Emigración

La televisión pública uruguaya va emitir una serie de cuatro capítulos, d’una hora de duración caún, qu’amosarán el pasáu y el presente d’Asturies a los fíos de los emigrantes. Con esti proyectu Raúl Vallarino y la escritora uruguaya d’orixe asturianu, Mercedes Vigil, quieren enseñar la realidá asturiana a los descendientes de los emigrantes, que nun conocen lo que se ta faciendo y viviendo a esti llau del charcu.

Raúl Vallarino, escritor y presidente de l’Academia Uruguaya de les Lletres, ye’l promotor d’esti proyectu que se llama ‘Asturies, si la vieres colos mios güeyos’. Cuadonga, Uvieu, Xixón, Aviles y les Cuenques son dalgunes de les localizaciones d’esti documental nel que trata de reflexase l’Asturies cultural, histórica, industrial y política actual.

Personalidaes como Corín Tellado, Hevia o Vicente Díaz, que gocen de gran repercusión al otru llau del Atlánticu fueron entrevistaos pa esta serie, que cunta cola collaboración de la escritora uruguaya descendiente d’asturianos, Mercedes Vigil, probablemente la escritora más lleída del Uruguay.

El siguiente proyectu de la televisión uruguaya ye poner en marcha un espaciu selmanal con información y noticies sobre’l Principáu.

La Fundación Sánchez Albornoz y l’Ayuntamientu de Navia van inaugurar esti xueves el VIII Alcuentru d’americanistes, destináu a recuperar la memoria histórica d’aquellos vecinos que coles sos aportaciones en materia económica, social y cultural ayudaron al desarrollu de les sos localidades d’orixe. El ciclu, dixiríu por Rafael Anes y Servando Fernández, quier poner de relieve nesta convocatoria la importancia de los asturianos nel mundu de la emigración.

El ciclu de conferencies va dar comienzu’l xueves a les cuatro y media la tarde con un análisis per parte de Carmen Bermejo de la figura de ‘Manuel Valle, tabaqueru en Cuba’. El vienres, once conferencies van repasar la vida d’otres tantes personalidaes que destacaron na vida de los sos países d’acoyida, Cuba, l’Arxentina, Puerto Rico o Mexico. De manera que les xornaes percorrerán la trayectoria vital de personaxes como la saga de los Ochoa, Rafael Calzada, Jerónimo Perez Sáenz de la Maza, Fermín Arango, Juan Peláez, Ramón Santamaría, Luis Seoane, Isidro Mendez, Luis Arias y Celestino Álvarez.

El sábado, les charles van versar sobre Manuel Suárez, Enrique Iglesias y Sebastián de Amorrortu. L’encargáu de clausurar les xornaes va ser l’escritor Jose Ignacio Gracia Noriega, que disertará sobre la figura de Manuel Fernández Juncos.

Los Alcuentros d’americanistes n’Asturies comenzaron a cellebrase nel añu 1986 y dende entós vienen acocenyándose cada dos años nunos encuentros que busquen la profundización en diferentes temes que tienen que ver con hispanoamerica y que s’entienden desatendíos. El pasáu alcuentru tuvo dedicáu a los emigrantes y inversores d’America llatina.

Web de la Fundación Sánchez Albornoz

El conseyeru de Xusticia, Seguridá Pública y Relaciones Esteriores, Francisco Javier García Valledor, recibió na mañana d’ayeri a un grupu de cuarenta y ún emigrantes provenientes de diferentes llugares d’America Llatina, que llevaben decades ensin pisar Asturies y que tuvieron esa posibilidá a travies del programa ‘Operación Señaldá’, entamáu pol Gobiernu del Principáu.

Asturianos provenientes de l’Arxentina, Venezuela, Cuba, Brasil y Uruguay algamaron estos díes el suañu de tornar a la so tierra d’orixe gracies al programa ‘Operación Señaldá’ qu’entama’l Gobiernu del Principáu y que-yos va permitir pasar quince díes n’Asturies. Nel día d’ayeri, Francisco Javier García Valledor recibió a esti grupu d’emigrantes, colos que compartió les sos esperiencias vitales al otru llau del oceanu y la so emoción por volver.

