Lliteratura

El próximu miercoles 6 de setiembre va empezar na ciudá d’Astorga (Lleón) el rodaxe del documental ‘La estancia vací’a, centráu nos últimos años de vida de Michi Panero. La película, dirixida polos asturianos Iván Fernández y Miguel Barrero, va contar con testimonios de persones que conocieron de primera mano al astorganu y va valise de les sos palabres pa reconstruir la so vida na capital maragata.

Michi Panero yera’l más pequeñu de los tres fíos del matrimoniu formáu por Leopoldo Panero –poeta consideráu pol franquismu como’l so «poeta oficial»– y Felicidad Blanc. Tres de la muerte del padre, la vilda y los fíos rodaben en 1974, dirixíos por Jaime Chávarri, ‘El desencanto’, un documental qu’acabó estrenándose en 1976 y que supunxo toa una conmoción social na España de la epoca. En 1994, el director Ricardo Franco volvía sobre la saga familiar de los Panero na película ‘Despues de tantos años’.

A finales de 2002, Michi Panero tornó a Astorga, sabiendose gravemente enfermu, pa tratar de recuperar el legáu paternu. Precisamente, nes
razones d’esa vuelta ta centráu el filu argumental de ‘La estancia vacía’, una película na que persones que conocieron de primera mano al más pequeñu de los Panero van contar les sos vivencies xunto a esti personaxe nuna ciudá, Astorga, a la que la familia cásique nun volviere dende’l rodaxe de la primer película.

‘La estancia vacía’ cuenta con Julio García Cedrón como director de fotografía y con Antonio de Benito como tecnicu de soníu. El plantel completase con Marcos González, que va cumplir les funciones d’ayudante de dirección, y Julia Vicente, qu’asume la producción. El rodaxe va facese íntegramente na ciudá d’Astorga y va allargase hasta’l domingu 10 de septiembre.

Baxo’l títulu de ‘I Encuentru de muyeres del territoriu del Valle de Ese-Entrecabos: Muyeres n’Ayande: Escritos y Escritoras’ empiza mañana, nel recintu ferial de La Puela, un congresu basáu nuna serie de ponencies y meses redondes nes que van participar dalgunes de les más importantes escritores asturianes ente les que destaca Berta Piñán, Carmen Gómez Ojea, Eugenia Rico y Nene Losada, ente otres. La directora de la Biblioteca Nacional, Rosa Regás, va ser la encargada d’inaugurar esti encuentru con una conferencia qu’analiza’l papel de les muyeres na lliteratura española de viaxes.

Sabela Fernández, María Esther García López y Celia Álvarez son otres de les participantes nesti alcuentru de muyeres escritores n’Ayande, nel que tamien se va poder visitar la esposición ‘Viajeras’, del Institutu Asturianu de la Muyer, asina como l’actuación del grupu Muyeres.

La Casa la Cultura del Valle de San Xurde en Nueva de Llanes va acoyer a partir del prósimu vienres 1 de setiembre a les ocho la tarde hasta’l 15 del mesmu mes la esposición ‘De la gloria les ruines’ del escritor Xose Ramón Martín Ardines. Cuarenta poemes y retratos qu’espeyen, a travies de ruines industriales y escumbrios ‘una realidá diferente a l’Asturies qu’aparez nos folletos turísticos, recordándonos lo que somos, lo que fuimos y lo qu’irremediablemente vamos ser: ruines d’estos tiempos de gloria’.

‘De la gloria les ruines’ yá pasó pela Casa la Mocedá de Sotrondio, la Casa la Cultura de Bimenes y l’Hotel La Marquesita nos Ozcos.

El Gremiu d’Editories asturianos inaugura güei en Xixón el IV Salón del Llibru Asturianu que va tar abiertu al públicu na cai Tomás y Valiente hasta’l prósimu 3 de setiembre. Les cinco mil obres en castellanu y n’asturianu que se van poner a la venta esta selmana van tar ordenaes por materies envede por editoriales pa facilitar la busca de los visitantes.

El Salón, organizáu pol Gremiu d’Editories d’Asturies col patrocioniu del Ayuntamientu xixones y la Conseyería de Cultura, va tar abiertu de 11.00 a 14.00 hores y de 17.00 a 21.00 hores de llunes a xueves, y de 11.00 a 14.30 hores y de 17.00 a 21.30 hores los fines de selmana.

Los alcuentros lliterarios de Verines, dirixíos pol profesor de la Universidá de Salamanca, Luis García Jambrina, van celebrar una nueva edición ente los díes 14 y 15 de setiembre baxo’l lema ‘America desde las dos orillas: suaño, mito, utopía, literatura’. La casona de Quintueles va axuntar a ventidós escritores en diferentes llingües y nacionalidaes. Con presencia per primer añu internacional, ente los convidaos encuentrense Clara Obligado, Juan Carlos Mestre, Luis Sepúlveda, Jon Kortazar y Flavia Company, ente otros.

