Emigración

Depués de que les Fiestes de La Santina de los asturianos en Cantabria abrieren hasta güei mesmo’l garapiellu de folixes que tienen a la Virxen de Cuadonga como motivu, entamen en Lleón les fiestes de la Casa d’Asturies que dende’l martes 31 d’agostu hasta’l 19 de setiembre van facer a lo asturiano protagonista de la capital lleonesa con munches actividaes de toa mena. La programación entamará’l martes col pregón de les fiestes qu’ufrirá Manuel Cadenas, entrenador del Club Balonmano Ademar y finará’l 19 de setiembre cola tradicional ofrenda a la Virxen del Camín.

El martes, amás de la llectura del pregón, sedrá’l día nel que se va proclamar Xana a Lidia Pablos Fernández y Xana infantil a Nerea Morán Manga. El sábadu que vien ta prevista la celebración d’un baille y un espectáulu de fuegos artificiales y el domingu día 5 de setiembre entamará la recta final de les fiestes cola procesión de la Virxen de Cuadonga y la misa xunta l’actuación del grupu Coral de la Ilesia de San Marcos. La tradicional fabada al meudía y la entrega de premios de los campeonatos sociales compondrán el restu’l programa que tien de finar cola actuación de los grupos de coros y danzas Xovellanos de Xixón.

Les fiestes de la Casa d’Asturies de Lleón van tener tamién otros dos díes d’actividaes. El día 12 de setiembre fadráse la misa polos socios y familiares fallecidos y el día 19 de setiembre la tradicional ofrenda a la Virxen del Camín.

Depués d’estes xornaes en conmemoración del 8 de Setiembre, Día d’Asturies, en Cantabria y Lleón van venir munches otres, ente les que destaca la cellebración entamada pol Centru Asturianu de Bruseles, qu’esti añu cumple venti años y que-y dedica la xornada al yuntamientu de Llangréu, como fai tolos años con ún de los conceyos asturianos.

Les comunidaes asturianes nel esterior van cobrar amás protagonismu dende esti añu nes celebraciones del Día d’Asturies depués que’l conseyeru de Xusticia, Seguridá Pública y Relaciones Esteriores, Francisco Javier García Valledor, anunciara l’envís del Gobiernu d’entamar una celebración adicional y rotativa del Día d’Asturies nel esterior a partir d’esta prósima edición, cola idea de que cada añu seya una ciudá distinta la qu’acueya los actos conmemorativos. Madrid va estrenar la llista festexando’l 18 y el 19 d’esi mes de setiembre’l Día d’Asturies, con presencia de miembros del Executivu’l Principáu.

El direutor de l’Axencia Asturiana d’Emigración, Luis Miguel Fernández Romero, viaxa a Santander p’abrir les Fiestes de La Santina 2004

Les ‘Fiestes de La Santina’ de los asturianos en Cantabria abren güei el garapiellu de folixes que tienen a la Virxen de Cuadonga como motivu y que van celebrar, a lo llargo’l mes de setiembre, más d’un cientu de comunidaes asturianes repartíes por tol mundu. La fiesta asturiana en Cantabria, que ye dende siempre la primera en cellebrase, va siguir dellos díes, hasta’l 29 d’agostu, con un perinteresante programa festivu. En representación del gobiernu asturianu dirá a Santander el direutor de l’Axencia Asturiana d’Emigración, Luis Miguel Fernández Romero, que va tar yá presente na inaguración de les cellebraciones del Centru Asturianu de Cantabria.

Los actos d’apertura de les fiestes, previstos pa güei, van tener llugar nos salones del Centru Asturianu de Cantabria, allugáu na cai Peñas Redondas de Santander. El programa’l direutor de l’Axencia Asturiana d’Emigración nel Centru va entamar a les 18 hores y va tener el so momentu cimeru a les 21 hores nel Hotel Bahía, asitiáu na avenida Alfonso XIII, onde va lleese’l pregón y darréu entregaránse les distinciones añales qu’otorga’l Centru Asturianu de Cantabria.

