Lliteratura

L’Ayuntamientu de Llaviana convoca un concrusu de narraciones curties, mesmo en prosa qu’en versu, nel que se va valorar que los trabayos recueyan tradiciones, costumes, llugares, fechos, paisaxe d’Asturies y, concretamente, del conceyu de Llaviana y del Valle del Nalón. El plazu d’entrega de los exemplares termina’l 9 de xunu.

Pal concursu establecense tres premios: ún de 900 euros, un segundu de 600 y el terceru de 300 euros. Nes bases del premiu consta espresamente que los trabayos tienen que tar redactaos en llingua asturiana, respetando les normes ortográfiques y gramaticales vixentes de l’Academia de la Llingua, con una estensión másima de 10 folios.

Bases completes del premiu

El númberu 18 de la revista madrilana ‘La hamaca de lona’ ta acabante de sacar una edición especial billingüe dedicada a la poesía escrita n’asturianu d’anguaño. El prólogu a esti nuevu númberu de la publicación dirixida pol poeta Juan Antonio Mora ta firmáu pol escritor y profesor de la Universidá d’Uvieu, Leopoldo Sánchez Torre.

Escritores de diferentes xeneraciones de poetes asturianos como Antón García, Xuan Bello, Berta Piñán o Martín López-Vega aparecen nesti númberu especial de la revista madrilana, que tien un enfotu especial por amosar la obra que se ta escribiendo dende les llingües minoritaries de la península.

L’escritor Jon Kortázar pieslla les Xornaes ‘Universidá n’escena’ con una conferencia a les doce la mañana sobre l’actualización del teatru pastoril. Tres de la ponencia Eladio de Pablo va dirixir la llectura dramatizada de la obra ‘Un compromisu maxinariu’ de Chechu García. Presentaciones de llibros y obres de teatru enllenen d’actos el Día del Llibru y del Discu n’Asturianu, nel que los compradores van recibir como regalu el DVD presentáu antiayeri por Javier Maqua y Ramón Lluis Bande ‘Pieces’.

El monologuista Carlos Alba ‘Cellero’ presenta na Carpa de LlibrUvieu, nel paseu de los Álamos d’Uvieu, a les seis de la tarde, el llibru ‘Del Chigre’ editáu por Trabe, mentes qu’una hora más tarde nel Forum Fnac de Parque Principáu va volver presentase y facese visionáu del DVD ‘Pieces’.

A les ocho la tarde, el Nuevu Teatru de La Felguera va acoyer la presentación de la obra ‘El cantar de los pipiolos’ de la compañía N’Alpargates y Orbayando. El testu, de Pedro Mario Herrero, ta adaptáu al asturianu por Ismael González Arias.

‘El cesto de Xan’, de Jesús Álvarez Valdes, va ser representáu a les nueve la nueche nos Baxos del Conceyo del Franco (Á Caridá) pola Asociación ‘Juan Manuel Mendez’, mentes qu’a les ocho y media la Casa la Cultura ‘Marta Portal’ de Nava fadrá otro tanto cola obra ‘La herencia del tíu’, d’Eloy Fernández Caravera, na que trabaya la Compañía ‘El Hórreo’.

L’últimu de los actos pa esti vienres va facese nel Centru Cultural ‘El Llar’ de Les Vegues, en Corvera, y correspuende a la obra ‘Colasa Maquiavelica’ d’Eloy Fernández Caravera, llevada a escena pol Grupu de Teatru ‘Xana’.

Güei vienres 5 de mayu, Día del Llibru Asturianu, presentase en LibrUvieu, na carpa instalada nel Paseu de los Álamos d’Uvieu, a les cinco la tarde, el númberu 23 de la colección «Maestros del Humor» qu’espubliza la editorial Trabe, dientro de los actos de la XXVII Selmana de les Lletres Asturianes. ‘Del Chigre’, llibru qu’axunta dalgunos de los famosos monólogos de Carlos Alba ‘Cellero’ (Aviles 1972), va ser presentáu esta tarde por Roxelio Crespo.

Carlos Alba ye cuntacuentos, monologuista, actor y periodista. Practica’l xeneru llamáu Monologuismu Cómicu Asturianu, una disciplina a mediu camín ente la narración y el teatru popular onde un personaxe (nesti casu Cellero) cuenta histories d’humor con una espresividá allegada a la del xuglar, tirando d’estremaos recursos espresivos como’l versu o’l cantu. Los primeros testos d’esti xeneru daten del sieglu XVII.

El poemariu de la xixonesa María Avello (Xixón, 1968) ‘Cronología del desarraigo’ na modalidá de castellanu y ‘El sangre del tiempu’, n’asturianu, escritu a dos manes ente Ana Gayol Suárez (Aviles, 1984) y Ruben Suárez (Areñes, 1983) foron los ganadores del XV Concursu de Poesía Elvira Castañón que se va entregar esta tarde, a les ocho, na Casa la Cultura de Morea. Tres del actu d’entrega y llectura de les obres ganadores, Dani García de la Cuesta y Brisa F. Pereda van ufiertar un conciertu de Cantares Tradicionales de bandurria.

