Cristina Muñiz Martín aporta a la narrativa asturiana con un llibru enllenu de frescura

Cristina Muñiz Martín ye l’autora de ‘Onde pisen poques güelles’, un volume de relatos nos que la escritoria s’estrena nel mundu editorial como una nueva voz de la lliteratura contemporánea en llingua asturiana. El primer llibru de Muñiz Martín aporta un regueru de frescura al panorama lliterariu nel nuestru idioma.

Los cuentos conteníos en ‘Onde pisen poques güelles’ (Trabe, 2005) amuesen a una autora con un gran dominiu de la técnica narrativa y del llinguaxe. La mirada aceda, cuando irónica, cuando descarnada, qu’adopta la voz narrativa nos diecinueve cuentos que componen esti volume, posa nos personaxes con un daqué de tenrura inevitable.

Cristina Muñiz Martín con ‘Onde pisen poques güelles’ abre una nueva vía na narrativa asturiana, dando por bonu’l principiu de que «la realidá supera a la ficción»: con un realismu ensuchu, salpicáu de pingarates estremes d’irrealidá, coles que l’autora traza una visión certera de la vida d’anguaño, reflexándola en tola so crudeza, averándose con valentía a los problemes tanto individuales como colectivos que la sociedá de güei va poniendo nel camín.

Cristina Muñiz Martín, tamién creadora de monólogos, aficionada al teatru y escritora de voz personal y fuerza narrativa hasta agora desconocida, vien a sumase a la nómina de muyeres narradores que pasín a pasu van enanchando el yá bien afitáu mundu de la narrativa asturiana.