Lliteratura

Güei, vienres 16 de mayu, a les 19,30 hores, va celebrase na sede del Atenéu Xovellanos, na cai Francisco Tomás y Valiente, 1, la conferencia “La obra lliteraria billingüe de la escritora xixonesa Mª Teresa González, espuesta por Xosé Lluis Campal Fernández, llicenciáu en Lliteratura y miembru del RIDEA.

Campal va comentar la obra de la esctritora ñacida en Tremañes, Xixón en 1950 y murta en 1995 na mesma ciudá. Una escritora billingüe que dio nestos años obres como Collaciu de la nueche (1987), Ochobre (1989), Heliocentru (1993) y La casa y otros cuentos (1994) y en castellán Con húmedos lamentos de felino (Premiu de poesía erótica “Cálamo” 1990). Una escritora a la qu’esti añu se-y dedicó la XXIX Selmana de les Lletres Asturianes.

Xosé Lluis Campal Fernández (Uviéu, 1965), ye escritor, filólogu ya investigador lliterariu. Llicenciáu en Lliteratura Española pola Universidá d’Uviéu. Especialista na obra del escritor realista Armando Palacio Valdés, autor al que dedicó la so tesina de llicenciatura, amás de numerosos artículos, ponencies congresuales y conferencies.

Nel añu 1999 fizo los trabayos preliminares pa la puesta en funcionamientu del Centru d’Interpretación “Casa Natal de Palacio Valdés”, del Ayuntamientu de Llaviana. Activu collaborador de prensa, ye autor de los estudios introductorios de les reediciones de 4 llibros d’Armando Palacio Valdés.

Miembru del Real Institutu d’Estudios Asturianos (RIDEA), la Sociedad de Literatura Española del Siglo XIX, de Barcelona. Comisariu de les esposiciones bibliográfiques dedicaes a Ramón de Campoamor, Marta Portal, Alejandro Casona y “Asturias y El Quijote”, organizaes pola Conseyería de Cultura. Ponente en congresos internacionales dedicaos al estudiu de la lliteratura española y asturiana. Trabayó sobrela obra d’ente otros, Cela, Blasco Ibáñez, Manuel Pilares, José León Delestal, Vital Aza, Clarín, Pérez de Ayala, Luciano Castañón, Max Aub, Adeflor, Salvador Rueda, etc y ye responsable de la edición lliteraria d’obres de poetes en llingua asturiana de los sieglos XIX y XX como Marcos del Torniello, Rufino Martínez Vázquez, Pepín Quevedo, Benito Canella Meana, Fabricio, Francisco González Prieto, Xulio García Quevedo, Pachín de Melás, Aladino Fuente Vega o Luis Aurelio, ente otros. En 2007 coordinó’l llibru d’ensayos La emancipación de la lliteratura asturiana (Crónica y balance de la narrativa contemporánea).

L’escritor Pablo Marín Estrada visitó esti miercoles la carpa de “LibroOviedo” pa presentar “Animal estrañu”, poemariu ganador de la última edición del premiu Xuan María Acebal de Poesía, que concede la Conseyería de Cultura y Turismu del Principáu. Nel actu tuvieron tamien presentes el poeta Xuan Santori, que foi l’encargáu de presentar al autor y la obra y, del lláu instutucional, la responsable de la Oficina de Política Llingüística del Principáu, Maria Antonia Pedregal.

Pablo Antón Marín Estrada, llangrenu de Sama, tien una llarga trayectoria como escritor bien nel terren de la poeta, bien na narración y cunta nel so haber con premios bien notables como’l Xosefa Xovellanos de novela, que recibiera en 1997 pola obra “La ciudá encarnada”.

El boletín oficial de l’Academia de la Llingua Asturiana, “Lletres Asturianes” llega al so númberu 98 cola edición d’un númberu lliterariu, como ye vezu cada mes de mayu. La revista, dirixida pola Presidenta de l’ALLA, Ana Cano, abre la edición con un entamu nel que l’Academia pide’l reconocimientu de los drechos llingüísticos de los asturianos y cunta nesti casu con una parte pa la poesía y otra pa la prosa.

