Emigración

El presidente del Conseyu de Comunidaes Asturianes, Manuel Fernández de la Cera y el Director Xeneral de Relaciones Institucionales y del Serviciu Xurídicu de la Conseyería d’Esteriores del Principáu, Manuel Cabaleiro, presentaron ayer n’Uviéu la segunda promoción de la Escuela de Veranu d’Asturianía. La iniciativa, inxertada nel Plan Integral d’Emigración, tenta que les nueves xeneraciones de los asturianos del esterior caltengan los sos raigaños col so país d’orixen.

Esti programa, que tuvo la so primer promoción ente los años 2002 y 2004 quier ufiertar dar a los fíos de los emigrantes una formación afayadiza de l’Asturies actual y afalalos a participar nes actividaes de los centros y cases asturianes del esterior. Atendiendo a ello, el Plan Integral d’Emigración (2004-2007) incorpora la Escuela de Veranu d’Asturianía dientro la so cuarta estaya: “Pa que los asturianos del mundu s’organicen en comunidá”, como llínea d’ actuación xestionada pol Conseyu de Comunidaes.

Los oxetivos de la Escuela son l’afondamientu del significáu de la “Asturianía” y el so ordenamientu normativu;divulgar la estructura, organización y funcionamientu del Conseyu de Comunidaes Asturianes y de los centros asturianos y entidaes asemeyaes homologaes pol Principáu; potenciar la conservación de les nuestres tradiciones y velar poles características esenciales y diferenciadoras de la nuestra cultura popular. El programa tamién tien una parte formativa pa cualificar monitores de cultura y música tradicional asturianes que puedan formar a la so vez a otres persones y dinamizar l’actividá cultural nos sos centros asturianos.

El Plan d’estudios desenvuélvese nun ciclu de tres cursos de 15 díes caún que se van entamar n’Uviéu los meses de xunetu de 2005, 2006 y 2007, con un total de 300 hores llectivas (100 hores por cursu). L’alumnáu puede escoyer ente les especialidaes de Baile Tradicional o Gaita. Al final del ciclu van recibir un “Diploma de Monitor/a de Cultura y Música Tradicional Asturianes”.

La Escuela d’Asturianía convocó pa esti añu un total de 26 places, pa les que se presentaron 43 solicitúes. Nesta segunda promoción van participar mozos y moces residentes n’España, Arxentina, México, Chile, Cuba, Uruguay , Venezuela y Bélgica.

Emigrastur

El conseyeru de Xusticia y Esteriores, Francisco José García Valledor, nun desaprovechó ayer el clima favoratible a la normalización del asturianu que se vivió nel plenu de la Xunta Xeneral col respaldu de los tres grupos parlamentarios a la política llingüística del gobiernu’l Principáu y defendió nesi idioma el Plan Integral d’Emigración elaboráu pol so departamentu. Pal titular d’Esteriores, el Plan yera “una delda que tenía Asturies colos sos tresterraos” y qu’hasta la llegada del actual gobiernu la nuestra comunidá “más que como una madre, comportárase como una madrastra cola nuestra xente del esterior”.

Valledor quiso asitiar les inicitives entamaes pola so conseyería respective a los emigrantes nun contestu xeneral de política asturiana onde’l referente fuera la voluntá de facer país: “cualquier proyeutu de país, de Comunidá que se quiera construir tien de tener en cuenta a esa xente, xente d’Asturies, en definitiva la nuestra xente”, afirmó n’asturianu, la única llingua qu’emplegó en tola so intervención.

El conseyeru punxo d’exemplu a los asturianos del esterior que “crearon sociedaes solidaries colos sos paisanos más necesitaos, organizaron centros que constitúin auténtiques embaxaes d’Asturies y desarrollaron acciones de calter sociocultural que permitieron nel pasáu y siguen permitiendo güei qu’Asturies seya protagonista en multitú de rincones del mundu”. García Valledor tamién quiso resaltar la importancia de los emigrantes como puxadores d’iniciatives “pal rellanzamientu de la nuestra tierra que non siempre fueron atendíes como se mererecíen”.

