Emigración

La conseyera de Presidencia del Gobiernu del Principáu Mª José Ramos inauguró esta Selmana na Oficina de la so representación en Bruseles la esposición: ‘Campesinas’, una amuesa de 42 fotografíes realizaes por Mª Aurora Carbajal y Jesús López alrodiu de muyeres campesines asturianes. La esposición va poder visitase na Casa d’Asturies en Bruseles, nel Edificiu Asturies-Le Peuple hasta’l prósimu 22 de marzu. Amás de los retratos de muyeres campesines asturianes l’amuesa ufierta fotografíes de campesines d’otros países como Portugal y Grecia.

Pal gobiernu del Principáu, organizador de l’amuesa na capital europea, la fecha d’inauguración de ‘Campesinas’ ta “cargada d’un doble simbolismu” pola so prosimidá al 20 de febreru, fecha nel que los asturianos y los demás ciudadanos del estáu, rafiticaron nun referendu la Constitución Europea y, tamién pola so cercanía al 8 de marzu, Día Internacional de les Muyeres.

La esposición na ’embaxada’ d’Asturies en Bruseles quier valir pa cumplir un de los oxetivos d’esi edificiu del Principáu, el de ser una plataforma de difusión cultural al serviciu de los asturianos residentes en Bélxica. L’Edificiu Asturies-Le Peuple, inauguróse’l mes pasáu de setiembre y ye la sé oficial del gobiernu asturianu na capital de la Unión Europea.

La esposición fotográfica “Campesinas, mujeres mayores del campo” ye un proyecto promovido por el Instituto Asturiano de la Mujer ye la primera esposición que se presenta na nueva sé de la Oficina del Principáu en Bruseles.

La conseyera Mª José Ramos, qu’acudió en representación del presidente Vicente Alvarez Areces, con quien se contaba y que finalmente, por razones de agenda, no pudo asistir, desplicó nel so discurso que la esposición “ye un homenaxe del gobiernu del Principáu a eses muyeres mayores del campu que cola so llucha y el so sacrificiu d’años contribuyeron abondo a que les xeneraciones futures puedan disfrutar güei d’un estáu de bienestar qu’ellas nun tuvieron”.

Les fotografíes, realizaes a lo llargo de los últimos ocho años por Mª Aurora Carbajal Alvarez y Jesús Suárez López en diferentes conceyos asturianos, reflexen momentos na vida de la muyer asturiana del campu, una muyer que nun oculta los signos del pasu del tiempu y que lluz les sos canes y la so piel surcao, invisible y silencioso.

La mayoría d’ellas miren directamente al oxetivu del fotógrafo, amosando una vez más la valentía y el coraxe colos que afrontaron los duros tiempos que-yos tocó vivir. Otras baxen el rostru y contémplense les manes con xestu pensativu, como si nun les reconocieren depués de toa una vida de llabor na tierra. En toes s’aprecia un componente de soledá y d’una cierta infelicidá que nun dexa indiferente a quien les contempla.

Según datos aportaos pol Institutu Asturianu de la Muyer, munches de estas muyeres contribuyeron a la economía familiar trabayando fuera de les sos cases (planchadores, bordadores, guisanderes, tenderes, llecheres…) y el so trabayu foi y ye fundamental pal desarrollu de les esplotaciones familiares agraries. Sicasí, el 80% d’ellas cobra pensiones inferiores al Salariu Mínimu Interprofesional y les sos pensiones contributives son un 94% más baxes que les de los homes.

Al actu d’inauguración, que contó con una considerable afluencia de públicu al pesar de les baxes temperatures que se tán rexistrando na capital belga, acudieron tamién Victoria Morera, embaxadora d’España énte el Reinu de Bélxica, Magda de Galán, miembra del Parlamentu de la Rexón de Bruseles-capital, y Antonio Massip, eurodiputado socialista.

La Conseyería de Xusticia y Esteriores quier reconocer a los artistes y grupos que collaboraron nos programes d’espardimientu de la nuestra cultura ente les colonies d’emigrantes asturianos repartíes per Europa y el continente americanu. Va facelo esti xueves 3 nun actu presidíu pol conseyeru García Valledor nel que más d’una cincuentena d’artistes, grupos de baile y teatru van recibir una distinción, consistente nuna escultura creada por Astur Paredes pa la ocasión y titulada Páxaru Atlantis.

L’actu va celebrase na Sala de Cámara del Auditoriu d’Uviéu con una gala musical na que van actuar Vicente Prado ‘El Pravianu’, Mari Luz Cristobal Caunedo, Annabel Santiago, Michael L. Wolfe, Xuacu Amieva y el Coru La Flor.