Énte les amueses d’agradecimientu per parte de los emigrantes, el conseyeru de Xusticia esplicó-yos qu’‘esto nun tien que ser un actu d’agradecimientu sinón de xusticia, porque la sociedá asturiana debevos muncho’.

La estancia n’Asturies d’estos emigrantes afincaos en distintos llugares d’America va desendolcase ente los díes 14 y 28 de setiembre.

El Centru Asturianu de Málaga, tres la reapertura de la so se social depues de les obres d’acondicionamientu, celebra’l Día d’Asturies el prósimu día 7 d’ochobre, con una recepción oficial a la representación del Principáu y miembros de la Xunta Directiva per parte del alcalde Pedro Fernández Montes y miembros de la corporación. Dientro de los actos, el centru fadrá entrega de les sos distinciones, los Escudos d’Oru, a diferentes personalidaes que vinieron collaborando cola entidá.

Los actos entamarán a la una la tarde del día 7 d’ochobre cola recepción oficial a la representación del Principáu y miembros de la Xunta Directiva. El Principáu va tar representáu nel Día d’Asturies por Luis Miguel Fernández Romero, Director Xeneral de l’Axencia Asturiana d’Emigración y por Roberto Perez López, Vicepresidente Primeru del Conseyu de Comunidaes Asturianes y Alcalde de Belmonte de Miranda y los Centros Asturianos por Jose Luis Casas Villanueva, Presidente de la Federación Internacional de Centros Asturianos y pol Folclore Asturianu l’Agrupación Xixonesa “TREBEYU”.

A les siete y media la tarde, habrá misa n’honor a la Santina na Ilesia del Buen Consejo, amenizada pola Agrupación folclórica Asturiana “TREBEYU” de Xixón. A les 21 hores, na Casa Cultura de Torremolinos, fadráse la imposición de bandes a la Xanina 2005 y Xanines d’honor, pa depues dar llectura al pregón qu’esti añu correrá a cargu Jose Luis Merino Bobes, director de cine, asturianu y Escudu d’Oru de la entidá nel añu 1984.
Pola so especial collaboración cola entidá va imponese esta insignia de reconocimientu a Dª Encarnación Navarro Rico, Teniente Alcalde y Conceyala de Cultura, Educación y Fiestes del Ayuntamientu de Torremolinos y a D. Rafael Trigos Nogueira, Expresidente de la Federación Malagueña de Peñes, Centros Culturales y Cases Rexonales de Málaga. Al terminar, actuará la gaitera y profesora de la Escuela de Gaites, Carina Linares, que va interpretar l’Himnu d’Andalucía y el d’Asturies. Tres d’ella actuará otra vuelta l’Agrupación Folclórica de Xixón“TREBEYU” y Noelia Carrio, socia del Centru (Flauta Travesera).
El repartu del bollu preñáu a los socios será al dia siguiente, el sábado día 8 d’ochobre.

La colectividá d’emigrantes asturianos residentes na ciudá de Buenos Aires, entama mañana varios actos en diferentes cases y centros de la ciudá con motivu de la conmemoración de la xesta de Cuadonga. Conferencies, fiestes y conciertos llenen los programes d’actividaes del fin de selmana na capital arxentina.

La Casa de Cantabria en Buenos Aires entama mañana, a les cinco la tarde, una conferencia illustrada con diapositives sobre’l “Panorama Xeneral del Arte n’España”, a cargu del profesor Iván Kresteff, nun actu que va desendolcase na Se Social de Jorge Newbery 2818.

El Centru de Cangas del Narcea, pela so parte, celebra la tradicional Fiesta’l Ramu a les ocho la tarde na so se social de Beruti 464. Nos puestos colocaos espresamente pa esta fiesta, habrá platos típicos asturianos, como frixuelos, empanaes, xamón, chorizu, quesu y vino. La folixa va tar amenizada pola Orquesta “Sabor Calipso”, y va acctuar el conxuntu “Pelayo” del Centru Asturianu de Buenos Aires, baxo la dirección de Nieves Pañeda, que tendrá al so cargu’l Cantar del Ramu, na procesión con tolos asistentes.

El Centru Asturianu de Buenos Aires, nel marcu de conmemoración del aniversariu de la Xesta de Cuadonga ofrez un conciertu de la Banda Sinfónica de la ciudá, qu’entamará a les 20,30 hores na so se social de Solìs 475. Esti mesmu centru, va cellebrar pal prósimu domingo, día 18, a les once y media la mañana, una misa en memoria de tolos socios fallecíos, nel Panteón Social del cimenteriu de la Chacarita.

