Escéniques

La obra “Favila, el príncipe reina”, va representase na Casa Cultura de Cangues d’Onís, esti xueves 14 de xunu a les 20:00 hores. El so autor ye’l canguetu Xabiero Cayarga y la representación va correr a cargu del colectivu de muyeres Les Filanderes.

L’actividá enmárcase dientro del programa de fiestes de San Antoniu 2012. “Favila, el príncipe reina” ye una comedia ambientada nel momentu hestóricu de la reconquista, más que ver esta dómina como un tiempu gloriosu, velu dende un puntu de vista satíricu.

Ta escrita siguiendo l’estilu shakespeariano ya introduz guiños del teatru popular asturianu. La obra cunta con unos personaxes brillosos que llogren crear una trama bien prestada con temes de gran caláu como son: les reivindicaciones llingüístiques y territoriales, los temes políticos, la homosexualidá, etc.

L’autor de la obra ye Xabiero Cayarga (Cangues d’Onís, 1967), escritor en llingua asturiana y llicenciáu en filoloxía inglesa, quien con esta obra ganó’l Primer Premiu de Testos Dramáticos n’Asturianu Teatru Xovellanos. Otres obres de Cayarga son El boleru de Xabel (Premiu de Narraciones de l’Academia de la Llingua Asturiana), Trastes de bufarda o los poemarios Pequeña Europa (Premiu Teodoro Cuesta) y Les llingües de la Hidra (Premiu Xuan María Acebal). Cayarga, amás d’autor de noveles, poesía y testos teatrales, collaboraba colos sos escritos nel periódicu Les Noticies y en revistes como Lletres Asturianes o Campo de los Patos, ente otres publicaciones.

La obra ta interpretada pol colectivu social de muyeres Les Filanderes cunta cola dirección de Carmen Gloria García Suárez. Les Filanderes ñació en 1999 en Sama (Llangréu) col enfotu de impulsar el papel de la muyer nel ámbitu cultural, social y de la cooperación. Les actividaes d’esti grupu entámense alredor de tres exes: área de lliteratura, área social y área de teatru. Les Filanderes forma parte de la Federación de Grupos de Teatru Amateur del Principáu d’Asturies (FETEAS).

Veraneante, meyor espectáculu de teatru na última edición de los premios Max, va poder trate’l sábadu 19 de mayu a les 20:30 hores nel Xovellanos. La coproducción del Teatro de la Abadía y Kamikaze producciones, llogró otros cuatro gallardones Max. Nel so repartu figuren dos actores asturianos.

Meyor espectáculu de teatru, meyor adaptación d’obra teatral pa Miguel del Arco, meyor composición musical pa espectáculu escénicu pa Arnau Vilá, meyor actriz protagonista pa Bárbara Lennie y meyor empresariu o productor priváu d’artes escéniques pa Kamikaze producciones, ye la carta de presentación cola que Veraneantes llega a Xixón. El Xovellanos tamién foi testigu de la puesta n’escena de la otra gran trunfadora nesta edición de los Max, La avería, que llogró cinco gallardones, ente los que destaquen meyor dirección pa Blanca Portillo y meyor actor pa Asier Etxeandía.

Miguel del Arco dirixe la versión qu’él mesmu afixo del testu que Maxim Gorki escribió en 1904: “Escribí Veraneantes a partir del testu de Gorki. Nin siquier pretende ser una versión llibre. Dexé utilizar l’orixinal como puntu de partida y dende ende, investigar, probar, xugar…” Esi procesu d’investigación y de xuegu más qu’eficaz pa llevantar proyectos teatrales que se converten n’ésitos, sigue la llínea de trabayu yá trazada con “Seis personajes en busca de autor”, qu’afaró na anterior edición de los premios Max. La intención de la dirección ye “pegar al públicu a los personaxes como si fueren estensiones d’ellos mesmos, cola fascinación puesta en tratar de que la forma perteneza a la nuesa dómina más allá de la vestimienta de los personaxes”. Nesta ocasión el director cuntó con dos actores asturianos, Trepa Otón y Ernesto Arias. Dambos figuraben ente los nomaos a meyor actriz y actor de repartida polos sos papeles nesta obra.

El Teatru Filarmónica d’Uviéu acueye esti vienres 20 d’abril a les ocho la tarde, la representación de la obra de Carlo Goldoni, tornada al asturianu por Lluis Portal. N’ella, un actor, escritor y director, Xuan Saco Botardo, escribe cola técnica del cañamazu la obra que se representa.

Esta obra escrita por Carlo Goldoni y estrenada en 1741 tina una puesta n’escena que contien los elementos que la caracterizaron nos sos oríxenes: la teatralidá, alta maña física, música, personaxes farsescos, con tola fuercia y tresparencia del teatru popular.

Enmarcáu na espresión Commedia dell´Arte del teatru risible por escelencia, el montaxe, en global, tien de recrear les comedies propies del sieglu XVII italianes dando un tonu de modernidá n’aspeutos como’l vestuariu, la lluz o la música.

La dirección cuerre a cargu d’Inma Rodríguez, siendo ayudante de dirección Toño Caamaño.