Nel quintu centenariu de la muerte de Colón, los organizadores del Alcuentru d’Escritores y Críticos de les Lletres Españoles vieron n’America’l tema más afayadizu pa debatir na casona d’indianos de Verines. Asina, per primer vez na hestoria de los alcuentros tán convidaos escritores d’orixe o vinculación hispanoamericana, como Flavia Company, Luis Sepúlveda, Horacio Vázquez Rial, Adolfo García Ortega, Alfredo Conde, Jorge Volpi o Jose María Merino. Nel encuentru tamien va participar l’asturiana Vanessa Gutierrez.

Tres d’esta esperiencia, los organizadores de los alcuentros piensen n’abrir el conceptu de la lliteratura, convidando, más alantre, a otros escritores europeos que puedan arriquecer los debates de Verines.

La conceyalía de Cultura del Ayuntamientu de Vegadeo, representada pol so titular Juan Santiago, cola collaboración de la Conseyería de Cultura del Principáu, ta acabante d’espublizar ‘Na boca de todos’, una antoloxía poetica que quier amosar la poesía que s’escribe nel Occidente d’Asturies, asina como toles variantes de llingüístiques emplegaes polos autores. Peñerada pola escritora Aurora García Rivas ya introducida con una nota pol filólogu Luis Casteleiro, la obra axunta testos de poetes como Nene Losada Rico, Fredo de Cabexe, Xuan Bello y Victoria Veiguela, ente otros. ‘Na boca de todos’ va ser presentada mañana, a les ocho la tarde, na Casa Cultura da Veiga.

‘Esta mostra de parte da poesía que s’escribe no Occidente d’Asturias (namáis en lengua e variantes vernáculas), ta feita dende os criterios esclusivos do qu’eu entendo por calidá poetica e coa estetica d’agora mesmo. Toda a antoloxía e de poetas vivos vinculados d’algunha maneira co Occidente. A responsabilidá dos poetas escollidos, así como dos poemas, e miña. A da ortografía ou da grafía qu’aparece, e de cada ún dos autores’. Con estes palabres, Aurora García Rivas, responsable de la selección de los testos, introduz los poemes de los ventidós escritores antologaos.

Los autores escoyíos ‘Na boca de todos’ son: Álvarez de Ponticella, Alfredo C. (Villayón, 1948), Álvarez Fernández, Arturo (Castropol, 1973), Bello, Xuan (Tineu, 1965), Fernández, L.luis (Xixón, 1962), Fernández, Sabela (Tineu, 1962), Frías Conde, Xavier (Salamanca, 1965), García, Anton (Tineu, 1960), García López, Mª Esther (Valdes), García Rivas, Aurora (San Tiso d’Abres, 1948), González Fernández, Alfredo (Fredo de Carbexe) (El Franco, 1967) , González-Quevedo González, Roberto (Palacios del Sil, Lleón, 1953) , Losada Rico, Nene (Luarca, 1921), Lorences, Taresa (Salas, 1955), Martínez Castro, Jose Ramón (Castropol, 1979) , Riguilón, Naciu’i (Cangas del Narcea), Rojo, Miguel (Tineu, 1957), Suárez Fernández, Xose Miguel (Tapia, 1965), Veiga, Elías (Allande, 1972), Veiguela, Victoria (León,1979), Veiguela Martins, Crisanto (A Veiga, 1959), Velázquez, Alfonso (Tineu, 1956) y Vilareyo, Xaviel (Mieres, 1967).

‘Na boca de todos’ va presentase mañana, a les ocho la tarde, na Casa Cultura da Veiga. Tres del actu, el tenor asturianu Cristobal Blanco y la pianista Laura Martin darán un conciertu pa los asistentes.

El XIII Premiu de Poesía Fernán Coronas que cada añu convoca la Sociedá Popular ‘La Regalina’ de Cadaveu foi esti añu pal poemariu que llevaba por títulu ‘Nordes’ de la escritora Carmen Guardado Parga. Guardado, que trabaya como maestra de Primaria y que ye miembru de l’Asociación de Poetes Valdesanos ‘Alfonso X El Sabio’, nun tenía hasta agora denguna obra espublizada.

El xuráu del que ye miembru la escritora Nene Losada Rico estimó l’usu de la fala de la escritora de L.luarca, que va recibir el galardón l’últimu domingu d’agostu, coincidiendo coles tradicionales fiestes de La Regalina en Cadaveu.