Fardaxu en conciertu:

Depues de la so primer xira per España, el grupu folk “Fardaxu” presenta’l so espectáculu en La Trastienda Club, a partir de les 21,30 hores, na Balcarce 460.
Los díes 30 y 31 de xunetu d’esti añu, el grupu “Fardaxu” presentóse n’España como teloneru de Carlos Núñez, cerrando’l Festival Intercelticu d’Aviles (Asturies). A la edición de los sos dos discos n’España, súmase una xira de 23 conciertos el prósimu añu y la grabación del so tercer CD. Esta banda basa’l so repertoriu en temes tanto tradicionales como d’autores contemporáneos. Musicalmente, Fardaxu tiene como puntu de referencia la corriente desarrollada pol gaiteru asturianu Jose Ángel Hevia.

En mayu de 2002 esplubizaron el so primer discu, llamáu como’l grupu, “Fardaxu”, qu’escosó tres ediciones. En 2003 editaron el segundu llamáu “Revolución Celta”, qu’agotó cuatro ediciones, participando como invitaos especiales, dende Asturias: Flavio Benito en gaita y Daniel García de la Cuesta en bandurria; y en l’Arxentina: Arturo Schneider, en flauta travesera y el grupu de cantareires de la Fundación Xeito Novo de Cultura Gallega.

La delegación del gobiernu del Principáu que visita Arxentina por mor de los actos institucionales de celebración del Día d’Asturies nel esterior sigue’l so viaxe peles sociedaes d’emigrantes repartíes pela xeografía d’esi país. Na so visita a la municipalidá bonairense de La Plata, el conseyeru de Xusticia y Esteriores, Francisco Javier García Valledor, recibió’l nomamientu de Visitante Ilustre de la Ciudá.

El conseyeru desplazóse a la Ciudá de La Plata, capital de la provincia de Bonos Aires. Na Intendencia de La Plata, el Conseyeru recibió’l títulu de Visitante Ilustre de la Ciudá por mor del so trabayu en favor de los emigrantes, un nomamientu que’l representante del Principáu acoyó –según palabras del propiu Valledor- “en nome de tolos ciudadanos de orixen asturianu”.

El conseyeru manifestó asinamesmo el “fondu y ampliu agradecimientu del Gobiernu asturianu y de tolos asturianos a la República Arxentina por recibir y acoyer a los emigrantes que llegaron a esti país nel pasáu,a los qu’emigraron a l’Arxentina en tiempos al fenómenu inversu que se produxo nestos últimos años, cuando arxentinos y, quiciabes, descendientes de españoles emigraron a España y a Asturies”.Valledor espresó el deséu del Gobiernu asturianu y el suyu propiu de qu’estos inmigrantes seyan trataos y recibíos “de la misma manera que lo fueron los asturianos n’Arxentina”.

Nel actu, tuvieron presentes, más d’una veintena de personalidaes representando a les instituciones locales de la municipalidá de La Plata, a la embaxada y consuláu d’España y a los Centros Asturianos de l’Arxentina.

Darréu, el conseyeru y la comitiva que lu acompañaba, empobinaron al Centru Asturianu de La Plata, onde los recibió’l l Presidente de la entidá, Celestino Barrios González y otros miembros de la directiva. Nel Centru, Valledor perecorrió les instalaciones; más tarde compartió una xinta criolla, tertulia y regalos institucionales colos emigrantes asturianos.

La colonia asturiana en Sao Paulo va xuntase’l prósimu 25 de setiembre pa siguir la preba del Gran Premiu de Brasil na que Fernando Alonso puede convertise dafechu en Campeón del Mundu de Fórmula 1. Una fabada y música del país a cargu del gaiteru Bras Rodrigo y la tamboritera Lorena Gómez van acompañar a los emigrantes nesta xuntanza n’honor del pilotu uvieín.

A la folixa de los asturianos residentes en Sao Paulo van asistir el nuevu Cónsul Xeneral de España en São Paulo, Fernando Martínez Westerhausen; la xefa de la Oficina Llaboral del Consuláu Xeneral de España en São Paulo, Ana María Serrano y el director da Axencia Asturiana d’Emigración, Luis Miguel Fernández Romero.