Na esposición del Plan Integral d’Emigración el conseyeru de Xusticia y Esteriores foi relatando cómo s’elaboró esti proyectu nel que remarcó “tuvieron un papel esencial los propios asturianos del esterior coles sos aportaciones” y darréu enumeró les distintes iniciatives tanto de calter solidariu y de cobertura a les necesidaes básiques de los emigrantes más desfavorecíos, como les diverses llabores de difusión de la cultura y les señes d’identidá del nuestru país en toles comunidaes asturianes espardíes pel mundu.

El conseyeru remató la so intervención amosando’l so arguyu de que “Asturies cuente con un Plan pa los asturianos del esterior participáu na so ellaboración por ellos mesmos, modélicu nos sos conteníos, dotáu presupuestariamente y que ta desarrollándose” y de que “nenguna otra comunidá autónoma s’allega a los niveles de transversalidá que tien el modelu asturianu de política pa la emigración”. Valledor definió el Plan como “axenda social para la xente emigrante y l’Asturies del esterior aprobáu n’agostu del añu pasáu, concrétense eses acciones, esa ‘fueya de ruta’ pa que la nuestra xente compruebe que nin nos escaecimos d’ella, nin tenemos intención d’abandonalos nin agora nin nel futuru y que queremos xustamente lo contrario, que participen colos asturianos d’equí nel ambiciosu proyeutu de construir una Asturies más próspera, más xusta, más solidaria, mas igualitaria y más sostenible”, afirmó.

Comisiones Obreres d’Asturies presentó esti miércoles 15 un informe sobre la situación llaboral de la mocedá asturiana nel qu’ente otros datos llámase l’atención sobre’l fechu de que la nuestra comunidá alpenes tien un 19 por cientu de población xuvenil, les tases de desempléu y temporalidá llaboral son les más altes del estáu, namás superaes por Ceuta y Melilla. L’informe constata tamién la fuxida de la mocedá asturiana a otres comunidaes en busca de trabayu, dalgo que pal sindicatu “ye una realidá, nun se trata d’una llienda urbana”.

Antonio Pino y Adrián Redondo presentaron esti miércoles 15 en rueda de prensa l’informe sobre la mocedá nel mercáu llaboral asturianu en 2004. El secretariu xeneral de CC.OO. d’Asturies dio a conocer les principales conclusiones del estudiu elaboráu pol sindicatu, qu’amuesen un panorama que los reprentantes sindicales calificaron de “desolador”, y contrapunxeron a “la irrealidá na que s’espresa el presidente del Gobiernu rexonal, Vicente Alvarez Areces”.

Pel so llau, el secretariu de Mocedá de CC.OO. d’ Asturies afondó nos principales datos recoyíos nel estudiu y llamó l’atención alrodiu de la precariedá llaboral que sufre la mocedá asturiana. Amás, àpuntó que “los nuevos modelos d’organización del trabayu implantaos pol neolliberalismu tán ensañándose sobremanera con esti colectivu.

L’informe destaca nes sos conclusiones que nel añu 2004, d’alcuerdu colos datos de la Encuesta de Población Activa referíos al cuartu trimestre, ”la tasa de empleu xuvenil baxó en cuatro puntos porcentuales mientres que’l nivel de desempléu medró en dalgo más d’un puntu”. L’informe resalta tamién que ”alpenes ún de cada cuatro xóvenes asturianos tá ocupáu”. Esta tasa de empléu xuvenil (24,11%) ye, según CCOO, la segunda más baxa del Estáu, namás superior a la de Ceuta y Melilla. Pa los autores del informe: ”Ye precisamente la dificultá d’acceder a un empléu la razón que desplica que tres de cada cuatro xóvenes asturianos n’edaes comprendíes ente los 18 y los 34 años continúen viviendo colos sos pás’. La tasa de emancipación de la mocedá asturiana (25,9%) ye, según resaltó’l responsable del area xuvenil de CCOO,tamién la más baxa del estáu.