Ente los premiaos figuren alrodiu de mediu centenar d’agrupaciones de baile y d’investigación etnográfica y una representativa nómina de músicos del país , ente ellos Mari Luz Cristobal Caunedo, Joaquín Pixán, Chus Pedro, Anabel Santiago, Pedru Pereira, asina como los grupos Dixebra, Corquiéu, Felpeyu, Los Berrones o Deua-Dubra.

El premiu quier amosar l’agradecimientu del gobiernu del Principáu pola disposición de toos esos artistes y colectivos a esparder la cultura asturiana ente los miles d’emigrantes de la nuestra comunidá repartíos per tol mundu.

Brasil axúntase a la llista. El Principáu inclúi por primer vegada esi país na llista preliminar de places pa la ‘Operación Señaldá’, el programa añal que-yos facilita un viaxe de dos selmanes a Asturies a emigrantes mayores de 65 años, xunta Uruguay, Arxentina, Venezuela y Cuba. El programa de repatriación, cuya convocatoria xeneral d’espubliza güei nel Boletín Oficial del Principáu, prevé pa esta edición un total de 45 places.

Esa cifra supón casi la mitá de los emigraos que participaron na ‘Operación Señaldá’ en 2004, pero entós rexistróse un aumentu equívocu: Depués que’l programa se paralizare en 2003 por falta d’una asignación presupuestaria específica, l’Axencia Asturiana d’Emigración viose obligada a axuntar na edición del añu pasáu a los beneficiarios escoyíos en 2003 y a los del propiu 2004.

Poro, el númberu de places regresa agora a los niveles habituales -en tornu a 40 emigrantes retornaos cada añu- y, amás d’acutar por primer vegada dos places p’asturianos emigraos al Brasil, sigue destinando la mayor cantidá de reserves p’Arxentina (25). Tamién podrán solicitar el viaxe de regresu al Principáu, como n’ocasiones anteriores, emigrantes afincaos en Venezuela, Cuba y Uruguay.

Según precisa la convocatoria asoleyada güei nel BOPA, el plazu pa la presentación de solicitúes permanecerá abiertu hasta’l prósimu 6 de mayu, y al programa podrán acoyese asturianos emigraos que tengan más de 65 años d’edá y que lleven a lo menos 40 años ensin regresar a España, si bien s’alminitrán escepcionalmente emigrantes menores de 65 años que nun tengan tornao nos últimos 45 años.

Los 45 seleccionaos tomarán parte d’un viaxe sufragáu pol Principáu de quince díes de duración, anque quienes caltengan virgayos familiares n’Asturies podrán prollongar la estadía delles selmanes más. Como novedá respecto a ediciones anteriores, el viaxe adelántase nesta ocasión a la segunda quincena de setiembre.

Convocatoria íntegra nel BOPA

“Yo tamién soi una lleenda urbana”. Con esi espresivu títulu, xóvenes asturianos emigraos por motivos llaborales unvíen dende ayeri cientos de correos ellectrónicos pa censurar les pallabres del presidente autonómicu, Vicente Álvarez Areces, que’l pasáu miércoles negó la marcha masiva de titulaos na Universidá d’Uviéu. Los asturianos ausentes considérense insultaos por Areces y defínense como “una parte’l fracasu políticu”.

Nos mensaxes que los postuniversitarios asturianos emigraos empobinen a medios de comunicación y, n’ocasiones, al corréu personal del propiu presidente autonómicu, hai una reivindicación central: Constatar que miles de xóvenes asturianos se vieron obligaos a abandonar el Principáu a la gueta d’un puestu de trabayu, en contra del argumentu’l presidente y de la conclusión principal d’un estudiu de la Universidá d’Uviéu que sostién que sólo’l 23 por cientu de los llicenciaos y diplomaos emigra.

De los resultaos d’esi informe, allaboráu a partir del sesenta por cientu de la promoción d’estudiantes qu’acabó los sos estudios nel cursu académicu 2000-2001 na Universidá asturiana, tanto’l presidente’l Principáu como’l responsable de la investigación, el caderalgu Joaquín Lorences, dixeron estrayer que nun ye cierto que cuelen d’Asturies los xóvenes más cualificaos.

Asinamesmo, la investigación afaya un altu porcentaxe de postuniversitarios que realiza trabayos poco o nada relacionaos colos estudios que cursaron, y afita que los titulaos con meyores notes son los que primero y meyor se coloquen nel marcáu llaboral.

Un estudiu de la Universidá conclúi que sólo la cuarta parte de los titulaos emigra d’Asturies por trabayu

La mocedá emigrao estrencha los sos vínculos. L’asociación Asturianos en Madrid, entidá que comparte col centenariu Centru Asturianu el realcuentru de los emigrantes na capital d’España, supera los 1.300 socios, una cifra qu’amuesa una tendencia creciente de la voluntá de los emigraos más mozos a integrase n’asociaciones específiques. El collectivu entama una ‘fabada-dance’ pa conmenorar la festividá de San Valentín.