Depués d’estes xornaes en conmemoración del 8 de Setiembre, Día d’Asturies, vendrán munches otres, ente les que destaca la cellebración entamada pol Centru Asturianu de Bruseles, qu’esti añu cumple venti años y que-y dedica la xornada al Ayuntamientu de Llangréu, como fai tolos años con ún de los conceyos asturianos.

Les comunidaes asturianes nel esterior van cobrar amás protagonismu dende esti añu nes celebraciones del Día d’Asturies depués que’l conseyeru de Xusticia, Seguridá Pública y Relaciones Esteriores, Francisco Javier García Valledor, anunciara’l pasáu 3 de xunu n’Uviéu l’envís del Gobiernu’l Principáu d’entamar una cellebración adicional y rotativa del Día d’Asturies nel esterior a partir d’esta prósima edición, cola idea de que cada añu seya una ciudá distinta la qu’acueya los actos conmemorativos, pa facilitar asina la participación de los asturianos emigraos a mui estremaos llugares. Madrid va estrenar la llista festexando’l 18 y el 19 d’esi mes de setiembre’l Día d’Asturies, con presencia de miembros del Executivu’l Principáu.

El Principáu escueye Madrid pa la primer cellebración oficial itinerante del Día d’Asturies nel esterior

Más oportunidaes de trabayu n’Asturies, más información, más planes como los que yá tán en marcha. Eses son les demandes que los collectivos d’emigrantes aconceyaos en Xixón espusieron esta tarde nel Muséu’l Pueblu d’Asturies a los gobernantes del Principáu, a los que-yos propusieron amás la creación d’una conseyería específica p’asuntos d’emigración.

Esta última suxerencia formulóla’l presidente de la Federación Internacional de Centros Asturianos (FICA), José Luis Casas, quien reclamó asinamesmo la instalación d’oficines de información permanente a emigrantes retornaos “non sólo n’Uviéu, sinón en cualquier llugar”. Pa Casas, qu’ocupa tamién la vicepresidencia’l Conseyu de Comunidaes Asturianes, l’Alministración autonómica ha siguir colos planes que yá tien en marcha pa facilitar el retornu d’emigrantes, pero tien que dar un pasu más pallá y responder a la entruga de “cómo podemos retomar la nuesa nacionalidá”.

José Luis Casas faló nesos términos nun alderique presidíu pola conceyala xixonesa de Servicios Sociales, María Antonia Fernández Felgueroso, plantegáu col títulu “La emigración xuvenil” pero con sólo dos de los cinco intervinientes de la mesa con edaes que s’axusten a la definición de “mocedá”: Natalia García, representante de l’Asociación d’Emigrantes Retornaos, y Ángel Emilio Álvarez, presidente’l Centru Asturianu de Lausana, en Suiza.

Dambos coincidieron na necesidá d’habilitar más oportunidaes de trabayu n’Asturies pa la xente mozo y evitar asina la so salida al esterior, onde “les condiciones son más interesantes”. Pol so llau, José Manuel Cobián, qu’intervino en representación del Centru Asturianu de Buenos Aires, defendió les ayudes qu’anguaño concede’l Principáu pa los emigrantes retornaos como “la devolución” del sofitu dau hai décades n’América Llatina a los asturianos qu’aportaben allá y a los que “bancos y políticos-yos metieron depués la mano en bolsu pa roba-yos”.

El nuevu Plan d’Emigración prevé cursos d’asturianu ‘on line’ ya un estudiu sobro l’éxodu de la mocedá

Falta escoyer el sitiu. El Gobiernu autonómicu busca un allugamientu afayadizu en Xixón pa reabrir la oficina d’atención al emigrante retornáu, pesllada en febreru pasáu na cai Feijóo pola anterior delegada’l Gobiernu n’Asturies, Mercedes Fernández, pa centralizar los sos servicios n’Uviéu, y cuya reapertura comprometió el so sucesor nel cargu, Antonio Trevín.