El gobiernu del Principáu acaba de publicar nel so boletín oficial la convocatoria de subvenciones y ayudes a emigrantes pa participar na llamada Escuela d’Asturianía que va celebrase esti veranu n’Uviéu. Los cursos van empobinaos a la formación de monitores que puedan desenvolver al empar llabores d’espardimientu de la identidá cultural del país nes colectividaes de l’Asturies esterior. La cultura y la música tradicional asturianes son les materies impartíes na Escuela de Veranu d’Asturianía.

La convocatoria pública del Principáu tien por oxetu regular l’accesu a la segunda promoción de la Escuela de Veranu d’ Asturianía, dependiente del Conseyu de Comunidaes Asturianes (Conseyería de la Presidencia), y establecer el réximen d’ayudes pa participar nel primer cursu del ciclu col fin de la formación de monitores de cultura y música tradicional asturiana. El programa de la segunda promoción organízase con un total de 300 hores llectives, distribuíes en tres cursos o niveles a pa entamar nos meses de xunetu de los años 2005, 2006 y 2007. El primer cursu va celebrase n’Uviéu del 14 al 28 de xunetu de 2005, entrambos incluíos.

Les bases de la convocatoria afiten que los que resulten beneficiarios/es de les ayudas y, poro, participantes nel primer cursu del ciclu, tienen derechu a participar nos dos cursos siguientes que, nel so casu, s’organicen, formando parte de la segunda promoción, asina como la correlativa obligación de participar nellos nos términos establecíos nes bases.

Una vez superaos los tres cursos del plan d’estudios y el períodu de práctiques que s’estableza, el Conseyu de Comunidaes Asturianes habrá espurrir el correspondiente “Diploma de Monitor/a de Cultura y Música Tradicional Asturiana” con especificación de la especialidá cursada: gaita, baile tradicional o canción asturiana.

4. Se convocan un total de 26 plazas repartidas de la siguiente forma: 10 plazas para la especialidad de Gaita, 10 para la de Baile y 6 plazas para la de Canción Asturiana. La Consejería de la Presidencia podrá, a propuesta de la Comisión de Selección, aprobar la acumulación de plazas de una especialidad a otra, según se regula en la base sexta, punto 5, de esta convocatoria.

Los versos de cuatro poetes y los sones del grupu folk Tarañu llevaron al corazón de los emigrantes de Bruseles la emoción poles palabres de la tierra en dos actuaciones celebraes esti viernes 21 y el sábadu 22 na capital belga. L’Edificiu Asturies, propiedá del Principáu, y la Sala Au Ryad del Midi, fueron los escenarios onde los asturianos de la diáspora se realcontraron cola so identidá más íntima al través de la música y la poesía na nuestra llingua.

Tarañu y los poetes Pablo Texón, Esther Prieto, Inaciu Galán y Pablo Antón Marín Estrada acudíen a Bruseles como parte del programa “Voces d’un país nel mundu ” col que l’Axencia Asturiana d’Emigración quier llevar a les colonies d’emigrantes una amuesa de la nuestra cultura. La cita foi el viernes nel salón d’actos del Edificiu Asturies y consistió nun emotivu actu nel que s’alternaron les pieces musicales de Tarañu colos poemes propios o d’otros autores que lleeíen los autores presentes. Munchos d’esos poemes de Prieto, Texón, Galán y Marín Estrada falaben de realidaes que nun-yos abultaben ayenes a los emigrantes qu’asistieron al actu: versos del desrraigañu, la señaldá, l’esmolecimientu por una tierra “que cai y un mundu que muerre” -en palabres d’un de los poetes- y na que toos, los que viven nella y los que tan llueñe, siguen teniendo sueños puestos, la emoción que vibra en remembrala.

