La Conseyería de Cultura fexo públicos los nomes de los ganadores de los premios lliterarios en castellano que concede añalmente embaxo’l marchamu de Premios Asturias Joven. Los escritores José Ángel Gayol y Juan Bautista Bilbao Lopategui fueron los ganadores esti añu nos apartaos de poesía y narrativa. La convocatoria pa testos teatrales quedó erma nesta ocasión.

El xuráu de los Premios ‘Asturias Joven’ tuvo compuestu pola directora del Institutu Asturianu de la Mocedá, Carmen Barrera Fernández y los escritores Ismael Piñera Tarque, Ricardo Menéndez Salmón, Adolfo Camilo Díaz, Teresa Lorences y Silvia Ugidos. Nel so aconceyamientu final decidió premiar el llibru “Con el velo de una sonrisa” de José Ángel García Fernández (José Ángel Gayol) na categoría de poesía y na categoría de narrativa l’orixinal de Juan Bautista Bilbao Lopategui presentáu embaxo’l títulu de “Tres relatos”. Entrambos premios tán dotaos con 1.800 euros y la publicación de la obra.

El prósimu xueves 19 de xineru, a les ocho la tarde, el Centru Asturianu de Madrid entama nel Salón “Príncipe de Asturias” la presentación a cargu d’Heliodoro Temprano del llibru “Dejaron huella. Historia de la minería en el Concejo de San Martín del Rey Aurelio” de Pedro Fandos Rodríguez, xeólogu y expresidente del Grupu Coleccionista Mineru Investigador, y Mariano Iglesias Rodríguez.

Güei, a les ocho y media la tarde, nel Club Lliterariu “Amargord” que s’axunta na C/ Torrecilla del Leal, 32 de Madrid, va tener llugar la presentación y proyección del DVD “Hablan las paredes”, del que son autores el poeta xixones David González y el fotógrafu Pedro Timón.

El DVD recueye la intervención fotográfica y lliteraria fecha na cai La Merced pol poeta David González y el fotógrafu Pedro Timón. Esta intervención ta producida pol Ateneu Obreru de Xixón y fíxose’l pasáu 13 de mayu dientro de l’actividá denominada “La Noche de las Palabras”, qu’entamó la Fundación Municipal de Cultura, Educación y Universidá Popular.

El escritor Armando Vega Rodríguez presenta güei a les ocho la tarde en Xixón el que ye’l so primer poemariu, “Pente’l borrín de la memoria” (Trabe, 2005), una colección de poemes que fain repasu de la so infancia n’Espinaréu, el so pueblu de nacencia. L’actu de presentación va correr a cargu del tamién escritor, y miembru de l’Asociación Cultural “Poegía”, Antonio Merayo.

Nel actu, amás del autor y d’Antonio Merayo, tamién va tar presente Esther Prieto, representando a Trabe, editorial responsable de la so publicación. El llibru ta ilustráu con una obra del propiu Armando Vega

El númberu 4 de la revista dixital Lliteratu ya ta colgáu na Rede y dedica los conteníos d’esta nueva edición a los concursos lliterarios en llingua asturiana. Pablo Rodríguez Alonso, últimu premiu Teodoro Cuesta; Ismael María González Arias, premiu Xosefa Xovellanos 2005 de novela; y Xabiero Cayarga, premiu Xuan María Acebal 2005 de poesía, ufierten a los llectores pedazos inéditos de les sos obres que foron premiaes.

Na recién entrega de la revista Lliteratu, otros premiaos como Marta Mori d’Arriba y Xosé Ánxelu Gutiérrez Morán, que compartieron ex aequo el Teodoro Cuesta del añu 2004, falen de les sos llectures a lo llargo d’una entrevista. El reportaxe central de la revista ta dedicáu a los Premios de la Lliterarios fallaos a lo llargo del mes d’avientu, a los que s’añeden los premios de la Crítica 2004. Una esbilla de testos poéticos unviaos polos llectores y estayes de creación completen, xunta les avezaes secciones informatives y d’actualidá, los conteníos del númberu 4 de Lliteratu.

Lliteratu

Cristina Muñiz Martín ye l’autora de ‘Onde pisen poques güelles’, un volume de relatos nos que la escritoria s’estrena nel mundu editorial como una nueva voz de la lliteratura contemporánea en llingua asturiana. El primer llibru de Muñiz Martín aporta un regueru de frescura al panorama lliterariu nel nuestru idioma.