Fernando Alonso puede converise en campeón del mundu de Fórmula 1 el prósimu 25 de setiembre si llogra facer podiu na preba del Gran Premiu de Brasil.

El Conseyeru de Xusticia Seguridá Pública y Relaciones Esteriores del Principáu, Francisco Javier García Valledor tornó otra vuelta a afitase nel so compromisu colos emigrantes hasta’l puntu de dicir nuna rueda de prensa al meudía d’esti llunes na Arxentina que “los presupuestos de la emigración son intocables” como rempuesta a una entruga de los periodistes alrodiu de como van afectar los recortes de los fondos comunitarios a los que se destinen a la emigración.

El Conseyeru fizo estes declaraciones nuna rueda de prensa na que tamién afitó’l desendolcu del Plan d’Emigración recién puestu en marcha pela so Conseyería y calificó de Día hestóricu’l d’esti llunes en Buenos Aires pola xunta que desendolcare la FICA y na que elli participó. La xunta de la FICA tuvo presidida por José Luis Casas, Presidente de la Federación Internacional de Centros Asturianos, y entamó a les 10:30 hores na Sé social del Centru Asturianu de Buenos Aires, con representantes de los demás Centros Asturianos de l’Arxentina, pa tratar asuntos d’interés de la FICA y sobre la prósima reforma de la Llei d’Asturianía. Nesa xunta recibieron amás los reconocimientos d’Asturianía los Centros Asturianos de La Plata y Mendoza ente otros.

El Conseyeru de Xusticia Seguridá Pública y Relaciones Esteriores del Principáu, Francisco Javier García Valledorsu, amuesó na mañana del llunes el so compromisu pa colos emigrantes asturianos na Arxentina y prometió un «esfuerzu mui importante» coles ayudes que se vienen ufiertando a la emigración naquel país. Valledor dexó tamién afitao que “se ta faciendo un esfuerzu mui importante dende’l punto de vista social y vamos seguir faciéndolu”. Valledor tamién asoleyó na rueda de prensa mentada que’l Gobiernu asturiano tien dedicao al Plan d’Emigración 2004-2007 quince millones d’euros, lo que supón doblar la dotación destinada a los paisanos y paisanes d’esta comunidá que viven nel esternu, con respeutu al períodu anterior.

Valledor tamién participó esti llunes nun seminariu que se desendolcó pela tarde nel Centru Asturianu de Buenos Aires alrodiu de la relación ente “Comunicación y Emigración” nel que participó el grupu Vezos d’Uviéu y nel que tamién intervinieron los periodistes Marcos Foglia, Editor Xefe de Clarin Dixital, Cristina Civale, escritora esperta en temes d’emigración, y Próspero Morán, Profesor de la Universidá Carlos III de Madrid.

El Conseyeru de Xusticia, qu’aportó’l vienres a l’Arxentina y participó’l sábadu en dellos actos que cincaben a la reinauguración del Centru Asturianu de Mendoza, tien previsto treslladase esti día a la ciudá de La Plata, 50 kilómetros al sur de Buenos Aires, onde va ser nomáu “Huesped de Honor”, entrevistándose tamién col secretariu xeneral de la Presidencia arxentina, Oscar Parrilli.

El Centru Asturianu de Buenos Aires celebró na tarde d’ayeri un seminariu sobre ‘Comunicación y emigración’, presidíu pol Conseyeru de Xusticia, Seguridá Pública y Relaciones Esteriores, Francisco Javier García Valledor, que calificó la comunicación como “la entenra asignatura pendiente del nuestru país colos sos emigrantes”. L’actu contó cola participación de los miembros del grupu ‘Vezos Astures’, asina como de dalgunos periodistes ente los que taba Marcos Flogia, Cristina Civale y Próspero Morán.

Nel discursu lleíu por Valledor al empiezu del Seminariu, el conseyeru valoró la comunicación como l’instrumentu necesariu pa “facilitar la so partipación na vida política d’Asturies, nel progresu económicu” mesmo del Principáu como de les colectividaes del esterior en situaciones de crisis o d’escepción, como les vivíes pola comunidá arxentina nos últimos años.