L’ayuntamientu d’Ayer creó esti premiu pa remembrar la figura d’Elvia Castañón, una autora qu’escribía normalmente n’asturianu, y que xunto a los sos compañeros de xeneración valió de ponte ente los autores nesta llingua anteriores a la guerra civil y los qu’empezaron a escribir nos años setenta.

El númberu 17 de La Ratonera, la revista asturiana de teatru editada por Oris Teatro y dirixida por Roberto Corte, Pedro Lanza, Boni Ortiz y Francisco Díaz-Faes, ta dedicáu a analizar la situación actual del teatru asturianu. Pa ello, la revista entreguina Reciella Malory collabora cola publicación teatral ufiertando nel mesmu númberu una selección de testos dramáticos n’asturiano, asina como entrevistes colos sos autores, que traten d’espeyar d’una manera realista’l panorama actual d’esti xeneru n’Asturies.

Na busca d’un númberu que fuere representativu del camín que sigue’l teatru asturianu, La Ratonera andechó con Reciella Malory, que pidió la collaboración d’aquellos autores que tienen trabayao esti xeneru, p’amosar d’esta manera una serie de testos qu’allegaren al llector la realidá de la creación dramática n’asturiano. Asina apaecen pieces de Carlos Alba ‘Cellero’, Xabiero Cayarga, Chechu García, Pablo R. Medina, Inaciu Galán, Cristina Muñiz, Arsenio González, Xurde Álvarez, Dolfo Camilo, Lluis Antón González, Carmen Duarte, Montse Garnacho, Azucena Alvarez, Jorge Fernández, Roxelio Crespo, Pilar Murillo, Josep Carles Laínez, Ramón Lluis Bande y Jose Ramón Oliva.

El númberu cunta amás cola collaboración de Milio Rodríguez Cueto, que fai traducción de la pieza d’Albert Camus ‘Revuelta n’Asturies’ basada na revolución d’ochobre del 34.

Pa la ocasión, la Ratonera recupera y ufierta a los sos llectores un DVD que contien la grabación de la obra ‘Gasolina con capullos’, escrita a dos manes ente Roberto Corte y Chechu García y que, llevada a les tables pola Compañía Barataria Teatru, llogró nel añu 2002 cinco premios Asturies de les Artes Esceniques , asina como una histórica nominación, por ser en llingua asturiana, a los premios estatales Max de Teatru como espectáculu revelación.

La Ratonera na rede

Con motivu de la cellebración de la XXVII Selmana de les Lletres Asturianes l’Ayuntamientu de Samartín del Rei Aurelio, al travies del so Serviciu de Normalización Llingüística, y en collaboración con dalgunes asociaciones, colectivos y escueles ufierta una serie de presentaciones, llectures y representaciones teatrales que repasen el panorama creativu n’asturianu.

Mañana vienres día 5 de mayu, los escritores Pablo R. Medina y Xose Ramón Martín Ardines van asistir a la representación teatral que’l grupu ‘El refaxu’ de Blimea va facer a les doce y media la mañana pa los escolinos del IES Juan Jose Calvo Miguel nel Centru Social de Blimea.

El domingu día 7 a les ocho la tarde, el teatru municipal del conceyu en L’Entregu va acoyer la obra ‘El caballeru de la murnia figura’, de Pedro Lanza, llevada a escena pola Compañía de Teatru ‘Nun Tris’.

Mentes que’l martes 9 de mayu l’IES Virgen de Covadonga de L’Entregu va organizar una llectura dramatizada per parte de los escolinos d’una comedia de guirrios, asina como la visita de los autores teatrales Roberto Corte, Chechu García y Pablo R. Medina. Pela tarde, a les cinco y media, la Casa de Cultura de L’Entregu va cuntar cola presencia de los escritores Nel Amaro, Xurde Álvarez, Ramón Lluis Bande, Xabiero Cayarga, Roberto Corte, Dolfo Camilo Díaz, Chechu García, Pablo R. Medina y Jorge Fernández García que van participar na mesa redonda titulada “Otru nuevu teatru en llingua asturiana, ¿ye posible?”, en collaboración cola revista La Ratonera y la tertulia lliteraria ‘Reciella Malory’.

L’actu va cerrase cola actuación del artista y escritor Nel Amaro que fadrá les siguientes aiciones: “Aición Real”, “Himnu Agónicu”, “Dicen que la patria ye: chanson (o porque nun soi un bon nacionaliegu asturianu”

L’escritor xixones Xose Nel Caldevilla (1963) ta acabante d’asoleyar la so traducción de la pieza teatral ‘El soldáu babayu’ de Plautu, autor llatín del sieglu III e.C., dientro de la colección ‘El Globu’, númberu 3, de la editorial VTP. L’entamu de la obra, un trabayu onde se recueyen datos mesmo del autor y de la obra, que del teatru romanu de la epoca, correspuende tamien a Caldevilla.