Na tarde-nueche del sábadu 22 celebróse la segunda parte del programa consitente nuna amuesa de música folk

na que participaron amás de Tarañu, el grupu astur-catalán Risca l’Alba, la Contrabanda, formáu por músicos asturianos y gallegos de Bruseles, y una bandina de gaites del Centru Gallegu. Nel festival taba previsto que tamién intervinieren los poetes participantes en “Voces d’un país nel mundu”, pero razones d’axuste de programa d’última hora impidiéronlo.

A lo llargo d’esta selmana y hasta’l domingu van siguir les actividaes del Centru Asturianu, cola incorporación a les mesmes del grupu Deua Dubra y los músicos Xosé Nel Espósito y Naciu de La Colla que van actuar el fin de selmana énte la colonia asturiana en Bruseles.

Bruseles va acoyer ente’l los díes 22 y el 28 de abril una amuesa de música y poesía asturianes entamada pola Axencia d’Emigración de la Conseyería de Xusticia y Esteriores y organizada en colaboración col Centru Asturianu de la capital belga y el Centru d’Animación de Llingües d’esa ciudá. Esti adelantru de la celebración de Les Lletres ye parte del proyectu entamáu pola Axencia Asturiana d’Emigración embaxo’l nome “Voces d’un país nel mundu” y va abrise esti viernes 22 con una llectura de poemes a cargu de Pablo Texón, Esther Prieto, Inaciu Galán y Pablo Antón Marín Estrada. El grupu folk Tarañu acompañará nel mesmu escenariu a los poetes esi día nel Edificiu Asturies de Bruseles.

Los actos d’esta amuesa dedicada a la cultura na nuestra llingua na ciudá europea onde residen más asturianos va siguir el sábadu 23 aprovechando la celebración na sala Au Ryad del I Festival de Música Celta Española. Les actuaciones d’esta amuesa de música tradicional tienen previsto entamar a les 2 de la tarde y prolonganse hasta altes horas de la madrugada del sábadu. El Festival contará cola representación asturiana de Tarañu y la colaboración especial del grupu Risca l’Alba, formáu por músicos asturianos afincaos en Barcelona, asina como los grupos Casa Galicia y Contrabanda de Bruseles, y la Banda de Gaites del Centru Asturianu la capital belga. Esi mesmu día los poetes participantes nesti capítulu de “Voces d’un país nel mundu” ufiertaran una nueva llectura de les sos obres.

Nel marcu de la Fiesta de les Llingües que cada añu s’entama por estes feches nes instalaciones de los cines Kinepolis de Bruseles y que cuenta con gran repercusión nes escueles ya institutos del país, el Centru Asturianu va disponer los díes 26, 27 y 28 d’un stand de promoción d’Asturies y de la so llingua con actividaes d’iniciación al folclor, llectura de cuentos y poesía, talleres d’iniciación a la radio a cargo de Radio Sí y degustación de gastronomía asturiana. Na nueche del 27 los asistentes a la fiesta multicultural podrán disfrutar de la música del grupu fol Deua Dubra.

Na presentación d’esta iniciativa pa llevar la nuestra cultura a l’Asturies esterior, el director Xeneral de l’Axencia Asturiana d’Emigración, Luis Miguel Fernández Romero incribió’l proyectu “Voces d’un país nel mundu” dientro la filosofía del Nuevu Plan d’Emigración 2004-2007 que pretende “aparte apoyar a la emigración más necesitada estrenchar los llazos de xuntura más fondos cola xente asturiana nel esterior”. Fernández Romero señaló que tanto los poetes presentes n’amuesa de Bruseles “ente los qu’hai autores ya perafitaos y autores mozos, aunque con una trayectoria ascendente, y los grupos folk que los acompañen, los asturianos de Bruseles van poder disfrutar d’una representación bien interesante de la cultura asturiana más viva”.