La Casa Cultura de Cangues d’Onís acueye esti martes 17 d’abril la representación de la obra “Sara nun tien pueblu”, de la compañía Teatro Kumen. La obra ta dirixida pol autor del testu, José Ramón López Menéndez y empobinada a neños d’ente 5 y 10 años.

El vienres 13 d’abril a les 20:30 hores estos dos actores protagonizarán nel Teatru Xovellanos la comedia “Se quieren”, de Muriel Robin y Pierre Palmade. Esta obra estrenada en Francia en 1996 y protagonizada por unu de los mesmos autores, Pierre Palmade, tuvo nomada a los premios Moler como meyor obra d’humor. La temática que s’enceta ye universal: les rellaciones de pareya dientro del matrimoniu. Con éses la hestoria podría trescurrir en cualquier país, en cualquier sector profesional, cultural o económicu. Y cualquiera podría vese reflexáu en dalguna de les situaciones que se plantegen nel intre de la función.

La versión castellana del testu fízola Miguel del Arco. El director y guionista dirixó en 2011 “Veraneantes”, propuesta teatral que tien el récord de nominaciones na hestoria de los Premios Max, concursando en 12 categoríes na gala que se celebrará’l próximu 30 d’abril.

Na versión en castellán, el protagonista masculín ye Enrique San Francisco, que retoma esti proyectu tres cuasi diez años del so estrenu, en 2002, nel Teatru Marquina de Madrid. Por aquel entós un grave accidente de moto estremólu de los escenarios cuando llevaba trés selmanes de representaciones. Amparo Muñoz protagonizaba al par de Quique esti primer montaxe y agora ye l’actriz Cristina Gallego, a la que pudimos ver recién en “Sin balas”, de la Compañía teatral Las Grotescas.

Con un humor desbordante desenvuélvense situaciones hilarantes llevaes al estremu, cola xera nada cenciella d’atopar una respuesta a la entruga de si hai vida dempués del matrimoniu.

Col espectáculu “El mundu rural ta descompuestu”, Carlos Alba “Cellero” como Sindo y Vanessa Peña como Nona de Calaín lleve un espectáculu nes dos llingües propies d’Asturies: l’asturianu y el gallego-asturianu, “cuidando de nun entorpecer la comprensión nes fasteres onde la población nun entienda bien dalguna de dambes llingües”, espliquen los actores.

Nona de Calaín, moza del Occidente. Sindo, mozu del Oriente. Analícennos el mundu de güei dende les sos vivencies y dende los casos que tienen visto nos sos pueblos, dende una cultura que tuvieron la suerte de vivir y qu’agora… ta descompuesta. Pero del enfrentamientu d’aquellos saberes coles costumes de güei sal un aquel de llucidez que alluma l’analís del mundu contemporáneu. Temes como’l turismu rural, l’artesanía, les caseríes-escuela, l’aisllamientu xeográficu, la cultura emprendedora, les rellaciones ente homes y muyeres d’agora y les d’enantes… van desfilar en riestra delantre los güeyos del públicu.

La primer actuación, esti xueves 22 de marzu a les diez de la nueche nel Café Trisquel de Xixón, asitiáu na cai Marqués de San Estebán, “Los Arcos”.

El grupu de teatru Telón de Fondo va actuar cola obra Squash, nel Centru d’Interpretación de Parque de Redes d’El Campu (Casu), el viniente 8 de marzu, a les 12:30 del meudía.

Squash escrita por Ernesto Caballero, con versión asturiana de Lluis Antón Gonzáez, ye una comedia social, na que dos muyeres s’enfrenten por un puestu trabayu. Les distintes pruebes que’l supuestu esaminador-yos fai, alléguennos a situaciones absurdes, propies de los “reality show” televisivos.

La obra ta interpretada por Carmen Suarez Trapielo, Marilú Casas y Lluis Antón González. La dirección ye de Sara García Rodriguez, la producción de Xulio Vigil y les lluces d’Alberto Ortiz. La representación ta incluyida dientro de la Muestra de Teatru Amateur del Principáu d’Asturies en collaboración col Conceyu de Casu.

El chigre “New York New York”, asitiáu ente les cais La Cruz y Madrid, en Lluanco, va acoyer una actuación de monólogos de Carlos Alba, col so personaxe Cellero. Sedrá de magar les doce la nueche.

El domingu 15 xineru a les 12:45 delantre la Ilesia Valdesoto (Siero) va facese la representación de Comedies. Ente les obres, “La ruina” fecha per Pergentino Martinez y representada polos escolinos de la Escuela de Faes y “La Politica ye una comedia”, fecha por José Ramón Oliva y representada pola Asociación “El Cencerru”.

El grupu teatru Telón de Fondo, actuará esti sábadu 26 de payares nel Centru Social de Granda (Xixón) dientro de les XIX Xornaes de Teatru. Pondrán en escena’l so caberu montaxe “Squash” d’Ernesto Caballero, dirixíu por Sara García Rodriguez y interpretáu por Marilú Casas, Carmen Suarez Trapiello y Lluis Antón González. La entrada ye llibre hasta completar aforu y la hora de comienzu sedrá les 8 la tarde.