Los cuentos conteníos en ‘Onde pisen poques güelles’ (Trabe, 2005) amuesen a una autora con un gran dominiu de la técnica narrativa y del llinguaxe. La mirada aceda, cuando irónica, cuando descarnada, qu’adopta la voz narrativa nos diecinueve cuentos que componen esti volume, posa nos personaxes con un daqué de tenrura inevitable.

Cristina Muñiz Martín con ‘Onde pisen poques güelles’ abre una nueva vía na narrativa asturiana, dando por bonu’l principiu de que «la realidá supera a la ficción»: con un realismu ensuchu, salpicáu de pingarates estremes d’irrealidá, coles que l’autora traza una visión certera de la vida d’anguaño, reflexándola en tola so crudeza, averándose con valentía a los problemes tanto individuales como colectivos que la sociedá de güei va poniendo nel camín.

Cristina Muñiz Martín, tamién creadora de monólogos, aficionada al teatru y escritora de voz personal y fuerza narrativa hasta agora desconocida, vien a sumase a la nómina de muyeres narradores que pasín a pasu van enanchando el yá bien afitáu mundu de la narrativa asturiana.

L’asociación cultural Rapalacóis entamó esti llunes 2 de xineru en As Figueiras un actu de presentación de la obra teatral ‘El trato’, escrita en 1926 pol escritor castripolense Francisco F. Arias Campoamor en gallego-asturiano. El tapiegu Xosé Miguel Suárez ye l’autor de la edición actual y de les notes y comentarios qu’avíen esta pieza costumista.

La obra d’Arias Campoamor ta publicada pola asociación Rapalacóis con una tirada de mediu cientu d’exemplares que se van repartir por escueles y centros culturales de la rexón eo-naviega. El llibru tamién va poder mercase nes llibreríes a un preciu de seis euros. ‘El trato’ ye una de les poques obres escrites abenayá en gallego-asturiano que se conserven íntegres.

“In Articulo mortis” ye’l títulu del volume nel qu’Adolfo Camilo Díaz recueye venticinco años d’opinión crítica publicada en diferentes medios escritos asturianos y que presentó’l vienres 30 d’avientu n’Uviéu cola collaboración de los periodistes Ramón Lluis Bande y Próspero Morán. L’escritor xunta nesti volume dalgo más d’una trentena d’artículos nos que la reflexón, l’análisis y la ironía afonden en llúcides instantánies de l’actualidá pública del nuestru país.

El llibru nel qu’Adolfo Camilo Díaz recopila una esbilla de la so obra periodística ta publicáu pola editorial Madú y presentóse esti viernes 30 d’avientu a les 19,00 nel centru social La Escandalera d’Uviéu. El periodista y director d’Asturnews Próspero Morán foi l’autor de la presentación de “Articulo mortis” xunta’l prologuista del llibru, el tamién periodista Ramón Lluis Bande.

Mentres que Bande s’averó na so presentación a cualidaes de los artículos recoyíos nel trabayu, Próspero Morán fizo alcordanza de los tiempos de llucha y animación cultural que compartiera nos 80 con Adolfo Camilo y afitó que “Dolfo, Ramón y yo mesmu, y de xuru que munchos de los equí presentes nesti asoleyar en volume de artículos y pensamientos abondo asoleyaos a lo llargo de 25 años, vivimos nuna Asturies irreal, la que cualaquier otru pueblu atalantaría normal, pero que’l de nueso sostituye por una Axturies que se paez más a esi planeta de la primer película ente gore y humorística, ente serie b y serie h, que fizo albidrar el remanecer del cine con caspa na España de los 90. Esa Asturies que tendrá de manifestase hasta pa despedir l’añu vieyu y acoyer el Nuevu na plaza l’Ayuntamientu d’Uviéu pa pidir lo que ye normal en tolos llaos, la oficialidá de la llingua que fala. Esa Asturies, que ye la de nueso, que ye la d’estos 25 años d’Artículos de Dolfo, de Ramón de quien-yos fala, de García Arías, de Ana Cano, de Xosé Ramón Riaño, de Roberto González Quevedo…”

Pela so parte, Adolfo Camilo desplicó’l contestu de dellos de los artículos recoyíos nel volume y dió llectura a ún espublizáu por La Voz d’Avilés nos años 80 sobre la política cultural gallega qu’albidró tien agora rabiosa actualidá. La llectura del artículu por Adolfo Camilo Díaz pue descargase nel ficheru d’audiu qu’acompanga esta información.