Asina lo precisó güei el conseyeru de Xusticia, Seguridá Pública y Relaciones Esteriores, Francisco Javier García Valledor, quien ratificó que Trevín tien l’envís de recuperar el serviciu xixonés d’atención al emigrante, según-y comunicó personalmente, dixo’l conseyeru, na primer xuntanza de trabayu que dambos mantuvieron.

Valledor pronuncióse nesos términos na apertura de dos xornaes dedicaes a los asturianos retornaos del esterior que tendrán continuidá mañana nel Muséu Etnográficu’l Pueblu d’Asturies. Nel programa de l’actividá, entamada pol Ayuntamientu de Xixón col sofitu’l Principáu, figuren una recepción oficial na Casa Consistorial, una visita guiada a la ciudá, una incursión na Feria de Muestres d’Asturies, amueses de folclore y una espicha final.

Cursos ‘on line’ y presenciales de llingua y cultura asturianes, un estudiu sociolóxicu pa definir por qué emigra la mocedá y reserva del 5 por cientu de viviendes de promoción pública p’asturianos retornaos. Son tres de les 69 acciones concretes que plantega’l Plan Integral d’Emigración del Principáu 2004-2007, que güei se presentó formalmente nel Archivu d’Indianos, allugáu en Colombres.

Asina, el documentu qu’esplicaron énte l’asamblea añal de la Federación de Centros Asturianos el presidente autonómicu, Vicente Álvarez Areces, y el conseyeru de Xusticia, Seguridá Pública y Relaciones Esteriores, Francisco Javier García Valledor, sorraya’l caltenimientu de la cultura asturiana nel esterior y mantién la cellebración itinerante del Día de les Lletres n’estremaes comunidaes fuera’l Principáu.

Aprobáu ayeri pol Conseyu de Gobiernu baxo la denominación íntegra ‘Plan Integral d’Emigración 2004-2007, una axenda social pa la xente emigrante y l’Asturies de la diáspora. Asturies cola so xente’, y ellaboráu n’asturianu y castellán, el documentu afita una inversión global de más de 14 millones d’euros d’equí a 2007 p’actuar en cinco estayes: atención sanitaria a emigrantes, promoción social de los asturianos retornaos, acciones pa la mocedá emigrao, ayudes a les comunidaes asturianes y promoción d’Asturies nel esterior.

Dos collectivos cobren especial protagonismu nel plan, les persones mayores que tornen y los mozos y moces de la diáspora. Pa los primeros, el Principáu acutará el 5 por cientu de les places en residencies del organismu autónomu ERA (Establecimientos Residenciales d’Asturies) y un procentaxe idénticu de les viviendes de promoción pública.

No que cinca a la mocedá, el Plan d’Emigración pon especial procuru y prevé realizar un estudiu sociolóxicu sobre les causes de la salida d’Asturies, les zones de destín y la percepción del regresu. Tamién contempla intercambios ente xóvenes asturianos y descendientes d’emigraos, una mesa itinerante sobro los “nuevos fenómenos de movilidá xeográfica”, un foru añal de xóvenes emigrantes y la creación d’un portal n’internet con recursos pa la mocedá.

Álvarez Areces y García Valledor intervienen güei na asamblea de la Federación Internacional de Centros Asturianos xunta’l presidente d’esti organismu, José Luis Casas; el director de l’Axencia Asturiana d’Emigración, Luis Miguel Fernández Romero, y l’acabante nomar presidente’l Conseyu de Comunidaes Asturianes, Manuel Fernández de la Cera.