Nel casu de los poemes espublicen obra los autores de xeneraciones estremaes: Lourdes Álvarez, Xurde Fernández, Berto García & Carlos Suari, Aurelio González Ovies, Xurde Álvarez, Nené Losada Rico, Xuan Porta, Lauren García, Manuel Asur, Xe M. Sánchez, Helena Trexu Fombella, Sergio Gutiérrez Camblor, Pablo X. Suárez, Mª Esther García López, Mª José Fraga Suárez, Inaciu Galán y González, Roberto González-Quevedo, Carme Uría Araujo, Alfredo Álvarez de Ponticiella, Xuan Carlos Crespos Lanchas, Xaviel Vilareyo, Lluis A. Muñiz Antuña, Victorino Garcia González y José Alfredo Hernández.

La prosa ta formada por “La baldosa”, de Berto Cobreros, “Análisis” d’Aurora Sánchez Fernández, “Olivines” de Vicente García Oliva, “La Vuelta” de Xurde Fernández, “Madre querida” de Xosé Lluís Campal, “Cuadrod de fumu” de Mª Esther García López, “Chuso” d’Abel Martínez González, “Coses d’entós (II): L’aviador” d’Inaciu Galán y González, “La primera de toles pallabres” de Carmen Gómez Ojeda, “Rica y xeométrica” de Xuan Morís, “I-RE-NE (Un conto e dúas verdades)” de Belén Rico Prieto, “La cruz d’Albera: ‘Los desapaecíos de Llaviana’” de Xuan Carlos Crespos, “Paséu al rodiu del Círculu Polar” d’Esperanza Mariño Davila, “Rqerds lo q pasó nel conciert de nubru?”de Xosé Ramón Martín Ardines”, “El paragües” d’Helena Trexu Fombella, “Lleche Negro” de Jorge Fernández García y “La furgoneta” de Matilde León.

El númberu ilústralu Monchi Pedreira con dibuxos basaos nel arte perhistóricu asturianu y piésllase cola convocatoria de los Concursos d’investigación y lliteratura de l’ALLA pal 2009.

Dellos de los poemes fueron lleíos por Próspero Morán, director d’Asturnews, y Loreto Díaz, presentadores del XXIX Día de les Lletres Asturianes nel Teatru Campoamor, que sirvió de presentación de luxu pa esti nuevu volume que yá ta nes llibreríes del país.

La obra de la poeta recién nomada académica de númberu de l’ALLA apaez dientro de la colección de poesía “Edicions de la Guerra”, y la torna ta al cargu de Jaume Subirana, incluyendo un prólogu de Leopoldo Sánchez Torre. El llibru llámase “Un mes i altres poemes” y axunta cuasi tola so obra poética.

La so obra poética ta formada polos llibros “Al abellu les besties” (1985), “Vida privada” (1991), “Temporada de pesca” (1998) y “Un mes” (2005). Tamién tien publicaos los llibros de narrativa “La tierra entero” y “La maleta al agua”.

La poeta valenciana Dolors Alberola, col poemariu “Del lugar de las piedras”, foi la ganadora del Premiu de Poesía Alonso de Ercilla que convocaba’l Salón del Llibru Iberoamericanu de Xixón. El xuráu, col director Luis Sepúlveda y los poetes Miguel Rojo, Francisco Alvarez Velasco y Eloy Santos, fizo públicu’l fallu esti domingu durante una gala poetica nel Xardín Botánicu Atlánticu de Xixón.

Nesta edición del certame presentásonse un total de 173 poemarios escritos en castellanu y portugues. El ganador va ver la so obra espublizada n’edición billingüe amás de la posibilidá de presentala en públicu nel festival Correntes D´Escritas, que se cellebra en febraru en Portugal y a la prósima edición del Salón del Llibru Iberoamericanu de Xixón.

Xixón acueye esti llunes la última xornada del Salón del Llibru Iberoamericanu de Xixón. A les 11:00 hores dellos de los autores participantes nel festival van facer una visita a colexos ya institutos de la ciudá. Darreu, a les 13:00 hores y pa zarrar la sesión matinal, va tener llugar nal Centru de Cultura Antiguu Institutu la presentación del llibru d’Alfredo Álvarez Álvarez, “Pelayín y los mundos profundos”.