Xose Nel Caldevilla trabaya como profesor de Llatín y de Griego nun institutu xixones. Como narrador, en 1994 ganó’l Premiu Xosefa Xovellanos cola novela ‘La Llos’a, una historia ambientada nuna comunidá rural del oriente asturianu que’l narrador va esgranando al filu de l’alcordanza: la propia y la de la xente que tien más cerca.

El pasáu vienres empezaben de manera oficiosa los actos de cellebración de la XXVI Selmana de les Lletres Asturianes cola presentación del llibru ‘En tables. Un teatru pal sieglu XXI’,per parte del so autor Dolfo Camilo Díaz; y col espectáculu poetico-teatral ‘Veus paral.leles-Voces paraleles: de Lliño a Taüll’ qu’axuntó na Capiella de los Dolores de Grao a cuatro poetes asturianos y cuatro poetes catalanes.

La Biblioteca Ramón Perez d’Ayala d’Uvieu valió d’escenariu de presentación pa la obra del escritor ayeranu Dolfo Camilo, editada por KRK Ediciones con motivu d’esta Selmana de les Lletres dedicada al teatru. Actu nel que tuvo acompañáu pol director de la Oficina de Política Llingüística, Ramón d’Andres, y pol director xeneral de Política Llingüística, Carlos Madera, que desplicó que la Conseyería de Cultura quier abrir con esta selmana ‘una nueva etapa pal teatru asturianu, dándo-y la mayor difusión posible’.

Dolfo Camilo comentó na rueda de prensa que, anque ‘pa la xente de la cai el teatru asturianu ye teatru n’asturianu, la llingua nun ye fundamental anque tengo un papel destacáu’. Tocante a la política de promoción del teatru, Camilo Díaz destacó la esistencia d’un sindicatu d’actor, un circuitu profesional, cierta presencia mediática pero tachó’l condicionamientu del mercáu per parte de la Conseyería de Cultura y los conceyos. ‘Les instituciones son el principal empresariu del teatru asturianu’, sentenció l’escritor y xefe del Serviciu de Promoción Cultural d’Aviles.

El llibru ‘En tables. Un teatru pal sieglu XXI’ quier ser, según el so autor, una política de provocación al llector porque ‘nun queremos que sía un elementu pasivu’.

Per otra parte, la Capiella de los Dolores de Grao acoyó l’espectáculu poetico-teatral ‘Veus paral.leles-Voces paraleles: de Lliño a Taüll’, reuniendo a cuatro poetes asturianos y cuatro catalanes baxo la dirección del dramaturgu y escritor catalán Albert Mestres, xunta la poeta portuguesa Sofía Fonseca.

Nun escenariu nel que primaben los xuegos de lluces y sombres, los poetes catalanes Ponç Pons, Núria Martínez-Vernis, Àngels Gregori y Jordi Cornudella, y los asturianos, Berta Piñán, Xuan Santori (que sustituyía a Xuan Bello, por tar en L’Habana), Vanessa Gutierrez y Xandru Fernández, foron lleendo los sos poemes que, al tiempu, yeren traducíos al asturianu o dramatizaos pola actriz asturiana Eva Vallines, encargada de facer presentación y de conducir un actu que, coordináu pol famosu escenógrafu de danza Jose Menchero, entemecía lo llírico colo teatral.

Esta primer representación de Voces Paraleles, pa la que la Institució de les Lletres Catalanes editó un llibru nel qu’axunta los poemes y les traducciones de los ocho autores y que foi repartíu ente’l públicu de Grao, val como ensayu pa les cuatro actuaciones que van tener llugar nel mes de payares en diferentes teatros de Barcelona, Tarragona y Vilafranca del Penedes.

Mañana miercoles día 3 de mayu, a les siete la tarde, el Club de Prensa Asturiana de La Nueva España d’Uvieu va acoyer la presentación de la nueva colección ‘Trabe Atlántica’, que presenta a la vez los sos tres primeros títulos: ‘Aquí me tocó escribir (antología de escritores y escritoras latinos en Nueva York’ de Paquita Suárez Coalla; ‘La formación histórica de la lengua asturiana’ de Xulio Viejo; y ‘La nación (im)posible (Reflexiones sobre la ideología nacionalista asturiana)’ de Pablo San Martín Antuña.

‘Aquí me tocó escribir (antología de escritores y escritoras latinos en Nueva York)’ de Paquita Suárez Coalla, axunta catorce escritores que, anque son estremaos nes temátiques y estilos de les sos obres, comparten una posición fronteriza que según l’autora ‘dio-yos la llibertá d’escribir lo que seguramente nunca escribiríen nos sos países d’orixe’.

L’ampliu y rigurosu estudiu sobre la formación histórica de la llingua asturiana de Xulio Viejo aparez agora n’español, allegando d’esta manera a tol públicu los mecanismos llingüísticos que la tresformaron a lo llargo de los sieglos, a la vez que la dinámica social, económica, política y cultural que sufrió la so comunidá de falantes.

El tercer títulu de la colección correspuende a Pablo San Martín Antuña. ‘La nación (im)posible (Reflexiones sobre la ideología nacionalista asturiana)’ analiza los principales fechos históricos y l’actuación de los protagonistes del nacionalistu asturianu.