El Principáu escueye Madrid pa la primer cellebración oficial itinerante del Día d’Asturies nel esterior

Madrid estrenará la llista. El Gobiernu autonómicu escoyó esa ciudá pa cellebrar los actos de la primer conmemoración oficial itinerante del Día d’Asturies nel esterior, festividá que tien llugar el 8 de setiembre pero que la comunidá asturiana en Madrid festexará el 18 y el 19 d’esi mesmu mes, con presencia de miembros del Executivu’l Principáu.

Según confirmó’l director de l’Axencia Asturiana d’Emigración, Luis Miguel Fernández Romero, el programa de cellebraciones entá nun ta dafechu definíu, pero ye segura la participación de representantes del Gobiernu autonómicu na folixa oficial de Madrid, que se retrasa pa mediaos de setiembre al nun ser festivu nesa comunidá el 8 de setiembre.

El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l pasáu 3 de xunu n’Uviéu l’envís del Gobiernu’l Principáu d’entamar una cellebración adicional y rotativa del Día d’Asturies nel esterior a partir d’esta prósima edición, cola idea de que cada añu seya una ciudá distinta la qu’acueya los actos conmemorativos, pa facilitar la participación de los asturianos emigraos a mui estremaos llugares.

Madrid acueye la principal colonia d’emigrantes asturianos nel esterior y mantién en funcionamientu dos grandes collectivos enfotaos en caltener viva l’asturianía la capital del Estáu: el Centru Asturianu de Madrid y la más reciente Asociación Cultural y Recreativa Asturianos en Madrid.

De poco más de 40.000 euros l’añu pasáu, a 80.000 euros nesti exerciciu. El Gobiernu’l Principáu destina esa cantidá pa meyorar l’atención sanitaria de los asturianos emigraos a l’Arxentina y enfótase en da-yos cobertura mélica a unes 440 persones con problemes de salú y escasos recursos vinculaes al Centru Asturianu de Buenos Aires, según precisó esti mediudía n’Uviéu el conseyeru de Xusticia, Seguridá Pública y Relaciones Esteriores, Francisco Javier García Valledor.

Asina, los datos asoleyaos pol conseyeru cifren en 24.000 euros la partida que’l Principáu empobinó pa la primer convocatoria d’ayudes sanitaries a emigrantes, hai agora dos años. En 2003, eses subvenciones medraron hasta los 45.000 euros y beneficiaron a 300 persones, númberos que quedarán baxos si se cumplen les previsiones pa esti exerciciu y l’apoyu del Gobiernu -aumentáu hasta los 80.000 euros- llega a unos 440 beneficiarios.

Con tales ayudes, l’Executivu asturianu quier amenorgar los efectos de la crisis económica desatada n’Arxentina a finales de 2001, que dexó a dellos emigrantes asturianos nuna situación enforma precaria, y busca amás caltener la vinculación de la colonia asturiana d’esi país sudamericanu al Centru Asturianu de Buenos Aires.

Responsables d’esa entidá -el vicepresidente, Faustino García, y el secretariu, Celestino García- acompañaron na so comparecencia a Valledor, que recordó la convocatoria, inda abierta, pa la concesión d’ayudes económiques a los asturianos residentes nel esterior que sufren dalgún tipu de discapacidá física, síquica o sensorial.

Renovar los centros asturianos nel esterior con sangre mozo. El Gobiernu autonómicu plantega esi envís como prioritariu nes sos polítiques d’emigración y avanza, nuna nota emitida esta mañana, que centrará los sos esfuerzos en vincular a los xóvenes “de l’Asturies interior” cola mocedá “de l’Asturies esterior” pa evitar la muerte natural de les comunidaes asturianes espardíes pol mundu.

Nesti sen, el plan que l’Executivu autonómicu ultima pa organizar les sos acciones na estaya d’emigración hasta 2007 tendrá como ún de los sos pegollos la participación de fíos d’asturianos emigraos n’actividaes desendolcaes n’Asturies, considerando a esos emigrantes de segunda xeneración como “un auténticu capital social pa la comunidá de nueso”.