Al traviés d’esta iniciativa, qu’axuntará el sábadu a unos 600 xóvenes del Principáu na llocalidá madrilana de Cantoblanco, l’asociación d’asturianos declara que quier camudar el tradicional ‘di-ylo con flores’ asociáu al Día de los Namoraos por un más autóctonu ‘di-ylo con fabes’.

La multitudinaria espicha arrancará al mediudía con pinchos de bienvenida, ente ellos bollos preñaos, tostes de cabrales y embutíos del país, y siguirá cola fabada. Depués de la xinta, el dj Luis Mulero amenizará una sesión de baille prevista hasta les 23,30 hores.

El pasáu mes de setiembre, el Gobiernu autonómicu escoyó Madrid como l’escenariu de la primer cellebración itinerante del Día d’Asturies nel esterior, col envís d’escenificar l’intierru de la llarga engarradiella qu’enfrentó a los dos principales collectivos d’emigrantes en Madrid, l’asociación Asma y el Centru Asturianu.

Archivu. El Principáu quier escenificar nos actos al rodiu’l 8 de Setiembre la xunidá de la colonia asturiana en Madrid

Estender los beneficios de l’asturianía a non descendientes d’emigrantes que destaquen pola so participación y rexuvenecer la Federación Internacional de Centros Asturianos (FICA) cola incorporación de comisiones de mocedá. Son dos de les propuestes finales del I Alcuentru de Mocedá pola Asturianía del Conu Sur, que finó’l pasáu llunes na llocalidá arxentina de Mendoza.

Nuna sola fueya qu’incorpora ocho conclusiones finales, los descendientes d’asturianos emigraos a Sudamérica planteguen que tamién los non descendientes destacaos nel so llabor pola asturianía puean incorporase llegalmente a los programes sociales entamaos pol Principáu, ún de los pegollos nos qu’anguaño s’afita el llabor de l’Axencia Asturiana d’Emigración.

Amás, los xóvenes aconceyaos en Mendoza entienden que les organizaciones d’emigrantes asturianos tienen que renovase xeneracionalmente, empezando pola FICA y pol Conseyu de Comunidaes Asturianes, y aseguren que la comunicación ente los emigraos espardíos pol mundu ha meyorase al traviés d’una nueva páxina web xestionada pol Gobiernu’l Principáu.

L’alcuentru d’Arxentina dio-y amás especial atención a la formación: Na llista de conclusiones, los mozos y moces participantes nel cónclave felicítense pola propuesta’l Principáu de becar a diez estudiantes pa qu’estudien na Universidá d’Uviéu, y proponen entamar seminarios itinerantes d’asturianía n’América con profesores llegaos d’Asturies.

El primer Alcuentru de Mocedá pola Asturianía del Conu Sur, qu’axuntó a un cientu de participantes n’Arxentina ente’l 21 y el 24 de xineru, ficieron asinamesmo un llamáu a propiciar torneos de bolos ente les estremaes comunidaes d’emigraos asturianos a Sudamérica.

Los estudiantes asturianos en Londres, al traviés de l’asociación ACTA, decidió entrega-y el premiu ‘Astures’ na so segunda edición a la emisora belga Radio Alma, qu’emite dende Bruseles con atención especial pa los inmigrantes procedentes del Sur d’Europa, ente ellos los europeos.

La emisora recibirá’l galardón tanto por mantener una programación específica pa la colonia asturiana en Bélxica, con a lo menos un espaciu selmanal en llingua asturiana, como por destacase a lo llargo de 2004 na promoción de la música tradicional fecha nel Principáu, cola organización de conciertos de los grupos Felpeyu, Deua Dubra, Tarañu y Risca l’Alba.

El sitiu web de Radio Alma, habilitáu na so versión actual hai agora dos años, recibe más de 800 visites diaries d’internautes interesaos nel funcionamientu y la programación de la emisora, na qu’andechen noventa voluntarios.

Web de Radio Alma

La comunidá emigrada a Brasil quier da-y nuevos aires al centru asturianu de la ciudá de Sao Paulo col sofitu’l Principáu. El conseyeru de Xusticia y Relaciones Esteriores, Francisco Javier García Valledor, y el director de l’Axencia Asturiana de Cooperación al Desarrollu, Rafael Palacios, recoyeron ‘in situ’ esa demanda nel trescursu de la visita que dambos realicen a Brasil.