‘Nesti so primer llibru, Hector Perez Iglesias escueye alloñase del estrofismu pa proponer un llargu viaxe iniciáticu a traves d’una poesía fecha d’imáxenes sueltes, cercanes a la escritura automática, nes que la ruptura sintáctica, l’acumulación conceptual o la diriva semántica son a crear imáxenes de gran fuerza. El resultáu ye un llibru sorprendente, novedosu, ensin concesiones lexiques, que dexa en quien llee’l posu amargu de la desolación’. Con esti comentariu editorial, Hector Perez Iglesias (Arlós, 1978) presenta güei a les siete y media la tarde na Casa la Cultura de Candás el so primer poemariu n’asturianu.

Llicenciáu n’Historia y ganador del premiu Asturias Joven de Poesía na convocatoria del 2003 col poemariu ‘Las tardes baldías’, Hector Perez Iglesias tien ganao n’asturianu dalgunos concursos lliterarios de cuentos como ye’l casu del Art Nalón Lletres o El Tragaluz.

Con ‘Prisión de náufragu’, Perez Iglesias entra a formar parte de les files más moces de la poesía asturiana, con una propuesta novedosa y una voz diferente. Enriedador cola palabra y directu nel versu, llevanta poemes a base d’imáxenes precises y llamatives que-y treslladen al llector la sensación del náufragu que s’agarra al so imaxinariu fabulador y señaldosu con tal de sobrevivir.

El poemariu va ser presentáu per primer vez esta tarde, na Casa la Cultura de Candás, de mano de la tamien escritora Vanessa Gutierrez. Editáu por Trabe na colección Albera, Perez Iglesias súmase a la xeneración d’autores más mozos que nos últimos tiempos vienen asoleyando les sos primeres obres, llamando bien l’atención de públicu y crítica. Exemplu d’ello son los poemarios recien espublizaos por Pablo Texón, Elías Veiga, Xuan Carlos Crespos, Berto García o Pablo Rodríguez Alonso, que presentó esti martes tamién nel mesmu marcu candasín, acompañáu pol escritor Naciu Varillas, ‘La lluz del nordés’.

‘La lluz del nordes’ ye’l primer poemariu de Pablo Rodríguez Alonso, un llibru col qu’esti poeta mozu se daba a conocer el pasáu mes d’avientu al facese col prestixosu premiu Teodoro Cuesta de Mieres. L’escritor xixones, autor tamien de dellos estudios d’investigación, va presentar esta obra en Candás mañana martes 8 d’agostu, a les siete y media la tarde, dientro del ciclu ‘Fecho n’Asturies’.

El ciclu candasín ‘Fecho n’Asturies’, que naz cola intención d’amosar la producción más nuevo fechu na tierra, tamien va acoyer esti xueves, a la mesma hora, la presentación d’otra primer obra d’un autor mozu, Hector Perez Iglesias. Con ‘Prisión de náufragu’ esti escritor que yá ganare’l premiu Asturias Joven de Poesía en castellanu, estrenase na llingua asturiana completando asina un añu nel que, la poesía asturiana, destacó pola aparición de voces dafechu nueves. Esti xueves, Perez Iglesias va tar acompañáu en Candás pola poeta Vanessa Gutierrez.

El I Festival ‘Fecho n’Asturies’ va llevar a les cais de Candás (Carreño) ente los prósimos díes 5 y 12 d’agostu una amuesa multicultural, pensada col envís de que tolos artistes y creadores qu’anguaño trabayen n’Asturies tengan un espaciu onde amosar les sos obres, bien sían audiovisuales, musicales, teatrales o lliteraries. Asina, lo más nuevo na creacción asturiana va poder esfrutase a lo llargo de la prósima selmana cultural, que va echar el pieslle’l sábadu día 12 con un conciertu de música folk nel que van participar Lliberdón, Chus Pedro, Xera y Skama la Rede.

La Tarrancha va ser el grupu encargáu d’estrenar los conciertos del I Festival ‘Fecho n’Asturies’ con una actuación que tendrá llugar esti sábadu a partir de les once la nueche. Xunto cola nueche folk que va pesllar la selmana cultural, el grupu Verde Cannaia completa la ufierta musical del certame candasín, onde’l teatru n’asturianu tien una bona representación de la so producción. Asina, el monologuista Carlos Alba ‘Cellero’, Nun Tris cola obra ‘La vixigona nun tien remediu’ y La Diosa del Sarcasmo con ‘Pachu y Roxina baxen a la villa’ van poner n’escena lo más recien de los sos trabayos.

Na sección poetica, Candás acueye la presentación de dos nuevos poemarios de dos autores tamien nuevos na lliteratura asturiana. ‘La lluz del nordes’ de Pablo Rodríguez Alonso, poemariu ganador del Premiu Teodoro Cuesta na so última edición, y ‘Prisión de náufragu’ d’Hector Perez Iglesias, entrambos editaos por Trabe, van cubrir una estaya lliteraria na que tamien se va presentar la revista ‘Remanecer’.