Escéniques

L’actor y monologuista asturianu Carlos Alba “Cellero”prepara una adaptación a la escena de “El Lazarillo de Tormes”, el clásicu col qu’entama la denomada novela picaresca española. El monólogu estrenaráse’l xueves 18 d’ochobre, nel teatru Xovellanos de Xixón, a les 20.30 hores. Va ser la primer vegada que se lleva a la escena, en llingua asturiana, esti clásicu de la lliteratura española.

L’espectáculu ta producíu pola compañía gozoniega ACostuBaxo Teatru, y empobináu por Felipe Santiago. Dende’l puntu de vista de la llingua, caltiense’l fondu popular y folclórico del orixinal, amás de la guapura de la espresión llingüística, la comicidá y la complicidá col públicu. La resultancia ye un asturianu bien cercanu a lo qu’inda se fala en munchos pueblos y villes, bien oral y popular, pa lo que se cuntó “cola inestimable collaboración del escritor Milio Rodríguez Cueto na revisión llingüística”, espliquen dende la compañía.

“La vida de Lazarillo de Tormes y de sus fortunas y adversidades”, más conocida como “El Lazarillo de Tormes”, novela espublizada nel sieglu XVI (añu 1554), y d’autoría entá desconocida, ye una de les obres cume de la lliteratura castellana, que da entamu al xéneru conocíu como “novela picaresca”. El testu ye una crítica aceda y cómica a la sociedá española de la so dómina, teniendo na “fame” y la miseria les sos temes principales. Ye una obra que fala de situaciones qu’entá vemos reflexaes na actualidá, tantu poles vivencies de persones mayores que dende bien pequeñes fuerob obligaes a trabayar, como na situación socioeconómica actual, na que vuelven situaciones de necesidá que se creíen superaes.

“El Lazarillo de Tormes” foi lleváu a la escena, y a la pantalla de cine, en más ocasiones, la más famosa d’elles, la versión realizada Fernando Fernán Gómez pal actor Rafael Alvarez “El Brujo”. La versión de Carlos Alba apurre la novedá de que, per primer vegada, nun s’esanicia nengunu de los amos que tuvo’l protagonista a lo llargo de les sos peripecies. Amás de la posibilidá d’escuchala en llingua asturiana, la versión ye novedosa na manera en que se nos amuesa al personaxe, Llázaro de Tormes, nuna adaptación escénica na que lo que prima ye’l so oficiu: pregoneru. Les referencies al vinu son tamién una constante a lo llargo de la obra, que nesta versión conviértese en vinu de Cangas. L’espectáculu cunta con una sovención del la Conseyería de Cultura d’Asturies que cubre’l 20% del so presupuestu.

Carlos Alba “Cellero” ye un actor especializáu nel monólogu y la narración oral, que participó en numberosos festivales, ente ellos los Festivales Internacionales de Teatru Clásicu d’Almagro y Olite o’l festival de Xuglares de San Javier. El so monólogu “Alonsomanía”, foi nomáu como meyor obra nos premios Asturies de les Artes Escéniques 2006; coles mesmes, foi ganador del concursu de monólogo Pepe Campos nos años 2009 y 2011, y llogró nel Festival de Teatro Tierres del Torío los premios 2.º y 3.º nos años 2011 y 2012. Anguaño foi gallardonáu col Premiu Anxelu de Monologuismu qu’otorga’l Patronatu del Teatru Prendes de Candás, en reconocencia a la so trayectoria. Publicó los sos monólogos sol títulu de “Del chigre”, y mientres los años 2009/2011 dirixió, xuntu con Vanessa Peña, la sección n’asturianu de Puntu Radio Asturies, llamada “La biesca felechos”. Los sos monólogos viéronse nel programa “Al Aldu”, de la TPA. Carlos Alba (Avilés, 1972) ye Llicenciáu en Ciencies de la Información pola Universidá Complutense de Madrid y diplomáu n’Interpretación pola escuela d’Arte Dramático Réplika. Academia del Actor, dirixida por Jaroslaw Bielski.

Dientro de los Supermartes del X aniversariu de CMI Pumarín Xixón-Sur, Min de les Pieces va actuar a les ocho la tarde esta selmana.

El monólogu ye una forma d’espresión distintiva d’Asturies que ta enraigonada nes nueses tradiciones y folclores. El cómicu y monologuista asturianu Armando Felgueroso (Min de les Pieces) collaborador habitual de l’Asociación d’Interpretes Asturianos AICA, va xugar cola complicidá del públicu y va arrincar a el espectadores que s’averen una risada.

Esti domingu 16 de setiembre va entamar n’El Franco la celebración de la Selmana Cultural 2012. Los actos van entamar col pregón de les fiestes nel Salón de Plenos del Conceyu a les 13:30h. al cargu de Mª Mercedes Argüello Méndez, natural d’A Caridá, profesora y caderalga de Filosofía y Lletres na especialidá de Xeografía y Hestoria, fía de Leopoldo Argüello, Rubiche, famosu maestru na Escuela d’A Caridá.

El miércoles 19 de setiembre, a les siete y media la tarde, l’asociación de muyeres As Xanas de San Xuan de Prendonés va poner n’escena “As tertulias de Cá Raquel”, l’adaptación per parte de l’asociación d’una obra de Javier del Dios.

El xueves 20 de setiembre, a les 21:30 hores, el Grupu de Teatru Pico de Faro d’A Roda van poner n’escena la obra “Francisca Alegre y Olé” , de J. Antonio Lara, mientres que’l vienres, a la mesma hora, será’l Grupu de Teatru El Cioyo de Castropol quien ponga n’escena “A maldición da pita roxa” de J. Ramón Oliva Alonso.