Los representantes del Gobiernu autonómicu ratificaron la implicación del Principáu nel rellanzamientu’l centru de la comunidá asturiana en Sao Paulo, con cuya directiva mantuvieron un alcuentru na sé de la entidá. Esa xuntanza valió tamién pa que Valledor y Palacios renovaren les declaracones d’intenciones espresaes durante la visita que’l presidente’l Principáu, Vicente Álvarez Areces, cursó a Sudamérica n’ochobre pasáu.

El conseyeru de Relaciones Esteriores y el director de l’Axencia de Cooperación aconceyaron ayeri na ciudá de Brasilia, nel interior del país, col ministru brasileñu de Desarrollu Social y Llucha contra la Fame, Patrus Ananias, quien agradeció los 200.000 euros colos que’l Principáu va contribuyir en 2005 p’allugar depósitos d’agua con garantíes sanitaries a disposición de más de 600 families brasileñes.

La delegación del Gobiernu asturianu, que güei tien previsto entrevistase con otres autoridaes llocales d’estremaos países del Conu Sur Americanu, tomará parte mañana nel Foru Social Mundial de Porto Alegre, ún de los mayores espacios alternativos d’alderique abiertos nel ámbitu internacional por mor de les reivindicaciones de los militantes y países opuestos a la globalización del neolliberalismu.

Dos cares de la emigración, a debate. Alredor d’un cientu de xóvenes descendientes d’asturianos participarán, a partir del xueves, nel Primer Alcuentru de Mocedá pola Asturianía, que se cellebra na llocalidá arxentina de Mendoza con participantes de siete países y dos grandes asuntos pa discutir: la situación de los fíos y nietos d’asturianos en Llatinoamérica y la nueva emigración de xóvenes qu’abandonen anguaño’l Principáu.

Pa llevar a bon puertu les discusiones de la xuntanza, que se prollongará hasta’l llunes 24 de xineru, dos representantes del Conseyu de la Mocedá del Principáu d’Asturies y una tercera procedente’l Centru Asturianu d’Alcobendas, en Madrid, viaxarán a Arxentina pa presentar ponencies qu’ayuden a enveredar el discutiniu.

De Mendoza, los miembros de la embaxada asturiana desplazaránse a la llocalidá chilena de Valparaíso con un doble envís, entrega-y el premiu del concursu de relatu entamáu pola asociación Les Filanderes a la so ganadora, que reside en Chile, y facer lo propio cola orla’l primer cursu de llingua asturiana que s’impartió nel centru asturianu de Valparaíso.

El director de l’Axencia Asturiana d’Emigración, Luis Miguel Fernández Romero, presentó esta mañana’l conteníu del alcuentru xunta la presidenta de Les Filanderes, Asunción Naves, y ún de los representantes del Conseyu de la Mocedá que viaxará a Arxentina, Pablo Prieto.

Archivu. https://www.asturnews.com/index.php?idn=827

Implicar a la mocedá na actividá diaria de los centros asturianos. Con esi envís prioritariu cellebraráse en xineru na llocalidá arxentina de Mendoza, el oeste’l país, el Primer alcuentru de mocedá del Conu Sur, un eventu que tendrá periodicidá biañal y nel que van participar un total de cincuenta mozos d’Asturies y Sudamérica.

Na presentación de la iniciativa, que se dio a conocer esti mediudía n’Uviéu y cuenta col auspiciu de l’Axencia Asturiana d’Emigración, el director d’esti organismu, Luis Miguel Fernández Romero, recordó que l’alcuentru respuende a lo previsto nel Plan Integral d’Emigración del Principáu, y felicitóse d’un cónclave hasta agora inéditu que se prollongará ente’l 20 y el 24 de xineru prósimu.

El programa del eventu afita pa les dos primeres xornaes un análisis del estáu de salú de l’asturianía nes estremaes comunidaes d’emigrantes en Sudamérica, intercambiu de folclore y espectáculos, mientres que’l domingu 23 resérvase como xornada turística pa los participantes y el día’l retornu, 24 de xineru, incluyirá la evaluación del alcuentru, que contará con una web propia y buscará la mayor difusión posible na prensa llocal.

A la presentación de la iniciativa asistieron asinamesmo Leonardo Quercetti, representante del Centru Asturianu de Mendoza, y María Alonso, vicepresidenta del Conseyu de la Mocedá del Principáu, quien saludó l’alcuentru de xóvenes como una ferramienta pa sofitar el vínculu ente los asturianos del Principáu y los que residen nel esterior.

Col alcuentru de xóvenes del Conu Sur, nel que tomarán parte mozos d’ente 15 y 30 años d’edá, el departamentu d’Emigración del Principáu afita’l so interés poles comunidaes asturianes emigraes a América del Sur, que’l presidente Vicente Álvarez Areces y el conseyeru de Relaciones Esteriores, Francisco Javier García Valledor, visitaron n’ochobre pasáu.