La comunidá emigrada a Brasil busca’l rellanzamientu’l centru asturianu de Sao Paulo

La comunidá emigrada a Brasil quier da-y nuevos aires al centru asturianu de la ciudá de Sao Paulo col sofitu’l Principáu. El conseyeru de Xusticia y Relaciones Esteriores, Francisco Javier García Valledor, y el director de l’Axencia Asturiana de Cooperación al Desarrollu, Rafael Palacios, recoyeron ‘in situ’ esa demanda nel trescursu de la visita que dambos realicen a Brasil.

Los representantes del Gobiernu autonómicu ratificaron la implicación del Principáu nel rellanzamientu’l centru de la comunidá asturiana en Sao Paulo, con cuya directiva mantuvieron un alcuentru na sé de la entidá. Esa xuntanza valió tamién pa que Valledor y Palacios renovaren les declaracones d’intenciones espresaes durante la visita que’l presidente’l Principáu, Vicente Álvarez Areces, cursó a Sudamérica n’ochobre pasáu.

El conseyeru de Relaciones Esteriores y el director de l’Axencia de Cooperación aconceyaron ayeri na ciudá de Brasilia, nel interior del país, col ministru brasileñu de Desarrollu Social y Llucha contra la Fame, Patrus Ananias, quien agradeció los 200.000 euros colos que’l Principáu va contribuyir en 2005 p’allugar depósitos d’agua con garantíes sanitaries a disposición de más de 600 families brasileñes.

La delegación del Gobiernu asturianu, que güei tien previsto entrevistase con otres autoridaes llocales d’estremaos países del Conu Sur Americanu, tomará parte mañana nel Foru Social Mundial de Porto Alegre, ún de los mayores espacios alternativos d’alderique abiertos nel ámbitu internacional por mor de les reivindicaciones de los militantes y países opuestos a la globalización del neolliberalismu.