La compañía de teatru xixonesa Nun Tris va representar el prósimo 9 de abril na sala Molière d’Anderlecht (Bruselas) la obra d’Armando Palacio Valdés ‘José’, novela de costumes marítimes publicada en 1885, que foi adaptada al teatru recientemente. La representación de ‘José’ en Bruseles enmárcase dientro l’axenda d’ actividades programades esti añu pol Centru Asturianu de la capital belga. Na actuación van participar tamién el Grupu Floklóricu y el Coru del Centru. Ye esta la primer actuación de la compañía asturiana en Bélxica.

La obra orixinal na que se basa l’adaptación teatral que va representar Nun Tris n’Anderlecht cuenta la hestoria de José, un marineru que vive una hestoria d’amor enllena de d’evocaciones líriques y emotives al paisaxe que conoció Palacio Valdés nuna dómina de la so vida que lu diba marcar pa siempre. L’ autor asturianu desarrolla nesta obra toles tradiciones de la so tierra, col mar y los sos recursos como protagonistes. Esta escenificación de ‘José’, na que hai música, danza, imaxen y poesía, estrenóse con gran ésito el pasáu mes de setiembre nel parque de Les Conserveres de Candás, como homenaxe d’esti pueblu a ún de los sos paisanos más ilustres nel 150 aniversariu del nacimientu del autor (inda nació n’Entrialgo, Palacio Valdés siempre tuvo especialmente vinculáu a Candás, onde veraneó munchos años).

Nun Tris nació en 1992 como grupu semiprofesional al acabar dos de los sos componentes, Inma Rodríguez y Toño Caamaño los sos estudios na Escuela de Teatru del ITAE. La compañía y productora d’espectáculos, qu’apostó dende un principiu pol asturianu como llingua dramática, tien la so sé de trabayu en Xixón y los distintos montaxes que conformen el so repertoriu intentan atender a públicos diversos: infantil, adultu, asturianu, calle, enseñanza… El prestixu d’esta compañía, que se tá afianzando como una base de producción artística profesional p’ artistes xóvenes, ya tien trascendío les fronteres internacionales, asina na sétima edición de los Premios ‘Teatro del Mundo’ de Buenos Aires, un xuráu de 32 espertos vinculaos a la universidá bonaeense destacó el montaxe de Nun Tris ‘K’, adaptación de la obra de Kafka ‘El proceso’, como ún de los tres meyores espectáculos teatrales estranxeros que pasaron per Arxentina a lo llargo de 2004. El prósimu mes el público belga va poder disfrutar por vez primera del so talentu.

Lieja, el segundu conceyu en númberu d’emigrantes del nuestru país de Bélxica, acueye esti viernes 25 y mañana sábadu 26 el rellanzamientu del Centru Asturianu con una serie d’actos que van tener el so momentu cume nuna folixa onde van sonar aires de la tierra y a poder degustase productos gastronómicos autóctonos. La folixa convocada embaxo’l lema de ‘Xuntos’ va cuntar cola presencia del conseyeru de Xusticia y Esteriores del Principáu, Francisco Javier García Valledor, convidáu pola presidenta del centru y conceyala nel Ayuntamientu de Lieja Julie Fernández, fía d’emigrantes.

El Centru Asturianu de la segunda colonia d’emigrantes de la nuestra tierra en Bélxica remanez con nueva vitalidá después d’un periodu d’adormecimientu y va facelo con una atopada d’asturianos residentes nel país onde ta la capital de la Unión Europea. Socios del Centru Asturianu de Bruseles y los de la casa hermana de Lieja van xuntase en dos díes repletos d’actos de xermandía ente la comunidá emigrante y de reafirmación de l’asturianidá de los miles de paisanos y paisanes de la nuestra tierra que viven nel país belga.