Un primer pasu prácticu d’esa declaración d’intenciones ye la llegada al Principáu, por primer vegada, de seis fíos d’asturianos emigraos a Llatinoamérica pa tomar parte de tres campos veraniegos de trabayu allugaos nos conceyos de Cabranes, Casu y Cangas de Narcea, tres de los municipios que rexistraron mayor númberu d’emigrantes a América na dómina d’entesieglos.

Los mozos, procedentes d’Arxentina y Venezuela y cuya estancia n’Asturies financien l’Institutu Asturianu de la Mocedá y l’Axencia Asturiana d’Emigración, mantuvieron esta mañana un alcuentru col conseyeru de Xusticia, Seguridá Pública y Relaciones Esteriores, Francisco Javier García Valledor; y el director de l’Axencia d’Emigración, Luis Miguel Fernández Romero, antes d’aconceyar con responsables del Conseyu de la Mocedá pa informase de les esmoliciones de la xuventú asturiana.

Relevu na cúpula’l Conseyu de Comunidaes Asturianes. Manuel Fernández de la Cera, conseyeru de Cultura nel primer gobiernu autonómicu de la democracia reciente, foi designáu güei presidente de la entidá en sucesión d’Antonio Trevín, qu’abandonara el cargu n’abril pasáu al ser nomáu delegáu del Gobiernu n’Asturies.

Hasta agora, De la Cera exercía como vicepresidente del Conseyu, un organismu creáu por llei en 1984 como máximu muérganu consultivu del Gobiernu’l Principáu na actividá de les comunidaes d’asturianos emigraos. Nesti sen, el Conseyu de Comunidaes tien ente les sos competencies la d’alitar la difusión y conservación de l’asturianía al traviés de la promoción de la llingua y cultura asturianes nel esterior.

Fernández de la Cera plantégase agora como prioridá del so mandatu la “continuidá” de la tradición cultural d’Asturies fuera’l Principáu, y avanza que centrará los sos esfuercios al frente de la entidá n’evitar que se pierda “la güelga d’Asturies nel mundu”.

El nuevu presidente’l Conseyu de Comunidaes Asturianes acompañó al conseyeru de Xusticia, Seguridá Pública y Relaciones Esteriores, Francisco Jacier García Valledor, nel so últimu viaxe per América Llatina, qu’incluyó visites a Venezuela, Nicaragua y El Salvador.

Web oficial del Conseyu de Comunidaes Asturianes

La comunidá emigrante en Venezuela estrena instalaciones na capital del país, Caracas. El conseyeru de Xusticia, Seguridá Pública y Relaciones Esteriores, Francisco Javier García Valledor, inagurará esta medianueche -hora española- el nuevu equipamientu, nun alcuentru colos emigrantes asturianos afincaos en Venezuela que pesllará’l viaxe que’l conseyeru realiza por América Llatina.

L’actu ta previstu pa les 18 hores, según l’horariu llocal venezolanu, ya inclúi una cena de confraternización cola comunidá emigrante. Pa mañana, vienres 9 de xunetu, ta fixáu el regresu de Valledor a Asturies, depués de mantener una posible xuntanza col presidente de la Comisión Permanente de Política Esterior de Venezuela, Tarek William Saab.

Dientro de la visita que cursa dende hai una selmana a Nicaragua, El Salvador y la propia Venezuela, el conseyeru de Relaciones Esteriores del Principáu peslló la so estancia nel segundu d’esos países cola entrega, anteayeri, de 31 cases a families ensin recursos na llocalidá de Nejapa, al norte d’El Salvador.

Los inmuebles edificárense col apoyu económicu del Gobiernu’l Principáu y del Ayuntamientu de Xixón nos terrenos de la vieya comunidá de ‘Calle Vieja’, qu’agora pasa a llamase ‘Nueva Esperanza’.