Tres un descansu, a les 18:00 hores los políticos Pedro de Silva y Antonio Masip van participar nun actu dedicáu a glosar los 20 años d’esistencia del Premiu Tigre Juan a la Novela. Ya de nueche, a les 21:30y nel restorán La Posada, va tener llugar la entrega del primer Premiu de Traducción Lliteraria Claude Couffon, que nesta ocasión foi a parar al italianu Pino Cacucci.

Al travies del Ateneu Obreru de Xixón y na coleición “Tiempu de Cristal”, que ta empobinada a recoyer trabayos relevantes de la lliteratura n’asturianu contemporanea, editose “La mirada aliella” del escritor tinetense Antón García. Esti llibru va ser presentáu pol autor esti llunes de magar les 18:00 hores na carpa de Libroviedo que ta asitiada nel Paseu de los Álamos de l’Uvieu con motivu de la cellebración de la Feria’l llibru.

“La mirada aliella”axunta nun únicu volume tola producción poetica del autor de prestixoses obres como “El Viaxe”, “Contra la oscuridá”, “Los díes repetíos” o “Venti poemes”

El Día de les Lletres garró trescendencia internacional cola cellebración que se fizo del mesmu nel Centru Asturianu de Buenos Aires. La sede social de la entidá na capital arxentina vivió’l pasáu vienres 9 de mayu la so particular contribución al actu central de la Selamana de les Lletres Asturianes, con un recitáu de testos de Maria Teresa González, autora homenaxeada nesta edición y otros escritores asturianos. El programa tamien incluyó’l pase d’un curtiumetraxe sobre Asturies y l’actuación d’un grupu de gaitres qu-y puxeron el ramu a la cellebración.

El Centru Asturianu de Buenos Aires foi sede de la celelbración oficial del “Día de les Lletres Asturianes nel Esterior” nel añu 2005

Web del Centru Asturianu de Buenos Aires

Chusa Barril, la responsable d’Alborá Llibros, en Xixón, la llibrería asturiana con más tradición na venta de llibru n’asturianu, fala nun vidiu p’Asturnews y comenta los efectos del Día del Llibru n’Asturianu nes ventes y la reacción del públicu llector.

p>L’Academia de la Llingua Asturiana va celebrar esti vienres, el Día de les Lletres Asturianes, a les 20 hores, nel Teatru Campoamor d’Uviéu. Na sesión académica va tomar posesión como nueva Miembru de Númberu de l’Academia la escritora Berta Piñán. L’Academia de la Llingua Asturiana quier, d’esti mou, “reconocer la fondura de la so contribución lliteraria al procesu de recuperación llingüística n’Asturies y facer posible, al empar, qu’esa valible contribución pueda enanchase col so trabayu dientro de la propia institución”.

Amás d’esta importante novedá, l’ALLA anunció yá va selmanes qu’esti añu va abrir l’actu l’entamu musical del gaiteru Llorián García al que siguirá la Xunta Estraordinaria de l’Academia de la Llingua Asturiana col discursu institucional de la Presidenta, Ana Cano.

Amás, una de les novedaes más importante pa esti vienres ye’l “Homenaxe a la Música Asturiana”. Nesti sen, l’Academia da anuncia de l’actuación coleutiva nel escenariu del Teatru Campoamor, en representación de tolos músicos y solistes asturianos, de: Nuberu, Dixebra, Llan de Cubel, Carlos Rubiera y Los Berrones.

L’Academia de la Llingua Asturiana, siguiendo’l facer entamáu n’ediciones pasaes, encamienta a los asistentes que, na midida de les sos posibilidaes, lleven el traxe asturianu como amuesa del so compromisu col resurdir de lo meyor de les solemnes tradiciones del país.

Llueu del actu académicu habrá una espicha, abierta a la participación de tola xente, nel restaurante “La Gruta”, con bailles y música asturiana.

Amás, l’Academia, diz nel comunicáu, “aguarda cuntar cola to asistencia a estos actos de celebración y pide la collaboración, nestos momentos nos que se xuega’l futuru de la llingua cola reforma del Estatutu d’Autonomía d’Asturies, pa esparder ente tolos asturianos y asturianes la demanda d’esixencia de la OFICIALIDÁ como únicu preséu pa garantizar el futuru y la sobrevivencia del nuesu idioma”.

Convidada pública al actu académicu