El primer festival ‘Fecho n’Asturies’ lleva a Candás lo más nuevo na creacción asturiana

El I Festival ‘Fecho n’Asturies’ va llevar a les cais de Candás (Carreño) ente los prósimos díes 5 y 12 d’agostu una amuesa multicultural, pensada col envís de que tolos artistes y creadores qu’anguaño trabayen n’Asturies tengan un espaciu onde amosar les sos obres, bien sían audiovisuales, musicales, teatrales o lliteraries. Asina, lo más nuevo na creacción asturiana va poder esfrutase a lo llargo de la prósima selmana cultural, que va echar el pieslle’l sábadu día 12 con un conciertu de música folk nel que van participar Lliberdón, Chus Pedro, Xera y Skama la Rede.

La Tarrancha va ser el grupu encargáu d’estrenar los conciertos del I Festival ‘Fecho n’Asturies’ con una actuación que tendrá llugar esti sábadu a partir de les once la nueche. Xunto cola nueche folk que va pesllar la selmana cultural, el grupu Verde Cannaia completa la ufierta musical del certame candasín, onde’l teatru n’asturianu tien una bona representación de la so producción. Asina, el monologuista Carlos Alba ‘Cellero’, Nun Tris cola obra ‘La vixigona nun tien remediu’ y La Diosa del Sarcasmo con ‘Pachu y Roxina baxen a la villa’ van poner n’escena lo más recien de los sos trabayos.

Na sección poetica, Candás acueye la presentación de dos nuevos poemarios de dos autores tamien nuevos na lliteratura asturiana. ‘La lluz del nordes’ de Pablo Rodríguez Alonso, poemariu ganador del Premiu Teodoro Cuesta na so última edición, y ‘Prisión de náufragu’ d’Hector Perez Iglesias, entrambos editaos por Trabe, van cubrir una estaya lliteraria na que tamien se va presentar la revista ‘Remanecer’.