Los actos empiecen esti viernes 25 a les 18,00 hores con una recepción oficial nel Ayuntamientu de Lieja a la colonia asturiana y a los miembros de la delegación del Principáu, encabezaos pol conseyeru de Xusticia y Esteriores, Francisco José García Valledor, el presidente del Conseyu de Comunidaes Asturianes, Manuel Fernández de la Cera y el presidente de la Federación Internacional de Centros Asturianos (FICA), José Luis Casas. El día grande va ser, sicasí, el sábadu cola celebración de la folixa ‘Xuntos’, una auténtica romería astur que va entamase nuna carpa allugada pol Ayuntamientu de Lieja nel mesmu centru de la ciudá y na xunta a actuaciones de grupos

de música y baile, va ufiertase una espicha con productos autóctonos.

Les actividaes d’esti alcuentru organícenles en xunto el Centru Asturianu de Lieja y el de Bruseles nun entamu de colaboración que quier caltenese nel futuru.Entrambes ciudaes acueyen el númberu más grande d’emigrantes asturianos en Bélxica, un país qu’agospia presencia de trabayadores del nuestru país dende hai más d’un sieglu.

Los primeros asturianos llegaron a les zones industriales del país belga a finales del sieglu XIX empobinaos poles empreses d’esa nacionalidá que calteníen esplotaciones mineres y siderúrxiques n’Asturies. Bélxica diba ser darréu país d’acoyida de persiguíos políticos nes principales movilizaciones obreres de les primeres décades del sieglu XX, sobremanera con motivu de la fuelga de 1917 y de la revolución de 1934. L’esiliu provocáu pola guerra civil va llevar nuevos ensames d’asturianos a Bélxica y décades después, dende empiezos de los años 60, van ser emigrantes económicos los que sigan el camín percorríu enantes por otros asturianos. Los últimos llegaos al país belga aportaron apocayá como funcionarios y empleaos de les instituciones europees o procedentes de la nueva emigración.

La presencia asturiana en ciudaes como Bruseles, Lieja o Charlesroi ye bultable hasta’l puntu de que les autoridaes locales y rexonales d’eses zones tienen en cuenta la interlocución cola comunidá de los nuestros paisanos al mesmu nivel que con otres comunidaes procedentes del sur d’Europa, Turquía o el Magreb. Una amuesa de la importancia de la comunidá asturiana en Bélxica ye la presencia nel Ayuntamientu de Lieja d’una conceyal fía d’emigrantes: Julie Fernández, militante del Partíu Socialista Belga y actual presidenta del Centru Asturianu de la ciudá onde desenvuelve’l so cargu políticu.

El presidente del Principáu Vicente Álvarez Areces unvió una carta dirixida al presidente de l’asociación Asturianos en Madrid (ASMA) col oxetu de “clarificar el debate” entamáu alrodiu del polémicu informe Lorences sobre empleabilidá. Nella el cabezaleru del gobiernu asturianu afirma que l’estudiu encargáu a la Universidá tenta orientar a los estudiantes na escoyeta de les sos carreres y que les sos declaraciones manipuláronse. Pal presidente autonómicu les coses n’Asturies “tan cambiando pa bien y nun a ayuda a naide negar esa realidá”. El rector Juan Vázquez tamién unvió otra carta a ASMA polos mesmos motivos na que-yos espresa el so apoyu.

Les lletres del presidente Areces acompáñense d’un artículu firmáu por él mesmu na prensa el 20 de febreru y del testu de la presentación del estudiu del caderalgu Joaquín Lorences. Na so carta espresa’l so deséu de qu’estos escritos sirva pa “clarificar un debate qu’existe na sociedá asturiana dende fai, polo menos, cuatro años, onde se taben utilizando datos evidentemente erróneos del númberu de titulaos universitarios que se veíen obligaos a marchar a otros territorios”. Nesi sen pal presidente: “la cifra de 18.000 xóvenes universitarios que marchen d’Asturies tolos años nun respuende a nengún estudiu rigurosu y ye un datu que nun se puede aceptar indaque dellos lu manexen de forma reiterada”. El trabayu encargáu a la Universidá d’Uviéu sobre empleabilida vendría a asitiar les coses “con rigor y oxetividá”, según l’argumentación d’Älvarez Areces.