El sábadu 22 de setiembre va celebrase la VII Gala del Deporte onde s’homenaxa a trés gallardonaos nos apartaos de proyección deportiva, méritos deportivos y una mención especial por méritos deportivos y por dedicación y sofitu al deporte. Nel auditoriu As Quintas a les 21:00h.

El domingu 23 va producise la inauguración de la esposición de pintura de Lisardo Lombardía na sala d’esposiciones As Quintas a les 12:30h, cuntando cola actuación de la Banda de Gaitas de Tapia, nel auditoriu As Quintas a les 20:30 hores.

La selmana va rematar con trés obres de teatru, “Matrimonios mentirosos”, pol Grupu de Teatru d’Anleo, el llunes 24 a les 21:30 hores, “Nosotros, ellas y el duende”, el martes a les 22 hores, col grupu Santiso del Eo y “Por fin casóuse Xanín”, el miércoles 26 a les 21:30 hores, pol Grupu de Teatru Aires Costumbristas d’A Caridá.

Con Sindo, nuevu personaxe, un mocín que ye una evolucion del borrachu del mercau Clariniano de Candás, llega Carlos Alba a Villaviciosa. Va ser güei, martes 11 de setiembre, na carpa que tien fuera La bodega, chigre de Villaviciosa, a les 22 hores.

El Teatru Xovellanos de Xixón acueye esti xueves 30 y vienres 31 d’agostu delles sesiones de la nueva obra de Bertín Osborne y Paco Arévalo, que decidieron xunir esfuercios y llevar a cabu esti espectáculu d’humor con cantares en directu. Los protagonistes rellaten sobre l’escenariu risonderes hestories que ponen de manifiestu los innumberables puntos de mancomún que dambos tienen. Los precios tán ente los 24 y los 15 euros.

Bertín Osborne interpreta nesta obra y en directu los sos meyores ésitos musicales, acompañáu del maestru Franco Castellani al pianu. Pero tamién dispara la so batería d’anécdotes risibles. Y Paco Arévalo, non yá intervien na so conocida faceta d’humorista, sinón qu’amuesa al públicu les sos dotes como cantante.

L’entamu de la trayectoria artística de Osborne remóntase al 1971, añu nel que debuta nel Festival del Cantar del Escorial. Pero nun va ser hasta 1980 cuando grabe’l so primer discu, Amor mediterráneo. Y a fecha de güei, el madrilanu que se confiesa xerezanu, publicó una ventena de trabayos discográficos. Bien conocíu ye’l so pasu por delles canales televisivos como presentador de programes d’audiencia masiva, como Contacto con tacto, Lluvia de estrellas, o Esos locos bajitos, por citar dalgunos. Pela so parte, Arévalo, empecipió la so andadura como humorista en 1970 col so espectáculu El bombero torero. Pero ye la so apaición selmanal nel programa Un, dos, tres…Responda otra vez la que-y concede el so mayor popularidá. La so incursión nel cine vieno de la mano de Mariano Ozores con películes como El currante, o El pan debaxo del brazu, dambes de 1983. Ente les más recién podemos citar L’oru de Moscú (2003) o Isi & Disi, altu voltaxe (2006).

Como cada añu, na segunda quincena del mes d’agostu, de resultes de la política cultural que’l Conceyu de Carreño empecipió na década de los 80, cola organización de Xornaes Teatrales na cai mientres los meses de branu nes que participaron diverses compañíes teatrales Asturianes, tómase la decisión en 1991 d’entamar un Salón de Teatru Costumbrista Asturianu dientro del C.C. Teatro Prendes, col enfotu de promocionar esta faceta artística que naquellos años volvía resurdir. Esti miércoles 22 entamó la edición númberu ventidós.

Programa completu d’actividaes de les Xornaes

Un añu más la Compañía Asturiana de Comedies llega al Teatru Xovellanos los díes 24, 25 y 26 d’agostu, con cuatro funciones de la obra “Los amores de Ximielga”, un clásicu del teatru asturianu, obra d’Eladio Verde. Ente los actores tán Pili Ibaseta, Josefina García, Mar Buelga, Mª Luisa Argüelles, Arsenio González, Manuel Aller, Norberto Sánchez, Iván Fernández, Sergio Buelga y Alazne Castaño. La dirección cuerre a cargu d’Eladio Sánchez.

Les entraes pueden consiguise en Caxastur Espress y nes taquilles del Teatru Xovellanos de Xixón por doce euros.

Esti añu recupérse’l taller de monólogu cómicu asturianu, dempués del parón de 2011. Va ser na Casa Cultura de Candás, la selmana del 20 al 24 d’agostu, de 18 a 21 hores. El preciu 24 euros. Pa más información sobre´l programa, conteníos, etc, puede llamase al 699459850.

El grupu de teatru SONA va actuar esti domingu 29 de xunetu nel prau de la fiesta de Somines-Nalió, con entrada llibre, de magar les seis de la tarde. La obra tará dirixida por Javier Villanueva y va cuntar cola actuación d’Agustina Solla, Belén García, Francisco González, Francisco Martínez, Jovita García, Azucena Huerta y Fernando Lorenzo.

Yá tán a la venta les llocalidaes pal Ballet Nacional de Marsella, una de les compañíes más conocíes a nivel mundial. L’Auditoriu va acoyer “Metamorfosis”, la obra maestra d’Ovidio con coreografía de Fréderic Flamand, el 3 d’agostu a les 20:30 hores.

L’acercamientu de los mitos va ser la ocasión pa una reflexón sobre les fuerces constitutives de la naturaleza humana, sobre les manifestaciones del deséu, sobre los combates eternos del bien y del mal. Remembrar un llugar antiguu pa entruganos meyor sobre la nuesa contemporaneidá.