Valledor valoró como “desiguales” los resultaos algamaos a lo llargo del tiempu polos diferentes medios de comunicación de mases al tratar de tender los llazos cola emigración, por eso resaltó l’enfotu puestu pol actual Gobiernu d’Asturies, y n’especial, pola Conseyería qu’él dirixe, en situar como una de les sos prioridaes esa comunicación con tolos asturianos y asturianes del mundu. Nesi sen, Valledor afirmó que “la nuestra obligación ye mantener a entrambos mundos comunicaos permanentemente”, comprometióse a siguir esforzándose porque siga siendo asina. El conseyeru invitó a tolos presentes a visitar y facer usu del portal www.emigrastur.com, que la conseyería dispón a tal fin.

Les palabres del conseyeru dieron pasu al alderique nel que participaron los miembros del grupu ‘Vezos Astures’, asina como los periodistes Marcos Foglia, Editor Xefe de Clarin Dixital, Cristina Civale, escritora esperta en temes d’emigración, y Próspero Morán, Profesor de la Universidá Carlos III de Madrid.

“Vosotros sois los nuesos meyores embaxadores, meyor diría yo, que Fernando Alonso”. Con estes sentíes pallabres finaba’l so discursu institucional el Conseyeru Francisco Javier García Valledor esti domingu na quinta que’l Centru Asturianu tien en Buenos Aires. Un discursu enmarcáu nel Día d’Asturies nel esternu que por primer vegada se desendolcaba na Arxentina, después de que la primer edición tuviera llugar l’añu pasáu en Madrí.

Francisco Javier García Valledor aportaba a Buenos Aires depués de pasar por Mendoza y visitar a los asturianos residentes nesa importante ciudá arxentina. Y facíalo pa asoleyar la importancia que la so Conseyería de Xusticia y Relaciones Esteriores y el gobiernu mesmu al que pertenez-y dan a los emigrantes y, de manera especial, a los emigrantes n’América.

El Conseyeru desplicó que l’añu pasáu cellebrárase en Madrí esti Día d’Asturies especialmente empobináu a la emigración non sólo porque tea na capitál del estáu Español el mayor númberu d’emigrantes, sinon tamién como homenaxe a los asturianos y españoles que padecieron el 11-M. Y esta vegada venía a desendolcase esti Día tan especial nel llugar del esternu onde más asturianos hai y tamién como un homenaxe mui especial a un asturianu tamién mui especial que nos dexó esti añu y que nun yera otru que l’artífice del grupu folklóricu del centru de Buenos Aires, Pelayo, y de tola activida alrodiu de la cultura tradicional que se fizo na capital Arxentina nes caberes décades: Manolo del Campo.

El Conseyeru, Francisco Javier García Valledor, fizo un repasu a la importancia del trabayu de Manolo del Campo y fizo alcordanza del so trabayu favoratible pa col folklor y la llingua asturiana nel Centru Asturianu “que tan intensamente trabayó pa llorgrar esta cellebración de güei”. Valledor faló de la “deuda hestórica que se tien cola emigración” y dexó afitao que yera “un elementu de xusticia alcontrase equí con vosotros y vosotres”, imaxen nidia de lo que ye la emigración asturiana nel mundiu.

L’actu que se desendolcó na quinta que tien en Vicente Flórez el Centru Asturianu entamó con partíes de Bolos y siguió tres de la Misa tradicional coles actuaciones del grupu Folklóricu Pelayo y el grupu Vezos, que viniere dende Asturies pa participar nesti día y pa siguir depués dellos díes actuando per estremaos llugares de l’Arxentina. Tres de les actuaciones folklóriques, nun día enforma soleyeru, pero abondo fríu, desendolcose la tradicional fabada na que sd’abellugó l’actu institucional”.

Xunta’l Conseyeru que mañana sigue en Buenos Aires y el martes viaxa a la ciudá de La Plata, alcontrábense presidiendo esti actu’l presidente del Centru Asturianu, José Antonio Nespral, el Consul Xeneral d’España en Buenos Aires, Manuel Fairén, y el Direutor de la Axencia Asturiana d’Emigración, Luis Miguel Fernandez Romero, amás de delles otres aurtoridaes asturianes, como l’alcalde de Belmonte en representación del Conseyu de Comunidaes, y representantes de tolos Centros Asturianos de l’Arxentina.