El presidente del Principáu defende les polítiques entamaes pol so gobiernu y diz qu’ésti “vien apoyando a la emigración con compromisos y recursos medrantes, como nunca se fizo n’Asturies”. Esi compromisu ye a xuiciu d’Areces “compatible col reconocimientu de que n’Asturies les coses tan cambiando pa bien y nun ayuda a naide negar la realidá”.

Peles mesmes feches -ente finales de febreru y empiezos de marzu- el rector de la Universidá d’Uviéu unvió otra carta a la directiva d’ASMA na que declara entender “el malestar que puedan haber xenerao dalgunes espresiones y reacciones, que como rector, nun comparto”. Juan Vázquez afirma que la Universidá ye “plenamente consciente” del problema que supón la marcha d’Asturies de titulaos y acaba manifestando qu’ente esi asuntu caltién un sentimientu “dual”, non namás como Rector “sinón además personalmente: la de desaprovechamientu n’Asturies d’unos valiosos recursos humanos, per un llau: y la del arguyu, tamién, de saber que per dayures s’alcuentren xóvenes titulaos universitarios asturianos mui cualificaos y con brillantes o prometedores trayectories profesionales”. Vázquez ufierta’l sofitu de la institución académica pa “estrechar vínculos” colos titulaos desplazaos fuera d’Asturies y pa ser receptora de les sos suxerencies ya iniciatives.

Más información

L’actuación de les bandes de gaites de Corvera y Gozón nel desfile del Día San Patricio nun pasó inadvertida pa la comunidá irlandesa de Nueva York. La preba d’ello foi l’anunciu del director de la Gran Parada John Dunleavy de la concesión del premiu a la meyor banda estranxera nel desfile del 18 de marzu pal conxuntu dirixíu por Bras Rodrigo. Dunleavy comunicó-yoslo personalmente a los gaiteros na cena organizada polos asturianos residentes en Nueva York na que’l másimu responsable de

la marcha de San Patricio formalizó énte’l director de l’Axencia d’Emigración del Principáu, Luis Miguel Fernández Romero, la invitación a qu’Asturies siga participando nos prósimos años n’atopada de la comunidá irlandesa-americana

La delegación del Principáu despidióse de la so estancia na ciudá de Nueva York con una cena organizada pola colonia asturiana na que la noticia de la concesión del premiu a los gaiteros asturianos recibióse como un regalu inesperáu. María Gelchie, presidenta del Centru Asturianu, manifestó que la participación de la nuestra comunidá na fiesta nacional de los irlandeses n’América “suponía un alcuentru únicu ente un y l’otru llau del Atlánticu y un sucesu difícil d’olvidar na historia de los emigrantes asturianos nos Estaos Uníos”.

Nel cursu de la cena Luis Miguel Fernández Romero, director de l’Axencia Asturiana de Cooperación, entregó a la presidenta del Centru Asturianu, al director de les bandes de gaites de Corvera y Gozón y al manayer del desfile niuyorquín de San Patricio, una obra de los artistes Anxel Nava y Pablo Armesto que representaba la xuntanza de los emigrantes d’un y otru llau del Atlánticu. Fernández Romero acoyó con agradu la invitación del responsable de la organización de la Gran Parada pa qu’Asturies siga participando en sucesives ediciones y aprovechó pa correspondelo con un brinde a que John Dunleavy visite Asturies pa entrega-yos personalmente el premiu a los gaiteros de Gozón y Corvera, y conocer más a fondo la cultura asturiana.