El Principáu plantega la participación de la mocedá de la “Asturies esterior” como prioridá n’emigración

Renovar los centros asturianos nel esterior con sangre mozo. El Gobiernu autonómicu plantega esi envís como prioritariu nes sos polítiques d’emigración y avanza, nuna nota emitida esta mañana, que centrará los sos esfuerzos en vincular a los xóvenes “de l’Asturies interior” cola mocedá “de l’Asturies esterior” pa evitar la muerte natural de les comunidaes asturianes espardíes pol mundu.

Nesti sen, el plan que l’Executivu autonómicu ultima pa organizar les sos acciones na estaya d’emigración hasta 2007 tendrá como ún de los sos pegollos la participación de fíos d’asturianos emigraos n’actividaes desendolcaes n’Asturies, considerando a esos emigrantes de segunda xeneración como “un auténticu capital social pa la comunidá de nueso”.

Un primer pasu prácticu d’esa declaración d’intenciones ye la llegada al Principáu, por primer vegada, de seis fíos d’asturianos emigraos a Llatinoamérica pa tomar parte de tres campos veraniegos de trabayu allugaos nos conceyos de Cabranes, Casu y Cangas de Narcea, tres de los municipios que rexistraron mayor númberu d’emigrantes a América na dómina d’entesieglos.

Los mozos, procedentes d’Arxentina y Venezuela y cuya estancia n’Asturies financien l’Institutu Asturianu de la Mocedá y l’Axencia Asturiana d’Emigración, mantuvieron esta mañana un alcuentru col conseyeru de Xusticia, Seguridá Pública y Relaciones Esteriores, Francisco Javier García Valledor; y el director de l’Axencia d’Emigración, Luis Miguel Fernández Romero, antes d’aconceyar con responsables del Conseyu de la Mocedá pa informase de les esmoliciones de la xuventú asturiana.